1-2. (a) Peidek dah kan me kitail pahn koasoiapene? (b) Dahme kasalehda me Siohwa kin ketin kupwurki sewese kitail?

 SIOHWA kak ketin sewese kitail en dadaurete pahn atail kahpwal kan oh ahneki peren ni atail papah ih. Ni ahl dah me e kin ketin sewese kitail? Oh ia duwen atail kak paiekihda soangen sawas me Siohwa ketikihda? Peidek pwukat pahn pasapengla nan iren onop wet. Ahpw mwohn atail pahn tehk pasapeng ko, kitail pahn koasoiapene peideko: Siohwa uhdahn kin ketin kupwurki sewese kitail?

² Mie lepin lokaia ehu me wahnpoaron Pohl doadoahngki nan nah kisinlikou ong mehn Ipru ko me kak sewese kitail diar pasapengo. Pohl ntingihedi: “Siohwa iei sawasepei; I sohte pahn masak. Dahme aramas kak wiahiong ie?” (Ipru 13:6) Kawehwehn Paipel kan kasalehda me lepin lokaiao “sawasepei” nan iretikitik wet kin wehwehki emen me tangalahng sewese emen me anahne sawas. Medewehla duwen Siohwa eh kin ketin mwadangala pwehn sewese emen me anahne sawas. Ke uhdahn pahn pwungki me kawehwe wet kin kasalehda me Siohwa uhdahn ketin kupwurki sewese kitail. Ni Siohwa eh kin ketin sewese kitail, kitail kak dadaur pahn atail kahpwal kan ni peren.

3. Ahl siluh dah kan me Siohwa kin ketin sewese kitail en dadaur pahn atail kahpwal kan ni peren?

³ Ni soangen ahl dah kan me Siohwa kin ketin sewese kitail en dadaur pahn atail kahpwal kan ni peren? Pwehn sapengala met, kitail pahn wadek wasa ehu nan pwuhken Aiseia. Dahme kahrehda? Pwehki kokohp tohto me Siohwa ketin kasalehiong Aiseia kin kadoadoahk ong sapwellime ladu kan rahnwet. Pil ehu, Aiseia kin kalapw kawehwehda duwen Siohwa ni lokaia kan me kitail kak wehwehki. Karasepe, tehk nan Aiseia irelaud 30. Nan irelaudo, Aiseia doadoahngki karasaras mwahu kan me kawehwehda duwen Siohwa  eh kin ketin sewese kitail, (1) sang ni eh kin ketin karonge oh sapengala atail kapakap kan, (2) sang ni eh kin ketikihda kaweid kan, (3) sang ni eh kin ketikihda kapai kan ahnsou wet oh pil ni ahnsou kohkohdo. Kitail pahn koasoiapene ahl siluh pwukat me Siohwa kin ketin sewese kitail.

4. (a) Ia duwen Siohwa eh ketin kawehwehda duwen mehn Suhs ko ni mwehin Aiseiao, oh dahme e ketin mweidada en wiawi? (b) Koapworopwor dahieu me Siohwa ketikihong me lelepek kan? (Aiseia 30:18, 19)

