1-2. Menlau kawehwehda ia duwen kaweid en Paipel kan ar kin uhdahn kesempwalla ong kitail ni ahnsou me atail irairo wekila.

 NI RAHNEN ara kapwopwoudo, ohl kamwohdo oh lih kamwohdo kin rong kanahieng padahk ehu me poahsoankihda Paipel duwen mouren pwopwoud. Kaweid ko me padahko kihda sohte kapw ong ira. Ahpw sang rahno kohla, kaweid ko pahn uhdahn kesempwalla ong ira. Dahme kahrehda? Pwehki ira pahn tepida doadoahngki kaweid ko nin duwen pwopwoud ehu.

² Met pil duwehte ni ahnsou me pwopwoud Kristian ehu kin wiahla pahpa nohno. Erein sounpar tohto, ele ira kin rong padahk tohto me pid duwen apwalihada seri kan. Ahpw kaweid ko pahn uhdahn kesempwalla ong ira met pwehki ira pahn apwalihada pein neira seri. Pwukoa wet uhdahn laud! Ei, ni ahnsou me atail irair en mour kin wekila, ekei iren Paipel kan kin miehla wehwe laud ong kitail. Ih ehu kahrepen sapwellimen Siohwa tohnkaudok kan kin wadek Paipel oh doudouloale “erein” arail mour, duwehte me nanmwarki en Israel kan kin anahne wia.​—Deud. 17:19.

3. Dahme kitail pahn koasoiapene nan iren onop wet?

³ Pahpa nohno kan, kumwail ahneki ehu rehn pwais kaselel kan me Kristian men kak ahneki, me iei en padahkihong noumwail seri kan duwen Siohwa. Ahpw kumwail men wia laudsang en padahkihongirailte ire mehlel kan duwen atail Kohto. Kumwail men sewese irail en uhdahn poakohng ih. Dahme kumwail kak wia pwehn kamwakid irail en poakohng Siohwa? Nan iren onop wet, kitail pahn koasoiapene kaweid en Paipel pahieu me kak sewese kumwail pahpa nohno kan. (2 Tim. 3:16) Kitail pil pahn kilang ia duwen ekei pahpa nohno  Kristian kan ar paiekihda arail kapwaiada kaweid en Paipel ko.

4. Ia ehu kaweid me kak sewese pahpa nohno kan en kamwakid neirail seri kan en poakohng Siohwa sang mohngiongirail? (Seims 1:5)

⁴ Kaweid 1: Rapahki kaweid sang rehn Siohwa. Peki rehn Siohwa en ketikihong uhk erpit me ke anahne pwehn sewese noumw seri kan en kakairada arail poakohng ih. (Wadek Seims 1:5.) Ih me keieu ketin warohng en ketikihda kaweid. Mie kahrepe tohto. Medewehla kahrepe riau pwukat. Keieu, Siohwa iei me keieu ketin mwahngiher oh koahieklahr en wia pahpa nohno men. (Mel. 36:9) Oh keriau, sapwellime kaweid erpit kan kin ahnsou koaros wahdo kamwahu.​—Ais. 48:17.

5. (a) Dahme sapwellimen Siohwa pwihn kin kihda pwehn sewese pahpa nohno kan? (b) Nin duwen me kisin kasdou kasalehda, dahme ke sukuhlkihsang mwomwen Brother oh Sister Amorim ara apwalihada neira seri ko?

⁵ Siohwa ketin doadoahngki sapwellime Mahsen oh sapwellime pwihn en ketikihda kaweid tohto me kak sewese pahpa nohno kan en apwalihada neirail seri kan en poakohng Ih. (Mad. 24:45) Karasepe, ke kak diar sawas mwahu tohto nan artikel kan me mi pahn oaralapo “Help for the Family,” me kin pwarada nan neitail makasihn en Awake! erein sounpar tohto, oh me met miehier nan neitail website. Pil mie kisin kasdo tohto nan jw.org me kak sewese pahpa nohno kan en doadoahngki sapwellimen Siohwa kaweid ni arail kin apwalihada neirail seri kan. *​—Lep. Pad. 2:4-6.

