1. Ia duwen aramas tohto ar mwekidki kaweid erpit kan sang nan Paipel? (Lepin Padahk 1:20, 21)

 NAN sahpw tohto, kitail kin kalapw kilang riatail Kristian kan kesihnen ni wasa kan me aramas tohto kin alialu. Irail kin sirei oh kasalehiong aramas ako pwuhk kan ma re men wadek. Mie pak me ke iang wia wiepen kalohk wet? Ma ei, ele met kin katamandohng uhk iren Paipelo nan pwuhken Lepin Padahk me karasahda duwen erpit eh liklikweriong aramas akan en rong eh kaweid. (Wadek Lepin Padahk 1:20, 21.) Paipel oh neitail sawasepen Paipel kan kin audaudki “erpit mehlel,” me iei sapwellimen Siohwa erpit. Aramas anahne soangen erpit wet pwe ren kak ahneki mour soutuk. Kitail perenki ni emen eh ale ehu neitail sawasepen Paipel. Ahpw kaidehn koaros kin ale. Ekei sohte men esehla dahme Paipel mahsanih. Ekei kin kouruhrkin kitail. Irail kin medewe me Paipel wereilahr oh sohte kak kadoadoahk ahnsou wet. Pil ekei kin kauwe padahk en Paipel me pid tiahk, oh kose me irail kan me kin idawehn Paipel wia aramas lemei kei me kin men kadeik meteikan. Ahpw ni limpoak, Siohwa kin pousehlahte ketikihda sapwellime erpit ong aramas koaros. Ni ahl dah?

2. Ia wasa kitail kak diar ie erpit mehlel, ahpw dahme pali laud en aramas akan pilada ren wia?

² Ehu ahl me Siohwa kin ketikihda erpit mehlel iei sang ni sapwellime Mahsen, Paipel. Kereniong aramas koaros kak naineki pwuhk wet. Oh ia duwen neitail sawasepen Paipel kan? Pwehki sapwellimen Siohwa kapai, sawasepen Paipel pwukat mieier ni lokaia daulih 1,000. Irail kan me kin rong, de wadek oh kapwaiada dahme re sukuhlki, pahn paiekihda. Ahpw pali laud en aramas akan pilada en dehr rong Siohwa. Ni arail pahn kin wiahda pilipil kan, irail kin men koapworopworkihte pein irail de rong meteikan. Ele re sohte wauneki  kitail pwehki kitail pilada en idawehn dahme Paipel mahsanih. Iren onop wet pahn koasoia dahme kahrehda aramas akan kin wia met. Ahpw keieu, kitail pahn koasoiapene ia duwen atail kak alehdi erpit sang rehn Siohwa.

3. Dahme erpit mehlel kin pidada?

³ Erpit kak dokedoke atail koahiek en doadoahngki dahme kitail ese pwehn wiahda pilipil mwahu kan. Ahpw erpit mehlel kin pidada laudsang met. Paipel mahsanih: “Pwe kumwail en loalokong, keieu kumwail pahn lemmwiki KAUN-O. Ma kumwail pahn ese Me Sarawio, eri, mie amwail dehdehki.” (Lep. Pad. 9:10) Eri ni atail pahn wiahda pilipil kesempwal ehu, kitail anahne esehda dahme Siohwa ketin medewehki pilipilo. Kitail kak wia met sang ni atail onopki Paipel oh sawasepen Paipel kan. Kitail kin kasalehda erpit mehlel ni atail wia met.​—Lep. Pad. 2:5-7.

4. Dahme kahrehda Siohwa kelehpw me kak ketikihong kitail erpit mehlel?

⁴ Siohwa kelehpw me kak ketikihong kitail erpit mehlel. (Rom 16:27) Dahme kahrehda e ketin wia Utupen erpit? Keieu, Siohwa iei Sounkapikpen mehkoaros, eri e ketin mwahngih soahng koaros duwen sapwellime kepikipik kan. (Mel. 104:24) Keriau, wiepen nin lime kan koaros kin kasalehda sapwellime erpit. (Rom 11:33) Kesiluh, sapwellime kaweid erpit kin ahnsou koaros wia kamwahu ong irail kan me kin doadoahngki. (Lep. Pad. 2:10-12) Ma kitail men ahneki erpit, kitail anahne pwungki ire mehlel pwukat oh mweidohng en kaweid atail pilipil oh wiewia kan.

