E WIA pahngok karuwaru oh sansal ehu: “Sounkalohki Wehio kan nan Britain​—Kumwail Pirida!!” (Informant, * December 1937, wiawihda ong London) E pil kapatahiong kisin oaralap kesempwal ehu: “Sohte Kasalepen Kekeirda Laud Erein Sounpar Eisek.” Ripoht en kalohk ong pahr 1928 lel 1937 me mi ni kilin doaropweo kadehdehda duwen met.

Dahme kahrehda doadoahk en kalohk eh sohla kekeirda nan Britain? E sansal me mwomwohdiso kan solahr arail ngoang oh kin pwakpwakihte koasoandi ko me wiawihda mahs. Patehng met, ohpis en Sounkadehdehn Siohwa kan wasao koasoanehdi me wasahn kalohk en wasao itar ongete pioneer 200, me kin doadoahk wasa me aramas malaulau mie a kaidehn rehn mwomwohdiso kan. Eri, ohpiso padahkihong irail kan me pahn wiahla pioneer me solahr itar wasahn kalohk nan Britain oh kangoange irail en kohla papah sahpw teikan nan Iurop. Pioneer tohto keseusang Britain kohla sahpw kan duwehte France, mendahki re ekiste ese de sohte douluhl ese lokaiahn wasao.

Oaralapo nan Informant en pahr 1937 koasoanehdi mehn akadei ehu ong pahr 1938, me iei en wiahda awa rar! Mehn akadei wet kak pweida ma sounkalohk kan pahn wiahda awa 15 nan sounpwong ehu oh pioneer kan awa 110. Iren sawas ko pil iangahki en koasoanehdi pwihn en kalohk kan me kin kalohk awa limau nan ekei rahn oh me kin wiahda koasoandi en pwurehng pwurala rehn irail kan me men rong, ahpw mehlel erein ni soutik kan nan wihk kan.

Koasoandi ong kalohk kapw wet kamwakid me tohto. Hilda Padgett * nda, “E wia pahngok ehu sang poasen kaun en Sounkadehde kan, me pali laud en kiht kin kasikasik oh me mwuhr imwila mwahu.” Sister E. F. Wallis nda: “Koasoandi en wia awa limau nan rahn ehu uhdahn mwahu! E uhdahn kaperen en doadoahngki pali laud en omw ahnsou rahn ehu pwon pwehn papah Kauno. . . . Mwein se kin pwangada ni at pwurodo, ahpw ia duwe, se kin peren? Ei uhdahn!” Stephen Miller, me wia mwahnakapw men ahnsowo, pil ahneki pepehm en karuwaru oh mwekidki pahngoko. E men wia met pwe e men isaneki eh ahnsou mwahu! E tamanda pwihn kan me kin tangahki pwaisikel rahn ehu pwon nan kalohk oh ni soutik kan, erein ahnsoun karakar (summer), re kin rong padahk kan me rekordi. Ni ngoang, re kin iang kapar weuwa sain kan oh kalohk nanial kihkihla makasihn.

Informant pil kihda pahngok kapw ehu: “Se anahne karis en pioneer meh 1,000.” Koasoandi kapw ehu ong wasahn kalohk wehwehki me pioneer kan solahr pahn tohrohr sang mwomwohdiso oh wia doadoahk en kalohk, ahpw re pahn uhd iang mwomwohdiso kalohk oh pil utung oh kangoange irail. Joyce Ellis nda: “Riatail Kristian tohto tehkada me  irail anahne pioneer. Mendahki I sounparte 13 ahnsowo, ih met me I men wia; I men pioneer.” E kapwaiada eh mehn akadeio nan July 1940, ni eh sounpar 15. Peter, me mwuhr pwoudikihda Joyce, rong pahngok wet en “Pirida,” oh kahrehiong en “tepida medemedewe en pioneer.” Nan June 1940, ni eh sounpar 17, e tangahki pwaisikel mwail 65 kohla Scarborough pwehn wia eh pwukoa kapw en pioneer.

Cyril oh Kitty Johnson wia pioneer kapw kei me kin kalapw tounmetei. Ira koasoanehdi en netikihla imwarao oh ara kepwe kan pwehn apwalih ira nan doadoahk en pioneer. Cyril uhdihsang eh doadoahk en mwohnio, oh mwurin sounpwong ehu ira onopadahngehr pioneer. E nda: “Se uhdahn kamehlele me se kak wia met. Se wia met ni peren.”

Ni pioneer kan ar uhdahn tohtohla, brother koahiek kan kin medemedewe ia ahl mwahu kan en apwalih karis wet me wie kekeirda. Jim Carr, me wia sounapwalih me kin seiloak nan pahr 1938, idawehn kaweid en koasoanehdi wasa kan nan kahnimw kan ong pioneer kan en kousoan ie. Kangoang kohwong pwihn en pioneer kan en kousoanpene oh doadoahkpene pwehn katikala pweinen soahng kan me re kin doadoahngki. Nan Sheffield, re kin pwain ihmw laud ehu me mi pahn epwelpen brother koahiek men. Mwomwohdisohn wasao toukihda neirail mwohni oh kepwehn nan ihmw kan. Jim nda: “Koaros doadoahkpene pwe met en kak pweida.” Pioneer ehk, me kin doadoahk laud, kousoan wasao oh re kin kolokolte arail koasoandi en kaudok. “Ni mwengehn menseng koaros re kin ehukihpene iren rahn,” oh “rahn koaros pioneer ko kin kohla ni arail wasahn kalohk ni soangsoangen wasa kan nan kahnimwo.”

Sounkalohk oh pioneer kan kapwaiada pahngoko. Irail lel arail mehn akadeio en wiahda awa rar nan pahr 1938. Ni mehlel, ripoht kan kasalehda kekeirda laud nan wiepe koaros me pid doadoahk en kalohk. Nan sounpar limau, nempehn sounkalohk kan nan Britain laudla pak siluh. Arail pwurehng nsenohkihda doadoahk en kalohki Wehio kakehlakahda sapwellimen Siohwa aramas akan en dadaurete pahn kahpwal kan en mahwen nan pahr kan me kohkohdo.

Rahnwet, pioneer kan nan Britain pil pwurehng kekeirda laud ni mahwen en Armakedon eh wie kerendohr. Nempehn pioneer kan uhdahn laudsang sounpar eisek samwalahro. Nempe wet lel 13,224 nan October 2015. Pioneer pwukat uhdahn wehwehki me arail doadoahngki pali laud en arail ahnsou nan kalohk iei ehu ahl me keieu mwahu en doadoahngki arail mour.