⁴ Ni tepin Aiseia irelaud 30, Siohwa ketin mahsaniheki mehn Suhs ko, “pwutak keptakai kan,” me kin “kapatahiong dihp ong dihp.” E pil mahsanih: “Irail aramas uhwong kei . . . me sohte men rong kosonned en Siohwa.” (Ais. 30:1, 9, NW) Pwehki aramas ako sohte men rong, Aiseia kohpada me Siohwa pahn ketin mweidohng irail en lokolok. (Ais. 30:5, 17; Ser. 25:8-11) Oh ih met me wiawi ni mehn Papilon ko wairaillahng Papilon nin duwen me selidi kei. Ahpw mie ekei me lelepek kan nanpwungen mehn Suhs ko, oh mie rohng en koapworopwor ehu ong irail sang Aiseia. E ndaiong irail me ehu rahn Siohwa pahn ketin mweidohng irail en pwurala oh pwurehng kousoan nan Serusalem. (Wadek Aiseia 30:18, 19, NW. b) Oh ih met me wiawi. Siohwa ketin kasaledekirailsang Papilon. Ahpw, arail saledekla sohte pahn mwadang wiawi. Mahsen ko, “Siohwa kin ketin awiawih ni kanengamah pwehn ketin kasalehiong kumwail kupwuramwahu,” kasalehda me mwurin ahnsou ehu, me lelepek kan pahn poadoandoarla. Ni mehlel, mehn Israel kan kalipilipala Papilon sounpar 70 mwohn ekei irail mweimweida en pwurala Serusalem. (Ais. 10:21; Ser. 29:10) Ni mehn Israel ko wie sensel Papilon, irail kin sengiseng pwehki irail nsensuwed. Ahpw ni arail pwurala sapwarailo, irail kin sengiseng pwehki irail uhdahn peren.

5. Dahme Aiseia 30:19 kamehlelehiong kitail?

⁵ Rahnwet kitail kak ale kangoang sang mahsen pwukat: “E uhdahn pahn ketin kasalehiong uhk kupwuramwahu ni eh ketin karongehda ngilen omw peksawas.” (Ais. 30:19, NW) Aiseia kamehlelehiong kitail me Siohwa pahn ketin karonge mwahu atail kin peksawas Reh, oh pahn ketin mwadang en sapengala atail kapakap kan. Aiseia pil nda: “E pahn ketin sapeng uhk ni ahnsowohte me e ketin karongehda met.” Mahsen pwukat uhdahn katamankihong kitail me Samatailo uhdahn ketin kupwurki sewese irail kan me kin peki sapwellime sawas. Atail ese met kin sewese kitail en dadaur ni peren.

6. Ia duwen dahme Aiseia koasoia eh kasalehda me Siohwa kin ketin karonge ahn emenemen sapwellime ladu kan ar kapakap?

⁶ Dahme iretikitik wet pil padahkihong kitail duwen atail kapakap? Siohwa kin ketin karonge ahn emenemen kapakap. Dahme kahrehda kitail kak ndahki met? Ni tepin iretikitik kan nan Aiseia irelaud 30, lepin lokaiao “kumwail” kin kadoadoahk pwehki Siohwa kin ketin mahmahseniong sapwellime aramas akan nin duwen pwihn ehu. Ahpw nan iretikitik 19, lepin lokaiao “uhk” kin kadoadoahk ong emente aramas. Aiseia ntingihedi: “Ke uhdahn sohte pahn sengiseng”; “E uhdahn pahn ketin kasalehiong uhk kupwuramwahu”; “e pahn ketin sapeng uhk.” Nin duwen Sahm limpoak men, Siohwa sohte kin ketin mahsanihong emen sapwellime, “Ke anahne kehlail duwehte riomwo.” Ahpw, e kin ketin nsenohki kitail oh kupwurki karonge atail kapakap kan.—Mel. 116:1; Ais. 57:15.

7. Ia duwen Aiseia oh Sises ara kasalehda kesempwalpen atail en pousehlahte kapakap?

⁷ Ni atail kin kapakapohng Koht oh patohwanohng ih duwen mehkot me kin kapwunode  kitail, ele nin tapio Siohwa pahn ketikihong kitail kehl me kitail anahne pwehn dadaur pahn kahpwalo. Oh ma atail kahpwalo sohte mwadang uhdi nin duwen me kitail kasik, ele kitail anahne pwurupwurehng peki rehn Siohwa kehl pwehn dadaurete. E ketin luke kitail en wia met. Ihme Aiseia koasoiahki me kitail en dehr “mweidohng [Siohwa] en ketin kommoaldi.” (Ais. 62:7) Ia wehwehn met? Atail kapakap kan ong Siohwa uhdahn anahne wiawi ni ngidingid me kahrehda e pahn mwomwen me kitail sohte pahn mweidohng Siohwa en ketin kommoal. Dahme Aiseia koasoia katamankihong kitail duwen sapwellimen Sises karasaras ko me pid kapakap nan Luk 11:8-10, 13. Nan iretikitik ko, Sises ketin kangoange kitail en kapakap ni “ngidingid” oh “pousehlahte peki” sapwellimen Koht manaman. Kitail pil kak peki Siohwa en ketin kaweid kitail pwe kitail en wiahda pilipil mwahu kan.

