1. Ia duwen atail ese me Siohwa ketin kupwurki karanihkitailla?

 SIOHWA ketin luke kitail en karanihala ih. (Seims 4:8) E ketin kupwurki wiahla atail Koht, Samatail, oh Kompoakepatail. E kin ketin sapengala atail kapakap oh sewese kitail erein ahnsou apwal kan. Oh e kin ketin doadoahngki sapwellime pwihn pwehn padahki kitail oh pere kitail. Ahpw dahme kitail anahne wia pwehn karanihala Siohwa?

2. Ia duwen atail kak karanihala Siohwa?

² Kitail kak karanihala Siohwa sang ni atail kapakap ong ih oh sang ni atail wadek sapwellime Mahsen oh doudouloale. Ni atail wia met, kitail kin direkihla limpoak oh kalahngan ong ih. Kitail kin mwekidki en patohwanohng ih peik oh kaping me e ketin warohng. (Kaud. 4:11) Ni atail esehla mwahu Siohwa, atail likih ih oh sapwellime pwihn me e ketikihda pwehn sewese kitail pahn laudla.

3. Ia duwen Tepilo kin song en katohreikitailsang Siohwa, ahpw dahme pahn sewese kitail en dehr kesehla atail Kohto oh sapwellime pwihn? (Melkahka 31:13, 14)

³ Ahpw, Tepilo kin song en katohreikitailsang Siohwa, ni mehlel ni atail kin lelohng kahpwal kan. Ia duwen eh kin wia met? E kin song ekisekis kaluwetehla atail likih Siohwa oh sapwellime pwihn. Ahpw kitail kak pereikitailsang eh uhwong kan. Ni atail pwoson Siohwa oh atail likih Siohwa eh kin teng, kitail sohte pahn kesehla atail Kohto oh sapwellime pwihn.—Wadek Melkahka 31:13, 14.

4. Dahme kitail pahn koasoiapene nan iren onop wet?

 ⁴ Nan iren onop wet kitail pahn koasoiapene kahpwal siluh me ele kak kohsang likin mwomwohdiso, ehuehu kak kaluwetehla atail likih Siohwa oh sapwellime pwihn. Ia duwen kahpwal pwukat kak eh katohreikitailsang Siohwa? Oh ia duwen atail kak pereikitailsang ahn Sehdan uhwong kan?

5. Ia duwen kahpwal kan ar kak kaluwetehla atail likih Siohwa oh sapwellime pwihn?

⁵ Ekei pak, kitail kin lelohng kahpwal kan me duwehte uhwong sang peneinei de sohla atail doadoahk en mwohni. Ia duwen kahpwal pwukat ar kak kaluwetehla atail likih sapwellimen Siohwa pwihn oh katohreikitailsang ih? Ni atail kin dadaur pahn kahpwal kan ni ahnsou werei, kitail kin nsensuwedla oh sohla atail koapworopwor. Sehdan kin doadoahngki ahnsou pwukat pwehn kahrehiong kitail en medewe me Siohwa sohte ketin poakohng kitail. Tepilo men kitail en medewe me Siohwa oh sapwellime pwihn me kin kahrehda atail kahpwal kan. Mehkot me duwehte met wiawihong ekei mehn Israel kan nan Isip. Nin tapio irail kamehlele me Siohwa ketin idihada Moses oh Aaron en kasaledekirailsang kalidu. (Eks. 4:29-31) Ahpw mwuhr ni Parao kahrehiong arail mour en apwalla, irail kapwukoahki Moses oh Aaron arail kahpwal ko, oh nda: ‘Kumwa kahrehiong Parao oh sapwellime lapalap akan ar kailongkinkitala. Kumwa kihongehr kedlahs pwoat nan pehrail pwe re en kemeikitala.’ (Eks. 5:19-21) Irail kapwukoahki sapwellimen Koht ladu loalopwoat ko. Ia uwen kansensuwed! Ma ke kin dadaur pahn kahpwal kan erein ahnsou reirei, ia duwen omw kak kakehlaka omw likih Siohwa oh sapwellime pwihn?

