1-2. Ni ahl dah kan me kitail kakete lelohng wiewia sapahrek?

 SISES ketikihda karasaraso duwen liohdi men me kin pekipeki sounkopwung men en sewese pwehki mie me wiahiong ih mwekid sapahrek ehu. Sapwellimen Sises tohnpadahk ko kak wehwehki ia pepehm en liohdio pwehki aramas tohto ni ahnsowo kin lelohng wiewia sapahrek sang meteikan. (Luk 18:​1-5) Kitail pil kak wehwehki en liohdio eh pepehm pwehki kitail koaros kin lelohng wiewia sapahrek ekei pak.

² Me tohto nan sampah rahnwet kin lipilipilki aramas, sohte kadek, oh noahrok. Pwehki met, kitail ese me kitail kakete lelohng wiewia sapahrek. (Ekl. 5:8) Ahpw dahme kitail ele sohte kasik iei ma riatail Kristian men wiahiong kitail mehkot me sohte kadek. Ei mehlel, weksang irail kan me kin kaloke de uhwong kitail; riatail kan sohte men wiakauwe kitail. Ahpw ihte, irail sohte unsek. Kitail kak sukuhlki soahng tohto sang dahme Sises kin ketin wia ni eh lelohng wiewia sapahrek sang aramas suwed kan me kin uhwong. Ma kitail kak kanengamahiong irail kan me kin wiakauwe kitail, eri kitail uhdahn pahn pil kanengamahiong riatail kan! Ia sapwellimen Siohwa pepehm ni atail kin lelohng wiewia sapahrek sang irail kan likin mwomwohdiso de pil nan mwomwohdiso? Ia duwe, e kin ketin nsenohki dahme kin wiawihong kitail?

3. Ia duwen atail ese me Siohwa kin ketin nsenohki mwomwen ahn aramas wiewia ong kitail, oh dahme kahrehda?

³ Siohwa kin uhdahn ketin nsenohki mwomwen ahn aramas wiewia ong kitail. “KAUN-O kin kupwurperenki dahme pwung.” (Mel. 37:28) Sises kamehlelehiong kitail me Siohwa pahn “mwadang ketin kapwaiada pwung pahrek” ni ahnsou me konehng.  (Luk 18:​7, 8) Oh ni ahnsou keren, e pahn ketikihsang soangen lokolok koaros me kitail ahneki oh sohte pahn ketin mweidohng kitail en pil pwurehng lelohng wiewia sapahrek.—Mel. 72:​1, 2.

4. Soangen sawas dah me Siohwa ketikihda ong kitail rahnwet?

⁴ Nin doken atail awiawih ahnsou me pwung pahn miehla, Siohwa kin ketin sewese kitail en dadaur pahn wiewia sapahrek. (2 Pit. 3:13) E ketin padahkihong kitail dahme kitail en wia pwe kitail en dehr kahrehiong kahpwalo en laudla. Ehu ahl me e ketin wia met iei sang ni eh ketin kasalehiong kitail sang nan Paipel dahme sapwellime Ohlo wia ni eh lelohng wiewia sapahrek. E pil ketikihong kitail kaweid mwahu kan me kitail kak doadoahngki ni atail lelohng soangen kahpwalo.

KANAHIENG MWOMWEN OMW KIN MWEKIDKI WIEWIA SAPAHREK

5. Dahme kahrehda kitail anahne kanahieng mwomwen atail kin mwekidki wiewia sapahrek?

⁵ Ele kitail kin uhdahn medengkihla oh pwunodkihda laud mwekid sapahrek ehu. (Deud. 28:34) Ladu lelepek kan, duwehte Sohp oh Apakuk, pil ahneki soangen pepehmohte. (Sohp 6:​2, 3; Apak. 1:​1-3) E sohte sapwung en ahneki soangen pepehm pwukat. Ahpw kitail anahne kanahieng mwomwen atail kin mwekidki kahpwal pwukat pwe kitail en dehr wiahda mehkot sapwung.

