1. Soangen kahpwal dahieu me me tohto rehtail ahneki?

 MIE pak me ke wiahda mehn akadei ehu ahpw apwalki kapwaiada? b Ma ei, kaidehn kowe kelehpw. Karasepe, Philip men kamwahwihala mwomwen eh kapakap oh kalaudehla eh ahnsou en kapakap, ahpw e apwalki diar ahnsou en kapakap. Ahn Erika mehn akadei iei en kin mwadangala ni tuhpenehn kalohk kan, ahpw kereniong ahnsou koaros e pil pwandte. Tomáš song pak kei en wadekala Paipel pwon. E koasoia: “I uhdahn sohte perenki wadek Paipel. I song en wia met pak siluh, ahpw ehuehu ahnsou, I lelete pwuhken Lipai oh uhdi.”

2. Dahme kahrehda kitail en dehr mworusala ma mie atail mehn akadei ehu me kitail saikinte lel?

² Ma mie omw mehn akadei ehu me ke saikinte lel, dehr mworusala. Pwehn lel mehn akadei tikitik ehu, met pil kin anahne ahnsou oh doadoahk laud. Pwehki ke kin men kapwaiadahte omw mehn akadeio, met kasalehda me ke kin kesempwalki omw nanpwungmwahu rehn Siohwa oh men patohwanohng ih dahme keieu mwahu. Siohwa kin ketin kesempwalki omw nannanti. Ni mehlel, e sohte kin ketin kasik laudsang dahme ke kak patohwanohng ih. (Mel. 103:14; Maika 6:8) Eri ni omw pilada mehn akadei ehu, tehk mwahu me ke pahn kak kapwaiada. Mwurin omw pilada mehn akadei ehu, dahme ke kak wia pwehn lel mehn akadeio? Kitail pahn koasoiapene ekei sawas kan.

3. Dahme kahrehda e kesempwal en ahneki ineng laud en lel omw mehn akadei kan?

³ E uhdahn kesempwal en ahneki ineng laud en lel omw mehn akadei kan. Ni omw kin inengieng laud en lel omw mehn akadei, ke pahn doadoahk laud en wia met. Atail ineng kin duwehte kisinieng me kin kamwakid pwoht serek ehu en lel wasa me e pahn lella ie. Ma kisiniengo sohte uhdi ipihp, me dake pwohto pahn lel wasa me e pahn lella ie. Oh ma kisiniengo kehlail, e pil kak mwadang en lella wasao. Duwehte met, ma atail ineng en lel atail mehn akadei kan uhdahn laud, kitail pahn kapwaiada. David, emen brother sang El Salvador koasoia: “Ni omw kin inengieng en lel omw mehn akadei, ke kin nantihong doadoahk laud. Ke sohte kin mweidohng mehkot en kalekeiukasang omw pahn lel omw mehn akadeio.” Eri, dahme ke kak wia pwehn kalaudehla omw inengo?

4. Dahme kitail kak kapakapki? (Pilipai 2:13) (Pil kilang kilel.)

⁴ Kapakapki en kalaudehla omw ineng. Sang ni eh ketin doadoahngki sapwellime manaman, Siohwa kak ketin kamwakid uhk en lel omw mehn akadei. (Wadek Pilipai 2:13.) Ekei pak, kitail kin wiahda mehn akadei ehu pwehki kitail ese me kitail anahne wia met, oh met mwahu. Ahpw ele kitail sohte uhdahn inengieng kapwaiada. Ih met me wiawihong sister men nan Uganda me adaneki Norina. E wiahda mehn akadei en onop Paipel rehn emen, ahpw eh ineng en kapwaiada met sohte uhdahn kehlail pwehki e sohte medewe me e wia sounpadahk mwahu men. Dahme sewese ih? E koasoia: “I tepida peki rehn Siohwa rahn koaros en sewese ie kalaudehla ei ineng en onop Paipel rehn emen. Ni ahnsowohte, I pil kin doadoahk laud en kamwahwihala ei koahiek en padahk. Mwurin sounpwong kei, I tehkada me ei ineng en wia onop Paipel rehn emen laudsang mwoweo. Nan pahrohte, I tepida onop Paipel rehn aramas riemen.”

