1, 2. (a) Soangen kahpwal dah kan me seri tohto me keseula ehu sahpw tohrohr kin lelohng? (b) Peidek dah kan me iren onop wet pahn koasoia?

 JOSHUA nda: “Sang ei tikitik, I kin lokaiahki lokaiahn ei pahpa oh nohno nan imwato oh nan mwomwohdiso. Ahpw mwurin ei tepida sukuhl, I tepida men doadoahngki lokaiahn wasao. Nan sounpar keite, lokaiahn wasaote me I kin doadoahngki. I sohte kak wehwehki at mihting ko, oh I sohte medewe me I iang kisehn soangen mour me ei pahpa nohno tikida loale.” Me tohto kin lelohng dahme Joshua lelohng.

² Rahnwet, aramas tohtohsang riesapw pahdep (240,000,000) sohte kin kousoan nan sahpw me re ipwidi ie. Ma kowe pahpa de nohno men me keseusang uhdahn sapwomwo, ia duwen omw kak sewese noumw seri kan ni ahl me keieu mwahu en esehla poakohng Siohwa oh “momourki mour mehlel”? (3 Sohn 4) Oh ia duwen meteikan ar kak sawas?

3, 4. (a) Ia duwen pahpa nohno kan ar kak wia mehn kahlemeng mwahu ong neirail seri kan? (b) Dahme pahpa nohno kan en dehr kasik sang neirail seri kan?

³ Pahpa nohno kan, amwail mehn kahlemeng uhdahn kesempwal ma  kumwail men noumwail seri kan en ahneki nanpwungmwahu rehn Siohwa oh mour kohkohlahte. Ni noumwail seri kan ar kilang amwail “pousehlahte rapahki mahs wehio,” re pahn sukuhlki en koapworopworki Siohwa ong arail anahn en ehuehu rahn. (Mad. 6:33, 34) Mwohneki amwail kin papah Siohwa ahpw dehr raparapahki en kepwehpwehla. Mourki mour ehu me sohte kin men ahneki soahng tohto oh song en dehr wiahda pweipwand kan. Rapahki pai en nanleng, me iei kupwuramwahu en Siohwa, a kaidehn en rapahki kumwail en naineki mwohni tohto de “ale kaping sang rehn aramas.”​—Wadek Mark 10:21, 22; Sohn 12:43.

⁴ Dehr nohn kedirepwla me kahrehda en sohla amwail ahnsou ong noumwail seri kan. Kasalehiong irail me kumwail kin pohlkihda arail pilada en mwohneki mahs Siohwa a kaidehn en raparapahki en ndandla de naineki mwohni tohto ong pein irail de ong kumwail. Soikala madamadau sapwung me dene seri kan me pahn apwalihki arail pahpa nohno mour me uhdahn nsenamwahu. Tamataman, “kaidehk seri kan me pahn nahkohng ar pahpa kan, pwe pahpa kan ong nair seri kan.”​—2 Kor. 12:14.

5. Dahme kahrehda pahpa nohno kan anahne en kin katamankihong neirail seri kan duwen Siohwa?

⁵ Nin duwen me kokohpdahr, aramas akan “sang ni lokaia koaros en wehi kan” kin pokondohng sapwellimen Siohwa pwihn. (Sek. 8:23, NW) Ahpw ma noumw seri kan sohte wehwehki lokaia me ke kin lokaiahki, e kak apwal ong uhk en padahkihong irail duwen padahk mehlel. Irail iei noumw tohnsukuhl en Paipel me keieu kesempwal, oh arail en esehla Siohwa kin pidada arail mour soutuk. (Sohn 17:3) Pwe noumw seri ko en sukuhlki sapwellimen Siohwa padahk kan, ke anahne en kin kalapw “kataman kin irail.”​—Wadek Deuderonomi 6:6, 7.

