1. Ia wehwehn en kolokolete atail koahiek en madamadau? (2 Timoty 4:5)

 NI MEHKOT eh wiawi oh kansensuwedihala kitail, e kakete kasonge atail loalopwoatohng Siohwa oh sapwellime pwihn. Ia duwen atail kak powehdi kahpwal pwukat? Kitail anahne kolokolete atail koahiek en madamadau oh pepehd, oh kesihnenda teng ni pwoson. (Wadek 2 Timoty 4:5.) Kitail kin kolokolete atail koahiek en madamadau sang ni atail kin meleilei, medewe mwahu, oh nantihong kilangwohng soahng kan ni ahlohte me Siohwa kin ketin wia. Ni atail wia met, atail pepehm kan sohte pahn kaunda atail madamadau.

2. Dahme kitail pahn koasoiapene nan iren onop wet?

² Nan iren onop en mwoweo, kitail koasoiapene kahpwal siluh me kitail kin lelohng likin mwomwohdiso. Nan iren onop wet, kitail pahn koasoiapene kahpwal siluh nan mwomwohdiso me kakete kasonge atail loalopwoatohng Siohwa. Kahpwal pwukat iei (1) ni riatail Kristian men eh wiahiong kitail mehkot sapwung, (2) ni atail ale kaweid laud, oh (3) ni atail apwalki wekidekla kan nan sapwellimen Siohwa pwihn. Ia duwen atail kak kolokolete atail koahiek en madamadau oh loalopwoatohngete Siohwa oh sapwellime pwihn ni atail lelohng soangen kahpwal pwukat?

3. Dahme kitail kakete wia ma riatail men wiahiong kitail mehkot sapwung?

³ Mie pak me riomw Kristian men, ele elder men me ahneki pwukoa, wiahiong uhk mehkot sapwung? Ele brothero sohte men kamedekihiukala. (Rom 3:23; Seims 3:2) Ahpw, eh wiewiao  kakete kansensuwedihiukala. Mwein ke kin medemedewe laud eh mwekido oh sohte kak meirla. Mwein ke pil medewe, ‘Ma brother men kak wia soahngo, met uhdahn sapwellimen Koht pwihn?’ Ih met me Sehdan men kitail en medewe. (2 Kor. 2:11) Soangen madamadau wet kak katohrekitailsang Siohwa oh sapwellime pwihn. Eri ma kitail pehm me riatail men wiahiong kitail mehkot sapwung, ia duwen atail kak kolokolete atail koahiek en madamadau oh soikala madamadau me Sehdan men kitail en ahneki?

4. Ia duwen Sosep eh kolokolete eh koahiek en madamadau ni rie ko ar wiahiong ih mehkot sapwung, oh dahme kitail kak sukuhlkihsang eh mehn kahlemeng? (Senesis 50:19-21)

⁴ Dehr kolokol omw lingeringer. Ni ahnsou me Sosep pwulopwul, rie pwutak laud ko wiahiong ih mehkot sapwung. Irail kailongki ih oh ekei irail men kemehla. (Sen. 37:4, 18-22) Mwuhr, irail netikihla ih nin duwen lidu men. Pwehki met, Sosep lelohng kahpwal laud me reireiki sounpar 13. Sosep kakete peidengki ma Siohwa uhdahn ketin poakohng ih. Oh e kakete medewe ma Siohwa ketin likidmelielahr ih ni ahnsou me e keieu anahne sawas. Ahpw Sosep sohte kolokol eh lingeringer. E kolokolete eh koahiek en madamadau oh meleilei. Ni ahnsou me e kakehr ikih rie ko, e sohte wia met, ahpw e kasalehda eh poakohng irail oh mahkohng irail. (Sen. 45:4, 5) Sosep kak wia met pwehki e medemedewe mwahu irairo. E sohte medewehte duwen eh kahpwal ko, ahpw e kin medemedewe dahme Siohwa ketin kupwurki. (Wadek Senesis 50:19-21.) Ia mehn kasukuhlo? Ma emen wiahiong uhk mehkot sapwung, dehr lingeringerda pahn Siohwa de medewe ma e ketin likidmelieiukala. Medemedewehte ia duwen eh kin ketin seweseiuk en dadaur pahn kahpwalo. Pil ehu, ni meteikan ar wiahiong uhk mehkot sapwung, song en powehkihdi limpoak arail soh unsek kan.—1 Pit. 4:8.

