1, 2. (a) Ia duwen soahng kan me kitail kin kasikasik ar weksang soahng kan me meteikan kin kasik? (b) Dahme kitail pahn koasoiapene nan iren onop wet?

 SIOHWA ketikihongehr kitail soahng kaselel kan me kitail en kasikasik. E ketin inoukihda en kasarawihla mwareo oh kahrehda kupwure en pweida nanleng oh sampah. (Mad. 6:9, 10) Mepwukat iei me keieu kesempwal me kitail kin kasikasik. Siohwa pil ketin inoukihda me e pahn ketikihong kitail mour soutuk, mehnda ma nanleng de sampah. Ia uwen met eh wia mehkot kaselel! (Sohn 10:16; 2 Pit. 3:13) Kitail pil kin kasik en kilang ia duwen Siohwa eh pahn ketin pousehlahte kaweid oh sewese sapwellime aramas akan ni imwin rahn pwukat.

² Paipel mahsanih me pwoson iei kamehlele mehkan me kitail kin kasikasik de koapworopworki. Met wehwehki me irail kan me ahneki pwoson kin uhdahn kamehlele me soahng kan me Siohwa ketin inoukihda pahn pweida. (Ipru 11:1) Weksang met, aramas tohto rahnwet kin kasik oh men ahneki soahng kan, ahpw re sohte uhdahn kak kamehlele me mepwukat pahn pweida. Karasepe, ele emen kin kasik en wihnkihda mwohni laud, ahpw e sohte uhdahn kak kamehlele me e pahn kana. Ahpw nan iren onop wet, kitail pahn kilang dahme kitail kak wia pwehn kakehlakahda atail pwoson sapwellimen Koht  inou kan. Kitail pahn pil koasoiapene ia duwen pwoson kehlail eh kak sewese kitail ahnsou wet.

3. Dahme kahrehda kitail pwoson me sapwellimen Koht inou kan pahn pweida?

³ Sohte emen rehtail ipwidi ahneki pwoson. Pwehn ahneki pwoson, kitail anahne mweidohng sapwellimen Koht manaman en kaweid mohngiongitail. (Kal. 5:22) Sapwellimen Koht manaman kak sewese kitail en esehla Siohwa. Ni atail wehwehkihla me ih me wasa lapalahpie oh erpit, kitail kin uhdahn kamehlelehla me e sapwellimanki koahiek en kapwaiada soahng koaros me e ketin inoukihda. Ni Siohwa eh kin ketin mahsanih duwen sapwellime inou kan, e kin mwomwen me inou ko wiawiher. E kin mahsanih: “E imwiseklahr!” (Wadek Kaudiahl 21:3-6.) Kitail ese me Siohwa kin ahnsou koaros ketin kapwaiada sapwellime inou kan. Ih Koht “me loalopwoat.” Ihme kahrehda kitail kin kamehlele soahng koaros me e ketin mahsanihong kitail duwen ahnsou kohkohdo.​—Deud. 7:9.

4. Dahme sapwellimen Koht aramas akan mahso kin pwoson?

⁴ Ipru irelaud 11 padahkihong kitail eden ohl oh lih 16 me uhdahn pwoson sapwellimen Siohwa inou kan. E pil mahsanih duwen me tohto teikan me kaperenda Siohwa “pwehki ar pwoson.” (Ipru 11:39) Irail koaros awiawih ‘kadaudoko’ me Siohwa ketin inoukihda. Re ese me “kadaudok” menet pahn kasohrehla sapwellimen Koht imwintihti kan koaros oh pwurehng kaparadaisihala sampah. (Sen. 3:15, NW) Sapwellimen Koht ladu pwukat pil uhdahn pwoson me Siohwa pahn ketin kaiasada irail. Ei mehlel, re sohte kin kasik ren iasadahng mour nanleng, pwehki Sises saikinte ketin ritingadahng aramas elen mour wet. (Kal. 3:16) Ahpw, re kasikasik en mour kohkohlahte nan paradais kaselel ehu nin sampah.​—Mel. 37:11; Ais. 26:19; 1 Kor. 15:55.

5, 6. Dahme Eipraam oh eh peneineio kin kasikasik? Ia duwen arail kolokolte arail pwoson en kehlail? (Menlau kilang tepin kilel.)