6. Dahme ahn Apsalom mehn kahlemengo padahkihong kitail? (Pil kilang kilel.)

⁶ Ni emen de emen me kitail poakohng wiahiong kitail wiewia sapahrek ehu, kitail kin men dupuk. Ahpw met kakete kalaudehla kahpwalo. Medewehla nein Nanmwarki Depit pwutako Apsalom. E uhdahn lingeringerkihda rie ohlo Amnon, me ira nohnopeseng, me angkehlailih rie serepeino Damar. Nin duwen me Kosonned en Moseso kehkehlingki, Amnon konehng kamakamala pwehki dahme e wiahda. (Lip. 20:17) E sohte sapwung en Apsalom lingeringerkihda met. Ahpw e sapwung Apsalom en kemehla Amnon.—2 Sam. 13:​20-23, 28, 29.

7. Ia duwen sounmelkahkao eh tepin mwekidki wiewia sapahrek kan me e kin kilang?

⁷ Ni aramas akan ar sohte alehdi kalokepen arail wiewia sapahrek kan, kitail kakete tepida medewe ma mie kamwahupen atail kin wia dahme pwung. Medewehla sounmelkahkao me kin kilang aramas suwed kan ar wiakauwe aramas mwahu kan ahpw re mwomwen kin nsenamwahuki arail mour. E koasoia: “Iei duwen  met iren me suwed akan. Re kin paiamwahu.” (Mel. 73:12) E uhdahn pwunodkihda wiewia sapahrek kan oh medewe me sohte katepen eh kin papah Siohwa. E koasoia: “I song en dehdehkihla irair apwal wet, ahpw e inenen apwal ong ie.” (Mel. 73:​14, 16) Ni mehlel, e wehkada: “Kereniongehr ei koapworopwor pahn sohla; oh ei pwoson tikitiklahr.” (Mel. 73:2) Mehkot me duwehte met wiawihong Alberto. a

8. Ia duwen brother men eh mwekidki wiewia sapahrek?

⁸ Ekei brother karaunehki Alberto me e pirapahla nein mwomwohdiso mwohni. Pwehki met, Alberto sohla wia elder men, oh me tohto nan mwomwohdisou me esehda duwen met sohla wauneki ih. E koasoia: “I lingeringerda oh mworusala.” E mweidohng eh nsensuwedo en kauwehla eh nanpwungmwahu rehn Siohwa, e pil sohla iang kalohk oh mihting erein sounpar limau. Dahme wiawihong ih karasahda dahme kak wiawi ma kitail sohte kaunda atail lingeringer ni emen eh wiakauwe kitail.

ALASANG MWOMWEN SISES EH KETIN DADAUR PAHN WIEWIA SAPAHREK

9. Wiewia sapahrek dah kan me Sises ketin dadaur pah? (Pil kilang kilel.)

⁹ Sises ketin wiahda mehn kahlemeng unsek duwen atail pahn dadaur pahn wiewia sapahrek. Aramas tohto, iangahki pein eh peneinei, kin wiakauwe. Kiseh kan koasoia me e sahliella,  kaunen pelien lamalam ko koasoia me manaman me e ketin doadoahngki kohsang rehn ngehn suwed kan, oh sounpei en Rom kan kapailoke, kaloke, oh kemehla. (Mark 3:​21, 22; 14:55; 15:​16-20, 35-37) Ahpw Sises ketin dadaur pahn wiewia sapahrek pwukat koaros oh soh mwahn wiahda sapwung kis. Dahme kitail kak sukuhlkihsang sapwellime mehn kahlemeng?

10. Ia duwen Sises eh ketin dadaur pahn wiewia sapahrek? (1 Piter 2:​21-23)

¹⁰ Wadek 1 Piter 2:​21-23. b Sises ketin wiahda mehn kahlemeng unsek ong kitail en idawehn ni atail lelohng wiewia sapahrek. E mwahngih iahd me e pahn ketin nennenla oh iahd me e pahn ketin mahsen. Ekei pak ni meteikan ar karaunlikamwih, e kin ketin nennenlahte. (Mad. 26:​62-64) Ni eh kin mahsen, e sohte kin ketin kasarowe de lokaia lemei ong irail me kin kaloke ih. (Mad. 11:19) Sises kin kak ketin kaunda eh mahsen kan pwehki e ketin “mweidala pein ih ong Meno me kin ketin kadeikada ni pwung.” Sises mwahngih me Siohwa kin ketin mahmahsanih wiewia sapahrek kan me wiawihong ih. E likih me Siohwa pahn ketin kapwungala wiewia sapahrek kan ni ahnsou me konehng.