6. Ia ahn emen pahpa pepehm duwen kaweid kan me ih oh eh pwoudo alehdi sang sapwellimen Siohwa pwihn?

⁶ Pahpa nohno tohto ndahier me re kin uhdahn kalahnganki sawas kan me Siohwa kin ketikihda sang sapwellime pwihn. Emen pahpa me adaneki Joe koasoia: “En apwalihada seri silimen nan padahk mehlel sohte mengei. Ngehi oh ei pwoudo kin ahnsou koaros kapakapki me Siohwa en ketin sewese kiht. Oh se pehm me se kin alehdi artikel de kisin kasdo ehu ni ahnsou me keieu konehng pwehn sewese kiht apwalihala irair ehu me se lelohng. Se kin ahnsou koaros koapworopworki sapwellimen Siohwa kaweid.” Joe oh eh pwoudo  diarada me artikel oh kisin kasdo pwukat kin sewese neira seri ko en karanihala Siohwa.

7. Dahme kahrehda e kesempwal ong pahpa nohno kan en wia uwen arail kak en wiahda mehn kahlemeng mwahu? (Rom 2:21)

⁷ Kaweid 2: Wiahda mehn kahlemeng mwahu. Seri kan kin kilikilang arail pahpa nohno oh kin kalapw alasang irail. Mehlel, sohte pahpa de nohno men me unsek. (Rom 3:23) Ahpw pahpa nohno kan anahne wia uwen arail kak en wiahda mehn kahlemeng mwahu ong neirail seri kan. (Wadek Rom 2:21.) Emen pahpa ndahki seri kan: “Irail duwehte koatun me kin koledi soahng koaros.” E pil nda: “Irail pahn ndaiong kitail ahnsou me kitail sohte kin wia soahng kan me kitail padahkihong irail en wia.” Eri, ma kitail men neitail seri kan en poakohng Siohwa, atail limpoak ong Ih anahne kehlail oh sansal.

8-9. Dahme ke sukuhlkihsang dahme Andrew oh Emma koasoia?

⁸ Mie ahl tohto me pahpa nohno kan kak padahkihong neirail seri kan en poakohng Siohwa. Tehk dahme mwahnakapw men me sounpar 17, me adaneki Andrew, koasoia: “Ei pahpa nohno kin ahnsou koaros kasalehda kesempwalpen kapakap. Nipwong koaros, Pahpa pahn kin iang ie kapakap, mehnda ma I kapakapehr. Pahpa nohno kin ahnsou koaros katamankihong kiht: ‘Kumwail kak koasoiong Siohwa ahnsou koaros me kumwail men.’ Eri, kapakap wiahla mehkot me uhdahn kesempwal ong ie. Met e kin mengei ong ie en kapakap oh pehm me Siohwa iei Sahm men me ketin poakohng ie.” Pahpa nohno kan, ahnsou koaros tamataman me omw limpoak ong Siohwa kak sewese noumw seri kan en pil poakohngala Ih.

⁹ Pil medewehla mehn kahlemeng en Emma. Ni ahnsou me eh pahpao kohkohsang ih, eh nohno, oh rie serepein tikitiko, mie ahn eh pahpao pweipwand laud ong aramas kei, kahrehda eh nohnou anahne pwainla. Emma koasoia: “Pak tohto sohte itar mwohni, ahpw at nohnou kin ahnsou koaros koasoia duwen Siohwa eh ketin apwalih sapwellime ladu kan. I kak kilang sang ni mwomwen eh mour me e uhdahn kamehlele met. Nohno kin kapwaiada dahme e padahngki.” Ia mehn kasukuhlo? Mehn kahlemeng en pahpa nohno kan kak kasukuhlih neirail seri kan pil nan irair apwal kan.​—Kal. 6:9.

10. Soangen ahnsou dah me pahpa nohno tohto en Israel kak koasoiong neirail seri kan? (Deuderonomi 6:6, 7)

¹⁰ Kaweid 3: Kaukaule koasoiong noumw seri kan. Siohwa ketin mahsanihong mehn Israel kan mahso ren kaukaule padahkihong neirail seri kan duwen ih. (Wadek Deuderonomi 6:6, 7.) Pahpa nohno ko ahneki ahnsou laud erein rahn ehu pwon pwehn koasoiong neirail seri kan oh kamwakid irail en poakohng Siohwa sang nan mohngiongirail. Karasepe, pwutak en Israel men ele kin iang eh pahpao erein awa tohto pwehn padokedi de dolung wahnsahpw. Rie serepeino ele kin iang ara nohnou erein rahno wia doadoahk en deidei, pahda kopwou de soahng teikan, oh pil doadoahk teikan nan imwarailo. Ni pahpa nohno oh neirail seri kan ar doadoahkpene, irail kak koasoia duwen soahng kesempwal tohto. Karasepe, re kak koasoia duwen kupwuramwahu en Siohwa oh duwen eh kin ketin sewese arail peneineio.

