1-2. “Doadoahk mwahu” dah me elder men kin wia?

 MA AHNSOU werei ke kin papah nin duwen sounsawas men, ele ke kin doadoahk laud pwehn kakairada irair kaselel tohto me anahn pwehn wiahla elder men. Ke men wia “doadoahk mwahu” me elder kan kin wia?—1 Tim. 3:1.

² Doadoahk dah me elder men kin wia? E kin tiengla mwowe nan kalohk, doadoahk laud pwehn apwalih oh padahkih Kristian kan, oh sewese kakehlaka arail pwoson Siohwa. Mie kahrepe mwahu tohto me Paipel kahdaneki elder pwukat me kin doadoahk laud “kisakis kei.”—Ep. 4:8.

3. Ia duwen brother men eh kak wiahla elder men? (1 Timoty 3:​1-7; Taitus 1:​5-9)

³ Ia duwen omw kak wiahla elder men? En wiahla elder men sohte duwehte omw alehdi doadoahk en mwohni ehu. Pak tohto, pwehn alehdi doadoahk ehu, ihte me ke anahne iei koahiek kan me kaunen doadoahko raparapahki. Weksang met, ma ke men idihdida nin duwen elder men, ke anahne wia laudsang en koahiekte nan kalohk oh padahk. Ke pil anahne wia soangen aramas me kileldi nan 1 Timoty 3:​1-7; oh Taitus 1:​5-9. (Wadek.) Kitail pahn koasoiapene soahng siluh me iren Paipel pwukat koasoia: ia duwen brother men eh kak ahneki adamwahu, ia duwen eh kak wia tapwin peneinei mwahu, oh dahme kak sewese en perenki papah nan mwomwohdiso.

 AHNEKI ADAMWAHU

4. Ia wehwehn en sohte ‘sohte karaunpomw’?

⁴ Pwehn wiahla elder men, ke pahn ‘sohte karaunpomw,’ me iei en ahneki adamwahu nan mwomwohdiso pwehki omw wiewia mwahu. Patehng met, ke anahne ahneki “mehn kadehde mwahu sang irail kan me kaidehn kisehn mwomwohdiso.” Ei mehlel, aramas akan me sohte kin papah Siohwa kakete kauwe dahme ke kin kamehlele. Ahpw irail en dehr peikasalki me ke wia aramas mwahu oh mehlel. (Dan. 6:​4, 5) Pein idek rehmw, ‘I kin ahneki adamwahu rehn riei Kristian kan oh pil rehn irail kan me sohte kin papah Siohwa?’

5. Ia duwen omw kak kasalehda me ke “poakohng me mwahu”?

⁵ Ma ke kin “poakohng me mwahu,” ke pahn kilang irair mwahu rehn meteikan oh kapingahkin irail. Ke pahn pil perenki wiahiong irail soahng mwahu kan, iangahki soahng kan me sohte me kasik ke pahn wia. (1 Des. 2:8; Taitus 1:8) Dahme kahrehda irair wet uhdahn kesempwal ong elder kan? Pwehki irail kin doadoahngki arail ahnsou laud en sewese mwomwohdiso oh apwalih arail pwukoa kan. (1 Pit. 5:​1-3) Mendahki e pahn doadoahk laud pwehn wia met, e pahn alehdi peren laud sang ni eh sewese meteikan.—Wiewia 20:35.

6. Ia wehwehn en “perenki kasamwo” meteikan? (Ipru 13:​2, 16; pil kilang kilel.)

⁶ Ke kin kasalehda me ke “perenki kasamwo” meteikan ni omw kin wiahiong irail soahng mwahu kan, iangahki irail kan me kaidehn kompoakepahmw keren. (1 Pit. 4:9) Ehu dikseneri en Paipel koasoia me ohl emen me kin perenki kasamwo meteikan, pil kin kadek ong aramas akan me e sohte ese, oh pil kin perenki kasamwo irail nan imweo. Pein idek rehmw, “I wia aramas emen me kin kasalehda kadek ong irail kan me mwemweitdo nan ei mwomwohdiso?” (Wadek Ipru 13:​2, 16.) Ohl emen me kin perenki kasamwo meteikan kin kadek ong soangsoangen aramas akan, iangahki irail kan me semwehmwe, oh irail kan me kin doadoahk laud, duwehte sounapwalih me kin seiloak oh me kin mwemweitdo pwehn wia padahk kan.—Sen. 18:​2-8; Lep. Pad. 3:27; Luk 14:​13, 14; Wiewia 16:15; Rom 12:13.

