NAN pahr 1910 samwa ei pahpa nohno keseula Canada sang Tbilisi, Georgia, oh kousoanla nan kisin ihmw kis karanih Pelly, Saskatchewan, ni palikapi en Canada. I ipwidi nan pahr 1928 oh ngehi me keieu tikitik nanpwungen seri wenemen. Pahpa mehla sounpwong weneu mwohn ei ipwidi, oh Nohno mehla ni ei wiahte kisin seri pwelel. Riei serepein me keieu laudo, Lucy, mehla mwurin mwo, ni eh sounpar 17. Eri, rien ei nohno ohlo, Nick, apwalihada ngehi oh riei ko.

Ehu rahn ni ei wia kisin seri, ei peneineio kilang ei wawaik ikin oahs men. Re masakada pwe oahso de kikimiehdi kahrehda re wering ie en uhdi, ahpw I sohte mwekid. I sohte sohpeiong irail, oh sohte rong arail weriwer. Mwahute pwe sohte mehkot keper wiawihong ie, ahpw ih rahno me ei peneineio esehda me I salengepon.

Emen kompoakepaht kihong kiht kaweid me I en iang seri salengepon teikan sukuhl, eri rien ei nohno, Nick, kihong ie nan sukuhl ehu ong me salengepon kan me mi nan Saskatoon, Saskatchewan. I keseula wasa ieu me awa kei dohsang ei peneineio, oh pwehki I sounparte limau, I uhdahn kin masepwehk. Kedekedeo, I esehla lokaiahki pehi kat oh I kin perenki mwadong ong seri teikan.

Nan pahr 1939, riei serepein laudo, Marion, pwoudikihda Bill Danylchuck, oh ira uhd apwalih ngehi oh riei serepeino Frances. Nanpwungen kiht, ira me tepin tuhwong Sounkadehdehn Siohwa kan. Erein ahnsoun kommoal en sukuhl, ira kin ehukihong ie duwen dahme ira sukusukuhlki sang Paipel ni uwen me ira kak. E sohte mengei en koasoiong ira pwehki ira sehse lokaiahki pehra ko. Ahpw ira kilang me I uhdahn poakohng mehkan me pid padahk mehlel. I  wehwehki me dahme ira wiewia oh dahme Paipel mahsanih kin dokpene, eri I kin iang ira ni ara kin kalohk. Sohte pwand, I men papidaisla, oh nan September 5, 1941, Bill papidaisiehla nan dengk mete ieu me audaudkihda pihl sang pwarer ehu. Pihlo inenen kopou!

Nan pahr 1946 ni ei pwurala imweio ni ahnsoun kommoal en sukuhl, se iang towehda mihting tohrohr ehu nan Cleveland, Ohio, Wehin Amerika. Keieu en rahn en mihting tohrohro, riei serepein ko kin wilian emenemen ntingihedi dahme wiewiawi pwe ien kak idawehn prokramo. Ahpw keriau en rahno, I perenkihda ei esehda me mie pwihn en me salengepon kan oh mie neirail sounkawehwe me kin lokaiahki peh. I perenki me I kakehr wehwehki prokramo, oh e uhdahn kaselel ei kakehr wehwehki ni sansal padahk mehlel en Paipel!

Ni ahnsowo, Mahwen Keriau en Sampah ahpwtehn uhdi oh madamadau en uhki wehi kan inenen kehlail. Ni ei kohkohsang mihting tohrohro I koasoanehdi teng en uhki ei pwoson ni ei wasahn sukuhlo. Eri I uhdihsang ei kin iang kasarawi pilaik oh koulki koulen wehi. I pil uhdihsang iang kasarawi rahn kan oh towehda arail sarawio. Tohndoadoahk en sukuhlo sohte perenki ei wia met oh song en kamasak ie oh nda soahng likamw kan pwe ien wekidala ei madamadau. Iengei tohnsukuhl ko pwuriamweikihla ei wia mepwukat koaros, ahpw met kahrehiong ie en isaneki kalohk ong irail. Iengei tohnsukuhl kan Larry Androsoff, Norman Dittrick, oh Emil Schneider kedekedeo pwungkihla padahk mehlel, oh irail kin papah Siohwa ni loalopwoat lao lel rahnwet.

Ni ei kin mwemweitla ni kahnimw teikan, I kin ahnsou koaros koasoanehdi ien kalohk ong me salengepon kan. Karasepe, nan Montreal ni wasa ehu me me salengepon kan kin kohpene, I kalohk ong Eddie Tager, mwahnakapw men me kin iang pwihn mwersuwed ehu. Lao e mehla nan pahr me nekiero, e kin iang mwomwohdiso ehu me kin lokaiahki pehrail nan Laval, Quebec. I pil tuhwong mwahnakapw men me adaneki Juan Ardanez me kin ngoangki roporop duwehte mehn Peria kan pwehn kadehdehda mehlelpen dahme Paipel padahngki. (Wiewia 17:10, 11) E pil iangala padahk mehlel oh kin papah ni lelepek nin duwen elder men nan Ottawa, Ontario, lao e mehla.

Nan pahr 1950, I keseula Vancouver. Mendahki I kin perenki kalohk ong me salengepon kan, I sohte pahn manokehla dahme wiawihong ie ni ei kalohk nanial ong lih emen me sohte salengepon me adaneki Chris Spicer. E ale makasihno me I kihong oh men ien tuhwong eh pwoudo, Gary. Eri I mwemweitla ni imwarao, oh se koasoipene ahnsou werei ni at  ntingpene. Ihte ahnsowo me se tuhpene oh sounpar kei mwuri, I pwuriamweikihla ara kilangada ie nanpwungen pokon ehu ni mihting tohrohr ehu nan Toronto, Ontario. Gary papidaisla rahno. Dahme wiawihong ieo katamankihong ie kesempwalpen en pousehlahte kalokalohk pwehki kitail sehse ia wasa de iahd me padahk mehlel pahn kekeirda ie.