6. Dahme kitail sukuhlkihsang soukohp Apakuk duwen en dadaur pahn atail kahpwal kan? (Apakuk 3:17-19)

⁶ Kasalehiong Siohwa audepen omw mohngiong, oh rapahki sapwellime sawas. Soukohp Apakuk lelohng kahpwal tohto. Ehu ahnsowo, e mwomwen peikasalki ma Siohwa ketin nsenohkin ih. Eri e kasalehiong Siohwa eh pepehm. E koasoia: “Maing, KAUN, ia erein ei kin patohwan liklikweriong komwi oh peksawas a komwi ahpw sohte ketin karonge. . . . Ia duwen omwi kak ketin kanengamahiong mahmahsanih soangen wiewia suwed wet?” (Apak. 1:2, 3) Siohwa ketin karonge ahn sapwellime ladu loalopwoat menet eh kapakap. (Apak. 2:2, 3) Mwurin Apakuk eh medemedewe laud duwen Siohwa eh ketin doarehla sapwellime aramas akan, e pwurehng ahneki peren. E kamehlele me Siohwa ketin nsenohki ih oh pahn ketin sewese ih en dadaurete pahn kahpwal kan. (Wadek Apakuk 3:17-19.) Ia mehn kasukuhl ong kitail? Ni omw lelohng kahpwal kan, kapakap ong Siohwa oh padahkihong omw pepehm. Kowe eri rapahki sapwellime sawas. Ni omw wia met, ke kak kamehlele me Siohwa pahn ketikihong uhk kehl me ke anahne pwehn dadaur. Oh ni omw pehm sapwellime sawas, omw pwoson ih pahn laudla.

7. Dahme emen kisehn Shirley song en kamehlelehiong ih, oh dahme sewese en lelepekohngete Siohwa?

⁷ Pousehlahte wia soahng kan me kin seweseiuk en karanihte Siohwa. Ih met me sewese Shirley, sister men nan Papua New Guinea, ni eh lelohng kahpwal kan. b Ahn Shirley peneineio semwehmwe, oh ekei pak, re kin apwal en diar mwenge me itar. Emen kiseh ko song en kaluwetehla eh likih Siohwa. E koasoia: “Ke nda me sapwellimen Koht manaman kin seweseiuk, ahpw ia sawas en? Ahmw  peneinei semwehmwehte. Ke kin kauwehla mwahl ahmw ahnsou kalokalohk.” Shirley koasoia: “I pein idek rehi: ‘Koht uhdahn ketin nsenohkin kiht de soh?’ Eri I mwadangete kapakap ong Siohwa oh padahkihong soahng koaros me I medemedewe. I sohte uhdihsang wadek Paipel oh neitail sawasepen Paipel kan, oh I pousehlahte kalohk oh towehda mihting kan.” Sohte pwand e tepida esehda me Siohwa kin ketin apwahpwalih eh peneineio. Eh peneineio sohte duhpekla, oh re kin peren. Shirley koasoia: “I pehm me Siohwa ketin sapengala ei kapakap kan.” (1 Tim. 6:6-8) Ma ke wiewiahte soahng kan me kin seweseiuk en karanihte Siohwa, ke pil sohte pahn mweidohng kahpwal kan de peikasal en katohreiuksang Siohwa.

8. Dahme kakete wiawihong brother kan me kin tiengla mwowe nan sapwellimen Siohwa pwihn?

⁸ Atail imwintihti kan kin doadoahngki social network oh palien nuhs kan pwehn kihpeseng likamw de kahrehiong kitail en peikasalki riatail Kristian kan me kin tiengla mwoweo nan sapwellimen Siohwa pwihn. (Mel. 31:13) Ekei wasa kin salihiraildi oh karaunehkin irail aramas mwersuwed kei. Tepin Kristian kan lelohng soangen irairohte ni ahnsou me wahnpoaron Pohl lelohng karaunlikamw oh selidi. Ia duwen arail mwekidki met?

9. Dahme ekei Kristian ko wia ni ahnsou me wahnpoaron Pohl selidi?

⁹ Ekei tepin Kristian ko uhdihsang utung wahnpoaron Pohl ni ahnsou me e selidi nan Rom. (2 Tim. 1:8, 15) Dahme kahrehda? Ia duwe, irail namenengki Pohl pwehki aramas akan kin wiahki ih aramas mwersuwed men? (2 Tim. 2:8, 9) De irail masak me irail pahn pil lelohng lokolok? Sohte lipilipil ia kahrepe, medewehla ia ahn Pohl pepehm. E anahne dadaur pahn kahpwal tohto oh eh mour mi nan keper pwehki irail. (Wiewia 20:18-21; 2 Kor. 1:8) Kitail en dehr duwehte aramas ako me sohte sewese Pohl ni ahnsou me e anahne sawas! Dahme kitail anahne tamataman ni riatail brother kan me kin tiengla mwowe lelohng kalokolok?

