1. Nin duwen me Malakai 3:16 (NW) mahsanih, pwuhk dahieu me Siohwa ketin ntintingih oh dahme pwuhk wet audaudki?

 EREIN sounpar kid kid kei, Siohwa kin ketin ntintingih pwuhk tohrohr ehu. Pwuhk wet audaudki ahd kan, me tepikihda eden tepin sounkadehde lelepeko, Eipel. * (Luk 11:50, 51) Sangete ahnsowo, Siohwa ketin kapakapatahiong ahd akan nan pwuhko, oh rahnwet, mie eden aramas rar rar kei nan pwuhko. (Wadek Malakai 3:16, NW.) Nan Paipel, pwuhk wet adaneki “pwuhken mour.”​—Kaud. 3:5; 17:8.

2. Eden ihs me ntingdi nan pwuhken mour, oh ia duwen adatail kan eh kak ntingdi nan pwuhko?

² Pwuhk tohrohr wet audaudki eden irail koaros me kin kaudokiong Siohwa ni wahu, oh me kin poakohng mwareo. Irail ahneki koapworopwor en mour soutuk. Rahnwet, adatail kan kak ntingdi nan pwuhko ma kitail kakairada nanpwungmwahu keren rehn Siohwa sang ni atail pwoson meirong en pweinen pweipwei sapahl en sapwellime Ohlo, Sises Krais. (Sohn 3:16, 36) Kitail koaros men adatail en ntingdi nan pwuhko, sohte lipilipil ma kitail ahneki koapworopwor en mour nanleng de nin sampah.

3-4. (a) Kitail pahn mour kohkohlahte ma adatail kan ntingdi nan pwuhken mour ahnsou wet? Menlau kawehwehda. (b) Dahme kitail pahn koasoiapene nan iren onop wet oh mehn mwuhr?

 ³ Ia duwe, met wehwehki me koaros me adarail kan ntingdi nan pwuhko uhdahn pahn ale mour soutuk? Kitail kak diar pasapeng wet ni atail tehk dahme Siohwa ketin mahsanihong Moses nan Eksodus 32:33. Siohwa ketin mahsanih: “Ihte me I pahn irisasang nan nei pwuhk, me kin wiahda dihp ong ie.” Eri, ahd kan me mi nan pwuhko kak irihrsang, mwomwen me Siohwa ketin doadoahngki pinsel ni eh ketin ntingihedi ahd pwukat nin tapio. (Kaud. 3:5) Kitail anahne nantihong pwe adatail kan en mihmihte nan pwuhko lao e ntingkihdi pehn.

⁴ Met kak kahrehiong kitail en idek peidek kan. Karasepe, dahme Paipel mahsaniheki duwen irail kan me adarail kan ntingdi nan pwuhken mour oh pil iangahki irail kan me adarail kan sohte ntingdi loale? Iahd me irail kan me adarail mi nan pwuhko ar pahn alehdi mour soutuk? Ia duwen irail kan me mehla ahpw sohte ahneki ahnsou mwahu en esehla duwen Siohwa? Adarail kan kak ntingdi nan pwuhko? Peidek pwukat pahn pasapengla nan iren onop wet oh mehn mwuhr.

EDEN IHS ME MI NAN PWUHKO?

5-6. (a) Nin duwen me sansalda nan Pilipai 4:3, eden ihs me ntingdi nan pwuhken mour? (b) Iahd me adarail ko pahn ntingdi kohkohlahte nan pwuhken mour?

⁵ Eden ihs me ntingdi nan pwuhken mour? Pwehn sapengala peidek wet, kitail pahn koasoiapene pwihnen aramas limau. Nan pwihn pwukat, eden ekei irail ntingdi nan pwuhken mour, ah ekei soh.

⁶ Keieun pwihno wiawihkihda irail kan me pilipildahr en iang Sises kaunda sang nanleng. Ia duwe, adarail ko ntingdier nan  pwuhken mour ahnsou wet? Ei. Nin duwen me wahnpoaron Pohl ndaiong ‘ienge tohndoadoahk’ kan nan Pilipai, eden irail me keidi kan me ale luhk en iang Sises kaunda, ntingdier nan pwuhken mour. (Wadek Pilipai 4:3.) Pwe adarail ko en mihmihte nan pwuhko, irail anahne lelepekte. Mwurin arail uhdahn kileldier, adarail kan solahr pahn irihrsang nan pwuhken mour. Met pahn wiawi mwohn irail mehla de mwohnte kahn kamakam kowahlap eh tepida.​—Kaud. 7:3.

