1. Dahme emen me papidaislahr anahne en pousehlahte wia?

KE PAPIDAISLAHR? Ma ei, ni ahnsou me ke papidaislao, ke kasalehda mwohn aramas teikan me ke pwoson Siohwa oh men iang sapwellime pwihn papah ih. * Ei mehlel, omw pwoson Siohwa anahne en pousehlahte keirda. Oh ke anahne doulahte kakehlakahla omw pwoson me sapwellimen Siohwa pwihn kin wiewia doadoahk me e ketin kupwurki ren wia rahnwet.

2-3. Ni ahl dah me Siohwa kin ketin kaweid sapwellime pwihn rahnwet? Menlau kihda ehu karasepe.

² Rahnwet, Siohwa kin ketin kaweid sapwellime pwihn ni ahl ehu me kasansalehda kupwure, sapwellime irair, oh koasoandi kan. Kitail pahn koasoiapene sapwellimen Siohwa irair kaselel siluh me kitail kak kilang nan sapwellime pwihn.

³ Keieu, “Koht sohte kin ketin lipilipilki aramas.” (Wiewia 10:34) Limpoak me kamwakid Siohwa en ketikihda sapwellime Ohlo nin duwen “pweinen pweipwei sapahl ehu ong aramas koaros.” (1 Tim. 2:6; Sohn 3:16) Siohwa kin ketin doadoahngki sapwellime aramas akan en kalohki rongamwahwo ong koaros me pahn rong. Ni ahl wet, e kin ketin sewese koaros en paiekihda pweinen pweipwei sapahlo. Keriau, Siohwa iei Koht en popohl oh soandi mwahu. (1 Kor. 14:33, 40) Ihme kahrehda kitail en kasik me sapwellime tohnkaudok kan kin papah ih ni popohl oh soandi mwahu nin duwen pwihn ehu. Kesiluh, Siohwa iei “Sounpadahk Lapalapo.” (Ais. 30:20, 21, NW) Ihme kahrehda sapwellime pwihn kin doadoahk laud en padahkihong meteikan duwen sapwellime Mahsen, Paipel, nan mwomwohdiso oh nan wasahn kalohk. Ia duwen mwomwohdisohn tepin Kristian ko ar kahlemengih sapwellimen Siohwa irair siluh pwukat? Ia duwen sapwellimen Siohwa aramas akan nan atail ahnsou ar kin kahlemengih irair siluh pwukat? Oh ia duwen sapwellimen  Koht manaman eh kak seweseiuk ni omw kin iang sapwellimen Siohwa pwihn rahnwet?

4. Nin duwen me kileldi nan Wiewia 1:8, dahme Sises ketin kehkehlikihong sapwellime tohnpadahk ko en wia, oh sawas dah me irail pahn alehdi?

⁴ Ni mwehin tepin Kristian ko. Rohngo me Sises ketin kalohki kihong aramas koaros koapworopwor. (Luk 4:43) Sises ketin kehkehlikihong sapwellime tohnpadahk ko en pousehlahte doadoahko me e ketin tapiada, en kalohk lella “wasa me keieu doh nin sampah.” (Wadek Wiewia 1:8.) Ei mehlel, re sohte kak kelehpw wia doadoahk wet. Re pahn anahne sapwellimen Koht manaman, me iei “sounsawaso” me Sises ketin inoukihong irail.​—Sohn 14:26; Sek. 4:6.

5-6. Ni ahl dah kan me sapwellimen Koht manaman sewese sapwellimen Sises tohnpadahk ko?

