1. Dahme kahrehda kitail koaros anahne erpit sang rehn Koht? (Lepin Padahk 4:7)

 MA KE anahne wiahda pilipil kesempwal ehu, ele ke pahn uhdahn kapakapki erpit pwehki ke ese me ke anahne. (Seims 1:5) Nanmwarki Solomon ntingihedi: “Kupwurokong me keieu kesempwal.” (Wadek Lepin Padahk 4:7.) Solomon sohte koasoakoasoia duwen ahn aramas erpit. E koasoakoasoia duwen erpit me kohsang rehn Siohwa Koht. (Lep. Pad. 2:6) Ahpw ia duwe, erpit sang Koht kak sewese kitail nan soangen kahpwal kan me kitail ahneki rahnpwukat? Ei, e kak. Nan iren onop wet, kitail pahn kilang ia duwen.

2. Ia ehu ahl me kitail kak ahneki erpit laud?

² Ehu ahl me kitail kak ahneki erpit laud iei sang ni atail onopki oh doadoahngki kaweid kan sang ohl riemen me ahneki erpit laud. Keieu, kitail pahn koasoiapene duwen Solomon. Paipel mahsanih me “Koht ketikihong Solomon erpit oh . . . loalokong me laud mehlel oh sohte kak sosohngdi.” (1 Nan. 4:29) Keriau, kitail pahn koasoiapene duwen Sises, me sapwellimanki erpit me siksang aramas koaros. (Mad. 12:42) Kokohp mahsanihki duwen Sises: “Sapwellimen Siohwa manaman pahn kohdiong powe. Ihme kahrehda e pahn ahneki erpit oh koahiek en wehwehki ire kan.”​—Ais. 11:2, NW.

3. Dahme kitail pahn koasoiapene nan iren onop wet?

³ Koht ketikihong Solomon oh Sises erpit laud pwe ira en kak kihda kaweid mwahu duwen soahng kan me kesempwal. Nan iren onop wet, kitail pahn koasoiapene soahng siluh: Kesempwalpen ahneki madamadau pwung ong mwohni, doadoahk en mwohni, oh pein kitail.

4. Ia duwen mouren Solomon eh weksang mouren Sises?

⁴ Solomon inenen kepwehpwe oh kin kousoan nan ihmw kaselel  kan. (1 Nan. 10:7, 14, 15) Ahpw Sises sohte sapwellimanki kepwe tohto oh sohte pein imwe. (Mad. 8:20) Ahpw ira koaros ahneki madamadau pwung ong kepwe kan pwehki ara erpit kohsang wasa tehieu, me iei sang rehn Siohwa Koht.

5. Madamadau pwung dah me Solomon ahneki me pid mwohni?

⁵ Solomon pohnese me mwohni kak “doareiuk.” (Ekl. 7:12) Ma kitail naineki mwohni, kitail kak alehda soahng kan me kitail anahne oh ele soahng kei me kitail men ahneki. Ahpw mendahki Solomon uhdahn kepwehpwe, e wehwehki me mie soahng kan me kesempwal sang mwohni. Karasepe, e ntingihedi: “Ma ke pahn pilada nanpwungen ndand mwahu [“adamwahu,” NW] oh ahneki dipwisou, eri, pilada ndand mwahu.” (Lep. Pad. 22:1) Solomon pil kilang me aramas akan me kin poakohng mwohni sohte kin kalapw perenki dahme re ahneki. (Ekl. 5:10, 12) Oh e koasoia me kitail en dehr medewe me mwohni iei me keieu kesempwal, pwehki uwen mwohni me kitail naineki kak mwadangete sohrala.​—Lep. Pad. 23:4, 5.