7. Ia duwen elder men eh kin kasalehda me e “sohte kin poakohng mwohni”?

⁷ “Sohte kin poakohng mwohni.” Met wehwehki me mwohni oh kepwe kan sohte wia  mehkot me keieu kesempwal ong uhk. Mehnda ma ke kepwehpwe de semwehmwe, papah Siohwa me keieu kesempwal nan omw mour. (Mad. 6:33) Ke kin doadoahngki omw ahnsou, kehl, oh kepwe kan pwehn kaudokiong Siohwa, pwehn apwalih omw peneinei, oh pwehn papah nan mwomwohdiso. (Mad. 6:24; 1 Sohn 2:​15-17) Pein idek rehmw: ‘Ia uwen ei kin kesempwalki mwohni? I kin itarki dahme I anahne pwehn momour? De I kin men ahnsou koaros naineki mwohni laud oh ahneki kepwe tohto?’—1 Tim. 6:​6, 17-19.

8. Ia ekei ahl akan me kasalehda me ke kin ‘ese kaunda omw wiewia kan’ oh kin ‘kaunda pein uhk’?

⁸ Ma ke kin ‘ese kaunda omw wiewia kan’ oh ‘kaunda pein uhk,’ ke kin toupahrek nan omw mour. Karasepe, ke sohte kin mwenge daulihala, ke sohte kin kamamsakau, omw likou oh kapwat kin soandi mwahu, oh ke kin wiahda pilipil mwahu ong mehn kamweit kan. Ke sohte kin alasang koasoandi en sampah wet. (Luk 21:34; Seims 4:4) Ke kin ahnekihte meleilei, pil ni meteikan ar sohte kadek ong uhk. Ke “sohte kin kamamsakau”; de aramas sohte kin esehkin uhk omw kin sakau daulihala. Pein idek rehmw, ‘Mwomwen ei mour kin kasalehda me I ese kaunda ei wiewia oh kin kaunda pein ngehi?’

9. Ia wehwehn en kin “madamadau pwung” oh “soandi mwahu”?

⁹ Ma ke kin “madamadau pwung,” ke kin medemedewe kanahieng kaweid en Paipel kan me pidada omw irairo. Ke kin medemedewe kanahieng ia duwen omw kak doadoahngki kaweid pwukat, oh ke kin wehwehkihla mwahu soahng kan oh wiahda pilipil pwung. Ke sohte kin mwadang en mwekid. Ahpw ke kin tehk mwahu me ke ese ire mehlel koaros. (Lep. Pad. 18:13) Imwilahn met, ke kin wiahda pilipil pwung me kin kahlemengih sapwellimen Siohwa madamadau. Ma ke kin “soandi mwahu,” ke kin kapwaiada soahng koaros ni ahnsou me kileldi. Ke kin kasalehda me ke likilik oh kin peikiong koasoandi. Irair pwukat pahn sewese omw adamwahu. Met kitail pahn koasoiapene irair kan me Paipel mahsanih me elder men anahne ahneki pwehn wia mehn kahlemeng mwahu nin duwen tapwin peneinei.

WIA TAPWIN PENEINEI MWAHU

10. Ia duwen ohl emen eh kin “apwalih mwahu pein eh peneinei”?

¹⁰ Ma ke wia ohl pwopwoud men oh men wiahla elder men, omw peneineio pil anahne wia mehn kahlemeng mwahu ong meteikan. Eri, ke anahne en kin “apwalih mwahu pein [omw] peneinei.” Met wehwehki ke anahne apwalih omw peneinei ni elen limpoak oh wiahda pilipil mwahu kan ong irail. Ke kin wia kaudok en peneinei, tehk mwahu me omw peneineio kin iang towehda mihting kan, oh sewese irail en wia uwen arail kak koaros nan doadoahk en kalohk. Dahme kahrehda met uhdahn kesempwal? Wahnpoaron Pohl peidengki: “Ma ohl emen sohte ese ia duwen eh pahn apwalih pein eh peneinei, a ia duwen eh pahn apwalih mwomwohdisohn Koht?”—1 Tim. 3:5.