5. Dahme kin wiawi ni aramas akan ar sohte pwungki me erpit mehlel kohsang rehn Siohwa kelehpw?

⁵ Me tohto nin sampah pwungki me mahn akan, tuhke kan, de soahng kaselel teikan me re kilang kin uhdahn wiawihda mwahu, ahpw re kin nda me sohte mie Sounkapikada men. Ekei me kitail tuhwong nda me re kamehlele Koht, ahpw irail medewe me dahme Paipel padahngki solahr kadoadoahk oh kin pilada en wia dahme re men wia. Ia imwilahn met? Ia duwe, sampah wet mwamwahula pwehki aramas akan kin koapworopworki pein arail loalokong a kaidehn sapwellimen Koht? Irail diarehr nsenamwahu mehlel de koapworopwor mehlel ong ahnsou kohkohdo? Dahme kitail kin kilang kamehlelehiong kitail ire mehlel wet: “Sohte erpit, sohte dehde, oh sohte kaweid kin uhwong Siohwa.” (Lep. Pad. 21:30, NW) Met kamwakid kitail en pekipekihte Siohwa en ketikihong kitail erpit mehlel! E kansensuwed me pali moron en aramas akan sohte kin. Dahme kahrehda?

6. Nin duwen me Lepin Padahk 1:22-25 mahsanih, ihs me sohte men rong sapwellimen Siohwa erpit?

⁶ Aramas tohto sohte men rong sapwellimen Siohwa erpit eh “liklikwer nanial kan.” Paipel mahsanih me mie pwihn en aramas siluh me kin soikala erpit: “me soakoahiek kan,” “sounkepit kan,” oh “me pweipwei kan.” (Wadek Lepin Padahk 1:22 b-25.) Kitail pahn tehkpene dahme kahrehda aramas pwukat kin soikala sapwellimen Koht erpit oh pil ia duwen atail kak dehr duwehte irail.

7. Dahme kahrehda ekei piladahte en “soakoahiek”?

⁷ Irail “me soakoahiek kan” iei irail me kin kamehlele soahng koaros me re rong oh meteikan kin mengei en pitihedi. (Lep. Pad. 14:15, NW) Kitail kin kalapw tuhwong soangen aramas pwukat nan kalohk. Karasepe,  medewehla aramas rar rar kei me kaunen pelien lamalam de politik kan pitihedi. Ekei uhdahn pwuriamweila ni arail esehda me kaun pwukat pitihiraildi. Ahpw irail kan me Lepin Padahk 1:22 mahsanih duwe kin piladahte en soakoahiek pwehki re mwahuki met. (Ser. 5:31) Irail men wia dahme re mwahuki oh sohte men sukuhlki dahme Paipel mahsanih de peikiong eh kosonned kan. Me tohto ahneki soangen madamadauohte me lih emen sang Quebec, Canada, me kin poadidiong eh sarawio, ndaiong emen Sounkadehde: “Ma aht pahdereo pitihkitdi, eri eh sapwung, kaidehn aht!” Uhdahn kitail sohte men alasang irail kan me pilada en soakoahiek!​—Lep. Pad. 1:32; 27:12.

8. Dahme pahn sewese kitail en ahneki erpit?

⁸ Mie kahrepe mwahu me Paipel kangoange kitail en dehr soakoahiekte ahpw en “wiahla aramas laud kei ni [atail] koahiek en wehwehki.” (1 Kor. 14:20) Kitail ahneki erpit sang ni atail kapwaiada kaweid oh ire mehlel kan en Paipel nan atail mour. Ni atail wia met, kitail pahn kilang ia duwen Paipel eh sewese kitail en soikala kahpwal oh wiahda pilipil mwahu. E mwahu en medewe duwen pilipil kan me kitail wiadahr. Karasepe, ma ke kin onop Paipel oh iang towehda mihting kan ahpw saikinte inoukihong Siohwa omw mour oh papidaisla, ke anahne medewe dahme ke anahne wia pwehn lel mehn akadei wet. Ma ke papidaislahr, ke kin pousehlahte kekeirda nin duwen sounkalohk oh sounpadahk en rongamwahwo? Omw pilipil kan kin kasalehda me ke weweidki kaweid kan en Paipel? Ke kin kasalehda irair en Kristian nan omw wiewia kan ong meteikan? Ma ke anahne wiahda wekidekla kan, ke anahne medewe mwahu sapwellimen Siohwa mehn kataman kan me kin “kaloalokongihala me soaloalokong kan.”​—Mel. 19:7.