11. Ia pil ehu ahnsou mwahu me pahpa nohno Kristian kan ahneki pwe ren kak koasoiong neirail seri kan?

¹¹ Mour en rahnpwukat weksang mahso. Nan sahpw tohto, pahpa nohno kan oh neirail seri kan sohte kak mihmihpene erein rahn ehu pwon. Ele pahpa nohno kin doadoahk, oh seri ko ele kin sukuhl. Eri pahpa nohno kan anahne wiahda ahnsou pwe ren kak koasoiong neirail seri kan. (Ep. 5:15, 16; Pil. 1:10) Kaudok en peneinei iei ehu ahnsou mwahu.  Brother pwulopwul men me adaneki Alexander koasoia: “Ei pahpao kin ahnsou koaros wiahda koasoandi kan ong at kaudok en peneinei, oh e sohte kin mweidohng mehkot en kauwehla at ahnsou en mihpeneo. Mwurin at onop, se kin koasoakoasoite.”

12. Dahme tapwin peneinei kan anahne tamataman erein arail kaudok en peneinei?

¹² Ma kowe me tapwin peneinei, dahme ke kak wia pwe noumw seri kan en kin perenki amwail kaudok en peneinei? Kumwail sou onopkihpene neitail pwuhk kapwo Enjoy Life Forever! E pahn mengei ong kumwail en koasoipene ni amwail onopki pwuhk wet. Ke men noumw seri kan en koasoiahda arail pepehm oh arail iren kapwunod kan, eri dehr doadoahngki ahnsoun kaudok en peneinei pwehn kauwe de kapwung irail. Nantihong en dehr lingeringerda ma ekei pak noumw seri ko nda mehkot me sohte pahrekiong Paipel. Ahpw kalahnganki arail kin kasalehda ni mehlel arail pepehm kan, oh kangoange irail en doulahte wia met. Ke kak uhdahn sewese noumw seri kan ma ke esehla dahme irail kin uhdahn medemedewe.

13. Ahnsou mwahu dah teikan me pahpa nohno kan kak sewese neirail seri kan en karanihala Siohwa?

¹³ Pahpa nohno kan, isaneki ahnsou mwahu kan ehuehu rahn pwehn sewese noumwail seri kan en karanihala Siohwa. Kumwail sohte anahne awih lao ahnsoun amwail onop Paipel pwehn padahkihong irail duwen atail Koht limpoako. Tehk dahme nohno men me adaneki Lisa koasoia: “Se kin doadoahngki soangen kepikipik koaros pwehn padahkihong nait seri ko duwen Siohwa. Karasepe, ni ahnsou me nait kidio pahn wia mehkot kemenkouruhr ong seri ko, se pahn nda me met kasalehda me Siohwa iei Koht peren men oh kin kahrehiong sen kak peren oh kouruhrki soahng kan.”

14. Dahme kahrehda e kesempwal ong pahpa nohno kan en sewese neirail seri kan en pilada mwahu kompoakparail kan? (Lepin Padahk 13:20)

¹⁴ Kaweid 4: Sewese noumw seri kan en pilada kompoakparail mwahu kan. Mahsen en Koht kasalehda ni sansal me kompoakepatail kan kak kahrehiong kitail en wia me mwahu de suwed. (Wadek Lepin Padahk 13:20.) Pahpa nohno kan, kumwail ese ihs me noumwail seri kan kin kompoakepahnki?  Kumwail tuhwongehr irail oh iang irail wia soahng kan? Dahme kumwail kak wia pwehn sewese noumwail seri kan en kompoakepahkihla irail kan me kin poakohng Siohwa? (1 Kor. 15:33) Kumwail kak sewese seri ko en wiahda kompoakparail mwahu kan sang ni amwail lukehdo irail kan me ahneki nanpwungmwahu keren rehn Siohwa pwehn iang amwail peneineio wia soahng kan.​—Mel. 119:63.

