IREN ONOP 46
KOUL 49 Kaperenda Kupwuren Siohwa
Brother kan—Ke Kin Akadeiong en Wiahla Sounsawas Men?
“Kihwei kin kaperen sang ale.”—WIEWIA 20:35.
DAHME KITAIL PAHN SUKUHLKI
Pwehn kangoange brother papidaisla kan en akadeiong en wiahla sounsawas kan.
1. Ia ahn wahnpoaron Pohl pepehm ong sounsawas kan?
SOUNSAWAS kan kin wia doadoahk kesempwal nan mwomwohdiso. Wahnpoaron Pohl kin kesempwalki ohl lelepek pwukat. Karasepe, ni eh ntinglahng Kristian kan nan Pilipai, e rahnmwahwih sounsawas kan oh pil elder kan.—Pil. 1:1.
2. Ia ahn Luis pepehm ong eh pwukoahn sounsawas men?
2 Sohte lipilipil ma re pwulopwul de mah, brother papidaisla tohto kin diar peren ni arail kin sewese mwomwohdiso nin duwen sounsawas kan. Karasepe, Devan sounpar 18 ni ahnsou me e idihdida nin duwen sounsawas men. Ahpw emen brother me adaneki Luis idihdida ni ahnsou me e sounpar 50 samwa. Luis kasalehda pepehm en brother tohto ni eh koasoia, “E uhdahn wia pwais kaselel ehu en wia doadoahk en sounsawas men, ahpw mehlel ni ei kin medewehla uwen limpoak laud me mwomwohdiso kin kasalehiong ie!”
3. Peidek dah kan me kitail pahn koasoiapene?
3 Ma kowe brother papidaisla men oh saikinte wiahla sounsawas men, ke seu wiahki met omw mehn akadei? Dahme kak kamwakid uhk en wia met? Oh soangen irair dah kan me Paipel mahsanih ken ahneki pwehn wiahla sounsawas men? Nan iren onop wet, kitail pahn koasoiapene pasapengpen peidek pwukat. Ahpw keieu, kitail pahn koasoiapene pwukoa dah kan me sounsawas men kin wia.
IA PWUKOAHN SOUNSAWAS MEN?
4. Ia pwukoahn sounsawas men? (Pil kilang kilel.)
4 Sounsawas men iei brother papidaisla men me sapwellimen Koht manaman idihada pwehn sewese elder kan apwalih soahng kesempwal tohto nan mwomwohdiso. Ekei sounsawas kan kin tehk mwahu me sounkalohk kan kin alehdi arail wasahn kalohk oh pwuhk kan ong kalohk. Ekei kin iang sewese kamwakele oh apwalih mwahu Wasahn Kaudok. Sounsawas kan pil kin sewese irail kan me iang towehda mihting oh pil kin apwalih wasahn microphone oh kisin kasdo kan erein mihting kan. Doadoahk pwukat koaros uhdahn katapan. Keieu kesempwal, sounsawas kan wia ohl kei me kin poakohng Siohwa oh kin mour ni ahl ehu me kin kaperenda Ih. Re pil kin uhdahn poakohng riarail Kristian kan. (Mad. 22:37-39) Ia duwen brother papidaisla men eh kak akadeiong en wiahla sounsawas men?
Sounsawas kan kin alasang Sises ni arail kin men apwalihala anahn en meteikan (Menlau kilang parakrap 4)
5. Ia duwen brother men eh kak nantihong akadeiong en wiahla sounsawas men?
5 Paipel kasalehda soangen irair kan me brother men anahne ahneki pwehn wiahla sounsawas men. (1 Tim. 3:8-10, 12, 13) Ke kak akadeiong pwais kaselel wet sang ni omw onopki mwahu duwen irair pwukat oh doadoahk laud pwehn kakairada. Ahpw keieu, ke anahne medewe kanahieng dahme kamwakid uhk en men wiahla sounsawas men.
DAHME KAMWAKID UHK EN MEN WIAHLA SOUNSAWAS MEN?
6. Dahme pahn kamwakid uhk en men papah riomw Kristian kan? (Madiu 20:28; pil kilang Kahn Iroir wet.)
6 Mehn kahlemeng keieu mwahu ong kitail iei Sises Krais, me kin ketin mwekidki limpoak—limpoak ong Semeo oh pil aramas akan. Limpoak wet kamwakid ih en ketin doadoahk laud oh pil wiahiong meteikan soahng kan me ekei aramas sohte kin wiahki mehkot. (Wadek Madiu 20:28; Sohn 13:5, 14, 15) Ma ke kin mwekidki limpoak, Siohwa pahn ketin kapaiukada oh pahn ketin seweseiuk en lel omw mehn akadei en wiahla sounsawas men.—1 Kor. 16:14; 1 Pit. 5:5.