8. Mahso, ia duwen mahsen ko nan Aiseia 30:20, 21 ar pweida?

⁸ Wadek Aiseia 30:20, 21, NW. c Ni ahnsou me sounpei en Papilon ko kapilpene Serusalem erein sounpar ehu elep, kahpwal laud me aramas ako lelohng mwomwen duwehla pilawa oh pihl me irail ahnlahr. Ahpw nin duwen me iretikitik 20 oh 21 kasalehda, Siohwa ketin inoukihong mehn Suhs ko me ma re pahn koluhla oh wekidala arail wiewia kan, e pahn ketin doareirailla. Ni Aiseia eh kahdaneki Siohwa arail “Sounpadahk Lapalapo,” e inoukihong irail me Siohwa pahn ketin padahkihong irail duwen arail pahn kin kaudokiong Ih ni ahl me pwung. Mahsen ko pweida ni ahnsou me mehn Suhs ko saledeksang arail sensel. Siohwa ketin kadehdehda me Ih me arail Sounpadahk Lapalap, oh pahn sapwellime kaweid, sapwellime aramas akan kapwurehdo kaudok min. Kitail uhdahn paiekihda Siohwa eh ketin wia atail Sounpadahk Lapalap rahnwet.

9. Ia ehu ahl me kitail kin ale sapwellimen Siohwa kaweid rahnwet?

⁹ Nan iretikitik pwukat, Aiseia koasoia me kitail duwehte tohnsukuhl kei me Siohwa ketin padahki ni ahl riau. Keieu, Aiseia nda: “Ke pahn kilangki mesomw kan omw Sounpadahk Lapalapo.” Nan karasaraso, Aiseia nda me Sounpadahko kesikesihnen mwohn nah tohnsukuhl ko. E wia pai kaselel ehu me Koht kin ketin kasukuhlih kitail rahnwet. Ia duwen? E ketin wia met ni eh ketin doadoahngki sapwellime pwihn. Kitail uhdahn kalahnganki kaweid kan me kitail kin ale sang pwihn wet! Kaweid kan me kitail alehdi nan atail mihting en mwomwohdiso kan oh pil mihting tohrohr kan, oh sang neitail sawasepen Paipel  kan, prokram en JW Broadcasting^®, oh pil soahng teikan kin sewese kitail erein ahnsou apwal kan, pwehn dadaurete ni peren.

10. Ni ahl dah me kitail kin rong ‘kapitie sang mwuritail’?

¹⁰ Aiseia pil koasoia keriaun ahl me Siohwa kin ketin kaweid kitail. E nda: “Kumwail pahn rong kapitie sang mwurimwail.” Soukohpo karasahiong Siohwa sounpadahk nsenoh men me kin alu mwurin nah tohnsukuhl kan oh kaukaweid irail ong ahl me ren keid ie. Rahnwet, kitail kin rong kapitien Koht mwuritail. Ia duwen? Mahsen en Koht ntingdier nan Paipel mahsie, ahnsou ehu me mi mwuritail. Eri ni atail kin wadek Paipel, e mwomwen me kitail kin rongorong kapitien Koht mwuritail.—Ais. 51:4.

