1. Pilipil keieu mwahu dah me emenemen kak wiahda?

PILIPIL me pahpa oh nohno kan kin wiahda kin kalapw kamwakid neirail seri kan ahnsou reirei. Ma papah nohno kan kin wiahda pilipil sapwung kan, irail kak kahrehiong neirail seri kan kahpwal kan. Ahpw ma re wiahda pilipil mwahu kan, irail kin sewese neirail seri kan en ahneki mour ehu me kaperen. Ahpw, seri kan anahne pil wiahda pilipil mwahu kan. Pilipil me keieu mwahu me emenemen kak wiahda iei en papah Samatailo nanleng, Siohwa, me kin ketin limpoak.​—Mel. 73:28.

2. Pilipil mwahu dah kan me Sises oh eh pahpa nohno wiahda?

² Sosep oh Mery men sewese neira seri ko en papah Siohwa, oh pilipil kan me ira wiahda kasalehda me en papah Siohwa me keieu kesempwal nan ara mour. (Luk 2:40, 41, 52) Sises pil ketin wiahda pilipil mwahu kan me sewese en wia dahme Siohwa ketin kupwurki en wia. (Mad. 4:1-10) Sises ketin wiahla ohl me kadek, loalopwoat, oh eimah. Pahpa oh nohno koaros me kin poakohng Siohwa pahn pohlki oh perenki naineki soangen pwutak duwehte ih.

3. Peidek dah kan me kitail pahn sapengala nan iren onop wet?

³ Nan iren onop wet, kitail pahn sapengala peidek pwukat: Pilipil mwahu dah kan me Siohwa ketin wiahda ong Sises? Dahme papah oh nohno Kristian kan kak sukuhlkihsang pilipil kan me Sosep oh Mery wiahda? Oh dahme Kristian pwulopwul kan kak sukuhlkihsang pilipil kan me Sises ketin wiahda?

4. Pilipil kesempwal dah me Siohwa ketin wiahda ong sapwellime Ohlo?

⁴ Siohwa ketin pilada ni pwung ahn Sises nohno oh pahpa. (Mad. 1:18-23; Luk 1:26-38) Dahme Mery nda me kileldi nan  Paipel kasalehda me e uhdahn poakohng Siohwa oh sapwellime Mahsen. (Luk 1:46-55) Oh mwomwen Sosep eh peikiong sapwellimen Siohwa kaweid kan kasalehda me e poakohng Siohwa oh men kaperenda ih.​—Mad. 1:24.

5-6. Dahme Siohwa ketin mweidohng sapwellime Ohlo en lelohng?

⁵ Tehk me Siohwa sohte ketin pilada ahn Sises nohno oh papah me kepwehpwe. Meirong me Sosep oh Mery wiahda mwurin Sises ketin ipwidi kasalehda me ira semwehmwe. (Luk 2:24) Ele Sosep wia eh doadoahk en kapinte nan eh kisin wasahn pesines ehu me mi limwahn imweo nan Nasaret. E mwomwen me sohte arail kepwe tohto de naineki diren mwohni, pwehki mwuhr ira naineki seri isimen de tohtohsang.​—Mad. 13:55, 56.

⁶ Siohwa ketin perehsang Sises soahng keper kan, ahpw E sohte ketin perehsang sapwellime Ohlo kahpwal koaros. (Mad. 2:13-15) Karasepe, mie kisehn Sises kan me sohte kin kamehlele ih. Medewehla ia uwen kansensuwed ong Sises me mie ekei nan eh peneineio sohte kamehlele ni tapio me ih me Mesaia. (Mark 3:21; Sohn 7:5) Pil ehu, ele Sosep mehla ni ahnsou me Sises pwulopwulte, oh met ele uhdahn apwal ong ih. Ahn Sosep mehlao kakete wehwehki me Sises, me wia nah pwutak me keieu laud, anahne apwalih peneineio oh arail pesineso. (Mark 6:3) Ni ahnsou me Sises ketin laudla, e mwahngiher ia duwen eh pahn apwalih eh peneineio. Ele e ketin anahne doadoahk laud pwehn apwalih irail. Eri e mwahngih ia mwomwen en pwangada mwurin doadoahk rahn ehu pwon.

