1. Pilipil dahieu me aramas koaros anahne wiahda?

 ARAMAS akan rahnwet anahne wiahda pilipil kesempwal ehu. Ia duwe, irail pahn utungada sapwellimen Siohwa Koht pwung en kaunda nanleng oh sampah, de irail pahn utung sapwellime imwintihti lemeio, Sehdan me Tepil? Koaros anahne wiahda pilipil pwehki irail sohte kak utung pali riau. Dahme re pilada pahn kasalehda ma re pahn mihmi kohkohlahte de soh. (Mad. 25:31-33, 46) Erein ‘kahn kamakam kowahlapo,’ irail pahn alehdi kilel en mour de kasohrala.​—Kaud. 7:14; 14:9-11; Esek. 9:4, 6.

2. (a) Dahme Ipru 10:35-39 kangoange kitail en wia? (b) Ia duwen pwuhken Kaudiahl eh kak sewese kitail?

² Wadek Ipru 10:35-39. Ma ke pilada en utung sapwellimen Siohwa kaunda, ke wiahda pilipil mwahu ehu. Met ke men sewese meteikan en wiahda pilipil pwung. Ke kak doadoahngki ire kan nan pwuhken Kaudiahl pwehn wia met. Pwuhken Kaudiahl kin kasalehda dahme pahn wiawihong irail kan me kin uhwong Siohwa, oh duwen Siohwa eh pahn ketin katingih irail kan me kin utung sapwellime kaunda ni lelepek. Kitail anahne onopki ire kesempwal pwukat. Atail wia met pahn kakehlakahla atail doulahte papah Siohwa. Kitail pil kak doadoahngki dahme kitail sukuhlki pwehn sewese meteikan en pilada en papah Siohwa oh doulahte wia met.

3. Dahme kitail pahn koasoiapene nan iren onop wet?

³ Nan iren onop wet, kitail pahn koasoiapene peidek pwukat: Dahme pahn wiawihong irail kan me utung sapwellimen Koht kaunda? Dahme pahn wiawihong irail kan me kin utung mahn lawalo weitahtao me pwuhken Kaudiahl kasalehda?

4. Pwihn dahieu me wahnpoaron Sohn kilangada me iang Sises ketiket nanleng?

⁴ Wahnpoaron Sohn kilangada nan kaudiahl ehu pwihn riau me kin utung sapwellimen Siohwa kaunda oh alehdi kapai kan en mour soutuk. Keieun pwihno iei 144,000 ko. (Kaud. 7:4) Irail me pwekpweksang nin sampah pwehn iang Sises wiahda koperment ehu, de Wehio, nanleng. Irail pahn iang Sises kaunda sampah. (Kaud. 5:9, 10; 14:3, 4) Nan kaudiahlo, Sohn kilangada arail iang Sises ketiket pohn Nahna Saion nanleng.​—Kaud. 14:1.

5. Dahme pahn kereniong wiawihong me keidi kan me momourte nin sampah?

⁵ Sang ni mwehin wahnpoaron ko lel met, aramas kid kid kei pilipildahr en iang kisehn 144,000 ko. (Luk 12:32; Rom 8:17) Ahpw, Sohn koasoia me me keidi keite me luhwe, de me malaulaute, me pahn momour nin sampah erein imwin rahn akan. Irail “luhwen kadaudok en liho” pahn alehdi “mehn kilel” me Siohwa ketin kupwurkin irail mwohn kahn kamakam kowahlapo tepida. (Kaud. 7:2, 3; 12:17) Eri ahnsou ehu erein kahn kamakam kowahlapo, irail me luhwehdi kan nin sampah pahn pwekipwekdahla nanleng pwehn iang kisehn 144,000 me melahr ni lelepek. Irail pahn iang Sises nanleng wia kaun kei en Wehin Koht.​—Mad. 24:31; Kaud. 5:9, 10.

6-7. (a) Pwihn dahieu me Sohn kilangada mwuhr, oh dahme kitail sukuhlki duwen irail? (b) Dahme kahrehda luhwen me keidi ko oh ‘pokon kalaimwuno’ kin kasikasik pweidahn Kaudiahl irelaud 7?