7. Sang dahme kitail wehwehki nan Kaudiahl 7:16, 17, iahd me eden pokon kalaimwun en sihpw teikan pahn ntingdi kohkohlahte nan pwuhken mour?

⁷ Keriaun pwihno wiawihkihda pokon kalaimwun en sihpw teikan. Ia duwe, adarail kan ntingdi nan pwuhken mour ahnsou wet? Ei. Adarail pahn mihmihte nan pwuhken mour mwurin arail pitsang Armakedon? Ei. (Kaud. 7:14) Sises mahsanih me irail pwukat me rasehng sihpw kei pahn kohlahng “mour soutuk.” (Mad. 25:46) Ahpw irail kan me pitsang Armakedon sohte pahn mwadangete ale mour soutuk. E pahn mwomwen me adarail pahn ntingtingte ni pinsel nan pwuhken mour. Erein Kaundahn Pahr Kido, Sises “pahn ketin wia sileparail oh kahreiraillahng ni utuhnpihl en mour.” Irail kan me kin peikiong en Krais kaweid oh mwuhr dierekda me irail lelepekte ong Siohwa, adarail kan pahn uhdahn ntingdi kohkohlahte nan pwuhken mour.​—Wadek Kaudiahl 7:16, 17.

8. Eden ihs me sohte pahn ntingdi nan pwuhken mour, oh dahme pahn wiawihong irail?

⁸ Kesiluh en pwihno wiawihkihda kuht kan me pahn kasohrala nan Armakedon. Adarail kan sohte mi nan pwuhken mour. Sises mahsanih me irail “pahn kolahng lopla soutuk.” (Mad. 25:46) Pahn sapwellimen Koht kaweid, Pohl padahkihong kitail me “irail pwukat pahn pakadeingkihda kasohrala soutuk.” (2 Des. 1:9; 2 Pit. 2:9) Oh koaros me kin nsenki lahlahwe sapwellimen Koht manaman erein poadopoad en aramas, pil sohte pahn ale mour soutuk, ahpw irail pahn sohrala kohkohlahte. Irail uhdahn sohte pahn iasada. (Mad. 12:32; Mark 3:28, 29; Ipru 6:4-6) Met kitail pahn kilang pwihn riau me pahn iasada nin sampah.

IRAIL KAN ME PAHN IASADA

9. Nin duwen me Wiewia 24:15 mahsanih, pwihn riau dah me pahn iasadahng nin sampah, oh ia wekpeseng en pwihn riau ko?

⁹ Paipel mahsanih duwen pwihn riau me pahn iasada oh ahneki koapworopwor en mour soutuk nin sampah, irail iei “me pwung kan oh “me sapwung kan.” (Wadek Wiewia 24:15.) “Me pwung kan” iei irail kan me kin papah Siohwa ni lelepek ni ahnsou me irail momour. Ahpw “me sapwung kan” sohte kin papah Siohwa ni lelepek. Ni mehlel, pali laud en ahnsou arail wiewia kan sohte pwung. Pwehki pwihn riau pwukat pahn iasada, kitail kak nda me adarail kan ntingdi nan pwuhken mour? Pwehn sapengala peideko, kitail pahn koasoiapene duwen ehuehu pwihn.

10. Dahme kahrehda me “pwung kan” pahn iasada, oh pwais kaselel dah me ekei irail pahn ahneki? (Pil kilang “Peidek kan Sang Sounwadawad kan” nan Kahn Iroir wet me pid kaiasada nin sampah.)

¹⁰ “Me pwung kan” iei kapahieu en pwihno. Mwohn arail mehla, adarail kan ntingdier nan pwuhken mour. Ia duwe, adarail ko irihrsang nan pwuko ni ahnsou me re mehla? Soh, pwehki irail ‘momourte’ nan sapwellimen Siohwa madamadau. Siohwa iei “Koht emen, kaidehn Koht en me  melahr akan, ahpw Koht en me momour akan, pwe irail koaros kin momouriong ih.” (Luk 20:38) Met wehwehki me ni ahnsou me me pwung kan pahn iasadahn mour nin sampah, adarail kan pahn mi nan pwuhken mour, mendahki e ntingkihdi pinsel ni tapio. (Luk 14:14) Ekei irail pwukat me iasada pahn ale pwais kaselel en papah nin duwen “lapalap kei nan sampah pwon.”​—Mel. 45:16, NW.