⁵ Sapwellimen Sises tohnpadahk ko alehdi sapwellimen Koht manaman ni Pendekos pahr 33. Pwehki sawas sang manaman wet, re mwadangete tepida kalohk, oh sohte pwand, meh kid kid kei alehda rongamwahwo. (Wiewia 2:41; 4:4) Ni aramas eh tepida kaloke irail, tohnpadahk ko sohte mweidohng masak en kahrehiong ren uhdihsang kalohk. Ahpw, irail peki Koht en ketin sewese irail oh re kapakapki: “Mweidohng sapwellimomwi ladu kan ren kin uhdahn eimah oh usehlahte kalohki sapwellimomwi mahsen.” Irail eri direkihla sapwellimen Koht manaman oh doulahte “kalokalohki mahsen en Koht ni eimah.”​—Wiewia 4:18-20, 29, 31.

⁶ Sapwellimen Sises tohnpadahk ko lelohng pil ekei kahpwal kan. Karasepe, ni ahnsowo Paipel kan malaulau. Tohnpadahk ko sohte naineki sawaspen Paipel kan duwehte me kitail naineki rahnwet. Oh tohnpadahk ko anahne kalohk ong aramas kan me kin lokaiahki soangsoangen lokaia kan. Mendahki kahpwal pwukat koaros, tohnpadahk ngoang pwukat wia mehkot me mwomwen sohte kak wiawi. Mpen sounpar silihsekte, irail lohkier rongamwahwo “wasa koaros nin sampah.”​—Kol. 1:6, 23.

7. Daulih sounpar 100 samwalahro, ia duwen sapwellimen Siohwa ladu kan ar ese dahme e ketin kupwurki ren wia, oh dahme re wia?

⁷ Nan atail ahnsou. Siohwa kin ketin doulahte kaweid oh kakehlaka sapwellime aramas akan. Ei mehlel, pali laud en sapwellime kaweid kan kin kohsang sapwellime Mahsen, me ntingdi sang ni sawas en sapwellime manaman. Nan Paipel, kitail kin wadek duwen sapwellimen Sises doadoahk en kalohk oh sapwellime kehkehlik ong tohnpadahk ko en pousehlahte doadoahko me e ketin tapiada. (Mad. 28:19, 20) Makasihn wet en July 1881 koasoia: “Siohwa sohte ketin pilkihtda pwe aramas akan en kapinga kiht de sen kepwehpwehla, ahpw pwe sen doadoahngki soahng koaros me se ahneki pwehn kalohki rongamwahwo.” Pwuhko To Whom the Work Is Entrusted me wiawihda nan 1919 koasoia: “Mie doadoahk tohto me en wiawi, ahpw sapwellimen Kauno doadoahk met, oh e pahn ketikihong kiht kehl en wia met.” Ei, duwehte tepin Kristian ko, brother pwukat eimah oh doadoahk laud pwehki irail likih me sapwellimen Koht manaman pahn sewese irail en kalohk ong soangen aramas koaros. Kitail pil kin likih me sapwellimen Koht manaman pahn sewesei kitail rahnwet.

8-9. Soangen wiepen kalohk dah kan me sapwellimen Siohwa pwihn kin doadoahngki pwehn lohkipeseng rongamwahwo?

⁸ Sapwellimen Siohwa pwihn kin doadoahngki mehn kasukuhl kan me keieu mwahu pwehn lohkipeseng rongamwahwo. Mehn kasukuhl pwukat iei me iangahki pwuhk kan me wiawihda, kasdohn “Photo-Drama of Creation,” phonograph, sidohsahn pakair, broadcast kan nan redio oh me keren, computer oh Internet. Sapwellimen Koht pwihn pil kin wia doadoahk en kawehwe me keieu laud nan poadopoad! Dahme kahrehda? Pwe soangen aramas koaros en kak rong rongamwahwo ni pein arail lokaia. Siohwa sohte kin ketin lipilipilki aramas; e ketin kohpada me rongamwahwo pahn lohkseli “ong wehi koaros oh keinek koaros oh lokaia koaros oh aramas koaros.” (Kaud. 14:6, 7) E ketin kupwurki koaros en kak rong rohng en Wehio.