⁶ Mwurin eh kilangada pwihno nanleng, Sohn kilangada “pokon kalaimwun ehu.” Weksang meh 144,000 ko, pokon kalaimwuno sohte kak wadawadi. (Kaud. 7:9, 10) Dahme kitail sukuhlki duwen irail? Sohn koasoiahda dahme e rong: “Irail pwukat me kohieisang nan kahn kamakam kowahlap, oh re kamwakelekidahr arail likou reirei kan oh wiahiong en pwetepwetkihla ntahn Sihmpwulo.” (Kaud. 7:14) Mwurin arail pitsang kahn kamakam kowahlapo, “pokon kalaimwun” wet pahn mour nin sampah oh alehdi kapai kaselel tohto.​—Mel. 37:9-11, 27-29; Lep. Pad. 2:21, 22; Kaud. 7:16, 17.

⁷ Sohte lipilipil ma kitail pilipilda en iang kohla nanleng de mihmihte nin sampah, ia duwe, kitail kamehlele me kitail pahn iang kilang pweidahn dahme kileldi nan Kaudiahl irelaud 7? Ei, kitail anahne. Ahnsowo pahn wia ahnsou kaperen ehu ong pwihn riau ko! Kitail pahn uhdahn perenki atail pilada en utung sapwellimen Siohwa kaunda. Pil dahme pwuhken Kaudiahl koasoiahki duwen kahn kamakam kowahlapo?​—Mad. 24:21.

8. Ia duwen kahn kamakam kowahlapo eh pahn tepida, oh ia duwen pali moron en aramas akan ar pahn mwekidki met?

⁸ Nin duwen me iren onop en mwoweo kasalehda, koperment kan en sampah pahn kereniong uhwongada Papilon Lapalap, me iei pwihnen kaudok likamw koaros en sampah. (Kaud. 17:16, 17) Uhwong wet pahn tapiada kahn kamakam kowahlapo. Ahpw ia duwe, aramas tohto pahn tepida papah Siohwa pwehki met? Soh. Kaudiahl irelaud 6 kasalehda me ahnsowo, aramas akan me sohte kin papah Siohwa pahn rapahki pereparail sang pelien koperment oh pelien pesines kan en sampah wet, me kin karasaraskihong nahna kan. Pwehki irail sohte pahn utung Wehin Koht, Siohwa pahn ketin wiahkin irail sounuhwong kei.​—Luk 11:23; Kaud. 6:15-17.

9. Ia duwen sapwellimen Siohwa aramas akan ar pahn uhdahn sansalda erein kahn kamakam kowahlapo, oh ia imwilahn met?

 ⁹ Sapwellimen Siohwa ladu lelepek kan pahn uhdahn sansalda erein kahn kamakam kowahlapo. Irail pahn wiahte pwihnen aramas nin sampah me kin papah Siohwa Koht oh sohte uhki “mahn lawalou.” (Kaud. 13:14-17) Arail kin lelepekohngete Siohwa pahn kalingeringerihada irail kan me kin uhwong Siohwa. Eri, pwihnen wehi kan pahn uhwongada sapwellimen Koht aramas akan nan sampah pwon. Paipel kahdaneki uhwong wet uhwong sang Kok en Makok.—Esek. 38:14-16.

10. Nin duwen me Kaudiahl 19:19-21 mahsanih, ia duwen Siohwa eh pahn ketin mwekidki uhwong me wiawihong sapwellime aramas akan?

¹⁰ Ia duwen Siohwa eh pahn ketin mwekidki uhwong wet? E ketin mahsanih: “I pahn engiengda kowahlap.” (Esek. 38:18, 21-23) Kaudiahl irelaud 19 kasalehda dahme pahn wiawi mwuhr. Siohwa ketin kadarala Sapwellime Ohlo pwehn pere sapwellime aramas akan oh kalowehdi arail imwintihti kan. “Karis en sounpei kan en nanleng,” me iei tohnleng lelepek kan oh 144,000 ko, pahn iang Sises mahweniong Kok en Makok. (Kaud. 17:14; 19:11-15) Ia pahn imwilahn mahwen wet? Iei kasohrlahn aramas koaros oh pwihn koaros me kin uhwong Siohwa!​—Wadek Kaudiahl 19:19-21.