5. Dahme kitail kak doudouloale pwehn sewese kakehlaka atail ineng en lel atail mehn akadei kan?

⁵ Doudouloale dahme Siohwa ketin wiadahr ong uhk. (Mel. 143:5) Wahnpoaron Pohl kin doudouloale sapwellimen Siohwa kadek sapan ong ih, oh met kamwakid ih en doadoahk laud ong Siohwa. (1 Kor. 15:9, 10; 1 Tim. 1:12-14) Pil duwehte met, ni omw kalaudehla omw doudouloale dahme Siohwa ketin wiadahr ong uhk, omw ineng en lel omw mehn akadei pahn pil laudla. (Mel. 116:12) Medewehla dahme sewese sister men sang Honduras en lel eh mehn akadeio en wiahla pioneer men. E koasoia: “I kin medemedewe ia uwen Siohwa eh ketin poakohng ie. E ketin kahrehiong ie en diarada sapwellime aramas akan. E kin ketin apwalih ie oh pere ie. Ni ei kin medewe duwen met, e kin kakehlakahla ei poakohng ih oh I men doadoahk laud pwe ien tepida pioneer.”

6. Dahme pil kak sewese kitail en kalaudehla atail ineng en lel atail mehn akadei kan?

⁶ Medemedewehte kamwahu kan me kohsang omw pahn lel omw mehn akadei. Tehk dahme sewese Erika, me kitail koasoiapene mwoweo, en kapwaiada eh mehn akadei en kin mwadangala ni tuhpenehn kalohk kan. E koasoia:  “I esehda me I kin katihasang soahng tohto ni ei kin pwand en lella ni tuhpenehn kalohk kan. Ahpw ma I mwadang en lella mwo, I pahn kak rahnmwahwih riei Kristian kan oh koasoiong irail. I pil pahn kak rong kaweid mwahu kan me pahn sewese ie en perenki oh kamwahwihala ei kalohk.” Erika kin medemedewehte kamwahu kan me kohsang eh pahn lel eh mehn akadeio, oh e kapwaiada. Soangen kamwahu dah kan me ke kak medemedewe? Ma omw mehn akadeio kin pidada wadek Paipel de kapakap, medewehla ia duwen met eh pahn kakehlakahda omw nanpwungmwahu rehn Siohwa. (Mel. 145:18, 19) Ma omw mehn akadeio iei en kakairada irair en Kristian ehu, medemedewehte ia duwen eh pahn kamwahwihala omw nanpwungmwahu rehn meteikan. (Kol. 3:14) Dahme ke sou ntingihedi kahrepe koaros me ke men kapwaiakihda omw mehn akadeio? Kaukaule kilang dahme ke ntingihedi. Tomáš, me kitail koasoiapene mwoweo, koasoia: “Ma I ahneki kahrepe tohto en lel mehn akadei ehu, I pahn kin doadoahk laud pwehn kapwaiada.”

7. Dahme sewese Julio oh eh pwoudo en lel ara mehn akadeio?

⁷ Werekiong irail kan me pahn kangoangeiuk en lel omw mehn akadei. (Lep. Pad. 13:20) Medewehla dahme sewese Julio oh eh pwoudo en lel ara mehn akadei en kalaudehla ara doadoahk en kalohk. Julio koasoia: “Se pilada kompoakepaht kan me pahn kangoange kiht en lel at mehn akadei, oh se kin koasoiaiong irail duwen at mehn akadeio. Me tohto rehrail lelehr arail mehn akadei kan me duwehte ahto, eri re kak kihong kiht kaweid mwahu kan. Kompoakepat ko pil kin idek reht ia iren at pilahn ko, oh kangoange kiht ni ahnsou me se anahne.”

8. Dahme kakete wiawi ma kitail kin nantihong en lel atail mehn akadei ihte ni ahnsou me kitail inengieng? (Pil kilang kilel.)

