1. Dahme kitail kak kasik oh kamehlele?

 KITAIL kak kasik en lelohng uhwong ni atail kalohk. Met kakete lalaudla ni ahnsou kohkohdo. (Dan. 11:44; 2 Tim. 3:12; Kaud. 16:21) Ahpw, kitail kak kamehlele me Siohwa pahn ketikihong kitail sawas me kitail anahne. Dahme kahrehda? Siohwa kin ketin ahnsou koaros sewese sapwellime ladu kan en kapwaiada arail pwukoa kan, sohte lipilipil ia uwen eh apwal. Karasepe, kitail pahn koasoiapene ekei soahng kan me wiawihong soukohp Esekiel, me kalohk ong mehn Suhs ko me kalipilipala Papilon.

2. Dahme Siohwa mahsanihki aramas ko me Esekiel kalohk ong, oh dahme kitail pahn koasoiapene nan iren onop wet? (Esekiel 2:3-6)

² Soangen aramas dah me Esekiel anahne kalohk ong? Siohwa mahsanih me irail aramas “kahngohdi,” “keptakai,” oh “uhwong” kei. Irail keper duwehte dihpw tekatek kei de skorpion kan. Ihme kahrehda Siohwa kin ketin pwurupwurehng mahsanihong Esekiel: “Ke dehpa masak”! (Wadek Esekiel 2:3-6, NW. b) Esekiel kak kapwaiada eh doadoahk en kalohko pwehki (1) Siohwa ketin poaronehla ih, (2) sapwellimen Koht manaman kihong kehl me e anahne, oh (3) Mahsen en Koht kakehlaka eh pwoson. Ia duwen soahng siluh pwukat ar sewese Esekiel? Oh ia duwen ar sewese kitail rahnwet?

3. Mahsen dah kan me ele kakehlaka Esekiel, oh ia duwen Siohwa eh ketin kamehlelehiong sapwellime sawas?

³ Siohwa mahsanihong Esekiel: “I kadarewohng uhk rehn aramas en Israel kan.” (Esek. 2:3, 4) Mahsen pwukat uhdahn kakehlakahda Esekiel. Dahme kahrehda? Pwehki Esekiel ele tamanda  me Siohwa ketin mahsanihong Moses oh Aiseia soahngohte ni eh ketin pilirahda en wia sapwellime soukohp kei. (Eks. 3:10; Ais. 6:8) Esekiel pil ese duwen Siohwa eh ketin sewese soukohp riemeno en kapwaiada pwukoa apwalo. Eri ni Siohwa eh pwurehng mahsanihong Esekiel: “I kadaruhkewei,” soukohpo ahneki kahrepe mwahu en likih sapwellimen Siohwa sawas. Pil ehu, Esekiel ntingihedi pak tohto: “KAUN-O ahpw ketin mahsanihong ie.” (Esek. 3:16) Oh e pwurupwurehng koasoia “KAUN-O ketin mahsanihong ie.” (Esek. 6:1) Esekiel uhdahn kamehlele me Siohwa me ketin poaronehla ih. Pil patehng, ahn Esekiel pahpahu samworo men. Ele e padahkihong Esekiel me Siohwa kin ketin padahkihong sapwellime soukohp kan me e pahn ketin sewese irail. Karasepe, Siohwa ketin mahsanihong Aisek, Seikop, oh Seremaia: “I pahn ieiang uhk.”​—Sen. 26:24; 28:15; Ser. 1:8.

4. Mehn kangoang dah kan me kakehlakahda Esekiel?

⁴ Ia duwen pali laud en mehn Israel kan ar mwekidki ahn Esekiel kalohk? Siohwa ketin mahsanih: “Sohte emen mehn Israel kan pahn men rong; re pil sohte mwahn men rong ie.” (Esek. 3:7) Ni arail soikala Esekiel, irail pil soikala Siohwa. Mahsen ko kamehlelehiong Esekiel me mendahki aramas ko soikala ih, met sohte wehwehki me e sohte kapwaiada eh pwukoa nin duwen soukohp men. Siohwa pil ketin kamehlelehiong Esekiel me ni ahnsou me rohng en kadeik me e ketin kalohki pahn pweida, aramas ko pahn “dehdehkihla me soukohp emen koukousoan rehrail.” (Esek. 2:5; 33:33) Ele mehn kangoang pwukat kihong Esekiel kehl me e anahne pwehn kapwaiada eh doadoahk en kalohk.