7. (a) Peidek dah kan me pahn sewese pwopwoud kan me men apwalihada seri? (b) Ia duwen Lepin Padahk 2:1-6 eh kak sewese pahpa nohno kan en kaiahne neirail seri kan?

⁷ Ma kumwa pwopwoud ehu oh men naineki seri, pein idek rehmwa: ‘Se wia aramas aktikitik me kin poakohng Siohwa oh sapwellime Mahsen? Siohwa pahn kak ketin pilada sen apwalih mouren seri pwelel men me kesempwal?’ (Mel. 127:3, 4) Ma ke wia pahpa de nohno men, pein idek rehmw: ‘I kin padahkihong nei serio kesempwalpen en kin doadoahk laud?’ (Ekl. 3:12, 13) ‘I kin wia uwen ei kak koaros en pere nei seri kan sang keper kan me irail kakete lelohng nan ahn Sehdan sampah?’ (Lep. Pad. 22:3) Ke sohte kak perehsang noumw seri kan kahpwal koaros me irail kakete lelohng. Met sohte kak wiawi. Ahpw ke kak  kaunopirailda ong kahpwal kan en mour sang ni omw pousehlahte padahkih irail ni limpoak ong ia duwen arail en likih kaweid en Paipel. (Wadek Lepin Padahk 2:1-6.) Karasepe, ma kisehn peneinei men pilada en uhdihsang papah Siohwa, sewese noumw serio en sukuhlkihsang nan Mahsen en Koht dahme kahrehda e uhdahn kesempwal en loalopwoat ong Siohwa. (Mel. 31:23) De ma emen me kumwail kin poakohng mehla, kasalehiong noumw seri ko iren Paipel kan me kak sewese irail en powehdi nsensuwed oh en ahneki meleilei.​—2 Kor. 1:3, 4; 2 Tim. 3:16.

8. Nin duwen me Deuderonomi 6:6, 7 mahsanih, dahme Sosep oh Mery anahne wia?

⁸ Sosep oh Mery kak sewese Sises en kekeirda oh wiahla emen me Koht ketin kupwurperenki pwehki ira kin idawehn sapwellimen Siohwa kaweid kan ong pahpa oh nohno kan. (Wadek Deuderonomi 6:6, 7.) Sosep oh Mery ahneki limpoak laud ong Siohwa, oh ara mehn akadei me keieu kesempwal iei en sewese neira seri kan en kakairada soangen limpoakohte.

9. Pilipil kesempwal dah kan me Sosep oh Mery wiahda?

⁹ Sosep oh Mery pilada en kaukaule kaudokiong Siohwa iangahki neira seri ko. Irail kin kohla iang mihting en nan wihk kan ni sinakoke en Nasaret, pil iangahki kasarawi en Pahsohpa nan Serusalem. (Luk 2:41; 4:16) Ele ira kin isaneki soangen ahnsou ko me re kin seiloakla Serusalem pwehn padahkihong Sises oh rie ko duwen poadopoad en sapwellimen Siohwa aramas akan. Ele erein arail seiseiloako, irail mwemweitla wasa kan me Paipel koasoia duwe. Ni arail peneineio eh tohtohla, ele e sohte nohn mengei ong Sosep oh Mery en kaukaule wia arail kaudok ong Siohwa. Ahpw re alehdi keting pwehki ar wia met. Pwehki re kin mwohneki mahs Siohwa, arail peneineio mihmihte karanih Siohwa.

10. Dahme pahpa oh nohno Kristian kan kak sukuhlkihsang Sosep oh Mery?

¹⁰ Dahme papah oh nohno kan me kin lemmwiki Koht kak sukuhlkihsang Sosep oh Mery? Me keieu kesempwal iei en kasalehiong noumw serio sang ni dahme ke kin nda oh wia me ke kin uhdahn poakohng Siohwa. Kisakis keieu kesempwal me ke kak kihong irail iei en sewese ren poakohng Siohwa. Oh ehu mehn kasukuhl me keieu kesempwal me ke kak padahkihong irail iei ia duwen arail kak kaukaule wia onop en Paipel, kapakap, iang mihting  kan, oh kalohk. (1 Tim. 6:6) Ei uhdahn, ke anahne kihong noumw seri kan kepwe kan me re anahne. (1 Tim. 5:8) Ahpw tamataman me en noumw seri kan nanpwungmwahu keren rehn Siohwa, kaidehn neirail mwohni de kepwe kan, me pahn sewese irail en pitsang imwin ahn Sehdan koasoandi oh iang pedolong nan sapwellimen Koht sampah kapwo. *​—Esek. 7:19; 1 Tim. 4:8.

