1. Soahng kaperen dah kan me kitail kasikasik pahn wiawi erein Kaundahn Pahr Kido?

 IA UWEN kaperen en ahnsowo me kaiasadahn aramas akan pahn tepida wiawi nin sampah erein Kaundahn Krais Pahr Kido! Koaros kin kasikasik en pwurehng kilang irail kan me re poakohng me mehla. Siohwa pil ketin sapwellimanki soangen pepehm wet. (Sohp 14:15) Medewehla peren laud me koaros nin sampah pahn ahneki ni ahnsowo. Nin duwen me kitail sukuhlki nan iren onop en mwoweo, “me pwung kan,” me adarail kan ntingdi nan pwuhken mour, pahn “iasadahng mour.” (Wiewia 24:15; Sohn 5:29) Ele me tohto me kitail poakohng me mehla pahn iang irail kan me iasada mwurinte Armakedon. * Patehng met, “me sapwung kan,” duwehte irail me sohte ahneki ahnsou mwahu en esehla Siohwa de papah ih ni lelepek mwohn arail mehla, pahn “iasadahng kadeik.”

2-3. (a) Nin duwen me Aiseia 11:9, 10 mahsanih, doadoahk dahieu me pahn wiawi me keieu laud nan poadopoad en aramas? (b) Dahme kitail pahn koasoiapene nan iren onop wet?

² Irail pwukat koaros me iasada pahn anahne ale kasukuhl. (Ais. 26:9; 61:11) Eri, doadoahk en kasukuhl me keieu laud nan poadopoad en aramas pahn wiawi. (Wadek Aiseia 11:9, 10.) Dahme kahrehda? Ehu, pwehki me sapwung  kan me iasada pahn anahne sukuhlki duwen Sises Krais, Wehin Koht, pweinen pweipwei sapahlo, oh kesempwalpen mwaren Siohwa oh sapwellime pwuhng en kaunda. Pil irail me pwung kan pahn anahne sukuhlki dahme Siohwa ekisekis ketin padahkihong sapwellime aramas akan duwen kupwure ong sampah. Ekei me lelepek pwukat mehla mwohn Paipel kaneknekla. Me pwung kan oh me sapwung kan koaros pahn anahne sukuhlki soahng tohto.

³ Nan iren onop wet, kitail pahn koasoiapene peidek pwukat: Ia duwen doadoahk en kasukuhl laud wet eh pahn wiawi? Ia duwen mwekid en aramas akan ong doadoahk wet eh pahn koasoanehdi ma adarail kan pahn ntingdi kohkohlahte nan pwuhken mour de soh? Pasapengpen peidek pwukat kesempwal ong kitail rahnwet. Kitail pahn kilang me ekei kokohp kapwuriamwei kan me pwuhken Daniel oh Kaudiahl kasalehda pahn sewese kitail en wehwehki mwahu dahme pahn wiawi ni ahnsou me me melahr kan pahn iasada. Keieu, kitail pahn koasoiapene mwekid kapwuriamwei kan me Daniel 12:1, 2 kohpada.

4-5. Dahme Daniel 12:1 mahsanihki duwen ahnsoun imwio?

⁴ Wadek Daniel 12:1, NW. * Pwuhken Daniel kasalehda kairekdi en soahng kapwuriamwei kan me pahn wiawi erein imwin ahnsou. Karasepe, Daniel 12:1 kasalehda me Maikel, me iei Sises Krais, kin “kesikesihnen pwehki [sapwellimen Koht] aramas akan.” Kokohp wet tepida pweida nan pahr 1914 ni ahnsou me Sises ketin idihdida pwehn wia Nanmwarki en Wehin Koht nanleng.

⁵ Ahpw tohnlengo pil padahkihong Daniel me Sises pahn ketin “mwekid” erein “ahnsou apwal ehu pahn wiawi me saikinte wiawi sangete ahnsou me miehla wehi ehu lao lel ahnsowo.” “Ahnsou apwal” wet iei “kahn kamakam kowahlap” me Madiu 24:21 mahsanih duwe. Sises ketin mwekid, de ketin pere sapwellimen Koht aramas akan ni kaimwiseklahn imwin ahnsou apwalo, de ni Armakedon. Pwuhken Kaudiahl kahdaneki irail pwukat ‘pokon kalaimwun ehu me kohieisang nan kahn kamakam kowahlapo.’​—Kaud. 7:9, 14.

6. Dahme wiawi mwurin pokon kalaimwuno pitsang kahn kamakam kowahlap? Menlau kawehwehda. (Pil menlau kilang nan Kahn Iroir wet oaralapo “Peidek kan Sang Sounwadawad kan” me pid kaiasada ong mour nin sampah.)