 ⁹ Ahpw ia duwen aramas akan me kitail sohte kak kalohk ong ele pwehki irail kin mi ni apartment kan me mie sounsilasil de kehlo loak? Pwe kitail en kalohk ong soangen aramas pwukat, Siohwa ketin sewese sapwellime pwihn en tepida doadoahngki soangsoangen wiepen kalohk pwehn kalohk ong wehipokon. Karasepe, nan pahr 2001, Pwihn me Kin Apwalih Mwomwohdiso nan Sampah Pwon mweidada riatail Kristian kan nan France en tepida doadoahngki deupen pwuhk kan oh ahl teikan me pahn kasalehda neitail pwuhk kan. Mwuhr, riatail kan nan ekei wasa pil tepida kalohk ni soangen ahl wet. Met pweida mwahu. Nan pahr 2011, prokram kapw ehu tepida nan Wehin Amerika ni ehu wasa me keieu kedirepw nan New York City. Erein tepin pahro, pwuhk 102,129 oh makasihn 68,911 me irail kihpeseng. Oh aramas 4,701 peki onop en Paipel! E sansal me sapwellimen Koht manaman kin utung doadoahk wet. Eri Pwihno mweidada riatail Kristian kan nan sampah pwon en doadoahngki wiepen kalohk wet.

10. Dahme kitail kak wia pwehn kamwahwihala atail doadoahk en kalohk?

¹⁰ Dahme ke kak wia. Nan mihting en Kristian kan, Siohwa kin ketin kaiahne kitail pwehn kalohk. Doadoahngki dahme ke sukuhlki wasao. Kaukaule iang kalohk rehn omw pwihn en kalohk. Riomw Kristian kan nan omw pwihn kak sewese iuk en koahiekla nan kalohk oh padahk, oh kak kangoange iuk sang ni ar mehn kahlemeng mwahu. Pousehlahte kalohk mendahki kahpwal kan. Nin duwen me iren Paipelo ong onop wet mahsanih, kitail kak kapwaiada kupwuren Koht, kaidehn pwehki pein atail kehl, ahpw pwehki kehl sang sapwellimen Koht manaman. (Sek. 4:6) Koht pahn uhdahn ketikihong kitail kehl me kitail anahne pwehki kitail wiewia sapwellime doadoahk.

11. Ia duwen pwihn me kin apwalih mwomwohdiso kan ni mwehin tepin Kristian ko ar doadoahkpene pwehn pousehlahte apwalih sapwellimen Koht aramas akan en soandi mwahu?

¹¹ Ni mwehin tepin Kristian ko. Pwihno nan Serusalem me kin apwalih mwomwohdiso kan kin doadoahkpene pwehn kolokol meleilei oh soandi mwahu nanpwungen sapwellimen Koht pwihn. (Wiewia 2:42) Karasepe, mpen pahr 49, Kristian tohto sohte pwungki ma koaros anahne en sirkumsaisla de soh pwehn kak papah Siohwa. Eri  pwihn me kin apwalih mwomwohdiso kan ahnsowo, me sapwellimen Koht manaman kin kaweid, koasoipene ireo. Ma mwomwohdisou tohrohrpeseng pwehki ireo, re sohte pahn kak pweida nan arail kalohk. Mendahki irail mehn Suhs kei, wahnpoaron ko oh ohl mah ko sohte mweidohng tiahk en mehn Suhs kan de irail kan me kin kehlailki tiahk pwukat en kamwakid irail. Ahpw, irail kilenglahng Mahsen en Koht oh peki sapwellime manaman pwehn sewese irail en wiahda pilipil pwung. (Wiewia 15:1, 2, 5-20, 28) Ia imwilahn met? Siohwa ketin kapaiahda arail pilipilo, mwomwohdisou kolokolete popohl oh minimin, oh re doulahte kalohki rongamwahwo.​—Wiewia 15:30, 31; 16:4, 5.