5. Ia duwen Miqueas eh kolokolete eh koahiek en madamadau ni meteikan ar wiahiong ih mehkot sapwung?

⁵ Medewehla dahme wiawihong emen elder nan South America me ede Miqueas. b E tamanda ehu ahnsowo me brother kan me ahneki pwukoa wiahiong ih mehkot sapwung. E nda: “I saikinte ahneki pwunod laud duwehte met. I uhdahn pwunodada oh I sohte kak meir nipwong. Sohte mehkot I kak wia.” Ahpw Miqueas kin kolokolete eh koahiek en madamadau oh nantihong kaunda eh pepehm kan. E kin kalapw kapakap oh peki rehn Siohwa en ketikihong ih sapwellime manaman oh kehl pwehn dadaurete. E pil kin onopki neitail sawasepen Paipel kan pwehn kak sewese ih. Ia mehn kasukuhlo? Ma riatail Kristian men wiahiong kitail mehkot sapwung, kitail en kolokolete atail meleilei oh song en kaunda atail madamadau sapwung. Ele ke sehse soangen irair dah me kahrehiong aramaso en nda de wia soahngo. Eri kapakapohng Siohwa oh peki en ketin seweseiuk en kin kilengwohng soahng kan ni ahlohte me aramaso kin wia. Omw wia met kak seweseiuk en medewe me riomw Kristiano uhdahn sohte men wiahiong uhk mehkot sapwung, oh ke kak mahkohng ih. (Lep. Pad. 19:11) Tamataman me Siohwa ketin mwahngih omw irairo oh e pahn ketikihong uhk kehl me ke anahne pwehn dadaur.—2 Kron. 16:9; Ekl. 5:8.

6. Dahme kahrehda e kesempwal en wehwehki me Siohwa kin ketin kapwungkitailla pwehki e ketin poakohng kitail? (Ipru 12:5, 6, 11)

⁶ Ale kaweid laud kak wia mehkot kamedek. Ma kitail medemedewehte atail nsensuwedlao, kitail kak tepida medewe me kaweido  sapahrek oh sohte kadoadoahk ong kitail. Met kak kerempwahla atail wehwehki mehkot me uhdahn kesempwal, me Siohwa kin ketin kapwungkitailla pwehki e ketin poakohng kitail. (Wadek Ipru 12:5, 6, 11.) Ahpw ma kitail kin mweidohng atail pepehm en kaunda kitail, kitail kin mweidohng Sehdan ahnsou mwahu en kasonge kitail. Sehdan mwahuki kitail en soikala kaweido oh, suwedsang met, en katohreikitailsang Siohwa oh mwomwohdiso. Ma ke alehdi kaweid laud, ia duwen omw kak kolokolete omw koahiek en madamadau?

7. (a) Nin duwen me kilelo kasalehda, ia duwen Siohwa eh ketin doadoahngki Piter mwurin eh pwungki ale kaweid? (b) Dahme ke sukuhlkihsang ahn Piter mehn kahlemeng?