⁶ Wadek Daniel 12:2. Dahme pahn wiawi mwurin pokon kalaimwuno ar pitsang ahnsou apwalo? Mwoweo, kitail kin medewe me iretikitik wet kin dokedoke kaiasada ong nanleng de laudlahn doadoahk en kalohko me sounuhwong kan kereniong kauhdi nan pahr 1918. * Ahpw met kitail wehwehki me mahsen pwukat kin dokedoke kaiasadahn me melahr kan me pahn wiawi nan sampah kapwo. Dahme kahrehda kitail kak ndahki met? Lokaia kan me kadoadoahk ni tepin Paipel eh ntingdi uhdahn doadoahngki lepin lokaiao “pwelpar” nan Sohp 17:16 oh Daniel 12:2. Ihme kahrehda kitail kak nda me Daniel 12:2 kin koasoakoasoia kaiasadao me pahn wiawi mwurin kaimwiseklahn imwin rahn kan oh mwurin mahwen en Armakedon.

7. (a) Ia wehwehn ekei ar pahn iasadahng “mour soutuk”? (b) Ia duwen met eh wia “iasada me mwahusang” iasadahn ekei aramas mahso?

 ⁷ Ahpw ia wehwehn Daniel 12:2 ni eh mahsanih me ekei pahn iasadahng “mour soutuk”? Met wehwehki me irail kan me iasada oh esehla, de doulahte esehla, oh peikiong Siohwa oh Sises erein sounpar kido pahn uhdahn alehdi mour soutuk. (Sohn 17:3) Met pahn wia “iasada me mwahusang” iasadahn ekei irail kan mahso. (Ipru 11:35) Dahme kahrehda? Pwehki aramas soh unsek kan me iasada mahso kedekedeo pwurehng mehla.

8. Ia duwen ekei ar pahn iasadahng “kanamenek poatopoat”?

⁸ Ahpw kaidehn koaros me iasada pahn men pwungki ale kasukuhl sang rehn Siohwa. Ahn Daniel kokohpo koasoia me ekei pahn pwurehng mourda ong “kanamenek poatopoat.” Pwehki irail pahn kasalehda madamadau en uhwong, adarail kan sohte pahn ntingdi nan pwuhken mour oh re sohte pahn alehdi mour soutuk. Irail pahn alehdi “kanamenek poatopoat,” de kasohrala. Eri Daniel 12:2 kin koasoakoasoia me dahme pahn wiawihong koaros me iasada, oh met pahn poahsoankihda arail wiewia kan mwurin arail iasada. * (Kaud. 20:12) Ekei pahn alehdi mour soutuk; ekei sohte pahn.

9-10. Dahme pil pahn wiawi mwurin kahn kamakam kowahlapo, oh ihs me “pahn lingalingki marain en pahnlahng”?

⁹ Wadek Daniel 12:3. Dahme pahn pil wiawi mwurin “ahnsou apwal” me kohkohdo? Patehngete Daniel 12:2, iretikitik 3 kin dokedoke mehkot me pahn wiawi mwurin kahn kamakam kowahlap.

¹⁰ Ihs me “pahn lingalingki marain en pahnlahng”? Madiu 13:43 sewese kitail en ese ihs irail ni eh mahsanih: “Ni ahnsowo, me pwung kan pahn lingalingla duwehte ketipin nan Wehin Samarail.” Nan iretikitik kan mwoweo, Sises kin mahmahsanih duwen “serien Wehio,” me iei ienge me keidi kan me pahn iang ih papah nan Wehio nanleng. (Mad. 13:38) Eri, Daniel 12:3 kin koasoakoasoia duwen me keidi kan oh pil doadoahk me re pahn wia erein Kaundahn Pahr Kido.

11-12. Doadoahk dahieu me irail meh 144,000 ko pahn wia erein pahr kido?

¹¹ Ia duwen me keidi kan ar pahn padahkihong “aramas tohto en wia dahme pwung”? Me keidi kan pahn iangete Sises Krais kaweid doadoahk en kasukuhl me pahn wiawi nin sampah erein pahr kido. Irail meh 144,000 ko sohte pahn wiahte nanmwarki kei ahpw re pil pahn wia samworo kei. (Kaud. 1:6; 5:10; 20:6) Eri, irail pahn iang “kamwahwihala wehi kan” oh sewese aramas akan en ekisekis unsekla. (Kaud. 22:1, 2; Esek. 47:12) Ia uwen me keidi kan ar pahn perenki wia met!

¹² Ihs me iang “aramas tohto” ko me sukuhlki en idawehn elen pwung? Irail me iasada kan oh pil irail kan me pitsang Armakedon iangahki seri koaros me ele pahn ipwidi nan sampah kapwo. Ni imwin pahr kido, koaros me momour nin sampah pahn unsekla. Eri iahd ahnsowo me adarail kan pahn uhdahn ntingkihdi pehn a kaidehn pinsel nan pwuhken mour?

13-14. Dahme aramas unsekla kan koaros nin sampah anahne kasalehda mwohn arail pahn alehdi mour soutuk?

¹³ Kitail anahne tamataman me emen me unsek sohte wehwehki me e uhdahn pahn  alehdi mour soutuk. Medewehla Adam oh Ihp. Ira koaros unsek, ahpw ira anahne kasalehda ara peikiong Siohwa Koht mwohn ara pahn alehdi mour soutuk. E kansensuwed me ira sohte peikiong ih.​—Rom 5:12.