11. Dahme “me sapwung kan” pahn anahne sukuhlki mwohn adarail kan kak ntingdi nan pwuhken mour?

¹¹ Medewehla kelimau en pwihno, “me sapwung kan.” Ele pwehki irail sohte ese sapwellimen Koht kosonned kan, irail sohte kin mourki mour pwung mwohn arail mehla. Eri adarail ko sohte ntingdi nan pwuhken mour. Ahpw Koht pahn ketin kaiasirailda pwehn ketikihong irail ahnsou pwe adarail kan en kak ntingdi nan pwuhken mour. Irail “me sapwung” pwukat pahn anahne sawas laud. Mwohn arail mehla, ekei irail kin wia soahng kan me uhdahn suwed. Eri, irail pahn anahne sukuhlki duwen arail pahn mour pahrekiong sapwellimen Siohwa koasoandi pwung kan. Pwehn sewese irail en wia met, Wehin Koht pahn kaweid doadoahk en kasukuhl me keieu laud me pahn wiawi nin sampah.

12. (a) Ihs me pahn kasukuhlih me sapwung kan? (b) Dahme pahn wiawihong irail ko me sohte men kapwaiada dahme re sukuhlki?

¹² Ihs me pahn kasukuhlih me sapwung kan? Pokon kalaimwuno oh me pwung kan me pahn iasada. Pwe eden me sapwung kan en kak ntingdi nan pwuhken mour, irail pahn anahne kakairada nanpwungmwahu keren rehn Siohwa oh inoukihong ih arail mour. Sises Krais oh me keidi kan pahn tetehk kanahieng sang nanleng pwehn kilang ia duwen me sapwung kan ar mwekidki dahme irail sukuhlki. (Kaud. 20:4) Emen me sohte men ale soangen sawaso pahn sohrala​—mehnda ma irail lel sounpar 100.  (Ais. 65:20) Siohwa oh Sises kak ketin mwahngih audepen mohngiong en aramas, oh ira sohte pahn ketin mweidohng mehmen en kahrehda kahpwal nan sampah kapwo.​—Ais. 11:9; 60:18; 65:25; Sohn 2:25.

IASADAHNG MOUR OH KADEIK

13-14. (a) Mahso, ia duwen atail wehwehki sapwellimen Sises mahsen ko nan Sohn 5:29? (b) Dahme kitail en wehwehkihla duwen mahsen pwukat?

¹³ Sises pil mahsanih duwen irail kan me pahn iasada nin sampah. Karasepe, e mahsanih: “Ahnsou ehu pahn kohdo me koaros me mihmi nan sousoun kataman kan pahn rong kapitie oh pedoisang, irail me wiewia me mwahu en iasadahng mour, a irail me wiewia me suwed en iasadahng kadeik.” (Sohn 5:28, 29) Ia wehwehn eh mahsen ko?

¹⁴ Mahso, kitail kin wehwehki me en Sises mahsen ko kin dokedoke wiewiahn me iasada kan mwurin arail iasada; me iei, ekei pahn iasada oh wia me mwahu, a ekei pahn iasada oh wia me suwed. Ahpw tehk me Sises sohte mahsanih me irail me pedoisang nan sousoun kataman kan pahn wia soahng mwahu kan de pahn wia soahng suwed kan. Eh mahsen kan kin pidada dahme wiawiher. E kin mahmahsanih duwen irail kan me “wiewia me mwahu” oh irail kan me “wiewia me suwed.” Met kasalehda me wiewia pwukat wiawiher mwohn arail mehla. Met pwehki e sohte mweimwei emen pahn wia soahng suwed kan nan sampah kapwo. Me sapwung kan kin wia soangen suwed pwuko mwohn arail mehla. Eri, ia duwen atail kak wehwehki mahsen en Sises ko me pid “iasadahng mour” oh “iasadahng kadeik”?

15. Ihs me pahn iang “iasadahng mour,” oh dahme kahrehda?

¹⁵ Me pwung kan me kin wia me mwahu mwohn arail mehla, pahn “iasadahng mour” pwehki adarail kan pahn miher nan pwuhken mour. Met wehwehki me kaiasadahn “irail me wiewia me mwahu” me Sohn 5:29 mahsanih duwe iei kaiasadaohte en “me pwung kan” me Wiewia 24:15 pil mahsanih. Kawehwe wet kin pahrekiong dahme Rom 6:7 mahsanih: “Emen me kin mehla maiaudahsang dipe.” Eri, ni irail me pwung pwukat ar mehla, Siohwa ketin mahkohngehr diparail kan, ahpw e pahn ketin tamatamante soahng koaros me re kin wia ni lelepek ni ahnsou me irail momour. (Ipru 6:10) Ei mehlel, me pwung pwukat pahn anahne lelepekte pwe adarail kan en mihmihte nan pwuhken mour.