11. (a) Ia duwen kaweido me dierek nan 1 Timoty 6:17-19 eh pahn sewese pahpa oh nohno kan en wiahda pilipil mwahu ni ahnsou me irail kin apwalihada neirail seri kan? (b) Mehn akadei dah kan me omw peneinei ele pahn tehkpene, oh kapai dah kan me kakete imwikihla? (Menlau kilang kisin koakon “ Mehn Akadei Dah kan me Ke Pahn Ahneki?”)

¹¹ Ia uwen eh kaperen en kilang me papah nohno Kristian tohto kin wiahda pilipil mwahu kan pwehn sewese neirail seri kan en karanihala Siohwa! Irail kin kaukaule ehupene papah Siohwa. Irail kin iang towehda mihting kan oh mihting tohrohr kan. Oh irail kin iang kalohki rongamwahwo. Ekei peneinei kan pil kak iang kalohk nan wasahn kalohk kan me sohte me kin kalapw kalohk ie. Ekei kin mwemweitla nan Pedel de iang doadoahk en kauwada ihmw kan me sapwellimen Siohwa pwihn kin doadoahngki. Peneinei kan me pilada soangen doadoahk ko kin doadoahngki pein neirail mwohni pwehn wia soahng pwukat, oh met kak apwal ong irail. Ahpw ni kadek Siohwa pahn ketin katingiheki arail wia met. (Wadek 1 Timoty 6:17-19.) Seri kan me kin tikida nan soangen peneinei pwukat kin kalapw pousehlahte wia soahng mwahu pwukat ni ahnsou me irail laudla, oh re perenki me arail pahpa oh nohno apwalihirailda ni soangen ahl wet! *​—Lep. Pad. 10:22.

12. Dahme Sises anahne ketin wia ni eh laudla?

¹² Semen Siseso me ketiket nanleng kin ketin ahnsou koaros wiahda pilipil mwahu kan, oh semeo oh ineo nin sampah pil kin wiahda pilipil loalokong kan. Ahpw, ni ahnsou me Sises ketin laudla, e anahne wiahda pein eh pilipil kan. (Kal. 6:5) E kak ketin pilada dahme e pahn wia, duwehte kitail. E kakete ketin pilada en roporop oh sohte wia kupwuren Koht. Ahpw, e ketin pilada en kolokolete eh nanpwungmwahu rehn Siohwa. (Sohn 8:29) Ia duwen sapwellime mehn kahlemeng eh kak sewese me pwulopwul kan rahnwet?

13. Pilipil kesempwal dah me Sises ketin wiahda ni ahnsou me e pwulopwul?

¹³ Ni ahnsou me Sises wia kisin pwutak pwulopwul men, e pilada en peikiong semeo oh ineo. Sohte pak ehu me e sapeikiong ira pwehki e medewe me e ese soahng tohto. Ahpw, e “kin pousehlahte uhpahiong ira.” (Luk 2:51) Sises me keieu laud nan pwutak, me wehwehki  me mie ekei eh pwukoa kan. E kin uhdahn wia uwen eh kak koaros pwehn ketin kapwaiada pwukoa pwukat. E kin ketin doadoahk laud pwehn esehla doadoahk en kapinte sang rehn Sosep pwe en kak sewese koadoahkihada mwohni ong anahn kan en eh peneineio.

14. Ia duwen atail ese me Sises ketin wia tohnsukuhl mwahu men en Mahsen en Koht?

¹⁴ Semen Siseso oh ineo ele padahkihong ih duwen kapwuriamwei en eh ipwidio oh dahme sapwellimen Koht tohnleng ko ndahki duwen ih. (Luk 2:8-19, 25-38) Ahpw kaidehn ihte met. Sises pil pein ketin onopki Nting Sarawi kan. Ia duwen atail ese me Sises ketin wia tohnsukuhl mwahu men en Mahsen en Koht? Pwehki ni ahnsou me e wiahte kisin pwutak, sounpadahk ko nan Serusalem “pwuriamweikihla eh koahiek en wehwehki ire kan oh eh pasapeng kan.” (Luk 2:46, 47) Oh ni eh sounparte 12, Sises ketin kamehlelehiong pein ih me Siohwa iei Seme.​—Luk 2:42, 43, 49.