11. Pwehn dadaur ni peren, soahng riau dah me kitail anahne wia, oh dahme kahrehda?

¹¹ Ia duwen atail kak paiekihda laud kaweid kan me Siohwa ketikihda sang sapwellime pwihn oh sapwellime Mahsen? Tehk me Aiseia nda soahng riau. Keieu e nda, “iet ahlo,” oh keriau, “kumwail idawehn.” (Ais. 30:21) E sohte itar en esehte “ahlo.” Kitail pil anahne “idawehn.” Sang sapwellimen Siohwa Mahsen oh dahme sapwellime pwihn kin kawehwehda, kitail kin sukuhlki dahme Siohwa ketin kupwurki sang kitail. Kitail pil sukuhlki ia duwen atail en kapwaiada dahme kitail sukuhlki. Pwehn dadaur ni peren ni atail kin papah Siohwa, kitail anahne wia soahng riau ko. Ihte ma kitail wia soahng riau pwukat, kitail kak kamehlele me Siohwa pahn ketin katingih kitail.

12. Nin duwen me Aiseia 30:23-26 mahsanih, ia duwen Siohwa eh pahn ketin kapaiahda sapwellime aramas akan?

¹² Wadek Aiseia 30:23-26. Ia duwen kokohp wet eh pweida ong mehn Suhs ko me pwurodo nan sapwen Israel mwurin arail sensel Papilon? Siohwa ketikihong irail soahng tohto pwehn sewese irail en kin wie momour oh doulahte papah ih. Siohwa ketikihong sapwellime aramas akan kanarail mwenge tohto. Ahpw keieu kesempwal, e ketikihong irail soahng koaros me re anahne pwehn karanihala ih oh pwurehng tepida kaudokiong ih ni ahl me pwung. Soahng mwahu kan me sapwellimen Koht aramas akan ahneki ahnsowo uhdahn tohtohsang me re kin ahneki mwoweo. Iretikitik 26 kasalehda me Siohwa ketin kalaudehla marain me sapwellime kan ahneki. (Ais. 60:2) Sapwellimen Siohwa kapai kan sewese sapwellime ladu kan en doulahte papah ih ni peren oh ni kehl “pwehki irair mwahu en mohngiong.”—Ais. 65:14, NW.

13. Ia duwen kokohpo me pid kapwurpwurdo en kaudok min eh pweidahr nan atail ahnsou?

¹³ Ia duwe, kokohpo me pidada kapwurpwurdo en kaudok min pil kin pidada kitail rahnwet? Uhdahn! Ia duwen? Sangete pahr 1919, aramas rar rar kei saledeksangehr Papilon Lapalap,  pwihnen pelien lamalam likamw koaros nin sampah. Irail ale kaweid en kolahng wasa ehu me mwahusang Sapwen Inowo en Israel. Irail mi nan paradais ni lokaiahn karasaras. (Ais. 51:3; 66:8) Ia wehwehn met?

14. Dahkot paradais ni lokaiahn karasaras, oh ihs me kin mi nan paradais wet rahnwet? (Menlau kilang Wehwehn Lepin Lokaia kan.)

¹⁴ Sang pahr 1919, me keidi kan kin perenki mi nan paradais ni lokaiahn karasaras. d Mwuhr, irail kan me ahneki koapworopwor en mour nin sampah, “sihpw teikan,” pil milahr nan paradais wet oh kin pereperenki kapai tohto sang rehn Siohwa.—Sohn 10:16; Ais. 25:6; 65:13.

15. Ia wasa irair me rasehng paradais kin mi ie?

¹⁵ Ia wasa me paradais wet kak dierek ie rahnwet? Sapwellimen Siohwa tohnkaudok kan kin mi wasa koaros nin sampah. Kahrehda, paradais wet pil kak mi wasa koaros nin sampah. Eri rahnwet, sohte lipilipil wasa me kitail kin kousoan ie, kitail kak mi nan irair wet sang ni atail kin utungada kaudok mehlel.