15. Dahme pahpa nohno kan kak wia pwehn sewese neirail seri kan en pilada werek mwahu?

¹⁵ Pahpa men me adaneki Tony kawehwehda dahme ih oh eh pwoudo kin wia pwehn sewese neira seri kan en wiahda kompoakparail mwahu kan. E koasoia: “Erein sounpar tohto, ngehi oh ei pwoudo kin lukehdo riat Kristian tohto me arail sounpar oh arail tikida wekpeseng. Re kin iang kiht mwengepene oh wia at kaudok en peneinei. Met wia ahl mwahu ehu en esehla irail kan me kin poakohng Siohwa oh papah ih ni peren. Se kin uhdahn paiekihda ni sounapwalih me kin seiloak kan, misineri kan, oh meteikan ar kin kohdo mi reht ni imwato. Koasoipen arail mour, arail ngoang, oh arail kin doadoahk laud nan sapwellimen Siohwa doadoahk kin uhdahn kamwakid nait seri ko oh sewese irail en karanihala Siohwa.” Pahpa nohno kan, kumwail koasoanehdi teng en sewese noumwail seri kan en pilada werek mwahu kan.

16. Ia duwen ma seri men nda me e sohla men papah Siohwa?

¹⁶ Ia duwen ma ke wia uwen omw kak koaros ahpw emen noumw seri ko nda me e sohte men papah Siohwa? Dehr medewe me ke sohte wia pahpa de nohno mwahu men. Siohwa ketikihong kitail koaros, iangahki noumw serio, saledek en wiahda pilipil, me iei koahiek en pilada ma kitail pahn papah Ih de soh. Ma noumw serio pilada en kohkohsang Siohwa, ahnekihte koapworopwor me ehu rahn e pahn pwurodo. Tamanda karasaras en pwutak me salongalao. (Luk 15:11-19, 22-24) Pwutako wiahda soahng suwed tohto, ahpw mwuhr, e pwurala rehn eh peneineio. Mwein ekei pahn nda: “Met wiahte karasaras ehu. Mehlel e kak wiawihong nei serio?” Ei, e  kak! Ni mehlel, ih met me wiawihong mwahnakapw men me adaneki Elie.

17. Ia duwen koasoipen Elie eh kangoangeiuk?

¹⁷ Elie koasoiahki eh pahpa nohnou: “Ira kin wia uwen ara kak en kamwakid ie en poakohng Siohwa oh sapwellime Mahsen, Paipel. Ahpw ni ei sounpar 15, I tepida uhwong ira.” Elie tepida ruksang ira pwehn wia soahng suwed kan. Eh pahpa nohnou song en sewese ih en mihmi karanih Siohwa, ahpw e sohte peikiong. Mwurin eh kohkohsang eh peneineio, e kin wia tiahk sapwung. Ahpw ekei pak, e kin koasoiaiong emen kompoakepah ko duwen Paipel. Elie koasoia: “Ni ei kin koasoiaiong kompoakepahio duwen Siohwa, met kalaudehla ei kin medemedewe duwen Siohwa. Ekisekis, weren padahk mehlel me wereila sohte keirda loalei​—me pahpa oh nohno nantihong padokedi nan ei mohngiong—​tepida kekeirda.” Kedekedeo, Elie pwurodo nan padahk mehlel. * Medewehla uwen eh pahpa oh nohnou ara kalahnganki me ira kin song en padahkihong ih sangete ni eh tikitiko en poakohng Siohwa.​—2 Tim. 3:14, 15.

18. Dahme ke medewehki pahpa nohno kan me kin doadoahk laud pwehn padahkihong neirail seri en poakohng Siohwa?

¹⁸ Pahpa nohno kan, Siohwa ketikihong kumwail pwais kaselel ehu en kaiahnehda dih en mwuhr kan en kaudokiong Siohwa. (Mel. 78:4-6) Met sohte mengei, oh se uhdahn kapingahki amwail kin doadoahk laud pwehn sewese noumwail seri kan! Ma kumwail pousehlahte wia uwen amwail kak en sewese noumwail seri kan en poakohng Siohwa oh kakairirailda ni sapwellime kaiahn oh kaweid, kumwail kak kamehlele me Samatail limpoako nanleng pahn ketin kupwurperenkihda.​—Ep. 6:4.