15. Ia duwen Sises eh ketin kasalehda me e pilada en wia kupwuren Siohwa?

¹⁵ Ni ahnsou me Sises esehda dahme Siohwa ketin kupwurki en wia, e pilada en wia kupwuren Siohwa. (Sohn 6:38) E mwahngih me aramas tohto pahn kailongkin ih. Mendahki e sohte kupwurperenki arail wia met, e piladahte en peikiong Siohwa. Ni Sises eh ketin papidaisla nan pahr 29, me keieu kesempwal ong ih iei en wia kupwuren Siohwa. (Ipru 10:5-7) Oh pil ni ahnsou me e pahn pwoulahr pohn tuhkehn kalokoloko, e koasoanehdi teng en pousehlahte wia kupwuren Semeo.​—Sohn 19:30.

16. Ia ehu mehn kasukuhl me seri kan kak sukuhlkihsang Sises?

¹⁶ Peikiong omw pahpa oh nohno. Duwehte Sosep oh Mery, omw pahpa oh nohno sohte unsek. Ahpw omw pahpa oh nohno ahneki pwukoa sang rehn Siohwa en pere oh kaiahne iuk. Ma ke rong ara kaweid oh wauneki ara pwuhng, ke pahn “pweida mwahu.”​—Ep. 6:1-4.

17. Nin duwen me Sosua 24:15 mahsanih, pilipil dah me me pwulopwul kan anahne wiahda ong pein irail?

¹⁷ Pilada ihs me ke pahn papah. Ke anahne kamehlelehiong pein kowe ihs Siohwa, ia kupwure, oh ia duwen omw kak kapwaiada nan omw mour. (Rom 12:2) Eri ke pahn kak en wiahda pilipil me keieu kesempwal nan omw mour, me iei en papah Siohwa. (Wadek Sosua 24:15; Ekl. 12:1) Ma ke kaukaule wia wadawad en Paipel oh onop, omw limpoak ong Siohwa pahn pousehlahte keirda oh omw pwoson ih pahn kehlailla.

18. Pilipil dahieu me me pwulopwul kan anahne wiahda, oh ia pahn imwilahn met?

 ¹⁸ Pilada en mwohneki mahs kupwuren Siohwa nan omw mour. Ahn Sehdan sampah inoukihda me ma ke doadoahngki omw koahiek ong pein kamwahupomw, ke pahn peren. Ahpw kitail ese me irail kan me kin kilangwohngete mehn akadei ong kepwe kan kin kalokehki pein irail “medek tohto.” (1 Tim. 6:9, 10) Ahpw, ma ke rong Siohwa oh pilada en mwohneki mahs kupwure nan omw mour, ke pahn pweida oh ‘ke pahn mwekid ni erpit.’​—Sos. 1:8, NW.

19. Dahme pahpa oh nohno kan anahne tamataman?

¹⁹ Pahpa oh nohno kan, wia uwen amwail kak koaros en sewese amwail peneinei en papah Siohwa. Likih ih, oh e pahn ketin sewesei kumwail en wiahda pilipil mwahu kan. (Lep. Pad. 3:5, 6) Tamataman me noumwail seri kan pahn mwekidki dahme kumwail kin wia laudsang dahme kumwail kin nda. Eri wiahda pilipil kan me pahn sewese noumwail seri kan en ale sapwellimen Siohwa kupwuramwahu.

20. Kapai dah kan me me pwulopwul kan pahn ale ma re pilada en papah Siohwa?

²⁰ Me pwulopwul kan, amwail pahpa oh nohno kan kak sewesei kumwail en wiahda pilipil mwahu nan omw mour. Ahpw kumwail anahne wiahda pilipil kan me pahn kaperenda Koht. Eri kahlemengih Sises oh pilada en papah Samamwail limpoako me ketiket nanleng. Ma kumwail wia met, kumwail pahn ahneki mour ehu me kedirepw, katapan, oh kaperen ni ahnsou wet. (1 Tim. 4:16) Oh ni ahnsou kohkohdo, kumwail uhdahn pahn perenki amwail mour!