16. Ia duwen atail kak kilikilangete lingan en atail popohl oh minimin me rasehng paradais?

¹⁶ Pwehn mihmihte nan paradais wet, kitail anahne pousehlahte kalahnganki atail mwomwohdiso en Kristian nan sampah pwon. Ia duwen atail kak wia met? Sang ni atail kin medemedewehte soahng kaselel kan en riatail kan, kaidehn arail soh unsek. (Sohn 17:20, 21) Dahme kahrehda met kesempwal? Medewehla karasaras wet. Kitail kasik en kilang soangsoangen tuhke nan mwetuwel kaselel ehu. Duwehte met, nan atail mwomwohdiso kan rahnwet, mie soangsoangen aramas akan me rasehng tuhke kan. (Ais. 44:4; 61:3) Kitail en medemedewehte lingan en “nanwel,” a kaidehn soh unsek en ehuehu “tuhke” me keieu karanih kitail. Kitail sohte kak mweidohng atail soh unsek de soh unsek en meteikan nan mwomwohdiso en kihsang lingan en miniminpene me atail mwomwohdiso en Kristian nan sampah pwon ahneki.

17. Dahme emenemen kitail kak wia pwe minimin en mihmihte nan mwomwohdiso?

¹⁷ Dahme emenemen kitail kak wia pwe minimin en mihmihte nan mwomwohdiso? Kitail kak wiahda popohl. (Mad. 5:9; Rom 12:18) Ehuehu  ahnsou me kitail kin tiengla mwowe oh wiahda popohl rehn meteikan nan mwomwohdiso, kitail kin kalaudehla irair en popohl oh minimin wet. Kitail tamataman me Siohwa ketin kakerenihedo emenemen me mi nan irair wet ong kaudok min. (Sohn 6:44) Medewehla ia uwen Siohwa eh pahn ketin kupwurperenkihda ni eh mahsanih atail kin doadoahk laud pwehn kalaudehla popohl oh minimin nanpwungen sapwellime ladu kan me e ketin kesempwalki!—Ais. 26:3; Ak. 2:7.

18. Dahme kitail en kin kalapw doudouloale, oh dahme kahrehda?

¹⁸ Siohwa ketikihong sapwellime ladu kan soahng mwahu tohto. Eri ia duwen atail kak uhdahn paiekihda soahng pwukat? Kitail kak doudouloale mwahu dahme kitail kin onopki nan Mahsen en Koht oh nan neitail sawasepen Paipel kan. Soangen wiepe wet pahn sewese kitail en kakairada irair kan en Kristian me kin kamwakid kitail en “limpoakpene nin duwen pirien ehu” nan mwomwohdiso. (Rom 12:10) Ni atail doudouloale kapai kan me kitail alehdi met, kitail kin kakehlakahda atail nanpwungmwahu rehn Siohwa. Oh atail kin medemedewe duwen soahng mwahu kan me Siohwa ketin inoukihda en ketikihong kitail ni ahnsou kohkohdo, met pahn kalaudehla atail koapworopwor en papah ih kohkohlahte. Soahng pwukat koaros pahn sewese kitail en papah Siohwa ni peren ahnsou wet.

19. (a) Nin duwen me Aiseia 30:18 mahsanih, dahme kitail kak kamehlele? (b) Dahme pahn sewese kitail en dadaur ni peren?

¹⁹ Siohwa “pahn ketida” pwehki kitail ni eh pahn ketin kasohrehla sampah suwed wet. (Ais. 30:18, NW) Kitail uhdahn kamehlele me Siohwa—“Koht en pwung pahrek”—sohte pahn ketin mweidohng ahn Sehdan sampah en mihmi wereisang me anahn. (Ais. 25:9) Kitail pahn iang Siohwa ketin awih ni kanengamah rahno me e pahn ketin kapitkitailla. Ahpw ahnsou wet, kitail en koasoanehdi teng en pousehlahte kesempwalki atail pai kaselel en kapakap, onop oh kapwaiada Mahsen en Koht, oh doudouloale kapai kan me kitail ahneki. Ni atail wia met, Siohwa pahn ketin sewese kitail en dadaur ni peren ni atail kin kaudokiong ih.