12. Dahme kasalehda me sapwellimen Siohwa pwihn rahnwet kin soandi mwahu oh meleilei?

¹² Nan atail ahnsou. Sapwellimen Siohwa pwihn kin sewese sapwellime aramas akan en kin soandi mwahu oh kolokol arail popohl. Pil sangete mahso, Kahn Iroir en November 15, 1895 (Zion’s Watch Tower and Herald of Christ’s Presence) kihda oaralapo me koasoia “Ni Ahl me Konehng oh Soandi Mwahu” me poahsoankihda 1 Korint 14:40. E koasoia: “Wahnpoaron ko ntingihedi soahng tohto ong tepin mwomwohdiso ko mahs duwen soandi mwahu . . . E kesempwal en pousehlahte idawehn ni keneinei ‘soahng kan me ntingdier mwowe pwe en padahkih kitail.’” (Rom 15:4) Ei, sapwellimen Siohwa pwihn rahnwet kin doadoahk laud pwehn sewese mwomwohdiso kan en soandi mwahu oh meleilei duwehte me tepin Kristian ko kin wia ni arail mwehio. Karasepe: Ma ke pahn iang Onop en Kahn Iroir nan ehu mwomwohdiso nan ehu sahpw tohrohr, ke pahn ese ia duwen onopo eh pahn wiawi oh mehnia oaralap me kumwail pahn onopki. Ke pahn mwadangete soanamwahuki! Sapwellimen Koht manaman kelehpw me kak kahrehda soangen minimino en kak wiawi!​—Sep. 3:9.

13. Peidek dah kan me Seims 3:17 pahn kahrehiong kitail en pein idek?

¹³ Dahme ke kak wia. Siohwa kin ketin kupwurki sapwellime aramas akan en ‘kolokol ehupene me irail alehsang sapwellimen Koht manaman.’ (Ep. 4:1-3) Eri pein idek rehmw: ‘I kin kahrehda minimin oh popohl nan mwomwohdiso? I kin peikiong irail kan me kin tiengla mwowe? Meteikan kak likih ie, ahpw mehlel ma mie ei pwukoa kan nan mwomwohdiso? I kin men sawas, perenki papah, oh sohte kin pwand?’ (Wadek Seims 3:17.) Ma ke kilang mie wasa kan me ke kak  kamwahwihala, kapakapki sapwellimen Koht manaman. Ma ke kin mweidohng en kamwakid pein kowe oh omw wiewia kan, en riomw Kristian kan limpoak ong uhk oh arail kalahnganki dahme ke kin wia pahn laudla.

14. Nin duwen me Kolose 1:9, 10 mahsanih, ia duwen Siohwa eh ketin kasukuhlih sapwellime aramas akan ni mwehin tepin Kristian ko?

¹⁴ Ni mwehin tepin Kristian ko. Siohwa kin ketin kupwurperenki padahkih sapwellime aramas akan. (Mel. 32:8) E ketin kupwurki irail en esehla ih, poakohng, oh en mour kohkohlahte nin duwen sapwellime seri kompoak kei. Soahng pwukat koaros sohte pahn kak wiawi ma sohte mehn kasukuhl kan me e ketikihda. (Sohn 17:3) Siohwa kin ketin doadoahngki mwomwohdiso en tepin Kristian ko pwehn kasukuhlih sapwellime aramas akan. (Wadek Kolose 1:9, 10.) Sapwellimen Koht manaman​—“sounsawas” me Sises ketin inoukihda—​pil sewese tohnpadahk ko. (Sohn 14:16) Sapwellimen Koht manaman sewese tohnpadahk ko en wehwehki Mahsen en Koht oh tamataman soahng koaros me Sises ketin wia oh mahsanih, me mwuhr re kak wadek nan pwuhken Rongamwahu ko. Loalokong wet kakehlakahla pwoson en tepin Kristian ko pil iangahki arail limpoak ong Koht, sapwellime Ohlo, oh pil ong emenemen.