16. Ia wehwehn “iasadahn kadeik”?

¹⁶ Ia duwen irail kan me kin wia soahng suwed kan mwohn arail mehla? Mendahki irail maiaudahsang diparail kan ni arail mehla, irail sohte kin papah Siohwa ni lelepek ni ahnsou me irail wie momour. Adarail ko sohte ntingdi nan pwuhken mour. Kahrehda, kaiasada en “irail me wiewia me suwed” iei kaiasadaohte me wiawihong “me sapwung kan” me Wiewia 24:15 mahsanih duwe. Arail iasada iei “iasadahng kadeik.” * Met wehwehki me Sises pahn ketin tetehk kanahieng wiewiahn me sapwung kan. (Luk 22:30) Mwurin ahnsou ehu, Sises pahn mwahngiher ma adarail kan pahn warohng ntingdi nan pwuhken mour. Ihte ma irail me sapwung pwukat soikala arail wiewia suwed kan en mahs oh inoukihong Siohwa arail mour, Siohwa pahn ketin ntingihedi adarail kan nan pwuhken mour.

17-18. Dahme irail koaros me iasadahng nin sampah pahn anahne wia, oh “wiewia” dah kan me Kaudiahl 20:12, 13 mahsanih duwe?

 ¹⁷ Sohte lipilipil ma mwoweo irail wia aramas pwung de sapwung kei, irail me iasada kan pahn anahne peikiong kosonned kan me mi nan pwuhk kapwo me pahn papahkpeseng erein pahr kido. Wahnpoaron Sohn kawehwehda dahme e kilangada nan kaudiahlo: “I kilangada me melahr akan, me lapalap akan oh me tikitik kan, me kesikesihnen mwohn mwoahlo, oh pwuhk kan papahkpeseng. Ahpw pil ehu pwuhk papahkpeseng; iei pwuhken mour. Me melahr akan ahpw pakadeingkihda soahng kan me ntinting nan pwuhk ko nin duwen arail wiewia kan.”​—Kaud. 20:12, 13.

¹⁸ “Wiewia” dah kan me me iasada kan pahn pakadeingkihda? Ia duwe, arail wiewia kan me irail kin wia mwohn ar mehla? Soh! Tamataman me irail maiaudasangehr ar dihp en mahs kan ni ar mehla. Eri wasaht, “arail wiewia kan” sohte kak wehwehki arail wiewiahn mahs. Ahpw e kin dokedoke arail wiewia kan me pahn sansalda sang arail mwekidki kasukuhl me irail pahn ale nan sampah kapwo. Pil ohl lelepek kan duwehte Noha, Samuel, Depit, oh Daniel pahn anahne sukuhlki duwen Sises Krais oh kasalehda arail pwoson sapwellime meirongo. Ma ohl pwukat anahne sukuhlki soahng tohto, me sapwung kan pahn anahne sukuhlki soahng tohtohsang!

19. Ia pahn imwilahn irail ko me soikala ahnsou mwahu wet?

¹⁹ Dahme pahn wiawihong irail kan me soikala ahnsou mwahu wet? Kaudiahl 20:15 padahkihong kitail: “Mehmen me ede sohte nting nan pwuhken mour lekdekiong nan lehn kisiniei.” Ei, irail pahn sohrala douluhl kohkohlahte. Eri, ia uwen eh kesempwal en tehk mwahu me adatail kan ntingdi nan pwuhken mour oh en mihmihte mwo!

20. Doadoahk kaperen dahieu me pahn wiawi erein Kaundahn Pahr Kido? (Menlau kilang kilel ni kilin Kahn Iroir wet.)

²⁰ Ia uwen eh pahn wia ahnsou kaperen ehu erein Kaundahn Pahr Kido! Ahnsowo, sapwellimen Siohwa aramas akan pahn wia doadoahk en kasukuhl me keieu laud nan sampah. E pil pahn wia ahnsou ehu me petehkpen wiewiahn me pwung kan oh sapwung kan pahn wiawi. (Ais. 26:9; Wiewia 17:31) Ia duwen doadoahk en kasukuhl wet eh pahn wiawi? Iren onop en mwuhr pahn sewese kitail en wehwehki oh kalahnganki doadoahk kaselel wet.