6. Ia duwen noumw seri kan ar paiekihda arail esehla lokaia me ke kin lokaiahki? (Menlau kilang tepin kilel.)

⁶ Noumw seri kan pahn uhdahn esehla lokaiahn wasao sang nan sukuhl de sang meteikan. Ahpw re esehla omw lokaia ni omw kin kalapw lokaiaiong irail. Ni noumw seri ko ar kin lokaiahki omw lokaia, e pahn mengei ong irail en koasoiong oh ndaiong uhk arail pepehm kan. Ahpw pil mie kamwahu teikan. Ni noumw seri ko ar lokaiahki lokaia tohtohsang ehu, e pahn kalaudehla arail koahiek en madamadau oh sewese irail en wehwehki madamadau en meteikan. E pahn pil sewese irail en isaneki koahiek wet en kalaudehla arail doadoahk en kalohk. Carolina, me eh pahpa nohno keseusang sapwarailo, nda: “Ei iang mwomwohdiso ehu me kin doadoahngki ehu lokaia tohrohr uhdahn kaperen. E pil kaperen en sewese wasa kan me anahn laud mie ong sounkalohk kan.”

7. Dahme ke kak wia ma lokaia wia mehkot apwal nan amwail peneinei?

⁷ Ahpw ni seri kan ar sukuhlki tiahk oh lokaiahn wasa me arail pahpa nohno keseudo ie, ekei irail kak sohla ahneki ineng oh pil koahiek en lokaiahki lokaia me arail pahpa nohno uhdahn kin doadoahngki. Pahpa nohno kan, ma noumw seri ko ahneki kahpwal wet, ke kak ekis sukuhlki lokaiahn wasao? E pahn mengei en apwalihada noumw seri ko nin duwen Kristian kei ma ke wehwehki dahme re kin ndinda, soangen mehn kamweit me re perenki, soahng kan nan sukuhl me re kin wia oh ma ke kak koasoiong arail sounpadahk ko. E mehlel me ke anahne ahnsou laud, nanti laud, oh aktikitik pwehn sukuhlki ehu lokaia tohrohr. Ahpw met uhdahn katapan. Karasepe, ma noumw serio salengeponla, ke sou pahn song en sukuhlki lokaiahki pehmw kan pwe ken kak koasoiong ih? Lokaia ehu me seri men keieu ese lokaiahki oh wehwehki iei me kitail en nsenohki esehla, kaidehn? *

8. Ia duwen omw kak sewese noumw serio mehnda ma ke sehse lokaiahki lokaiahn wasa me ke keseudo ie?

 ⁸ Ekei pahpa nohno kan me keseudo nan sahpw kapw ehu kak apwalki esehla lokaiao me neirail seri ko kin lokaiahki. Met kak kahrehda en apwal ong pahpa nohno kan en sewese neirail seri kan en wehwehki “Pwuhk Sarawi.” (2 Tim. 3:15) Ma ih mwomwen omw irairo met, ke kak sewesehte noumw seri ko en esehla oh poakohng Siohwa. Elder men me adaneki Shan koasoia: “Ei nohno, me sohte eh pwoud, sohte nohn wehwehki lokaiao me se keieu wehwehki, oh ngehi oh riei serepein ko sohte nohn ese lokaiahki eh lokaiao. Ahpw ni at kin kilang ih onohnop, kapakap, oh wia uwen eh kak en wia at kaudok en peneinei wihk koaros, se wehwehki me e uhdahn kesempwal sen esehla Siohwa.”

9. Ia duwen pahpa nohno kan ar kak sewese seri kan me ele anahne onopki Paipel oh sawaspen Paipel kan ni lokaia riau?

⁹ Ekei seri ele anahne sukuhlki duwen Siohwa ni lokaia riau. Dahme kahrehda? Pwehki re kin doadoahngki ehu lokaia nan sukuhl oh ehu ni imwarailo. Pwehki kahrepe wet, ekei pahpa nohno kin doadoahngki sawaspen Paipel kan, mehkan me rekordi, oh pil kasdo kan ni lokaia riau pwukat. E sansal me pahpa nohno kan me keseula nan ehu sahpw anahne nanti laud oh pil doadoahngki ahnsou laud pwehn sewese neirail seri kan en karanihala Siohwa.