6. Madamadau pwung dah me Sises sapwellimanki ong kepwe kan? (Madiu 6:31-33)

⁶ Sises sapwellimanki madamadau pwung ong kepwe kan. E kupwurperenki iang sakasak oh niminim. (Luk 19:2, 6, 7) Ehu ahnsou, e ketin wiahda wain me keieu mwahu​—tepin manaman me e ketin wiahda. (Sohn 2:10, 11) Oh ni rahn me e pwoula, likou me e ketin likawiho pweilaud. (Sohn 19:23, 24) Ahpw Sises sohte ketin wiahki soahng pwukat me keieu kesempwal nan eh mour. E mahsanihong sapwellime tohnpadahk ko: “Sohte emen kak liduwih soumas riemen . . . Kumwail sohte kak liduwih Koht oh Kepwe.” (Mad. 6:24) Sises padahngki me ma kitail kin rapahki mahs Wehio, Siohwa pahn ketin tehk mwahu me kitail alehdi dahme kitail anahne.​—Wadek Madiu 6:31-33.

7. Ia duwen brother men eh paiekihda eh ahneki madamadau pwung ong mwohni?

⁷ Tohto riatail Kristian kan kin paiekihda arail doadoahngki kaweid erpit kan sang Siohwa me pid mwohni. Medewehla mehn kahlemeng en brother kiripw men me adaneki Daniel. E  koasoia: “Ni ahnsou me I pwulopwul, I pilada me dahme keieu kesempwal nan ei mour iei en papah Siohwa.” Pwehki e kin kihsang soahng kan me sohte nohn kesempwal nan eh mour, Daniel kak wia soahng tohto ong Siohwa. E pil koasoia: “I kak nda ni mehlel me I sohte mwahn koluhkihla ei pilipilo. Ei mehlel, I kak koadoahkihada mwohni tohto ma I wiahki met me keieu kesempwal nan ei mour. Ahpw I sohte pahn wiahda kompoakepahi mwahu kan me I ahneki met. Ma I kin medemedewehte duwen mwohni, I sohte pahn nsenamwahu duwehte ei nsenamwahu met pwehki ei kin mwohneki mahs Wehio. Sohte uwen mwohni ehu me pahrekiong kapai kan me Siohwa ketikihongehr ie.” Eri, e sansal me kitail kin paiekihda atail wia soahng kan ong Siohwa, a kaidehn ong mwohni.

8. Ia duwen atail ese me Solomon ahneki madamadau pwung ong doadoahk? (Eklesiasdes 5:18, 19)

⁸ Solomon koasoia me doadoahk laud kak wadohng emen peren laud. E kahdaneki met “kisakis ehu sang rehn Koht.” (Wadek Eklesiasdes 5:18, 19.) E ntingihedi: “Mie kamwahupen soangen doadoahk laud koaros.” (Lep. Pad. 14:23, NW) Pein Solomon wehwehki mehlelpen met. E kin uhdahn doadoahk laud! E kauwada ihmw kan, padokedi mwetin wain kan, oh wiahda mwetuwel oh lehn pihl kan. E pil wiahda kahnimw kan. (1 Nan. 9:19; Ekl. 2:4-6) Doadoahk pwukat uhdahn laud, oh e uhdahn perenkihda. Ahpw Solomon ese me pwehn uhdahn peren mehlel, e anahne wia laudsang soahng pwukat. E pil kin wia soahng tohto ong Siohwa. Karasepe, e kaweid kokoudahn tehnpas sarawi kaselelo ong kaudok en Siohwa. Doadoahk wet reireiki sounpar 7! (1 Nan. 6:38; 9:1) Mwurin Solomon wiahda soahng tohto, e esehda me dahme keieu kesempwal me aramas emen kak wia iei en papah Siohwa. E ntingihedi: “Mwurin mepwukat koaros, meteieu me I pahn nda: lemmwiki Koht, oh kapwaiada sapwellime mahsen.”​—Ekl. 12:13.

9. Ia duwen Sises eh ketin tehk mwahu me eh doadoahko kaidehn me keieu kesempwal ong ih?

⁹ Sises pil kin ketin doadoahk laud. Ni ahnsou me e pwulopwul, e ketin wia kapinte men. (Mark 6:3) Semeo oh ineo kin kalahnganki eh sawas ni arail kin doadoahk laud pwehn apwalihala anahn akan en arail peneinei laudo. Sises ketin unsek oh e kak wiahda soahng kan ni unsek, eri aramas tohto mwein kin men alehda dahme e wiahda. Sises uhdahn kin kupwurperenki eh doadoahko. Ahpw mendahki e wia soundoadoahk pwerisek men, e kin ahnsou koaros ketin tehk mwahu me e wiahda ahnsou ong papah Siohwa. (Sohn 7:15) Mwuhr, ni ahnsou me e wiahla sounkalohk, e mahsanihong me rongorong kan: “Kumwail dehr doadoahk ong mwenge me kin kiteila, ahpw doadoahk ong mwenge me kin mihmi ong mour soutuk.” (Sohn 6:27) Oh nan sapwellime Kapahrek en Pohn Dohl, Sises mahsanih: “Kumwail kihpene ong pein kumwail pai en nanleng.”​—Mad. 6:20.