5. Dahme Aiseia 44:8 mahsanih me pahn kihong kitail eimah?

⁵ Kitail pil ahneki eimah pwehki kitail ese me Siohwa ketin poaroneikitailla en kalohk. E ketin kawauwihkitailla sang ni eh kahdanekin kitail sapwellime “sounkadehde” kan. (Ais. 43:10)  Pai kaselel ehu met! Duwehte Siohwa eh ketin mahsanihong Esekiel: “Ke dehpa masak,” Siohwa ketin kangoangehkin kitail: “Kumwail dehr masak.” Dahme kahrehda kitail en dehr masak sounuhwong kan? Pwehki duwehte Esekiel, Siohwa me ketin poaroneikitailla oh kin ketikihong kitail sapwellime sawas.—Wadek Aiseia 44:8.

6. (a) Ia duwen Siohwa eh ketin kamehlelehiong kitail sapwellime sawas? (b) Dahme kin kangoange kitail?

⁶ Siohwa ketin inoukihda me e pahn sewese kitail. Karasepe, mwohnte Siohwa mahsanih: “Kumwail me iei ei sounkadehde,” e mahsanih: “Ni omw pahn kotehwei pihl loal akan, I pahn ieiang uhk; omw apwal akan sohte pahn kakihruhkala. Ni omw pahn keidwei nan kisiniei, ke sohte pahn mwasingkihla; omw apwal laud akan sohte pahn kauweiukala.” (Ais. 43:2) Ni atail kin kalohk, ekei pak kitail kin lelohng kahpwal tohto me duwehte lapake oh kasongosong kan me duwehte kisiniei. Ahpw, Siohwa pahn ketin sewese kitail en pousehlahte kalohk. (Ais. 41:13) Duwehte ni mwehin Esekielo, pali laud en aramas kin soikala rohngo rahnwet. Ahpw met kaidehn pwehki kitail sohte pweida nan kalohk. Kitail kin ale kangoang pwehki Siohwa kin kupwurperenki ni atail kin pousehlahte lohki sapwellime rohngo ni lelepek. Wahnpoaron Pohl koasoia: “Emenemen pahn ale ketingpe nin duwen eh doadoahk.” (1 Kor. 3:8; 4:1, 2) Emen sister me wereila wia pioneer koasoia: “E kin kihong ie peren en ese me Siohwa kin ketin katingih atail nanti.”

7. Ia ahn Esekiel pepehm ni eh medewe duwen kaudiahlo me e kilangada? (Menlau kilang kilel ni kilin Kahn Iroir wet.)

⁷ Esekiel kilang ia uwen kehlail en sapwellimen Koht manaman. Dahme Esekiel kilangada nan kaudiahlo sewese en wehwehki me sapwellimen Koht manaman kin sewese tohnleng kehlail ko oh kamwakamwakid kuruma en daia laud ehu. (Esek. 1:20, 21) Dahme Esekiel wia? E ntingihedi dahme wiawi. “Ni ei kilangada met, I poaridiong nanpwelo.” Esekiel uhdahn pwuriamweikihla me kahrehda e pwupwudiong nanpwelo. (Esek. 1:28, NW) Mwuhr, ni Esekiel eh medewe duwen kaudiahl kapwuriamweio, met uhdahn kakehlakahla eh kamehlele me sang ni sapwellimen Koht manaman, e kak kapwaiada eh kalohk.