11. Ni ahl dah kan me kitail kak kaunda atail kin koasoi? (Pil kilang kilel kan.)

¹¹ Ni emen eh wiakauwe kitail, kitail kak alasang Sises oh kanahieng dahme kitail pahn koasoia. Ekei wiewia sapahrek kin tikitik, oh kitail kak pohnsehsehla. De ele kitail kak nennenlahte oh dehr nda mehkot me kakete kalaudehla kahpwalo. (Ekl. 3:7; Seims 1:​19, 20) Oh ekei pak, ele kitail anahne nda mehkot ni atail kilang emen eh lelohng wiewia sapahrek de ni  atail kin uhki padahk mehlel. (Wiewia 6:​1, 2) Ma kitail pahn nda mehkot, kitail anahne song uwen atail kak en wia met ni meleilei oh wahu.—1 Pit. 3:15. c

12. Ia duwen atail en mweidala pein kitail ong “Meno me kin ketin kadeikada ni pwung”?

¹² Kitail pil kak alasang Sises ni atail kin mweidala pein kitail ong “Meno me kin ketin kadeikada ni pwung.” Ni meteikan ar kin kadeik sapwungih de wiakauwe kitail, kitail kin likih me Siohwa ketin mwahngih dahme wiawi. Soangen likilik wet kak sewese kitail en dadaur pahn wiewia sapahrek pwehki kitail ese me Siohwa pahn uhdahn ketin kapwungala soahng koaros mwuhr. Atail mweidala pein kitail ong Siohwa kin sewese kitail en dehr inaptihnmwomw de kailongki meteikan. Soangen pepehm pwukat kak kahrehiong kitail en wiahda mehkot suwed, sohla ahneki peren, oh kauwehla atail nanpwungmwahu rehn Siohwa.—Mel. 37:8.

13. Dahme kak sewese kitail en pousehlahte dadaur pahn wiewia sapahrek?

¹³ Ei mehlel, kitail sohte pahn kak idawehn ni unsek sapwellimen Sises mehn kahlemeng. Ekei pak, ele kitail kin wia de nda soahng kan me kitail kin koluhkihla mwuhr. (Seims 3:2) Oh ele erein atail mi nan koasoandi wet kitail kin uhdahn medengkihla de nsensuwedkihla ekei wiewia sapahrek. Ma met wiawihong uhk, kamehlele me Siohwa kin ketin mwahngih dahme ke kin lelohng. Oh Sises, me pil ketin lelohng wiewia sapahrek, kak wehwehki omw pepehm. (Ipru 4:​15, 16) Siohwa ketikihda ahn Sises mehn kahlemeng unsek oh pil kaweid kan nan sapwellime Mahsen me kin sewese kitail en dadaur pahn wiewia sapahrek. Kitail pahn koasoiapene iren Paipel riau nan pwuhken Rom me kak sewese kitail.

“MWEIDOHNG ENGIENG EN KOHT”

14. Ia wehwehn en “mweidohng engieng en Koht”? (Rom 12:19)

¹⁴ Wadek Rom 12:19. Wahnpoaron Pohl kangoange rie Kristian kan ren “mweidohng engieng en Koht” en doadoahk. Kitail kin mweidohng engieng en Siohwa en doadoahk sang ni atail mweidohng en ketin koasoanehdi iahd oh ia duwen eh pahn ketikihda pwung pahrek. Mwurin brother men me adaneki John lelohng wiewia sapahrek, e koasoia: “I anahne nantihong powehdi ei lingeringer pwe I de wiahda mehkot sapwung, ahpw met sohte mengei. Rom 12:19 sewese ie en kanengamah oh likih Siohwa.”