15. Ni ahl dah kan me ke kilangehr Siohwa eh ketin kapwaiada sapwellime inou me dierek nan Aiseia 2:2, 3?

¹⁵ Nan atail ahnsou. Siohwa ketin kohpada me “ni rahn ekei me pahn kohdo,” aramas akan sang wehi koaros pahn kohdo ni sapwellime “nahna,” de iang sapwellime tohnkaudok mehlel kan, sukuhlki duwen kupwure kan. (Wadek Aiseia 2:2, 3.) Kitail kin kilang kokohp wet eh pweidahr. Kitail kak kilang me kaudok mehlel uhdahn mwahusang kaudok likamw teikan koaros. Oh Siohwa kin ketikihong sapwellime aramas akan ire tohto duwen Paipel. (Ais. 25:6) E kin ketin doadoahngki ‘ladu lelepek oh loalokongo’ pwehn kihda ire pwukat koaros, me kin kohda ni soangsoangen ahl kei. Karasepe, kitail kak wadek iren onop kan, rong padahk kan, oh kilang kisin kasdo kan.  (Mad. 24:45) Kitail kin ahneki pepehm duwehte kompoakepahn Sohpo, Elihu, me nda ni pwung me Koht iei “sounpadahk me keieu lapalap sang koaros.”​—Sohp 36:22.

16. Dahme ke kak wia pwehn paiekihda kaweid kan me kohsang rehn Siohwa?

¹⁶ Dahme ke kak wia. Sapwellimen Koht manaman pahn seweseiuk en kapwaiada nan omw mour dahme ke wadek oh onopki nan Mahsen en Koht. Kapakap duwehte sounmelkahkao: “Maing KAUN, komw ketin padahkihong ie audepen kupwuromwien, I ahpw pahn kin loalopwoat peikiong komwi; komw ketin padahkihong ie pwe I en kin papah komwi ni kapehdi unsek.” (Mel. 86:11) Eri, pousehlahte wadek oh onopki Paipel oh sawasepen Paipel kan me sapwellimen Siohwa pwihn kin kihda. Ei uhdahn, omw mehn akadei kaidehn en ihte alehdi loalokong. Ke men kamehlelehiong pein uhk duwen padahk mehlel oh kapwaiada nan omw mour. Sapwellimen Siohwa manaman kak seweseiuk en wia met. Ke pil men kangoange riomw Kristian kan. (Ipru 10:24, 25) Dahme kahrehda? Pwehki irail omw peneinei. Kapakapki sapwellimen Koht manaman en seweseiuk en wia pasapeng kan sang nan omw mohngiong nan mihting en Kristian kan, oh wia uwen omw kak koaros ma mie omw pwukoa nan mihtingo. Ni soangen ahl pwukat ke kin kasalehiong Siohwa oh sapwellime Ohlo me ke poakohng sapwellimara “sihpw” kesempwal kan.​—Sohn 21:15-17.

17. Ni ahl dah kan me ke kak kasalehda me ke kin utung ni loalopwoat sapwellimen Siohwa pwihn?

¹⁷ Ni ahnsou keren, ihte pwihn me pahn luhwehdi nin sampah iei pwihn me sapwellimen Koht manaman kin kaweid. Eri iang sapwellimen Siohwa pwihn doadoahk nin ngoang. Kasalehda me ke poakohng aramas koaros duwehte me Koht kin ketin wia sang ni omw kalohki rongamwahwo ong aramas koaros me ke tuhwong. Alasang eh kin ketin poakohng popohl oh soandi mwahu sang ni omw kin kahrehda miniminpene nan mwomwohdiso. Oh rong omw Sounkaweid Lapalapo sang ni omw sukuhlki ire kan koaros me e kin ketikihda. Eri ni ahn Sehdan sampah eh pahn imwisekla, ke sohte pahn masepwehk. Ahpw, ke pahn eimah iangih irail kan me kin loalopwoat papah nan sapwellimen Siohwa pwihn.