⁷ Ale kaweid oh wiahda wekidekla kan me anahn. Pak tohto Sises ketin kapwungala Piter mwohn wahnpoaron teiko. (Mark 8:33; Luk 22:31-34) Ele met kahrehiong Piter en namenekla! Ahpw Piter loalopwoatohngete Sises. E pwungki kaweido oh sukuhl sang eh sapwung ko. Mwuhr, Siohwa ketin katingiheki Piter eh loalopwoat oh ketikihong ih pwukoa kesempwal kan nan mwomwohdiso. (Sohn 21:15-17; Wiewia 10:24-33; 1 Pit. 1:1) Dahme kitail kak sukuhlkihsang ahn Piter mehn kahlemeng? E mwahu ong kitail oh pil meteikan en dehr kin medemedewehte mwomwen atail nameneklao, ahpw en kin pwungki kaweido oh wiahda wekidekla kan me anahn. Ni atail wia met, met pahn kalaudehla atail kin doadoahk ong Siohwa oh riatail kan.

8-9. Mwurin Bernardo ale kaweid laud, ia eh pepehm nin tapio, ahpw dahme sewese ih en kapwungala eh madamadau?

⁸ Medewehla dahme wiawihong Bernardo, brother men nan Mozambique. E sohla wia elder. Ia ahn Bernardo pepehm nin tapio? E nda, “I uhdahn lingeringer pwehki I sohte mwahuki kaweid me I aleo.” E kin pwunodki dahme meteikan nan mwomwohdiso pahn medewehki ih. E koasoia: “Erein sounpwong tohto I anahne wekidala mwomwen ei kin kilengwohng kaweido oh pwurehng tepida likih Siohwa oh sapwellime pwihn.” Dahme sewese Bernardo en ahneki madamadau pwung?

⁹ Bernardo kapwungala eh madamadauo. E koasoia: “Ni ahnsou me I wia elder men, I kin doadoahngki Ipru 12:7 pwehn sewese meteikan ren ahneki madamadau pwung duwen sapwellimen Siohwa kaweid. Ahnsou wet I kin pein idek rehi, ‘Ihs me anahne kapwaiada  iren Paipel wet?’ Sapwellimen Siohwa ladu kan koaros oh pil ngehi.” Bernardo wiahda wekidekla teikan pwehn kalaudehla eh likih Siohwa oh sapwellime pwihn. E kalaudehla eh kin onop Paipel oh pil kalaudehla eh doudouloale dahme e kin wadek. Mendahki e pwunodkihte dahme rie Kristian kan medewehki ih, e kin iangete irail nan doadoahk en kalohk oh towehda mihting kan. Kedekedeo, Bernardo pil pwurehng idihdida nin duwen elder men. Ma ke ale kaweid laud duwehte Bernardo, song en dehr medemedewe laud mwomwen omw namenekla, ahpw pwungki kaweido, oh wiahda wekidekla kan me anahn. c (Lep. Pad. 8:33; 22:4) Ma ke wia met, ke kak kamehlele me Siohwa pahn ketin katingihiuk pwehki omw loalopwoatohng ih oh sapwellime pwihn.

10. Wekidekla dahieu me ele kasonge loalopwoat en ekei ohlen Israel ko?

¹⁰ Wekidekla kan nan sapwellimen Siohwa pwihn kak kasonge atail loalopwoat. Ma kitail sohte kanahieng, kitail pil kakete mweidohng wekidekla pwukat en katohreikitailsang Siohwa. Karasepe, medewehla ia duwen wekidekla ehu nan Kosonned en Moseso eh kakete kamwakid ekei mehn Israel ko. Mwohn Siohwa ketikihong irail Kosonnedo, tapwin peneinei kan kin wia dahme samworo kan kin wia. Irail kin wiliandi arail peneinei oh wiahda pei sarawi kan oh meirong ong Siohwa. (Sen. 8:20, 21; 12:7; 26:25; 35:1, 6, 7; Sohp 1:5) Ahpw ni ahnsou me Kosonnedo wiawihda, e sohla mweimwei tapwin peneinei kan en wia soahng pwukat. Siohwa ketin idihada samworo kan sang ahn Aaron peneinei pwehn wia meirong kan. Mwurin wekideklao wiawi, ma tapwin peneinei men me kaidehn kadaudok en Aaron tepida wia pwukoahn samworo, e kakete kamakamala. d (Lip. 17:3-6, 8, 9) Ia duwe, wekidekla wet seu kahrehiong Kora, Dadan, Apiram, oh ohl en Israel 250 ko en uhwongada Moses oh Aaron? (Nemp. 16:1-3) Kitail sehse uhdahn kahrepeo. Ahpw kitail ese me Kora oh irail ko me iangih sohte loalopwoatohngete Siohwa. Ma wekidekla kan nan sapwellimen Siohwa pwihn kasonge omw loalopwoat, dahme ke kak wia?