⁸ Ahpw mie rahn akan me kitail koaros sohte kin inengieng lel atail mehn akadei kan. Ia duwe, met wehwehki me kitail sohte kak wia mehkot pwehn lel atail mehn akadeio? Soh. Karasepe, kisinieng kehlail kak kamwakid pwoht serek ehu en lel wasa en lella ie. Ahpw kehl en kisiniengo wekpeseng, oh ekei rahn, uhdahn sohte kisinieng douluhl. Ia duwe, met wehwehki me sehlao sohte kak mwekimwekid kohwei? Soh. Karasepe, ekei pwoht serek kin mie misihn; oh ekei mie padil kan. Sehlao kak doadoahngki soahng pwukat pwehn doulahte mwekimwekid kohla ni wasa me e pahn lella ie. Atail ineng en kapwaiada atail mehn akadei kak duwehte kisiniengo. Ekei rahn e kin kehlailsang ekei rahn. Oh ekei rahn, kitail uhdahn sohte men nantihong pwehn lel atail mehn akadei. Eri ma kitail kin nantihong en lel atail mehn akadei ihte ni ahnsou me kitail inengieng, ele kitail sohte pahn kak lel atail mehn akadeio. Ahpw duwehte sehlao me doadoahngki soahng teikan pwehn lel wasa me e pahn lella ie, kitail pil kak nannantihte pwehn lel atail mehn akadeio pil ni ahnsou me kitail sohte inengieng wia met ekei pak. Mehlel, met sohte pahn mengei. Ahpw ke pahn peren ni omw lel omw mehn akadeio. Mwohn atail pahn koasoiapene dahme  kitail kak wia, kitail pahn tehkpene peidek ehu me kakete pwarada.

9. Kitail anahne nannantihte pwehn lel atail mehn akadeio mehnda ma kitail sohte inengieng kapwaiada? Menlau kawehwehda.

⁹ Siohwa kin ketin kupwurki kitail en perenki oh pil nsenki papah ih. (Mel. 100:2; 2 Kor. 9:7) Ahpw kitail anahne pousehlahte nantihong lel atail mehn akadeio ma kitail sohte men? Medewehla ahn wahnpoaron Pohl mehn kahlemeng. E koasoia: “I kin kaloke paliwereiet oh kaunda duwehte lidu men.” (1 Kor. 9:25-27) Pil ni ahnsou me Pohl sohte inengieng wia dahme Siohwa ketin kupwurki en wia, e kin idingkihong pein ih en wia. Ia duwe, Siohwa ketin kupwurperenki dahme Pohl wia ong ih? Ei uhdahn! Oh Siohwa pil ketin katingiheki eh nannanti.—2 Tim. 4:7, 8.

10. Kamwahu dah kan me kohsang atail nannanti en lel atail mehn akadei pil ni ahnsou me kitail sohte inengieng wia met?

¹⁰ Duwehte met, Siohwa kin ketin kupwurperenki ni eh mahsanih atail nannanti en lel atail mehn akadei, pil ni ahnsou me kitail sohte ahneki ineng en wia met. E ketin kupwurperenki met pwehki e ketin mwahngih me mehnda ma kitail sohte kin ahnsou koaros perenki dahme kitail wiewia, kitail kin wiahte met pwehki kitail poakohng ih. Duwehte Siohwa eh ketin kapaiahda Pohl, E pil pahn ketin kapaikitailda pwehki atail nannanti. (Mel. 126:5) Oh ni atail pehm sapwellimen Siohwa kapai kan, kitail pil kakete tepida ahneki ineng en lel atail mehn akadeio. Emen sister sang Poland me adaneki Lucyna koasoia: “Ekei pak, I sohte men kohla kalohk, ahpw mehlel ma I pwang. Ahpw, peren me I ahneki mwurin ei kohla kalohk uhdahn wia kisakis kaselel ehu.” Eri, kitail en kilang dahme kitail kak wia ni ahnsou me atail ineng en lel atail mehn akadeio tikitikla.