8-9. (a) Dahme wiawihong Esekiel ni Siohwa eh mahsanihong en “kesihnenda”? (b) Ia duwen Siohwa eh pil ketin kakehlaka Esekiel nan eh doadoahk en kalohk me apwal?

⁸ Siohwa ketin kehkehlikiong Esekiel: “Nein aramas, kesihnenda pwe I en mahseniong uhk.” Mahsen pwukat me iangete sapwellimen Koht manaman kihong Esekiel kehl me e anahne pwehn uhdahsang nanpwelo. Esekiel ntingihedi: “Sapwellimen Koht manaman ahpw kohlong rehi oh kasihnenihiehda.” (Esek. 2:1, 2, NW) Mwuhr oh erein eh doadoahk en kalohk, “limen” Koht kaweid Esekiel, me iei sapwellimen Koht manaman. (Esek. 3:22; 8:1; 33:22; 37:1; 40:1) Sapwellimen Koht manaman kakehlaka pwukoa me Esekiel alehdi, me iei en kalohk ong aramas me “keptakailahr oh kahngohdilahr.” (Esek. 3:7) Siohwa mahsanihong Esekiel: “I wiahiong mesomwen en kekeluwakala duwehte masarail kan oh temwomwen en kekeluwakala duwehte temwarail kan. I wiahiong temwomwen en duwehte daimon ehu, kekeluwaksang takai kekeluwak. Ke dehpa masak irail de masakada masarail kan.” (Esek. 3:8, 9, NW) E mwomwen me Siohwa mahmahsanihong Esekiel: ‘Ke dehr mweidohng ahn aramas akan keptakaila en kamworusihiukala. I pahn kakehlakaiuk.’

⁹ Mwurin mwo, sapwellimen Koht manaman sewese Esekiel erein eh doadoahk en kalohk. Esekiel ntingihedi: “Limen Siohwa ahpw kohdiong pohi ni kehlail.” Soukohpo anahne wihk ehu pwehn uhdahn wehwehki rohngo me en kalohki  pwe en kak kalohk ni eimah. (Esek. 3:14, 15, NW) Siohwa eri ketin mahsanihong ih en kohla wasa patapat en wahwo me “sapwellimen Koht manaman eri kohlong [reh].” (Esek. 3:23, 24, NW) Esekiel onopada en tepida eh kalohk.

10. Sawas dah me kitail anahne pwehn kalohk, oh dahme kahrehda?

¹⁰ Sawas dah me kitail anahne pwehn kapwaiada atail doadoahk en kalohk? Pwehn sapengala, medewehla dahme wiawihong Esekiel. Mwohn eh tepida kalohk, sapwellimen Koht manaman kihong kehl me e anahne. Duwehte Esekiel, rahnwet kitail pil kak kapwaiada atail doadoahk en kalohk ihte pwehki sawas sang sapwellimen Koht manaman. Dahme kahrehda? Pwehki Sehdan kin mahmahweniong kitail pwehn kauhdi atail doadoahk en kalohk. (Kaud. 12:17) Aramas tohto medewe me Sehdan nohn kehlail me kahrehda kitail sohte kak kana ni atail peiong ih. Ahpw sang ni atail doadoahk en kalohk, kitail kin kalowehdi ih! (Kaud. 12:9-11) Ni ahl dah? Ni atail kin kalohk, kitail kasalehda me kitail sohte masak soahng kan me Sehdan kin kamasangkin kitail. Ehuehu ahnsou me kitail kin kalohk, kitail kin kalowehdi Sehdan. Eri dahme sansalda ni atail diarada me kitail kak pousehlahte kalohk mehnda ma atail imwintihti kan uhwong kitail? E sansal me Siohwa kin ketikihong kitail sapwellime manaman oh me e kin kupwurperenkin kitail.—Mad. 5:10-12; 1 Pit. 4:14.