11-12. Dahme kahrehda nein brother men seri kan arail mwekid uhdahn kesempwal ma e men wiahla elder men? (Pil kilang kilel.)

¹¹ Ma kowe pahpa men, oh noumw seri ko pahnangin sounpar 18 oh mi pahn epwelpomwi, irail anahne kin “peik oh tiahk mwahu.” Ke anahne kaiahne oh padahkih irail ni limpoak. Ei mehlel, ke men irail en nsenamwahu oh pereperen, duwehte seri teikan koaros. Ahpw ke pil anahne padahkihong irail en kin peikiong uhk, wauneki meteikan, oh kin tiahk mwahu. Patehng met, ke anahne wia uwen omw kak koaros en sewese noumw seri kan en kakairada nanpwungmwahu rehn Siohwa, oh mour pahrekiong kaweid en Paipel kan, oh kekeirda pwehn papidaisla.

 ¹² “Naineki seri kan me pwoson me sohte karaunepen ar tiahk suwed de sapeik.” Ma seri men wiahda dihp laud ehu, dahme met pahn wiahiong pahpao? Ma pahpao sohte kin kaiahne oh panawih serio, e sohte pahn kak papah nin duwen elder men.—Menlau kilang Kahn Iroir en May 1, 1997 pali 28, par. 6, 7.

APWALIH MWOMWOHDISO

13. Ia duwen omw kak kasalehda me ke kin “toupahrek” oh “sohte kin keptakai”?

¹³ Brother men me ahneki irair kaselel en Kristian uhdahn kin sawas laud nan mwomwohdiso. Ohl emen me kin “toupahrek” kin kahrehda popohl. Patehng met, ohl emen me toupahrek kin rong meteikan oh song en wehwehki arail pepehm. Karasepe, ma pali laud en elder kan pwungki pilipil ehu me pahrekiong kaweid en Paipel kan, ia duwe, ke pahn pwungki pilipilo mehnda ma ke pwungki ehu soahng tohrohr? “Sohte kin keptakai” kin wehwehki me ke sohte pahn ngihtehtehki me meteikan en wia dahme ke mwahuki. Ke ese me e kesempwal en rong ahn meteikan madamadau. (Sen. 13:​8, 9; Lep. Pad. 15:22) Ke “sohte kin akamai” de “sohte kin mwadang lingeringer.” Met wehwehki me ke sohte kin akamai ong meteikan de sohte kin waunekin irail. Ahpw ke kin kadek ong irail. Ke kin doadoahk laud pwehn wiahda popohl rehn meteikan, mehnda ma irairo apwal. (Seims 3:​17, 18) Ke kin koasoi kadek ong meteikan oh met kin sewese irail en meleilei, pil iangahki irail kan me sohte pwungki dahme kitail kamehlele.—Sounkopwung 8:​1-3; Lep. Pad. 20:3; 25:15; Mad. 5:​23, 24.

14. Ia wehwehn “kaidehn ohl emen me ahpwtehn pwosonla” oh “loalopwoat”?

¹⁴ Brother men me kak wiahla elder men “kaidehn ohl emen me ahpwtehn pwosonla.” Mendahki ke sohte anahne papidaisla erein sounpar tohto, ke anahne ahnsou pwehn wiahla Kristian koahiek men. Duwehte Sises, ke anahne aktikitik oh perenki papah Siohwa ni soangsoangen ahl akan. Ke pahn kin kanengamah oh awih Siohwa en ketikihong uhk ekei pwukoa nan mwomwohdiso. (Mad. 20:23; Pil. 2:​5-8) Ke kak kadehdehda me ke  kin “loalopwoat” sang ni omw mour ni ahl me Siohwa ketin kupwurki oh idawehn kaweid me kohsang sapwellime pwihn.—1 Tim. 4:15.