11. Mwekid kesempwal dahieu me wiawi me kileldi nan pwuhken Kaudiahl?

¹¹ Song medewehla ia pepehm en irail me lelepek kan nin sampah me pitsang kasohrlahn sapwellimen Koht imwintihti kan! Ahnsowo pahn uhdahn kaperen! Ahpw mendahki e pahn mie peren laud nanleng ni ahnsou me Papilon Lapalap pahn kasohrala, pil mihete mehkot me pahn kaperen sang met. (Kaud. 19:1-3) Met iei “kapwopwoud en Sihmpwulo,” me wia mwekid uhdahn kesempwal ehu nan pwuhken Kaudiahl.​—Kaud. 19:6-9.

12. Nin duwen me Kaudiahl 21:1, 2 mahsanih, iahd me kapwopwoud en Sihmpwulo pahn wiawi?

¹² Iahd me kapwopwoudo pahn wiawi? Irail meh 144,000 ko koaros pahn mi nanleng mwohnte mahwen en Armakedon pahn wiawi. Ahpw, kaidehn ih ahnsowo me Sihmpwulo pahn kapwopwoudla. (Wadek Kaudiahl 21:1, 2.) Kapwopwoud en Sihmpwulo pahn wiawi mwurin mahwen en Armakedon oh kasohralahn sapwellimen Koht imwintihti kan koaros.​—Mel. 45:3, 4, 13-17.

13. Dahme pahn wiawi ni kapwopwoud en Sihmpwulo?

¹³ Ia wehwehn kapwopwoud en Sihmpwulo ong irail kan me iang pidada? Duwehte kapwopwoud ehu me kin kihpene ohl emen oh lih emen, ih pil duwen kapwopwoud en Sihmpwulo me pahn kihpene Nanmwarki Sises Krais oh sapwellime “lih kamwohd” meh 144,000 ko. Mwekid kesempwal wet iei wiawihdahn koperment kapw ehu me pahn kaunda sampah erein sounpar 1,000.​—Kaud. 20:6.

14-15. Dahme Kaudiahl irelaud 21 kapahrekiong 144,000 ko? (Menlau kilang kilel ni kilin Kahn Iroir wet.)

¹⁴ Mwuhr, Kaudiahl irelaud 21 kapahrekiong 144,000 ko kahnimw kaselel ehu me adaneki “Serusalem Kapw.” (Kaud. 21:2, 9) Kahnimw wet poahsoankihda takai 12, me “ahd 12 eden sapwellimen Sihmpwulo wahnpoaron 12 ko” nting powe. Dahme kahrehda Sohn pahn perenki ese duwen met? Pwehki e kilang edeo ntingdi ni ehu takai ko. Ia uwen met eh wia pai kaselel ehu ong ih!​—Kaud. 21:10-14; Ep. 2:20.

 ¹⁵ Kahnimw wet weksang kahnimw teikan. Ahllap en kahnimwo wiawihkihda kohl tohr, ewen kehl 12 wiawihkihda perl, kehl kan oh poahsoan kan kapwatkihda takai kesempwal kan, oh uwen reirei oh tehlap oh ile uwe tehieu. (Kaud. 21:15-21) Ahpw Sohn tehkada me mie mehkot me sohte iang! Sohn koasoia: “I sohte kilangada tehnpas sarawi ehu loale, pwe Siohwa Koht, me Keieu Manaman iei eh tehnpas sarawi, oh pil Sihmpwulo. Oh kahnimwo sohte anahne ketipin de pil maram pwe en dakerada, pwe lingan en Koht me kin kamarainih, oh eh lamp iei Sihmpwulo.” (Kaud. 21:22, 23) Irail kan me wiahda Serusalem Kapw pahn iang pato rehn Siohwa. (Ipru 7:27; Kaud. 22:3, 4) Eri, Siohwa oh Sises iei me tehnpas sarawio nan kahnimwo.