10. (a) Ihs me pahn pilada mehnia lokaia me mwomwohdiso kin doadoahngki me eh peneineio en iang? (b) Dahme e anahne medewe mahs mwohn eh wiahda pilipilo?

¹⁰ Ni “mehn liki kan” ar keseula dohsang Sounkadehde kan me kin lokaiahki arail lokaia, irail anahne iang mwomwohdiso ehu me doadoahngki lokaiahn wasa me re keseula ie. (Mel. 146:9) Ahpw ma mie mwomwohdiso ehu me kin doadoahngki arail lokaia me mi karanih irail, tapwin peneineio anahne pilada mehnia lokaia me mwomwohdiso kin doadoahngki me pahn keieu mwahu ong eh peneineio. Mwohn eh wiahda eh pilipilo, e anahne medemedewe mwahu oh kapakapki duwen met. E pil anahne ndaiong eh pwoudo oh nah seri ko. (1 Kor. 11:3) Dahme e pahn anahne medewe? Kaweid en Paipel dah kan me kak sewese ih en wiahda pilipilo?

11, 12. (a) Ia duwen soangen lokaia ehu eh kamwakid uwen laud en dahme seri men kak paiekihda sang mihting? (b) Dahme kahrehda ekei seri sohte men esehla lokaia me arail pahpa nohno kin doadoahngki?

¹¹ Pahpa nohno kan anahne medewe dahme neirail seri kan uhdahn anahne. Pwehn wehwehki mwahu padahk mehlel en Paipel, seri kan anahne laudsang awa keite en sukuhlki Paipel ehuehu wihk nan mihting kan. Ahpw medewehla met: Ni mihting kan me doadoahngki lokaia me seri ko keieu wehwehki, seri ko ele kak paiekihda laud sang ni arail iang mi mwo, laudsang dahme arail pahpa nohno kin medewe. Ahpw met sohte kak wiawi ma seri ko sohte uhdahn wehwehki lokaiao. (Wadek 1 Korint 14:9, 11.) Oh lokaiao me serio tikida doadoahngki sohte pahn wia lokaiaohte me pahn kamwakid mwomwen eh madamadau oh eh pepehm. Ni mehlel, ekei seri kak sukuhlki en wia pasapeng kan, kamwomwada kan, oh padahk kan ni lokaia me arail pahpa nohno kin doadoahngki, ahpw re sohte pahn uhdahn kasalehda arail madamadau oh pepehm kan.

¹² Pil ehu, mohngiong en serio kin mwekidki soahng teikan ahpw kaidehn ihte lokaia. Met iei me wiawihong Joshua, me kitail koasoiapene mwoweo. Rie serepeino, Esther, koasoia: “Ong seri pwulopwul kan, lokaia, tiahk, oh pelien lamalam en arail pahpa nohno ko kin dokpene.” Ma seri ko sohte pehm me re wia kisehn soangen mour me arail pahpa nohno kohsang ie, re sohte pahn men esehla lokaia de pelien lamalam en arail pahpa nohno. Dahme pahpa nohno ko kak wia?

13, 14. (a) Dahme kahrehda pwopwoud ehu keseula ara peneineio en iang mwomwohdiso me kin doadoahngki lokaiahn wasao? (b) Ia duwen ara kolokol ara nanpwungmwahu rehn Siohwa en kehlail?

¹³ Pahpa nohno Kristian kan kin mwohneki  anahn en neirail seri ko laudsang pein arail. (1 Kor. 10:24) Ahn Joshua oh Esther pahpao, Samuel, nda: “Ngehi oh ei pwoudo kin tehk nait seri ko pwehn kilang mehnia lokaia me pahn keieu sair arail mohngiong, oh se kin kapakapki erpit. Pasapengpen at kapakapo kaidehn dahme se uhdahn mwahuki. Ahpw ni at kilang me re sohte uhdahn paiekihda mihting kan me kin doadoahngki at lokaia, se pilada en keseula nan mwomwohdiso ehu me kin doadoahngki lokaiahn wasao. Kiht koaros kin kaukaule towehda mihting kan oh iang kalohk. Se pil kin lukehdo kompoakepaht ko sang wasao en iang kiht mwenge oh pil kohla mwemweit wasa kan. Mepwukat koaros kin sewese nait seri ko en esehla riat Kristian ko oh pil esehla Siohwa, kaidehn ihte nin duwen arail Koht ahpw nin duwen Samarail oh Kompoakepahrail. Se medewe me met uhdahn kesempwal sang arail en esehla mwahu lokaia ehu.”