Sang eh mehn kahlemeng, Sises ketin padahkihong sapwellime wahnpoaron kan en papah meteikan ni aktikitik a en dehr rapahki en alehdi dehu kesempwal (Menlau kilang parakrap 6)
7. Dahme kahrehda brother men en dehr wiahla sounsawas men pwehn alehte kaping?
7 Aramas akan nin sampah kin kalapw wauneki irail kan me kin wiahki pein irail aramas kesempwal kei. Ahpw sapwellimen Siohwa aramas kan sohte duwehte met. Brother men me kin mwekidki limpoak, duwehte Sises, sohte kin inengieng en ahneki manaman laud, kaunda meteikan, de aramas en wiahki ih lapalap emen. Ma emen me men aramas en kesempwalki ih laudsang meteikan idihdida nan mwomwohdiso, ele e sohte pahn wia soangen doadoahk tikitik kan, de wia soahng teikan me anahn pwehn apwalih sapwellimen Siohwa sihpw kan. E kakete medewe me e nohn kesempwal en wia ekei doadoahk kan. (Sohn 10:12) Siohwa sohte pahn ketin kapaiahda doadoahk en emen me kin men kesempwalla.—1 Kor. 10:24, 33; 13:4, 5.
8. Kaweid dahieu me Sises ketikihong sapwellime wahnpoaron ko?
8 Ekei pak, kompoakepahn Sises keren kan pil men alehdi pwukoa tohrohr kan, ahpw kahrepeo sapwung. Medewehla dahme sapwellimen Sises wahnpoaron riemen, Seims oh Sohn wia. Ira peki Sises en ketikihong ira pwukoa kesempwal nan sapwellime Wehi. Sises sohte kapingahki ira ara pekipeko. Ahpw e ketin kawehwehiong wahnpoaron 12 ko koaros: “Mehmen me men lapalapala nanpwungamwail anahne wia amwail sounpapah, oh mehmen me men keieu nanpwungamwail anahne wia ladun koaros.” (Mark 10:35-37, 43, 44) Brother kan me ahneki kahrepe mwahu en papah meteikan pahn sewese mwomwohdiso ni ahl tohto.—1 Des. 2:8.
DAHME KAK SEWESEIUK EN MEN PAPAH RIOMW KRISTIAN KAN?
9. Ia duwen omw kak kalaudehla omw ineng en papah riomw kan?
9 Ei mehlel, ke poakohng Siohwa oh men papah meteikan. Ahpw mwein ke sohte ahneki ineng en wia doadoahk me sounsawas men kin wia. Ia duwen omw kak kalaudehla ineng en papah? Medewehla uwen peren me ke pahn ahneki sang omw kin papah riomw kan. Sises mahsanih: “Kihwei kin kaperen sang ale.” (Wiewia 20:35) Pein Sises ketin kapwaiada kaweid wet. E sapwellimanki peren laud pwehki eh kin ketin papah meteikan, oh ke pil pahn ahneki peren.
10. Ia duwen Sises eh ketin kasalehda eh kupwurperenki papah meteikan? (Mark 6:31-34)
10 Medewehla ehu karasepen Sises eh ketin kasalehda me e kin kupwurperenki papah meteikan. (Wadek Mark 6:31-34.) Ehu ahnsou, Sises oh sapwellime wahnpoaron ko uhdahn pwangada. Irail eri kolahng wasa kis me tohrohrala pwe ren kommoal. Ahpw pokon en aramas ehu lella wasao mwohn irail, oh kasikasik me Sises en ketin padahkih irail. Sises kakete mahsanih soh, pwehki ih oh ienge ko “solahr arail ahnsoun kommoal de pil mwenge.” De Sises kakete ketin kadarpeseng pokono mwurin eh padahkihong irail soahng keite. Ahpw pwehki limpoak, e “ketin padahkihong irail soahng tohto.” Oh e doulahte ketin padahki irail lao “wasa pwongier.” (Mark 6:35) E ketin wia met kaidehn pwehki e anahne, ahpw pwehki “e ketin poakeirailla.” E kupwurki padahki irail pwehki e ketin poakohng irail. En papah meteikan kin kahrehiong ih peren laud.
