Ke men wiahiong omw pein onop en kin audapan? Wiepe pwukat kak sewese kamwahwihala omw kin wia onop:

• Pilada wasa mwahu. Ma kak, rapahkihda wasa ehu me soandi mwahu oh marain. Ke kak mwohd ni tehpel ehu, de ke kak pilada wasa mwahu ehu likin ihmw.

• Rapahkihda wasa ehu me ke kak kelehpwla. Sises ketin pilada en kapakap “nin sohrahn,” wasa me e kak “kalapwukala.” (Mark 1:35) Ma uhdahn sohte mie wasa kis me ke kak kelehpwla, ke kak padahkihong omw peneinei de tohn imwomwo iahd me ke pahn kin wia onop oh peki ma re kak menlau dehr kedirepweiuk ahnsou ko.

• Dehr mweidohng mehkot en kerempwa iuk. Ma ke kin doadoahngki sehlpwohn de tablet pwehn onop, kakunla ngilen alert kan de kihla ni airplane mode pwehn dehr kerempwa iuk. Oh ma ke medewehda mehkot me ke anahne wia, ntingihedi oh ke nek wia mwuhr. Ma e apwal en dehr medewe soahng teikan likin onop, kommoal oh kohla alu de kedengdeng.