10. Dahme kakete wiahla kahpwal ehu ma kitail kin wia tohndoadoahk mwahu kei?

¹⁰ Ni atail kin doadoahngki sapwellimen Siohwa kaweid erpit, kitail pahn ahneki madamadau pwung ong atail doadoahk en mwohni. Nin duwen Kristian kei, kitail sukuhlki en kin “doadoahk laud . . . , doadoahk mwahu.” (Ep. 4:28) Atail kaunen doadoahk kan kin kalapw kilang me kitail kin mehlel oh pwerisek en doadoahk, oh ele re kin ndaiong kitail me re kalahnganki mwomwen atail kin wia atail doadoahk. Met kakete kahrehiong kitail en kalaudehla atail awahn doadoahk pwehki kitail men atail  kauno en kin pwungki Sounkadehdehn Siohwa kan. Ahpw ma kitail wia met, met kakete kihsang atail ahnsou en mi rehn peneinei de wia soahng kan ong Siohwa. Kitail anahne wekidala met pwe en kak mie atail ahnsou en wia soahng kan me keieu kesempwal.

11. Dahme emen brother sukuhlki duwen madamadau toupahrek ong doadoahk?

¹¹ Brother pwulopwul men me adaneki William sukuhlkihsang brother men me e doadoahkohng mahso duwen kesempwalpen ahneki madamadau pwung ong doadoahk. E koasoia: “[Brother menet] wia mehn kahlemeng uhdahn mwahu duwen emen me kin toupahrek ong eh doadoahk. E kin doadoahk laud, oh ih oh irail kan me e kin wia pesines ong kin nanpwungmwahupene pwehki eh doadoahk mwahu. Ahpw ni ahnsou me e kin nek doadoahk, e kin pwilikihdi eh doadoahko oh doadoahngki eh ahnsou oh kehl ong eh peneineio oh ong Siohwa. Eri, ih emen aramas me I ese me kin uhdahn peren mehlel!” *

12. Ia duwen Solomon eh kasalehda me e ahneki madamadau pwung ong pein ih, ahpw ia duwen eh sohla ahneki met?

¹² Ni ahnsou me Solomon kin kaudokiong Siohwa ni lelepek, e ahneki madamadau pwung ong pein ih. Ni eh pwulopwul, e pein nda me mie eh soh itar kan oh peki rehn Siohwa kaweid. (1 Nan. 3:7-9) Ni eh tepida nanmwarki, Solomon pil wehwehki keperpen en aklapalapala. E ntingihedi: “Aklapalap kin kahrehiong aramas en pwupwudi.” (Lep. Pad. 16:18) E kansensuwed me mwuhr, Solomon sohte kapwaiada eh kaweido. Mwuhr ni eh kakaunte, e aklapalapala oh tepida pohnsehsehla sapwellimen Koht kosonned kan. Karasepe, ehu kosonned ko kehkehlingki me nanmwarki en Israel men sohte pahn “sapwellimanki likend tohto, pwe met pahn kahrehiong eh pahn sohpeisang” Siohwa. (Deud. 17:17) Solomon pohnsehsehla kosonned wet oh pwoudikihda lih 700 oh pekehiki lih 300, oh me tohto rehrail sohte kin kaudokiong Siohwa! (1 Nan. 11:1-3) Mwein Solomon medewe me  met sohte keper ong ih. Ahpw mwuhr, Solomon lelohng imwila suwed me kohsang eh sapeikiong Siohwa.​—1 Nan. 11:9-13.