11. Dahme kitail sukuhlkihsang mehn kahlemeng en mehn Kohad ko?

¹¹ Utung wekidekla kan nan sapwellimen Siohwa pwihn. Erein mehn Kohad kan ar seiseiloak nan sapwtehn, irail kohwahki pwais uhdahn tohrohr ehu. Ehuehu ahnsou me mehn Israel kan pahn mweselda, ekei mehn Kohad ko pahn kin wahda kohpwahn inou lapo oh tieng mwohn aramas ako koaros. (Nemp. 3:29, 31; 10:33; Sos. 3:2-4) Met uhdahn wia pwais kaselel ehu! Ahpw soahng kan wekila ni mehn Israel ko ar kousoanla nan Sapwen Inowo. Kohpwahn Inowo solahr anahne wisikseli. Eri ni ahnsou me Solomon nanmwarkihla, ekei mehn Kohad ko ale pwukoahn sounkoul, ekei kin sile kehl en tehnpas sarawio, oh ekei kin apwalih wasahn nahk dipwisou kan. (1 Kron. 6:31-33; 26:1, 24) Paipel sohte kasalehda ma mehn Kohad ko kaulim de men ale pwukoa kesempwal teikan pwehki arail pwukoahn mwoweo uhdahn kesempwal. Dahme kitail kak sukuhlkihsang met? Utung ni mohngiong unsek wekidekla kan me sapwellimen Siohwa pwihn wiahda, iangahki  wekidekla kan me kakete pidada omw pwukoa. Perenki pwukoa sohte lipilipil me ke alehdi. Tamataman me kaidehn omw pwukoau me kahrehiong uhk en kesempwal ong Siohwa. Siohwa kin ketin kesempwalki omw peik laudsang pwukoa me ke ahnekio.—1 Sam. 15:22.

12. Ia ahn Zaina pepehm ni ahnsou me e sohla papah nan Pedel?

¹² Medewehla mehn kahlemeng en Zaina, sister men me alehdi ehu pwukoa tohrohr oh sohla wia pwukoa kaselel me e ahneki mwoweo. Mwurin eh papah Pedel daulih sounpar 23, e wiahla emen pioneer tohrohr. E koasoia: “I uhdahn pwuriamweila ni ei pwukoau eh wekila. I pehm me sohla katepei oh I kin pein idihdek rehi, ‘Sapwung dah me I wiahda?’” E kansensuwed me ekei rie Kristian ko nan mwomwohdisou pil kalaudehla eh nsensuwedo ni arail ndaiong: “Mwein ma ke wiahda mwahu, ke pahn mihmihte nan Pedel.” Erein ahnsou ehu, Zaina uhdahn mworusala oh kin sengiseng nipwong koaros. Ahpw e koasoia: “I sohte mweidohng pein ngehi en peikasalki sapwellimen Siohwa pwihn de sapwellime limpoak.” Ia duwen Zaina eh kolokolete eh koahiek en madamadau?