11. Dahme sapwellimen Koht manaman kin wiahiong kitail, oh ia duwen atail kak pousehlahte alehdi?

¹¹ Dahme kitail pil sukuhlki ni atail medewe mwomwen Siohwa eh ketikihong Esekiel kehl me e anahne pwehn kalohk? Sapwellimen Koht manaman kak kihong kitail kehl me kitail anahne pwehn powehdi kahpwal kan me kitail ahneki nan kalohk. (2 Kor. 4:7-9) Eri, dahme kitail kak wia pwehn pousehlahte alehdi sapwellimen Koht manaman? Kitail anahne pousehlahte kapakap oh kamehlele me Siohwa pahn ketin karonge atail kapakap kan. Sises ketin padahkihong sapwellime tohnpadahk ko: “Pousehlahte peki, . . . pousehlahte rapahki, . . . pousehlahte  letelet.” Siohwa pahn “ketikihong irail kan me peki reh sapwellime manaman.”—Luk 11:9, 13; Wiewia 1:14; 2:4.

12. Nin duwen me Esekiel 2:9–3:3 mahsanih, ia wasa doaropwe limilimo kohsang ie oh dahme e audaudki?

¹² Esekiel sohte kehlailkihdahte sapwellimen Koht manaman ahpw pil Mahsen en Koht. Nan kaudiahlo, Esekiel kilangada peh ehu me kolokol doaropwe limilim ehu. (Wadek Esekiel 2:9–3:3.) Ia wasa doaropwe limilimo kohsang ie? Dahme e audaudki? Ia duwen eh kakehlakahda Esekiel? Kitail pahn kilang. Doaropwe limilimo kohsang mwoalen Koht. Ele Siohwa ketin doadoahngki emen tohnleng pahmen ko me Esekiel kilangada mwoweo pwehn kihong doaropwe limilimo. (Esek. 1:8; 10:7, 20) Doaropwe limilimo audaudki Mahsen en Koht, me iei, rongen kadeik laud ehu me Esekiel anahne kalohkihong irail me uhwong kan me kalipilipala. (Esek. 2:7) Rohngo ntingdi mwowe oh mwurin doaropwe limilimo.

13. Dahme Siohwa mahsanihong Esekiel en wiahiong doaropwe limilimo, oh dahme kahrehda e mem?

¹³ Siohwa mahsanihong sapwellime soukohpo en kangala doaropwe limilimo oh ‘kadirehkihla kapehdeo.’ Ni peik, Esekiel kangala doaropwe limilimo koaros. Ia wehwehn kaudiahl wet? Esekiel anahne uhdahn wehwehki rohngo me e pahn lohki. E anahne kamehlele rohngo pwehn kak kamwakid ih en kalohk. Eri mehkot kapwuriamwei wiawi. Esekiel esehda me doaropwe limilimo “mem duwehte sukehn loangalap.” (Esek. 3:3) Dahme kahrehda? Ong Esekiel, pai kaselel en wilian Siohwa wia mehkot mem de kansenamwahu. (Mel. 19:8-11) E kalahnganki me Siohwa ketin kupwurki eh wia sapwellime soukohp.

14. Dahme sewese Esekiel pwehn onopada en wia eh pwukoa?

¹⁴ Mwuhr, Siohwa mahsanihong Esekiel: “Rong ei mahsen kan koaros me I padahkihong uhk oh katengehdiong mepwukat nan omw mohngiong.” (Esek. 3:10, NW) Sang ni kaweid pwukat, Siohwa mahsanihong Esekiel en song tamataman dahme ntingdi nan doaropwe limilimo oh doudouloale. Ni Esekiel eh wia met, eh pwoson kehlailla. Pil patehng, doaropwe limilimo kihong rohng kehlail ehu me en wahlahng aramas ako. (Esek. 3:11) Ni Esekiel eh uhdahn wehwehkihla oh kamehlele Mahsen en Koht, e onopada en tepida kalohk oh pousehlahte lao e kanekehla eh pwukoa.—Pil kilang Melkahka 19:14.