13. Dahme kitail kak sukuhlkihsang atail doudouloale sapwellimen Sises aktikitik?

¹³ Sises sapwellimankihte madamadau pwung oh aktikitik ong pein ih. Mwohn eh ketido sampah, e wiahda soahng mwahu tohto nin doken eh papah Siohwa. Pwehki Sises, “soahng teikan koaros me mi nanleng oh nin sampah kapikipikda.” (Kol. 1:16) Ni ahnsou me e papidais, ele Sises tamanda soahng kan me e wiahda ni ahnsou me e patopato rehn Semeo. (Mad. 3:16; Sohn 17:5) Ahpw Sises sohte ketin aklapalapala pwehki e tamanda soahng pwukat. E sohte ketin wia mehkot pwehn kasalehda me e mwahusang koaros. E mahsanihong sapwellime tohnpadahk ko me e ketido sampah “kaidehn pwe aramas en papah, ahpw pwe en papah oh toukihda moure nin duwen pweinen pweipwei sapahl ehu ong aramas tohto.” (Mad. 20:28) E pil pein mahsanih me e sohte kak wia mehkot ni pein nsene. (Sohn 5:19) Sises uhdahn ketin aktikitik! E ketin wiahda mehn kahlemeng uhdahn mwahu ong kitail en idawehn.

14. Dahme kitail kak sukuhlkihsang Sises me pid ahneki madamadau pwung duwen pein kitail?

¹⁴ Sises ketin padahkihong sapwellime tohnpadahk kan ren kin ahneki madamadau pwung duwen pein irail. Ehu pak e mahsanihong irail: “Pitenmoangamwail kan koaros pil wadawadedi.” (Mad. 10:30) Mahsen pwukat uhdahn kin kansenamwahwihkitailla, ahpw keieu ma kitail kin kalapw ahneki madamadau sapwung duwen pein kitail. Met wehwehki me Samatailo nanleng kin uhdahn ketin nsenohkin kitail​—mie katepatail mwohn silangi. Ma Siohwa ketin mweidohng kitail en wia sapwellime tohnkaudok kan oh warohng ahneki mour kohkohlahte nan sapwellime sampah kapwo, kitail en dehr medewe e ketin sapwung.

15. (a) Madamadau pwung dahieu duwen pein kitail me Kahn Iroir kangoangehki kitail en kakairada? (b) Nin duwen me kilelo nan pali 24 kasalehda, ma kitail kin nohn medemedewehte pein kitail, kapai dah kan me kitail pahn katihasang?

¹⁵ Mpen sounpar 15 samwalahro, Kahn Iroir  kangoangehki kitail en kakairada madamadau pwung duwen pein kitail: “Kitail en dehr kin nohn medemedewehte pein kitail me kahrehda kitail en aklapalapala. Kitail en pil dehr nohn medewe me kitail sohte wad me kahrehda kitail en mworusala. Ahpw kitail en kin ahneki madamadau pwung duwen pein kitail, me wehwehki kitail en pohnese me mie atail kehl oh pil mie atail luwet kan. Emen lih Kristian koasoia: ‘Kaidehn ngehi aramas suwed men, ahpw I pil sohte wia aramas keieu mwahu men. Mie ei kehl oh pil luwet kan, pil duwehte koaros.’” * Ia duwe, ke kak kilang kamwahupen atail en kakairada madamadau pwung duwen pein kitail?

16. Dahme kahrehda Siohwa ketikihong kitail kaweid erpit?

¹⁶ Siohwa ketikihda kaweid erpit ong kitail nan sapwellime Mahsen. E ketin poakohng kitail oh ketin kupwurki kitail en peren. (Ais. 48:17, 18) Pilipil me keieu mwahu me kitail en wiahda, me pahn wadohng kitail nsenamwahu mehlel, iei en doulahte wia dahme kin kaperenda kupwuren Siohwa. Ni atail wia met, kitail pahn soikala soangen kahpwal tohto me kin lelohng irail kan me kin nsenohkihte mwohni, arail doadoahk, de pein irail. Eri, emenemen kitail en koasoanehdi teng en loalokongla oh kaperenda kupwuren Siohwa!​—Lep. Pad. 23:15.