10. Dahme kitail anahne tamataman ni brother kan me kin tiengla mwowe ar lelohng kalokolok, oh dahme kahrehda?

 ¹⁰ Tamataman kahrepen atail lelohng kalokolok oh ihs me kin kahrehda. Keriaun Timoty 3:12 mahsanih: “Irail koaros me men mourki poadidiong Koht ni arail kin miniminiong Krais Sises pil pahn lelohng kalokolok.” Eri kitail en dehr pwuriamweiki me Sehdan kin keieu uhwong brother kan me kin tiengla mwowe. E men brother pwukat en uhdihsang papah Siohwa ni lelepek oh pil men kamasak kitail.—1 Pit. 5:8.

11. Dahme kitail sukuhlkihsang mehn kahlemeng en Onesiporus? (2 Timoty 1:16-18)

¹¹ Pousehlahte utung brother kan oh loalopwoatohngete irail. (Wadek 2 Timoty 1:16-18.) Emen Kristian mahso me adaneki Onesiporus weksang meteiko ni ahnsou me Pohl selidi. E “sohte kin namenengki [Pohl eh] senselki selmete.” Ahpw, Onesiporus rapahki Pohl, oh ni eh diarada, e song en sewese oh kihong dahme e anahne. Ni eh wia met, eh mour mihla nan keper. Ia mehn kasukuhl ong kitail? Kitail en dehr mweidohng masak aramas de mweidohng emen en kauhdi atail kin utung brother kan me lelohng lokolok. Ahpw, kitail en wia uwen atail kak koaros pwehn sewese irail. (Lep. Pad. 17:17) Irail anahne atail limpoak oh utuht.

12. Dahme kitail sukuhlkihsang riatail Kristian kan nan Russia?

¹² Medewehla ia duwen riatail Kristian kan nan Russia ar sewese riarail kan me selidi. Ni ahnsou me ekei irail ale kopwung, riarail Kristian tohto kohla ni mwoalen kopwungo pwehn utung irail. Ia mehn kasukuhl ong kitail? Ni ahnsou me riatail brother kan me kin tiengla mwowe ar lelohng karaunlikamw, selidi, de kalokolok, kitail en dehr masepwehkada. Kapakapkin irail, sewese arail peneinei kan, oh rapahki elen omw pahn utung irail.—Wiewia 12:5; 2 Kor. 1:10, 11.

13. Ia duwen meteikan ar kapailokei kitail eh kak kaluwetehla atail likih Siohwa oh sapwellime pwihn?

¹³ Kisehtail kan, iengatail tohndoadoahk kan, de iengatail tohnsukuhl kan ele kin kapailokei kitail pwehki kitail kin kalohk de pwehki kitail kin idawehn sapwellimen Siohwa kosonned kan. (1 Pit. 4:4) Ele irail pahn nda: “I kin perenkin uhk, ahpw omw pelien lamalam en nohn kakos oh kin idawehnte tiahk en mahs.” Ele ekei pahn kauwehki mwomwen atail wiewia ong me piskenla kan oh nda: “Ia duwen omw kak nda me kowe aramas limpoak men?” Soangen koasoi pwukat kak kahrehiong kitail en medewe ma sapwellimen Koht kosonned kan kin pahrek. Kitail kakete tepida medewe: ‘Siohwa kin ketin kasik laudsang dahme I kak wia? Sapwellime pwihn nohn kakos?’ Ma ke kin lelohng soangen irairo, ia duwen omw kak mihmihte karanih Siohwa oh sapwellime pwihn?

14. Dahme kitail pahn wia ni meteikan ar kapailokehkin kitail atail kin kapwaiada sapwellimen Siohwa koasoandi kan? (Melkahka 119:50-52)

¹⁴ Koasoanehdi teng en wiewiahte dahme Siohwa mahsanih me pwung. Sohp iei ohl emen me kapwaiada sapwellimen Siohwa koasoandi kan mendahki meteikan kauwehki eh wia met. Emen ohl me mwomwehda kompoakepahn Sohp pil song kahrehiong en kamehlele me Koht sohte ketin nsenohki ma Sohp kin wia dahme pwung de soh. (Sohp 4:17, 18; 22:3) Ahpw Sohp sohte men kamehlele likamw pwukat. E ese me sapwellimen Siohwa kosonned kan ong dahme pwung oh sapwung kin pwung, oh e koasoanehdi en kapwaiada. E sohte mweidohng meteikan en kaluwetehla eh lelepek. (Sohp 27:5, 6) Ia  mehn kasukuhl ong kitail? Dehr mweidohng kapailok en kahrehiong uhk en peidengki sapwellimen Siohwa kosonned kan. Medewe duwen dahme wiawiher nan omw mour. Mwein pak tohto ke kilangehr me sapwellimen Siohwa koasoandi kan kin pwung oh wia kamwahupomw. Koasoanehdi teng en utung pwihno me kin kapwaiada koasoandi pwukat. Eri sohte lipilipil ia uwen aramas akan pahn kapailokei kitail, kitail sohte pahn uhdihsang papah Siohwa.—Wadek Melkahka 119:50-52.