11. Ia duwen Siohwa eh kak ketin sewese kitail en kakehlakahla atail irair en kaunda pein kitail?

¹¹ Kapakapki pwe kitail en kak kaunda pein kitail. Kaunda pein emen iei irair ehu me emen ahneki pwehn kaunda eh pepehm oh eh wiewia kan. Irair wet kin kalapw kauhdi kitail sang wia me suwed. Ahpw kitail pil anahne irair wet pwehn kamwakid kitail en wia me mwahu, ahpw mehlel ma dahme kitail pahn wiao apwal de kitail sohte inengieng wia. Pil tamataman me irair wet wia kisehn wahn sapwellimen Siohwa manaman. Eri peki rehn Siohwa sapwellime manaman pwehn seweseiuk en kakairada irair kesempwal wet. (Luk 11:13; Kal. 5:22, 23) David, me kitail koasoiapene mwoweo, kawehwehda ia duwen kapakap eh sewese ih. E kin men kaukaule wia pein eh onop en Paipel. E koasoia: “I kin peki Siohwa en ketin sewese ie kakairada irair en kaunda pein ngehi. Pwehki sapwellime sawas, I kak tepida wiahda koasoandi mwahu en onop oh en kaukaule wia met.”

12. Ia duwen Eklesiasdes 11:4 eh sewese kitail en lel atail mehn akadei?

¹² Dehr awih ahnsou mwahu pwehn wia mehkot. Nan sampah wet, ele kitail sohte pahn ahneki ahnsou mwahu en wia soahng kan. Ma kitail awiawih ahnsou mwahu, ele kitail sohte pahn kapwaiada atail mehn akadei kan. (Wadek Eklesiasdes 11:4.) Emen brother me adaneki Dayniel koasoia: “Kitail sohte kak diarada ahnsou mwahu koaros en wia mehkot, eri kitail en dehr awih, ahpw kitail en tepidahte wia.” Emen brother sang Uganda me adaneki Paul koasoia pil ehu kahrepe me kitail en dehr kin pwand en wia mehkot. E koasoia: “Ni atail kin tepida wia mehkot mendahki e apwal, Siohwa kak ketin sewese kitail.”—Mal. 3:10.

13. Dahme kahrehda e mwahu en tepida wia mehn akadei tikitik kan?

¹³ Ekisekis tepida. Ele atail ineng tikitikla pwehki atail mehn akadeio uhdahn apwal. Ma met wiawi, ke kak kamengeila omw mehn akadeio? Ma omw mehn akadeio iei en kakairada irair mwahu ehu, ke sou nantihong ekisekis kasalehda irair wet? Ma omw mehn akadeio iei en wadekala Paipel pwon, ke sou tepida ni omw  koasoanehdi ahnsou mwotomwot pwehn wadek Paipel? Tomáš, me kitail koasoiapene mwoweo, kin apwalki eh mehn akadeio en wadekala Paipel pwon nan sounpar ehu. E koasoia: “I esehda me I wiahda koasoandi en wadek Paipel me nohn apwal ong ie. Eri, I koasoanehdi en pwurehng song, ahpw met I koasoanehdi en wadek ekei parakrap rahn koaros oh doudouloale. Imwilahn met, I tepida perenki ei wadawad.” Pwehki Tomáš tepida perenki wadek Paipel, e men kalaudehla eh ahnsou en wadawad. Kedekedeo, e wadekala Paipel pwon. c

14. Dahme kakete wiawi me kak kahpwalihala atail en lel atail mehn akadei?

¹⁴ E kansensuwed me sohte lipilipil ia uwen atail inengieng en kapwaiada atail mehn akadei, ele mie soahng kan me kin wiawi me kahrehda e apwal ong kitail. Karasepe, ele kitail lelohng “paisuwed” me kak kihsang atail ahnsou en kapwaiada atail mehn akadei. (Ekl. 9:11) Ele kitail lelohng kahpwal ehu me kahrehiong kitail en mworusala oh kaluwetekitailla. (Lep. Pad. 24:10) Pwehki kitail soh unsek, kitail kak wiahda sapwung kan me kahpwalihala atail en lel atail mehn akadei. (Rom 7:23) De kitail uhdahn pwang. (Mad. 26:43) Dahme kak sewese kitail en powehdi kahpwal ehu me kakete wiawi?