¹⁴ Samuel pil nda: “Pwehn kolokol at nanpwungmwahu rehn Siohwa en kehlail, ngehi oh ei pwoudo pil kin towehda mihting kan ni at lokaia. At mour inenen kedirepw, oh se kin pwangada. Ahpw se kalahngankihong Siohwa pwehki eh ketin kapaiahda at nanti laud oh pil at wiahda tounmetei kan. Nait seri silimeno kin doadoahngki pali laud en arail ahnsou en papah Siohwa.”

15. Dahme kahrehda sister men me adaneki Kristina pehm me e kak kalaudehla eh papah Siohwa nan mwomwohdiso ehu me doadoahngki lokaiahn wasao?

¹⁵ Ni seri kan ar kekeirda, ele re esehda me re kak kalaudehla arail papah Siohwa sang ni arail iang mwomwohdiso ehu me kin doadoahngki lokaia me re keieu wehwehki. Ma ei, pahpa nohno ko en dehr leme me neira seri ko solahr poakohng ira. Kristina nda: “I ese ekei lokaia sang ni lokaia me ei pahpa nohno kin doadoahngki, ahpw lokaiao me at mihting kan kin doadoahngki uhdahn apwal ong ie. Ahnsou me I sounpar 12, I iang mihting tohrohr ehu me doadoahngki lokaia me ei sukuhlo kin doadoahngki. Ih ahnsowo me I ahpwtehn wehwehki me dahme I rongorong iei padahk mehlel! Pil ehu wekidekla mwahu me wiawi iei ni ahnsou me I tepida kapakap doadoahngki lokaia me ei sukuhlo kin doadoahngki. I kin kak lokaiaiong Siohwa sang nan ei mohngiong!” (Wiewia 2:11, 41) Ni ahnsou me e sounpar 18, Kristina koasoiaiong eh pahpa nohno duwen met oh pilada en keseula nan mwomwohdiso ehu me doadoahngki lokaiahn wasao. E nda: “Ei sukuhlki duwen Siohwa ni lokaia me ei sukuhlo kin doadoahngki uhdahn kamwakid ie.” Kristina kedekedeo wiahla pioneer men oh e inenen peren.

16. Dahme kahrehda Nadia kalahnganki eh mihmihte nan mwomwohdiso ehu me kin doadoahngki lokaiahn eh pahpa nohno?

¹⁶ Me pwulopwul kan, ke leme ke pahn men iang mwomwohdiso ehu me kin doadoahngki lokaiahn wasa me ke keseula ie? Ma ei, pein idek rehmw dahme kahrehda. Ia duwe, omw keseula nan mwomwohdiso wet pahn seweseiuk ken karanihala Siohwa? (Seims 4:8) De ke men keseula pwehki ke sohte men omw pahpa nohno en tetehk soahng koaros me ke kin wia de pwehki ke sohte men nantihong? Nadia, me met papah nan Pedel, nda: “Ni ahnsou me ngehi oh riei ko daulih sounpar eisek samwa, se men keseula nan ehu mwomwohdiso me kin doadoahngki lokaiahn wasao.” Ahpw eh pahpa nohno ese me arail keseula sohte pahn mwahuong arail nanpwungmwahu rehn Siohwa. Nadia nda: “Se inenen kalahnganki me at pahpa nohno kin doadoahk laud pwehn padahkihong kiht ara lokaiao oh sewese kiht en mihmihte nan mwomwohdiso me kin doadoahngki ara lokaiao. E kamwahwihala at mour oh kalaudehla at ahnsou mwahu en sewese meteikan ren esehla Siohwa.”