⁵ Ipru 11:13 mahsanih duwen sapwellimen Siohwa ladu lelepek pwukat: “Aramas pwukat koaruhsie pwoson, ahpw re melahr. Re sohte ale mehkan me Koht ketin inoukidahr; ahpw, sang wasa doh me re kilang oh perenkihda.” Re kin kasik sampah kapwo oh medewehla ar mi mwo. Emen rehrail iei Eipraam. Sises mahsanih me Eipraam “perenkihda eh pahn kilang” rahno. (Sohn 8:56) Sara, Aisek, Seikop, oh me tohto teikan pil kin kasik ahnsowo me Wehio, “me Koht ketin kupwurehla oh kauwada,” pahn kaunda sampah pwon.​—Ipru 11:8-11.

⁶ Ia duwen Eipraam oh eh peneineio arail kolokolte arail pwoson en kehlail? Re kin pousehlahte sukuhlki duwen Siohwa. Ekei pak, Koht ketin doadoahngki tohnleng, kaudiahl de ouraman kan pwehn mahseniong irail. Mwein re pil esehla soahng kan sang me mah lelepek kan de sang nting en mahs kan. Eipraam oh eh peneineio sohte manokehla duwen sapwellimen Koht inou kan, oh re kin perenki doudouloale mepwukat. Imwilahn met, re uhdahn kamehlele me Siohwa pahn ketin kolokolte sapwellime inou kan. Eri re kolokolte arail loalopwoatohng ih mendahki re lelohng kahpwal kan de kalokolok.

7. Dahme Siohwa ketikihongehr kitail pwehn kakehlakahda atail pwoson, oh dahme kitail anahne wia?

⁷ Dahme pahn sewese kitail en kolokolte atail pwoson en kehlail? Siohwa ketikihongehr kitail Paipel pwehn padahkihong kitail duwen sapwellime inou kan ong ahnsou kohkohdo. Nan Paipel, e ketin kasalehiong kitail dahme kitail anahne wia pwe kitail en nsenamwahu. Ihme kahrehda e mwahu kitail en wadek Paipel rahn koaros oh idawehn eh kaweid. (Mel. 1:1-3; wadek Wiewia 17:11.) Siohwa pil ketin doadoahngki “ladu lelepek oh loalokongo”  en kihong kitail kanatail “mwenge ahnsou me konehng.” (Mad. 24:45, NW) Duwehte sapwellimen Koht aramas akan mahsie, kitail anahne kaukaule wadek duwen sapwellimen Koht inou kan oh uhdahn doudouloale. Met pahn sewese kitail en kolokolte atail loalopwoatohng Koht oh kasikasikte ahnsowo me sapwellime Wehi pahn kaunda sampah pwon.

8. Ia duwen kapakap eh kak kakehlakahda atail pwoson?

⁸ Dahme pil sewese sapwellimen Siohwa aramas akan mahso en kolokolte arail pwoson en kehlail? Re kin kapakapki sapwellimen Siohwa sawas, oh ni arail kin kilang me e ketin sapengala arail kapakap kan, arail pwoson kin kehlailla. (Neh. 1:4, 11; Mel. 34:4, 15, 17; Dan. 9:19-21) Pil duwehte, ni atail kin kilang me Siohwa ketin karonge atail kapakap kan oh ketikihong kitail dahme kitail uhdahn anahne ni ahnsou me konehng, atail pwoson ih kin kehlailla. (Wadek 1 Sohn 5:14, 15.) Kitail pil anahne doulahte “peki” Siohwa en ketikihong kitail sapwellime manaman pwe kitail en kak kalaudehla atail pwoson.​—Luk 11:9, 13.

9. Soahng dah kei me kitail anahne kapakapki?

⁹ Ni atail kin kapakapohng Siohwa, kitail en dehr kin ihte peki reh en ketikihong kitail dahme kitail anahne. Kitail anahne pil kalahnganohng ih oh kapinga ih rahn koaros. Iei ih me ketin wiahda soahng kaselel tohto ong kitail! (Mel. 40:5) Sapwellimen Siohwa aramas akan pil kin kapakapki riarail Kristian kan sampah pwon. Karasepe, kitail kin “tamanda me sensel kan.” Kitail pil kin kapakapki brother kan me kin tiengla mwowe. Ni atail kin kilang ia duwen Siohwa eh kin ketin sapengala atail kapakap kan, atail pwoson ih kin kehlailla oh kitail kin karanihala ih.​—Ipru 13:3, 7.