Mwuhr, I pwurehng keseula Saskatoon. Wasao I tuhwong nohno men me idek rehi ma I kak onop Paipel rehn nah mpwer serepein riemeno me salengepon, Jean oh Joan Rothenberger, me wia tohnsukuhl kei ni sukuhlohte me I iang mahso. Sohte pwand, serepein riemeno tepida ehukihong iangara tohnsukuhl ko dahme ira sukusukuhlki. Kedekedeo, meh limen nanpwungen tohnsukuhl ko wiahla Sounkadehdehn Siohwa kei. Emen iei Eunice Colin. I tepin tuhwong Eunice ni imwen sukuhlo ni kaimwiseklahn pahr en ei sukuhl. Ni ahnsowo, e kihong ie kisin kirahka kis oh idek ma se kak kompoakepahnki emenemen. E uhd wiahla emen me uhdahn kesempwal nan ei mour, e wiahla ei pwoud!

Ni ahnsou me ahn Eunice nohno diarada me e kin onopki Paipel, e ndaiong principal en sukuhlo en song en kauhdi Eunice. Principalo pil kihsang pwuhk kan me Eunice kin onopki. Ahpw, Eunice koasoanehdi teng en doulahte mwohneki Siohwa nan eh mour. Ni eh men papidaisla, eh pahpa nohno ndaiong ih, “Ma ke wiahla emen Sounkadehdehn Siohwa, ke pahn anahne kohkohsang imwate!” Ni eh sounpar 17, Eunice kohkohsang imweo, oh peneinei ehu me wia Sounkadehde kei uhd apwalih ih. E pousehlahte onop oh mwuhr papidaisla. Ni ahnsou me se pwopwoudida nan pahr 1960, eh pahpa nohno sohte kohdo ni at kapwopwoudo. Ahpw, sounpar kei mwuri, ira tepida waunekin kiht pwehki dahme se kin kamehlele oh mwomwen at apwalihada nait seri ko.

Nin duwen pahpa nohno salengepon kei, se apwalihada nait pwutak isimeno me sohte salengepon. Met apwal, ahpw se tehk mwahu me ren esehla lokaiahki pehrail ko pwe sen kak kapehse mwahu oh pil padahkihong irail duwen padahk mehlel. Riat Kristian kan nan mwomwohdiso uhdahn kin sawas laud. Karasepe, emen pahpa ntingdo me emen nait pwutak ko kin nda lokaia suwed nan Wasahn Kaudok. Se mwadangete apwalihala irairo ahnsowo. Nait pwutak pahmeno, James, Jerry, Nicholas, oh Steven, oh pil arail pwoud oh peneinei, kin papah Siohwa ni lelepek. Nait pwutak pahmeno koaros kin papah nin duwen elder kei. Patehng met, Nicholas oh eh pwoudo, Deborah, kin sewese pwihn en sounkawehwe kan me kin lokaiahki pehrail nan ohpis en Sounkadehdehn Siohwa kan nan Britain, oh Steven oh eh pwoudo, Shannan, kin pil wia soahngohte nan ohpis en Sounkadehde kan nan Wehin Amerika.

Sounpwong ehu mwohn katamanpen pahr 40 me se pwopwoudki, Eunice mehla pwehki eh soumwahu laud en kanser. E uhdahn eimah erein ahnsou apwalo. Eh koapworopwor ong kaiasada kin kakehlailih ih. I kasikasik ahnsowo me I pahn pwurehng kilang ih.

Nan February en pahr 2012, I pwupwudi oh tihn pwoaneie timpeseng, oh e sansal me I pahn anahne sawas. Eri I keseula rehn emen nei pwutak ko oh eh pwoudo. Met se iang kisehn mwomwohdiso me kin lokaiahki pehrail nan Calgary, wasa me I pousehlahte papah nin duwen elder men. Ni mehlel, ih wasaht me I tepin iang mwomwohdiso ehu me kin lokaiahki pehrail. Nna song medewehla! I kin iang mwomwohdisohn lokaiahn wai sangete pahr 1946, ia duwen ei kak pweida nan ei nanpwungmwahu rehn Siohwa? Siohwa ketin kapwaiada sapwellime inowo en apwalih seri sepwoupwou kan. (Mel. 10:14) I kalahnganki irail koaros me kin men ntingihedi ong ie dahme wiewiawi, sukuhlki lokaiahki pehrail, oh sewese kawehwe ong ie soahng kan ni uwen me re kak.

Ni mehlel, mie ahnsou kan me I kin pwangada oh men uhdi pwehki I sohte kak wehwehki dahme aramas akan kin ndinda de mwomwen me sohte me wehwehki anahn en me salengepon kan. Ahpw, erein ahnsou ko, I kin medewe duwen dahme Piter patohwanohng Sises: “Maing, ihs me se pahn patohla reh? Sapwellimomwi mahsen kan, iei mahsen en mour soutuk.” (Sohn 6:66-68) Duwehte riei Kristian me salengepon kan en ei diho, I sukuhlki en kanengamah. I sukuhlki en awih Siohwa oh sapwellime pwihn, oh I uhdahn paiekihda ei wia met! Met I kin paieki sawaspen Paipel kan ni pein ei lokaia, oh I kak paiekihda ei miniminiong meteikan ni mihting kan oh mihting tohrohr kan me kin lokaiahki pehrail (ASL). I uhdahn ahneki mour nsenamwahu oh pai ni ei papah Siohwa, atail Koht lapalap.