15. Dahme kahrehda Brizit lelohng kapailok?

¹⁵ Medewehla dahme wiawihong Brizit, sister men nan India. Eh peneinei kin kapailoke pwehki eh pwoson. Sohte pwand mwurin eh papidaisla nan pahr 1997, eh pwoudo me sohte kin papah Siohwa sohla eh doadoahk. Eri eh pwoudo, Brizit, oh neira serepein ko anahne keseula rehn en eh pwoudo papah nohno, me kin kousoan nan ehu kahnimw. Ahpw ahn Brizit kahpwal ko pahn pil laudla. Pwehki eh pwoudo sohla doadoahk, e anahne doadoahk mpen awa 40 nan wihk ehu pwehn apwalih eh peneineio. Patehng met, mwomwohdiso me keieu karanih irail dohki mwail 220. E kansensuwed me en eh pwoudo peneinei kin uhwong ih pwehki eh pwoson. Irairo uhdahn suwedla me kahrehda ahn Brizit peneineio anahne pwurehng keseu. Mwuhr, ni soh kasikpe eh pwoudo mehla. Mwurin mwo, emen nah serepein ko mehkihla kanser ni eh sounparte 12. Ahpw suwedsang met, ahn Brizit peneineio kin kapwukoahki soahng suwed ko me wiawi. Irail nda me ma e sohte wiahla emen Sounkadehdehn Siohwa, soangen kahpwal ko koaros sohte pahn wiawi. Ahpw, e likihte Siohwa oh karanihte sapwellime pwihn.

16. Ia duwen Brizit paiekihda eh mihmihte karanih Siohwa oh sapwellime pwihn?

¹⁶ Pwehki Brizit dohsang mwomwohdisou, sounapwalih me kin seiloak men kangoangehki en kalohk wasa me e kin kousoan ieo oh wia mihting kan nan imweo. Nin tapio e pwunodki met. Ahpw e idawehn kaweido me brothero kihong ih. E ehukihong meteikan rongamwahwo, wia mihting kan  nan imweo, oh kaukaule wia kaudok en peneinei rehn nah serepein ko. Ia imwilahn met? Brizit kak tapiada onop en Paipel tohto oh nah tohnsukuhl en Paipel tohto papidaisla. Nan pahr 2005 e tepida pioneer. E ale ketingpen eh likih Siohwa oh eh loalopwoatohng sapwellime pwihn. Nah serepein ko kin papah Siohwa ni lelepek, oh met mie mwomwohdiso riau wasao! Brizit kamehlele me Siohwa ketikihong ih kehl pwehn dadaur pahn eh kahpwal kan oh pahn kapailok sang eh peneinei.

17. Dahme kitail anahne koasoanehdi teng en wia?

¹⁷ Sehdan men kitail en kamehlele me Siohwa sohte pahn ketin sewese kitail oh me en mihmihte nan sapwellime pwihn pahn kahpwalihalahte atail mour. Sehdan men kitail en masepwehkada ni brother kan me kin tiengla mwowe ar lelohng uhwong, kalokolok, de selidi. Oh sang ni kapailok, e men kaluwetehla atail likih sapwellimen Siohwa koasoandi kan oh sapwellime pwihn. Ahpw, kitail uhdahn ese eh widing kan oh e sohte kak pitihkitaildi. (2 Kor. 2:11) Koasoanehdi teng en soikala ahn Sehdan likamw kan oh loalopwoatohngete Siohwa oh sapwellime pwihn. Tamataman, Siohwa sohte pahn ketin likidmelieiukala. (Mel. 28:7) Eri dehr mweidohng mehkot en katohreiuksang Siohwa!—Rom 8:35-39.

18. Dahme kitail pahn koasoiapene nan iren onop en mwuhr?

¹⁸ Nan iren onop wet, kitail koasoiapene kahpwal kan me kitail kin lelohng likin mwomwohdiso. Ahpw atail likih Siohwa oh sapwellime pwihn pil kak lelohng kasongosong sang ni kahpwal kan me kin kohsang nan mwomwohdiso. Ia duwen atail kak pweida ni atail dadaur pahn kahpwal pwukat? Kitail pahn koasoiapene met nan iren onop en mwuhr.