11. Ni ahl mwahu dah me Sises ketin sewese aramas ako? (Pil kilang kilel.)
11 Ni Sises eh ketin papah pokono, e sohte ketin padahkihte irail ahpw e ketin wia laudsang. E ketin apwalihala arail anahn en war. Ni ahl kapwuriamwei ehu, e ketikihda kanarail mwenge oh mahsanihong sapwellime tohnpadahk ko en kihpeseng mwenge ko. (Mark 6:41) Sang ni eh ketin wia met, e ketin padahkihong sapwellime tohnpadahk ko ia duwen arail en papah meteikan. E pil ketin kasalehiong irail me soangen doadoahk wet, me duwehte dahme sounsawas kan kin kalapw wia, kesempwal. Medewehla uwen peren me wahnpoaron ko ahneki ni arail iang Sises ketikipeseng mwenge ko lao “koaros eri mwenge oh medla”! (Mark 6:42) Met wiahte ehu karasepen Sises eh ketin nsenohki anahn en meteikan laudsang pein ah. E kin ketin wia met erein eh ketiket sampah. (Mad. 4:23; 8:16) Sises uhdahn kupwurperenki padahki meteikan oh ni aktikitik apwalihala arail anahn kan. Ke pil kak ahneki peren laud ma ke kin men papah meteikan nin duwen sounsawas men.
Poakohng Siohwa oh men papah meteikan pahn kamwakid uhk en wia soahng koaros me ke kak pwehn sewese riomw kan (Menlau kilang parakrap 11) a
12. Dahme kahrehda kitail koaros en dehr medewe me sohte atail koahiek en kak sewese mwomwohdiso?
12 Ma ke pehm me sohte omw koahiek laud, dehr nsensuwed. Ke uhdahn ahneki irair kan me ke kak doadoahngki pwehn sewese mwomwohdiso. Ke kak paiekihda sang ni omw kapakap oh wadek dahme Pohl koasoia nan 1 Korint 12:12-30. Dahme Pohl koasoia kasalehda ni sansal me kowe, pil duwehte sapwellimen Siohwa ladu teikan koaros, kin anahn oh pil kesempwal nan mwomwohdiso. Ma ahnsou wet ke sohte kak papah nin duwen sounsawas men pwehki ke anahnehte kakairada ekei irair kaselel kan me anahn, dehr uhdi. Ahpw doula wia dahme ke kak wia pwehn papah Siohwa oh sewese riomw Kristian kan. Kamehlele me elder kan pahn medemedewe omw koahiek kan oh kihong uhk pwukoa kan me ke kak wia.—Rom 12:4-8.
13. Dahme mehlel duwen irair kan me sounsawas men anahne ahneki?
13 Pil medewehla met: Pali laud en irair kan me Paipel mahsanih me sounsawas men anahne ahneki iei irair mwahu kan me Kristian kan koaros anahne ahneki. Kristian koaros anahne karanihala Siohwa, perenki kihkihwei, oh mour ni ahl ehu me kin kaperenda Koht. Ele ke kakairadahr pali laud en irair kan me sounsawas men anahne ahneki. Eri dahme brother men kak wia pwehn wiahla sounsawas men?
DAHME KE KAK WIA PWEHN WIAHLA SOUNSAWAS MEN
14. Ia wehwehn en “kin mehlel”? (1 Timoty 3:8-10, 12)
14 Met kitail pahn koasoiapene ekei irair kan me kileldi nan 1 Timoty 3:8-10, 12. (Wadek.) Sounsawas men pahn “kin mehlel.” En “kin mehlel” pil kak wehwehki “warohng ale wahu,” de “mwekid ni ahl ehu me aramas akan kak wauneki.” Met sohte wehwehki me ke sohte kak kouruhr de kamwan. (Ekl. 3:1, 4) Ahpw e wehwehki me ke kin doadoahk laud pwehn kapwaiada omw pwukoa kan. Ma ke kin ahnsou koaros kanekehla doadoahk me kohwong uhk oh wiahda mwahu doadoahko, eri riomw kan nan mwomwohdiso pahn ese me re kak koapworopworkin uhk oh waunekin uhk.
15. Ia wehwehn “sohte kin loh riau” oh ‘sohte kin rapahki pein kamwahupomw ni noahrok’?
15 “Sohte kin loh riau” kin wehwehki me ke kin koasoi mehlel oh aramas kak likih iuk. Ke kin kapwaiada dahme ke nda ke pahn wia, oh sohte kin pitih meteikan. (Lep. Pad. 3:32) ‘Sohte kin rapahki pein kamwahupomw ni noahrok’ wehwehki me ke kin mehlel ni omw wia pesines de apwalih mwohni. Ke sohte kin isaneki riomw Kristian kan ni omw doadoahngki irail pwehn wiahda mwohni laud.
16. (a) Ia wehwehn “sohte kin nim wain laud”? (b) Ia wehwehn en kolokol “nsenmwakelekel”?
16 “Sohte kin nim wain laud” wehwehki me ke sohte kin kamamsakau de aramas sohte kin wiahkin uhk emen me kin sakau daulihala. En kolokol “nsenmwakelekel” kin wehwehki me ke kin mour pahrekiong sapwellimen Siohwa koasoandi kan. Mendahki ke sohte unsek, ke kin ahneki popohl me kohsang omw ahneki nanpwungmwahu rehn Koht.