15. Dahme kahrehda e pahn keieu mwahu en awih Siohwa en ketin apwalihala kahpwal kan?

¹⁵ Kitail kin paiekihda ni atail kin awih Siohwa en ketin kapwungala kahpwal ehu. Ni atail wia met, kitail kak soikala pwunod oh nsensuwed laud me kin kalapw lelohng kitail ni atail song pein kapwungala kahpwalo. Siohwa ketin kupwurki sewese kitail. Ni karasaras, e kin mwomwen mahsanih, ‘Mweidohng ie wiewia sapahrek kan, oh I pahn apwalihala.’ Ma kitail kamehlele sapwellimen Siohwa inou en ketin kadeikada irail kan me kin wiakauwe aramas, kitail sohte anahne kadakadaur atail lingeringer pwehki kitail ese me e pahn ketin wia dahme pwung. Ih met me wiawihong John, me kitail koasoia mwoweo. E koasoia: “Ma I kak awih Siohwa, e pahn ketin apwalihala ei kahpwalo mwahusang ei pahn song en kamwahwihala.”

“AHNSOU KOAROS KALOWEHKIHDI ME SUWED ME MWAHU”

16-17. Ia duwen kapakap eh sewese kitail en “ahnsou koaros kalowehkihdi me suwed me mwahu”? (Rom 12:21)

¹⁶ Wadek Rom 12:21. Pohl pil kangoange Kristian kan en “ahnsou koaros kalowehkihdi me suwed me mwahu.” Nan sapwellime Kapahrek en Pohn Dohl, Sises mahsanih: “Pousehlahte  poakohng amwail imwintihti kan oh kapakapki irail me kin kalokei kumwail.” (Mad. 5:44) Ih met me e ketin wia. Ele kitail kin medewehla lokolok laud me Sises ketin dadaur pah ni sounpei en Rom ko ar pasuradahng ni tuhkehn kalokoloko. Sises ketin lelohng tiahk lemei oh weirek laud. Kitail sohte kak uhdahn wehwehki uwen lokolok laud me e ketin lelohng.

¹⁷ Sises sohte ketin mweidohng wiewia sapahrek me e lelohng en kalowehdi ih. E sohte patohwan peki me sounpei ko en ale kalokeparail, ahpw e kapakap oh peki: “Ipa, komw ketin mahkohng irail pwe re sehse dahme re wiewia.” (Luk 23:34) Ni atail kin kapakapki irail me kin wiakauwe kitail, e kak sewese kitail en meleilei oh sohte nohn lingeringer. E kak pil wekidala mwomwen atail kilangwohng irail.

18. Ia duwen kapakap eh sewese Alberto oh John en dadaur pahn wiewia sapahrek?

¹⁸ Kapakap sewese brother riemeno me kitail koasoia mwoweo nan iren onop wet en dadaur pahn wiewia sapahrek me lelohng ira. Alberto koasoia: “I kapakapki brother ko me wiahiong ie wiewia sapahrek. I kin peki Siohwa pak tohto en ketin sewese ien uhdihsang linglingeringerki dahme wiawihong ieo.” E kaperen me Alberto pil pwurehng papah Siohwa ni lelepek. John koasoia: “Pak tohto, I kin kapakapohng Siohwa en ketin sewese brothero me kansensuwediehla oh pil sewese ie en mahkohng. Siohwa ketin sewese ien dehr lingeringer pahn brothero oh en uhdihsang kadeikih. Oh ei kapakap ko pil sewese ien kin meleilei.”

19. Dahme kitail anahne wia lao koasoandi wet imwisekla? (1 Piter 3:​8, 9)

¹⁹ Erein atail mi nan sampah suwed wet, ele kitail pahn kin lelohng wiewia sapahrek. Ahpw sohte lipilipil dahme kitail anahne dadaur pah, kitail en dehr uhdihsang kapakapki sawas sang rehn Siohwa. Pil ehu, kitail en kin alasang mwomwen Sises eh ketin mwekidki wiewia sapahrek oh pousehlahte doadoahngki kaweid kan en Paipel. Ma kitail wia met, kitail kak kamehlele me Siohwa pahn ketin kapaikitailda.—Wadek 1 Piter 3:​8, 9.