¹⁴ Ia pahn mwomwen irair en irail kan nin sampah ni imwin pahr kido? Koaros pahn unsekla. Ia duwe, irail pwukat koaros me unseklahr pahn uhdahn uhki sapwellimen Siohwa kaunda kohkohlahte? De ekei pahn duwehte Adam oh Ihp me sapeikla mendahki ara unsek? Peidek pwukat anahne pasapengla, ahpw ia duwen?

15-16. (a) Iahd me aramas unsek kan koaros pahn ale ahnsou mwahu en kasalehda arail loalopwoatohng Siohwa? (b) Ia pahn imwilahn kasongosong wet?

¹⁵ Sehdan pahn selidi erein pahr kid. Erein ahnsowo, e sohte pahn kak pitihedi emen. Ahpw ni imwiseklahn pahr kido, Sehdan pahn saledeksang sensel. Ih eri pahn song en pitihedi aramas unsek kan. Erein ahnsoun kasongosongo, aramas unsek koaros nin sampah pahn ahneki ahnsou mwahu en kasalehda ni sansal ma irail kin wauneki mwaren Koht oh uhki sapwellime kaunda de soh. (Kaud. 20:7-10) Dahme irail pahn wia ahnsowo pahn kasalehda ma adarail kan konehng en ntingdi kohkohlahte nan pwuhken mour.

¹⁶ Paipel padahkihong kitail me ekei aramas pahn duwehte Adam oh Ihp, oh re pahn soikala sapwellimen Siohwa kaunda. Dahme pahn wiawihong irail? Kaudiahl 20:15 mahsanih: “Mehmen me ede sohte nting nan  pwuhken mour lekdekiong nan lehn kisiniei.” Ei, sounpelian pwukat pahn sohrala douluhl kohkohlahte. Ahpw pali laud en aramas unsek kan pahn pitsang kaimwiseklahn kasongosongo. Adarail kan eri pahn ntingdi kohkohlahte nan pwuhken mour.

17. Dahme tohnlengo padahkihong Daniel me pahn wiawi nan atail ahnsou? (Daniel 12:4, 8-10)

¹⁷ Ia uwen kaperen en medewehla duwen mwekid pwukat ar pahn wiawi ni ahnsou kohkohdo! Ahpw Daniel pil alehdi sang tohnleng men ire kesempwal kei me pid atail ahnsou, “imwilahn ahnsou.” (Wadek Daniel 12:4, NW * 8-10; 2 Tim. 3:1-5) Tohnlengo padahkihong Daniel: “Loalokong mehlel pahn tohtohla.” Ei, sapwellimen Koht aramas akan pahn dehdehkihla mwahu mahsen en kokohp kan nan nah pwuhko. Tohnlengo pil koasoia me erein ahnsowo “me suwed kan sohte pahn dehdehki, ahpw re pahn usehla wiewia ar mour suwed kan.”

18. Dahme pahn kereniong wiawihong irail me suwed akan?

¹⁸ Rahnwet e mwomwen me me suwed akan  sohte kin ale kalokepen arail wiewia suwed. (Mal. 3:14, 15) Ahpw ahnsou keren Sises pahn ketin kadeikada me rasehng kuht kan oh katohreirailsang irail kan me rasehng sihpw. (Mad. 25:31-33) Aramas suwed pwukat sohte pahn pitsang kahn kamakam kowahlapo, oh re sohte pahn iasada oh mour nan sampah kapwo. Adarail sohte pahn mi nan “pwuhk en kataman” me Malakai 3:16 (NW) mahsanih duwe.

19. Dahme kitail anahne wia ahnsou wet, oh dahme kahrehda? (Malakai 3:16-18)

¹⁹ Met iei ahnsou en kadehdehda me kitail sohte iang me suwed kan. (Wadek Malakai 3:16-18.) Siohwa kin ketiketikihpene irail kan me e ketin wiahki ‘uhdahn sapwellime aramas,’ de irail kan e uhdahn ketin kesempwalki. Kitail uhdahn men iang irail.

20. Inou dahieu me Daniel alehdi keieu mwuhr, oh dahme kahrehda ke kasikasik pweidahn inou wet?

²⁰ Ei mehlel, kitail miher ni ahnsou kesempwal kei. Ahpw soahng kan me kapwuriamwei sang met pahn kereniong wiawi. Ahnsou keren kitail pahn kilang kasohralahn soahng suwed koaros. Mwurin mwo, kitail pahn kilang pweidahn sapwellimen Siohwa inowo ong Daniel, me mahsanih: “Ke pahn pwurehng iasada pwe ke en ale ketingpomw ni imwilahn ahnsowo.” (Dan. 12:13) Ia duwe, ke kin kasikasik rahno me Daniel, iangahki irail kan me ke poakohng ar pahn pwurehng “iasada”? Ma ei, eri wia uwen omw kak ahnsou wet pwe ken lelepekte, eri ke kak kamehlele me edomwen pahn ntintingte nan sapwellimen Siohwa pwuhken mour.