15. Elder men anahne mai en padahk? Menlau kawehwehda.

¹⁵ Paipel mahsanih me sounapwalih kan anahne “koahiek en padahk.” Ia duwe, met wehwehki me ke anahne wia padahk kaselel kan? Soh. Kaidehn elder kan koaros kin uhdahn mai en padahk, ahpw ni arail kin kalohk oh mwemweitla rehn meteikan, re anahne en kak doadoahngki mwahu Paipel pwehn padahkih oh kangoange riarail Kristian kan. (1 Timoty 3:2; pil kilang 1 Korint 12:​28, 29 Episos 4:11.) Mendahki ke sohte kin mai en padahk, ke anahne pousehlahte doadoahk laud pwehn kalaudehla omw koahiekla. Ia duwen omw kak wia met?

16. Ia duwen omw kak kalaudehla omw koahiek en padahk? (Pil kilang kilel.)

¹⁶ “Kolokol teng mahsen likilik.” Pwehn kalaudehla omw koahiek en wia padahk, tehk mwahu me dahme ke kin koasoia ni omw wia padahk oh kihda kaweid ong riomw Kristian kan en kin ahnsou koaros pahrekiong Paipel. Pwehn wia met, ke anahne onopki mwahu Paipel oh neitail sawasepen Paipel kan. (Lep. Pad. 15:28; 16:23; Taitus 1:9) Ni omw onop, tehk mwahu ia duwen neitail sawasepen Paipel kan ar kawehwehda iren Paipel kan pwe ken kak kapwaiada ni pwung. Oh ni omw kin padahk, song en sewese aramas akan en kalaudehla arail poakohng Siohwa oh kamwakid irail en kapwaiada dahme re sukuhlki. Ke kak kalaudehla omw koahiek ma ke peki oh kapwaiada kaweid me kohsang elder koahiek kan. (1 Tim. 5:17) Elder kan anahne en ‘kak kangoange’ riarail Kristian kan; ahpw re anahne ekei pak kaweid de pil “panawih” irail. Sohte lipilipil ma ke kin kangoange de kaweid meteikan, elder anahne kin ahnsou koaros kadek. Ma ke kin meleilei oh limpoak, oh omw padahk kin poahsoankihda Mahsen en Koht, ke pahn wiahla sounpadahk koahiek men pwehki ke pahn kahlemengih Sounpadahk Lapalapo, Sises.—Mad. 11:​28-30; 2 Tim. 2:24.

 POUSEHLAHTE KEKEIRDA

17. (a) Dahme kak sewese sounsawas kan en pousehlahte kekeirda? (b) Dahme elder kan anahne tamataman ni arail medemedewe ma brother men kak wiahla elder men? (Menlau kilang koakon “ Toupahrek ni Omw Medemedewe Ma Brother Men Kak Papah.”)

¹⁷ Ekei sounsawas kan kakete pehm me re sohte kak wiahla elder pwehki mie irair kaselel tohto me irail anahne ahneki. Ahpw tamataman me Siohwa oh sapwellime pwihn sohte kasik me ken kasalehda irair pwukat ni unsek. (1 Pit. 2:21) Oh sapwellimen Siohwa manaman me seweseiuk en kakairada irair pwukat. (Pil. 2:13) Mie soangen irair ehu me ke men kamwahwihala? Kapakapkihong Siohwa met. Wia roporop oh peki rehn emen elder ia duwen omw kak kamwahwihala.

18. Dahme sounsawas koaros kak wia?

¹⁸ Kitail koaros, iangahki irail kan me kin papah nin duwen elder, anahne koasoanehdi teng en pousehlahte kakairada irair kan me iren onop wet koasoia. (Pil. 3:16) Ke wia emen sounsawas? Pousehlahte kekeirda! Peki Siohwa en ketin kaiahne iuk pwe ken pil kalaudehla omw papah ih oh nan mwomwohdiso. (Ais. 64:8) Siohwa uhdahn pahn ketin kapaiahkin uhk soahng koaros me ke kin wia pwe ken kak papah nin duwen elder men.