10. Dahme sewese me tohto en eimah oh kolokolte arail loalopwoatohng Koht?

¹⁰ Nan Ipru irelaud 11, wahnpoaron Pohl nda: “Lih ekei mie me aleier nair seri kei me pwurehng mourda sang mehla pwehki pwoson. Pil ekei, ni ar kahng ale saledek, re pilada mehla nan lokolok laud pwe re en iasadahng mour me mwahusang met.” (Ipru 11:35) Me tohto lelohng kahpwal kan ahpw re kolokolte arail loalopwoatohng Koht pwehki re uhdahn pwoson dahme Koht ketin inoukihda duwen kaiasada. Re esehier me ni ahnsou kohkohdo, Siohwa pahn ketin kaiasada irail oh re pahn mour kohkohlahte nin sampah. Medewehla duwen Napod oh Sekaraia. Pwehki ira peikiong Koht, aramas akan katehki ira takai lao ira mehla. (1 Nan. 21:3, 15; 2 Kron. 24:20, 21) Daniel lekdekdiong nan pesen laion duhpek kei, oh ienge ko lekdeklahng nan kisiniei mwehlo. Re mendahkihla arail mour pwe re sohte men kaudokiong koht likamw akan. Ohl pwukat uhdahn pwoson me Siohwa pahn ketikihong irail sapwellime manaman oh sewese irail en dadaurete pahn kalokolok pwukat.​—Ipru 11:33, 34; Dan. 3:16-18, 20, 28; 6:13, 16, 21-23.

11. Kahpwal dah kan me ekei soukohp ko dadaur pah pwehki arail pwoson?

¹¹ Aramas kin kemenkouruhrki de salihedi soukohp tohto, duwehte Maikaia oh Seremaia. Soukohp teikan, duwehte Elaisa, “kin kohkohseli nan sapwtehn, pohn nahna kan, pahn paip akan, oh nan pwoahr akan.” Irail koaros kin dadaurete oh kolokolte arail loalopwoatohng Koht pwehki re ‘kamehlele mehkan me re kin koapworopworki de kasikasik.’​—Ipru 11:1, 36-38; 1 Nan. 18:13; 22:24-27; Ser. 20:1, 2; 28:10, 11; 32:2.

12. Ihs me wia mehn kahlemeng me keieu mwahu me kitail kak alasang? Dahme sewese ih en ketin dadaur pahn kahpwal kan?

¹² Sises Krais ketin lelohng kahpwal ehu me inenen laudsang kahpwal koaros ahpw e kolokolte eh loalopwoatohng Siohwa. Dahme sewese ih en ketin dadaurete? Pohl nda: “Pwehki peren me e kasikasik, e sohte mwahn  kupwurohkihla kanamenekpen eh pahn pwoula nin [“tuhkeo,” NW]; eri, ahnsou wet e ketiketier ni palimaun en mwoalen Koht.” (Ipru 12:2) Pohl eri kangoange Kristian kan ren “medemedewe” duwen sapwellimen Sises mehn kahlemeng. (Wadek Ipru 12:3.) Duwehte Sises, Kristian tohto ni mwehin wahnpoaron ko mehla pwehki ar loalopwoatohng Siohwa. Emen rehrail iei Antipas. (Kaud. 2:13) Kristian pwukat alehdier ketingparail, re weksang sapwellimen Koht ladu teikan mwohrail me kin kasikasik mour nin sampah. (Ipru 11:35) Ahnsou kis mwurin Sises ketin wiahla Nanmwarki nan pahr 1914, Kristian keidi kan me melahr iasadahng nanleng, oh re pahn iang Sises kaunda tohnsampah.​—Kaud. 20:4.

13, 14. Kahpwal dah kan me Rudolf Graichen lelohng, oh dahme sewese ih en kolokolte eh loalopwoatohng Koht?

¹³ Sapwellimen Koht ladu rar rar kei kin idawehn mehn kahlemeng mwahu en Sises. Re kin doudouloale sapwellimen Koht inou kan oh kolokolte arail loalopwoatohng ih erein ahnsou apwal kan. Emen rehrail iei Rudolf Graichen, me ipwidi Sehmen nan pahr 1925. Ni eh pwulopwul, eh pahpa nohno kin kihda kilel kan nan imwarailo me  pid duwen Paipel. E nda: “Ehu kilel ko kasalehda duwen kidi en wel men oh sihmpwul men, kisin kuht men oh lepard men, koupwul men oh laion men. Irail koaros kousoanpene ni popohl oh kisin pwutak kis me wia sileparail.” (Ais. 11:6-9) Met sewese Rudolf en medemedewe laud duwen paradais nin sampah oh kakehlakahda eh pwoson met. Pwehki met, e kolokolte eh loalopwoatohng Siohwa mendahki e ale kalokolok laud erein sounpar tohto sang Gestapo en Nazi oh mwuhr sang Communist Stasi en Palimesen Sehmen.