13. Dahme Zaina wia pwehn powehdi eh madamadau sapwung kan?

¹³ Zaina kak powehdi eh madamadau sapwung ko. Ia duwen? E wadek artikel kan sang neitail sawasepen Paipel kan me pidada eh kahpwalo. Karasepe, e diarada artikel ehu me koasoia duwen sounnting en Paipelo Mark me ele ahneki soangen pepehmohte ni ahnsou me e alehdi ehu pwukoa tohrohr. Zaina koasoia, “Ahn Mark mehn kahlemengo duwehte wini me sewese ie en powehdi ei mwoaros.” Zaina pil karanihete kompoakepah kan. E sohte katohrehla ih, de poakehla pein ih. E wehwehkihla me sapwellimen Siohwa manaman kin kaukaweid pilipil kan me sapwellime pwihn kin wiahda, oh me irail kan me kin tiengla mwowe uhdahn nsenohki ih. E pil wehwehki me dahme keieu kesempwal ong sapwellimen Koht pwihn iei me sapwellime doadoahk en pweida.

14. Wekidekla dahieu me Vlado apwalki ahnla oh dahme sewese ih?

¹⁴ Vlado, emen elder sang Slovenia me sounpar 73, uhdahn apwalki ni ahnsou me eh mwomwohdisou oh pil ehu mwomwohdiso patpene oh re sohla doadoahngki Wasahn Kaudok me e kin iango. E nda: “I sohte wehwehki dahme  kahrehda se sohla doadoahngki Wasahn Kaudok kaselelo. I nsensuwedkihla met pwehki se ahpwtehn onehda sapahl Wasahn Kaudoko. Ngehi emen kapinte oh I iang wiahda ekei kepwehn nan Wasahn Kaudoko. Pil ehu, patpenehn mwomwohdiso ko kahrehda en mie wekidekla tohto me apwal ong kiht me mah kan.” Dahme sewese Vlado en utung koasoandio? E koasoia: “En ahnla wekidekla kan me sapwellimen Siohwa pwihn wiahda kin ahnsou koaros wahdo kapai. Wekidekla pwukat kin kaunopkitailda ong wekidekla laud kan ni ahnsou kohkohdo.” Ke kin apwalki ni ahnsou me mwomwohdiso kan patpene de omw pwukoa kan wekila? Ke kak kamehlele me Siohwa kin ketin wehwehki omw pepehm. Ni omw kin utung wekidekla pwukat oh loalopwoatohngete Siohwa oh pwihn me e ketin doadoahngki, e pahn uhdahn ketin kapaiukada.—Mel. 18:25.

15. Ia duwen atail kak kolokolete atail koahiek en madamadau ni atail lelohng kahpwal kan nan mwomwohdiso?

¹⁵ Ni atail kerenlahng ni imwin koasoandi wet, kitail kak kasik me kahpwal kan pahn kohsang nan mwomwohdiso. Kahpwal pwukat kak kasonge atail loalopwoatohng Siohwa. Eri kitail en kolokolete atail koahiek en madamadau. Ma ke pehm me riomw Kristian men wiahiong uhk mehkot sapwung, dehr nsensuwedla. Ma ke alehdi kaweid laud, dehr medemedewehte omw nameneklao, pwungki ale kaweido, oh wiahda wekidekla kan me anahn. Oh ni sapwellimen Siohwa pwihn eh wiahda wekidekla kan me kin apwal ong uhk, pwungki oh peikiong kaweido sang ni mohngiong unsek.

16. Ia duwen omw kak kolokolete omw likih Siohwa oh sapwellime pwihn?

¹⁶ Ke kak likilikihte Siohwa oh sapwellime pwihn ni ahnsou me omw loalopwoat lelohng songosong. Ahpw pwehn wia met, ke anahne kolokolete omw koahiek en madamadau, me iei en meleilei, medemedewe mwahu, oh kilangwohng soahng kan ni ahlohte me Siohwa kin ketin wia. Koasoanehdi teng en onopki duwen irail kan nan Paipel me kin dadaur pahn soangen kahpwalohte, oh doudouloale arail mehn kahlemeng. Kapakapki sapwellimen Siohwa sawas. Oh dehr katohreiuksang mwomwohdiso. Eri, sohte lipilipil dahme pahn wiawi, Sehdan sohte pahn kak katohreiuksang Siohwa oh sapwellime pwihn.—Seims 4:7.