15. Ma mie mehkot wiawi me kahrehda e apwal ong kitail en lel atail mehn akadei, met wehwehki me kitail sohte pweida? Menlau kawehwehda. (Melkahka 145:14)

¹⁵ Tamataman me met sohte wehwehki me ke sohte pweida. Paipel mahsanih me ele kitail pahn pwurupwurehng lelohng kahpwal kan. Ahpw e pil kasalehda ni sansal me kitail kak pwurehng song en lel atail mehn akadei, ahpw mehlel ma Siohwa ketin sewese kitail. (Wadek Melkahka 145:14.) Brothero me adaneki Philip, me kitail koasoiapene mwoweo, koasoia: “I sohte kin medemedewehte ahnsou kan me I sohte lel ei mehn akadeio. Ahpw, I kin medemedewehte ahnsou kan me I pwurehng nantihong lel ei mehn akadei kan.” David me kitail  koasoiapene mwoweo, koasoia: “Ma mehkot wiawi pwehn kahpwalihala ei pahn lel ei mehn akadeio, I sohte kin wiahki met mehn kerempwa ehu me pahn kauhdi ie, ahpw I kin wiahki met ahnsou mwahu en kasalehiong Siohwa ia uwen ei poakohng ih.” Sang ni omw pousehlahte song en lel omw mehn akadei mendahki e apwal, ke kin kadehdehiong Siohwa me ke men kaperenda ih. Ia uwen Siohwa eh kin ketin kupwurperenkihda ni eh mahsanih omw kin nannantihte en lel omw mehn akadei!

16. Dahme ke kak sukuhlki ma mehkot wiawi me kalekeiukasang omw pahn lel omw mehn akadei?

¹⁶ Sukuhlsang ahnsou kan me mehkot wiawi me kalekeiukasang omw en lel omw mehn akadei. Medewehla dahme kahrehda e wiawi oh pein idek rehmw, ‘Dahme I kak wia pwe met en dehr wiawi?’ (Lep. Pad. 27:12) Ahpw ekei pak, ma omw mehn akadeio nohn apwal en kapwaiada, met kak kasalehda me e sohte mwahu ong uhk. Ma ke pehm me met me wiawi, pwurehng medewe duwen omw mehn akadeio oh kilang ma ke kakete wia. d Siohwa sohte pahn ketin medewe me ke sohte pweida ma ke sohte lel mehn akadei ehu me ke sohte kakohng.—2 Kor. 8:12.

17. Dahme kahrehda kitail en medemedewe dahme kitail kapwaiadahr?

¹⁷ Medemedewe dahme ke kapwaiadahr. Paipel mahsanih me “Koht me pwung oh e sohte pahn ketin meliehla amwail doadoahk.” (Ipru 6:10) Eri ken pil dehr manokehla dahme ke wiadahr. Medewehla mehn akadei kan me ke kapwaiadahr duwehte, kakairada nanpwungmwahu rehn Siohwa, koasoiaiong meteikan duwen ih, de papidaisla. Duwehte omw nantihong oh lel omw mehn akadei kan mahso, ke kak pousehlahte nantihong pwehn lel omw mehn akadeio met.—Pil. 3:16.

18. Dahme kitail en tamataman ni atail nantihong en lel atail mehn akadeio? (Pil kilang kilel.)

¹⁸ Pwehki sapwellimen Siohwa sawas, ke kak lel omw mehn akadei, duwehte sehla men me perenki eh lella wasa me e pahn lel ie. Ahpw tamataman, sehla tohto pil kin perenki seiloako. Duwehte met, ni omw pousehlahte nantihong lel omw mehn akadeio, dehr manokehla en kilang ia duwen Siohwa eh kin ketin seweseiuk oh kapaiaiukada ni omw kin nantihong lel omw mehn akadeio. (2 Kor. 4:7) Ma ke sohte uhdi, ke pahn ale kapai me laudsang.—Kal. 6:9.