¹⁴ Rudolf pil lelohng kahpwal tohto teikan. Eh nohno mehkihla soumwahu laud ehu me adaneki typhus nan imweteng en Ravensbrück. Eh pahpao sainihala doaropwe ieu me kadehdehda me e solahr wia emen Sounkadehdehn Siohwa. Ahpw Rudolf kolokolte eh pwoson en kehlail. Mwurin eh pedoisang nan imweteng, e papah nin duwen sounapwalih me kin seiloak. Mwuhr e ale luhk en iang Sukuhl en Kilead oh pekederlahng Chile, wasa me e pwurehng papah nin duwen sounapwalih me kin seiloak. E pwoudikihda sister men, Patsy, me wia misineri men wasao. Ahpw, e kansensuwed me sounpar ehu mwuri, neira serepein pwelelo mehla. Ahnsou kis mwurin mwo, Patsy, me sounparte 43, pil mehla. Mendahki kahpwal pwukat koaros, Rudolf pousehlahte papah Siohwa. Pil ni eh mahla oh sohte ahneki roson mwahu, e kin papah nin duwen pioneer oh elder men. Kitail kak wadek duwen koasoipen eh mour nan Kahn Iroir (lokaiahn wai) en August 1, 1997, pali 20-25. ^[1]

15. Menlau kihda ekei karasepen riatail Kristian kan rahnwet me kin papah Siohwa ni peren mendahki re kin lelohng kalokolok.

¹⁵ Rahnwet, tohto riatail Kristian kan kin papah Siohwa ni peren mendahki re kin lelohng kalokolok laud. Tohto rehrail mi nan imweteng en Eritrea, Singapore, oh Palieir en Korea pwehki re sohte men “doadoahngki kedlahs.” (Mad. 26:52) Karasepe, Isaac, Negede, oh Paulos miher nan imweteng en Eritrea daulih sounpar 20! Wasao re kin ale kalokolok laud. Oh erein sounpar ko koaros, re sohte kak pwopwoudida de apwalih arail pahpa nohno. Ahpw, re kin loalopwoatohng Siohwa oh arail pwoson kin kehlail. Pil met, sounsilepen imweteng ko kin wauneki irail. Mie kilelen brother pwukat nan neitail website jw.org. Re kin pohkomwokomw, mendahki ar lokolok.

16. Dahme pwoson kehlail kak seweseiuk en wia?

¹⁶ Pali laud en sapwellimen Siohwa aramas akan sohte kin selidi de lelohng kalokolok laud duwehte riatail kan me kitail ahpwtehn koasoiapene. Ahpw me tohto kin lokolok pwehki semwehmwe, mahwen, de kahpwal en melimel, rerrer en sahpw de iloak laud ape. Ekei kin idawehn mehn kahlemeng en Eipraam, Aisek, Seikop, oh Moses oh pwilikihdi arail mour ndand oh kepwe kan pwe ren kilangwohngete arail kin papah Siohwa. Dahme kin sewese riatail Kristian kan en kolokol arail peren ni arail papah Siohwa? Arail limpoak ong ih oh arail uhdahn pwoson sapwellime inou kan. Re ese me e pahn ketin katingiheki mour soutuk sapwellime ladu lelepek kan nan sampah kapwo, wasa me sohte pahn mie wiewia sapahrek.​—Wadek Melkahka 37:5, 7, 9, 29.

17. Ia duwen omw pahn kolokolte omw pwoson en kehlail, oh dahme kitail pahn koasoiapene nan iren onop en mwuhr?

¹⁷ Nan iren onop wet, kitail kilangehr duwen wehwehn pwoson, me iei en “kamehlele mehkan me kitail kin koapworopworki de kasikasik.” Pwehn ahneki soangen pwoson wet, kitail anahne kapakapohng Siohwa oh doulahte doudouloale sapwellime inou kan. Kitail eri pahn kak dadaur pahn kahpwal koaros. Nan iren onop en mwuhr, kitail pahn kalaudehla atail koasoiapene duwen ia wehwehn en ahneki pwoson.