Kitail kak ale mahkpen dipatail kan ihte pwehki pweinen pweipwei sapahlo me Sises ketin pwainkihda sapwellime nta. (Ep. 1:7) Ahpw, Paipel mahsanih: “Koht ketin kanengamah oh ketin mahkohng dihp kan me aramas akan wiadahr mahso,” me iei, mwohn Sises eh ketikihda pweinen pweipwei sapahlo. (Rom 3:25) Ia duwen Siohwa eh kak ketin mahkohng dipen aramas mwohn pweinen pweipwei sapahlo wiawihda oh wiahte Koht en pwung pahrek?

Siohwa ketin inoukihda me mie ‘kadaudok’ men me pahn doarehla irail kan me kin pwoson Ih oh sapwellime inou kan. Ni eh ketin wiahda inou wet, e mwomwen me pweinen pweipwei sapahlo pweipweilahr. (Sen. 3:15; 22:18) Koht uhdahn ketin likih me sapwellime Ohlo pahn kihda pweinen pweipwei sapahlo ni ahnsou me Koht ketin kupwurki en wia. (Kal. 4:4; Ipru 10:​7-10) Erein Sises eh mi nin sampah, Siohwa ketikihong manaman en mahkohng dipen aramas akan mwohn pweinen pweipwei sapahlo wiawihda. Sises kak ketin mahkohng dipen irail kan me kin pwoson pwehki e mwahngih me meirong me e pahn ketikihda pahn pwainla diparail kan.—Mad. 9:​2-6.