17. (a) Ihs me Siohwa ketikihong pwukoa en apwalihada seri kan? (b) Ia duwen pahpa nohno kan ar kak ale sawas ni arail kin padahkihong neirail seri kan padahk mehlel?

¹⁷ Siohwa ketikihong pahpa nohno kan pwukoahn padahkihong neirail seri kan padahk mehlel. E sohte ketikihong pahpa de nohno kahlap kan de pil meteikan. (Wadek Lepin Padahk 1:8;  31:10, 27, 28.) Ahpw, pahpa nohno kan me sehse lokaiahn wasao ele anahne sawas pwehn sair mohngiong en neirail seri kan. Ni pahpa nohno kan ar peki sawas, met sohte wehwehki me re kin songosong en soikala pwukoahn apwalih neirail seri kan. Ahpw, e kak wia kisehn arail kin apwalihada neirail seri ko “ni kaiahn oh madamadau en Siohwa.” (Ep. 6:4, NW) Karasepe, pahpa nohno kan kak peki rehn elder kan nan mwomwohdiso iren sawas kan ong arail pahn wia kaudok en peneinei oh pil ong rapahkihda kompoakepah mwahu kan ong neirail seri ko.

18, 19. (a) Ia duwen Kristian teikan ar kak sewese me pwulopwul kan? (b) Dahme pahpa nohno kan en pousehlahte wiewia?

¹⁸ Pwehn sewese neirail seri ko, pahpa nohno kan kak ekei pak lukehdo peneinei teikan en iang arail kaudok en peneinei. Pil ehu, me pwulopwul tohto kin sukuhl sang Kristian teikan ni arail iang irail kalohk oh pil wia soahng teikan. (Lep. Pad. 27:17) Shan, me kitail koasoia mwoweo, nda: “I tamatamante brother ko me kin sewese ie. Ni arail kin sewese ie wiahda padahk kan nan mwomwohdiso, ahnsou koaros I kin sukuhlki soahng tohto. Oh I pil perenki at kin mwemweit nin duwen pwihn ehu.”

¹⁹ Irail kan me pahpa nohno kan pilada en sewese neirail seri kan anahne ahnsou koaros kangoange seri ko ren wauneki arail pahpa nohno. Met kak wiawi sang arail kin nda soahng mwahu kan duwen pahpa nohno ko oh dehr kihsang pahpa nohno ko arail pwukoa en apwalihada seri ko. Pil ehu, irail kan me kin sawas anahne soikala wiewia kan me kakete kahrehda ekei likin de nan mwomwohdiso en lemelemehk suwedki. (1 Pit. 2:12) Mendahki pahpa nohno kan kin peki sawas sang meteikan, e wiahte arail pwukoa en kasukuhliong neirail seri ko padahk mehlel. Re anahne tetehk soangen sawas me Kristian teikan kin sewesekin irail.

20. Ia duwen pahpa nohno kan ar kak sewese neirail seri kan en wiahla sapwellimen Siohwa ladu mwahu kei?

²⁰ Pahpa nohno kan, kapakapki sawas sang Siohwa, oh wia uwen amwail kak koaros. (Wadek 2 Kronikel 15:7.) Mwohneki mahs nanpwungmwahu me noumw serio ahneki rehn Siohwa laudsang dahme ke mwahuki. Wia soahng koaros me ke kak pwehn tehk mwahu me Mahsen en Koht kin sair mohngiong en noumw serio. Dehr uhdihsang omw kamehlele me noumw serio kak wiahla sapwellimen Siohwa ladu mwahu men. Ni noumw seri kan ar kin idawehn Mahsen en Koht oh pil omw mehn kahlemeng mwahu, ke pahn ahneki soangen pepehmohte me wahnpoaron Sohn ndahki kompoakepah ko me rasehng nah seri kei: “Sohte me I perenki sang ei rong me nei kompoakepahi [“seri,” NW] kan kin momourki mour mehlel.”—3 Sohn 4.