15. Pwehn dadaurete, dahme kitail anahne ‘katengehdiong mohngiongitail’?

¹⁵ Pwehn dadaurete nan atail kalohk, kitail pil anahne mweidohng Mahsen en Koht en pousehlahte kakehlaka atail pwoson. Kitail anahne ‘katengehdiong mohngiongitail’ soahng koaros me Siohwa ketin mahsanihong kitail. Rahnwet Siohwa kin ketin mahseniong kitail sang nan sapwellime Mahsen Paipel. Dahme kitail kak wia pwe Mahsen en Koht en pousehlahte kamwakid atail madamadau, pepehm, oh wiewia kan?

16. Dahme kitail anahne wiahiong Mahsen en Koht, oh ia duwen atail kak kadirehkihla nan atail mohngiong?

¹⁶ Ni atail kin kang mwenge oh kadallehla, paliwaratail kan kin kehlailla. Oh ni atail kin onopki Mahsen en Koht oh doudouloale, atail pwoson kin kehlailla. Met ehu mehn kasukuhl me Siohwa ketin kupwurki kitail en sukuhlki. Siohwa ketin kupwurki kitail en ‘kadirehkihla kapehditail’ sapwellime Mahsen, me iei, en wehwehkihla mwahu sapwellime Mahsen. Kitail kak wia met sang ni kapakap, wadawad, oh doudouloale. Keieu, kitail kin kapakap pwehn kaunopada atail mohngiong pwehn ahneki sapwellimen Koht madamadau. Kitail eri kin wadek iren Paipel  ehu. Mwuri, kitail kin uhdi pwehn doudouloale, medemedewe mwahu, dahme kitail wadek. Eri ia imwilahn met? Ni atail kin kalaudehla atail doudouloale, atail wehwehkihla Mahsen en Koht pahn laudla oh e pahn kakehlakahla atail pwoson.

17. Dahme kahrehda e kesempwal en doudouloale dahme kitail wadek nan Paipel?

¹⁷ Dahme kahrehda e kesempwal en wadek Paipel oh doudouloale? En wia met kin kihong kitail kehl me kitail anahne pwehn kalohki rongen Wehio ahnsou wet oh pwehn kalohki rongen kadeik laud me ele kitail pahn kalohki ni ahnsou keren. Pil patehng, ni atail kin doudouloale sapwellimen Siohwa irair kaselel kan, atail nanpwungmwahu reh pahn ehute kehlailla. Imwilahn met, e pahn wia mehkot mem ong kitail, me iei, popohl oh nsenamwahu.—Mel. 119:103.

18. Dahme aramas akan nan atail wasahn kalohk anahne pohnese, oh dahme kahrehda?

¹⁸ Esekiel soukohp men, ahpw kaidehn kitail. Ahpw kitail koasoanehdi teng en pousehlahte kalohki sapwellimen Siohwa rohngo me e ketin ntingihedi nan sapwellime Mahsen lao doadoahk en kalohko imwisekla nin duwen me e ketin kupwurki. Ni ahnsou me rahnen kadeiko pahn leledo, sohte kahrepen aramas akan nan atail wasahn kalohk en nda me re sohte alehdi rongen kadeiko de me Koht ketin pohnsehsehla irail. (Esek. 3:19; 18:23) Ahpw, irail anahne pohnese me rohngo me kitail kalohki kohsang rehn Koht.

19. Dahme pahn kihong kitail kehl pwehn kapwaiada atail doadoahk en kalohk?

¹⁹ Dahme pahn kihong kitail kehl pwehn kapwaiada atail doadoahk en kalohk? Soahng siluh kohte me kakehlakahda Esekiel. Kitail kin pousehlahte kalohk pwehki kitail ese me Siohwa me ketin poaroneikitailla, sapwellimen Koht manaman me kakehlakakitailda, oh Mahsen en Koht me kakehlakakitailda. Sang ni sapwellimen Siohwa sawas, kitail mwekidki en kapwaiada atail doadoahk en kalohk oh dadaurete “lel ni imwi.”—Mad. 24:13.