17. Ia duwen brother men eh kak kasalehda me meteikan kak likih ih ni eh ‘ale keseu mahs ma e kak wia pwais’ kan? (1 Timoty 3:10; pil kilang kilel.)
17 ‘Ale keseu mahs ma ke kak wia pwais’ kin wehwehki me ke kasaledahr me ke kin apwalihala mwahu omw pwukoa kan oh elder kan kak likih iuk. Kahrehda, ni elder kan ar kihong uhk pwukoa ehu, idawehn kanaiehng arail kaweid oh pil kaweid kan me sapwellimen Siohwa pwihn kin kihda. Tehk mwahu me ke wehwehki mwahu dahme ke anahne wia oh iahd me ke anahne kanekehla pwukoau. Ni omw kin pwerisekiong kapwaiada ehuehu pwukoa ko, meteikan nan mwomwohdiso pahn kin tehk oh kalahnganki omw kekeirda mwahu. Elder kan, kumwail tehk mwahu me kumwail kaiahnehda brother papidaisla kan. (Wadek 1 Timoty 3:10.) Mie brother papidaisla kan nan amwail mwomwohdiso me sounpar 10 lel 14 de pwulopwulsang? Mie pein arail koasoandi en onop Paipel oh kin kaunopada mwahu ong mihting kan? Irail kin kaukaule iang pasapeng nan mihting oh iang kalohk? Ma ei, kihong irail pwukoa kan me konehng arail sounpar oh irair. Ni ahl wet, brother pwulopwul pwukat kin “ale keseu mahs ma re kak wia pwais” kan. Eri, ni arail sounpar 17 lel 19, irail kak wiahla sounsawas kei.
Ni elder kan ar kihong brother papidaisla kan pwukoa kan, irail kak kasawih “ma re kak wia pwais” kan (Menlau kilang parakrap 17)
18. Ia wehwehn “sohte karaunparail”?
18 ‘Sohte karaunpomw’ kin wehwehki me sohte emen kak ni pwung karaunki me ke kin wiewia sapwung laud ehu. Mehlel, aramas akan kakete karaunlikamwih Kristian kan. Aramas akan kin karaunlikamwih Sises, oh e mahsanih me me tohto pahn pil karaunlikamwih sapwellime tohnpadahk kan. (Sohn 15:20) Ahpw ma ke kin wiewiahte tiahk mwakelekel, duwehte Sises, ke pahn kin adamwahu nan mwomwohdiso.—Mad. 11:19.
19. Ia wehwehn en “pwoudiki lihtehmen”?
19 “Pwoudiki lihtehmen.” Ni ahnsou me Siohwa ketin wiahda tepin koasoandi en pwopwoud, e ketin mahsanih me pwopwoud pahn kin wiawi nanpwungen ohl emen oh lih emen. Eri, Kristian koaros anahne peikiong. (Mad. 19:3-9) Ohl Kristian men en dehr wia tiahk samin me pid wia nsenen pwopwoud. (Ipru 13:4) Met pil wehwehki me e anahne kin ahnsou koaros loalopwoatohng eh pwoud. Eri, e sohte pahn kin kalahiong lih teikan.—Sohp 31:1.
20. Ia duwen ohl emen eh kin apwalih “mwahu” eh peneinei?
20 “Kin apwalih mwahu neirail seri kan oh pein arail peneinei.” Ma kowe me tapwin peneinei, ke uhdahn anahne kapwaiada omw pwukoa kan. Ke anahne kaukaule wia kaudok en peneinei. Kalapw iang emenemen tohn omw peneinei kalohk ni uwen omw kak. Sewese noumw seri kan en kakairada pein arail nanpwungmwahu rehn Siohwa. (Ep. 6:4) Ohl emen me kin apwalih mwahu eh peneinei kin kasalehda me e kak apwalih mwomwohdiso.—Pil kilang 1 Timoty 3:5.
21. Ma ke saikinte wiahla sounsawas men, dahme ke kak wia?
21 Brother kan, ma ke saikinte wiahla sounsawas men, menlau wadek iren onop wet oh kapakapkihong Siohwa. Onopki irair kan me sounsawas kan anahne ahneki oh doadoahk laud en kapwaiada. Medemedewe uwen laud en omw poakohng Siohwa oh riomw Kristian kan. Kalaudehla omw ineng en papah irail. (1 Pit. 4:8, 10) Nantihong en wiahla sounsawas men oh ke pahn ahneki peren laud ni omw kin papah riomw kan nan mwomwohdiso. Siohwa en ketin kapaiahda omw kin nannanti pwehn wiahla sounsawas men!—Pil. 2:13.
KOUL 17 ‘Iei I Men’
a WEHWEHN KILEL: Ni palimeing, Sises ni aktikitik ketin papah sapwellime tohnpadahk kan; ni palimaun, sounsawas men sewese brother mah men nan mwomwohdiso.