16. Dahme pahn wiawihong aramas akan erein Kaundahn Pahr Kid en Wehin Koht?

¹⁶ E kaperen ong me keidi kan en medewehla duwen kahnimw wet. Ahpw irail kan me ahneki koapworopwor en mour nin sampah pil anahne perenkihda met. Erein Kaundahn Pahr Kid en Wehin Koht, Serusalem Kapwo pahn wadohng nin sampah kapai tohtohie. Sohn kilangada kapai pwukat ar pwilipwildo rasehng “pillap en pilen mour.” Oh pali koaros en pillapo mie “tuhkehn mour” me kin kapwarehda teh kan “ong kamwahwihala wehi kan.” (Kaud. 22:1, 2) Aramas koaros me momour ahnsowo pahn paiekihda soahng mwahu pwukat. Aramas koaros me kin peikiong Siohwa pahn ekisekis unsekla. Solahr pahn mie soumwahu, medek, oh sengiseng pwehki nsensuwed.​—Kaud. 21:3-5.

17. Nin duwen me Kaudiahl 20:11-13 mahsanih, ihs me pahn paiekihda Kaundahn Pahr Kido?

¹⁷ Ihs me pahn paiekihda kapai mwahu pwukat? Irail me pahn tepin paiekihda kapai pwukat iei pokon kalaimwuno me pitsang Armakedon, oh seri kan me ele pahn ipwidi nan sampah kapwo. Ahpw Kaudiahl irelaud 20 pil inoukihda me me melahr akan pahn iasada. (Wadek Kaudiahl 20:11-13.) “Me pwung kan” me kin lelepek me mehla mahso, iangahki “me sapwung kan”​—me sohte ahneki ahnsou mwahu en sukuhlki duwen Siohwa—​pahn iasadahng mour nin sampah. (Wiewia 24:15; Sohn 5:28, 29) Ia duwe, met wehwehki me koaros pahn iasadahng mour nin sampah erein  Kaundahn Pahr Kido? Soh. Irail kan me soikala ni ahl suwed ahnsou mwahu en papah Siohwa mwohn arail mehla sohte pahn iasada. Ahnsou kohieng irail ahpw re kasalehda me irail sohte warohng mour nan Paradais nin sampah.​—Mad. 25:46; 2 Des. 1:9; Kaud. 17:8; 20:15.

18. Dahme pahn wiawihong sampah ni imwin pahr kido?

¹⁸ Ni imwin pahr kido, koaros me momour nin sampah pahn unsekla. Solahr me pahn lokolongki dihp me irail sohsohki sang Adam. (Rom 5:12) Keria me kohsang dipen Adam pahn sohrala douluhl. Eri met wehwehki me irail kan me mi nin sampah pahn “mourda” pwehki irail pahn unsekla ni imwin pahr kido.​—Kaud. 20:5.

19. Dahme kahrehda mie anahnepen kaimwiseklahn kasongosong?

¹⁹ Kitail ese me Sises ketin lelepekohngete Koht pil ni ahnsou me Sehdan kasonge ih. Ahpw ia duwe, aramas unsek kan koaros pahn lelepekohngete Siohwa ni Sehdan eh pahn song en kasonge irail? Emenemen pahn kak sapengala peidek wet ni ahnsou me Sehdan sapwedekdahsang nan pwoahr loalo me soh kapi ni imwin pahr kido. (Kaud. 20:7) Irail kan me lelepek ni kaimwiseklahn kasongosongo pahn alehdi mour soutuk oh kakehr ahneki saledek mehlel. (Rom 8:21) Irail kan me uhwongada Siohwa pahn kasohrala soutuk, iangahki Tepil oh nah ngehn suwed kan.​—Kaud. 20:8-10.

20. Ia omw pepehm duwen kokohp kaselel kan me mi nan pwuhken Kaudiahl?

²⁰ Ia omw pepehm mwurin atail kousapahlih ni mwotomwot pwuhken Kaudiahl? E seu kaperen en medewehla me ke iang mi ni ahnsowo me kokohp pwukat pahn pweida? Met seu kamwakid uhk en men luke meteikan en iang kitail nan kaudok min en atail Koht? (Kaud. 22:17) Pwehki atail koasoiapenehr soahng kan me pahn wiawi ni ahnsou kohkohdo, met uhdahn kamwakid kitail en men nda soahngohte me wahnpoaron Sohn koasoia: “Amen! Komw ketido, Kaun Sises.”​—Kaud. 22:20.