9. Ia duwen “sounkepit kan” ar kasalehda me re kin soikala erpit?

⁹ Keriaun pwihnen aramas me kin soikala erpit sang Koht iei irail “sounkepit kan.” Ekei pak, kitail kin tuhwong soangen aramas pwukat nan kalohk. Irail perenki kepitki meteikan. (Mel. 123:4) Paipel katamankihong kitail me ni imwin rahn akan, e pahn mie sounkepit tohto. (2 Pit. 3:3, 4) Duwehte ohl ako me pwoudiki nein Lohd serepein ko, ekei aramas rahnwet sohte kin rong mahsen en Koht. (Sen. 19:14) Me tohto kin kouruhrki irail kan me kin peikiong dahme Paipel mahsanih. Irail kin wia met pwehki re men idawehn “pein arail ineng suwed kan.” (Sud 7, 17, 18) Paipel eh kawehwehda sounkepit pwukat uhdahn pahrekiong irail kan me kesehla oh uhwongada kaudok mehlel oh pil meteikan me kin soikala Siohwa!

10. Nin duwen me Melkahka 1:1 mahsanih, ia duwen atail kak dehr wiahla sounkepit?

¹⁰ Ia duwen atail kak tehk mwahu me kitail en dehr wiahla sounkepit? Ehu ahl iei en dehr patehng irail kan me kin men kaulimki soahng koaros. (Wadek Melkahka 1:1.) Met wehwehki me kitail en dehr rong de wadek mehkot sang irail kan me kesehla oh uhwongada kaudok mehlel. Kitail anahne kanahieng pwe kitail en dehr tepida kaulimki soahng koaros oh peikasalki Siohwa oh kaweid kan me kitail alehdi sang sapwellime pwihn. Eri kitail anahne pein idek rehtail: ‘I kin kalapw kaulim ni ahnsou me kitail alehdi kaweid kapw de kawehwe kapw ehu? I kin men rapahki sapwung en irail kan me kin tiengla mwowe?’ Ni atail kin mwadangete uhdihsang wia soahng pwukat, Siohwa pahn ketin kupwurperenkin kitail.​—Lep. Pad. 3:34, 35.

11. Ia duwen “me pweipwei kan” ar kin kilangwohng sapwellimen Siohwa kaweid kan?

¹¹ Kesiluh en pwihn en aramas me kin soikala  erpit iei irail “me pweipwei kan.” Irail pweipwei pwehki irail sohte kin kapwaiada sapwellimen Koht kaweid kan nan arail mour. Irail kin men wia dahme pein irail medewe me pwung. (Lep. Pad. 12:15) Irail kin soikala Siohwa me ketin wia Utupen erpit. (Mel. 53:1) Ni ahnsou me kitail tuhwong irail nan kalohk, irail kin kalapw lemei oh kauwe kitail pwehki atail wauneki kaweid kan en Paipel. Ahpw irail sohte kak kihong kitail mour mwahu. Paipel mahsanih: “Mahsen en kupwurokong kan me nohn loal pwe me pweipwei kan en kak dehdehki. E sohte kak patohwanda mehkot ni ahnsou me mahsen en ire kesempwal akan kin wiawi.” (Lep. Pad. 24:7) Sohte kaweid erpit ehu me me pweipwei kan kak kihda. Ihme kahrehda, Siohwa ketin mahsanihong kitail en “keiweisang rehn aramas pweipwei kan”!​—Lep. Pad. 14:7.

12. Dahme pahn sewese kitail en soikala elen me pweipwei kan?

¹² Kitail sohte duwehte irail kan me kailongki sapwellimen Koht kaweid. Ahpw kitail kin sukuhlki en poakohng sapwellime elen madamadau, iangahki sapwellime kosonned kan koaros. Kitail kak kalaudehla limpoak wet sang ni atail kapahrekihpene imwilahn me peik kan oh me sapeik kan. Tehk mwahu soangen kahpwal kan me aramas akan kin pein kahrehiong irail pwehki ni pweipwei re soikala sapwellimen Siohwa kaweid erpit. Kowe eri medewe ia uwen mwahulahn omw mour pwehki ke kin peikiong Koht.​—Mel. 32:8, 10.

13. Siohwa kin ketin idingkihong kitail en peikiong sapwellime kaweid erpit kan?

¹³ Siohwa kin ketikihda erpit ong koaros, ahpw e sohte kin ketin idingkihong emen en pwungki. E ketin kawehwehda ia imwilahn irail kan me sohte kin rong sapwellime erpit. (Lep. Pad. 1:29-32) Irail kan me pilada en sapeikiong Siohwa pahn ‘ale mehkoaros me konehng irail.’ Mwuhr, irail pahn lelohng weirek oh lokolok laud pwehki mwomwen arail mour, oh Siohwa pahn ketin kasohreirailla. Ahpw Siohwa ketin inoukihong irail kan me kin rong sapwellime kaweid erpit kan oh doadoahngki: “Ma mehmen pahn rong ie, e pahn ale komour. E pahn poadoandoarla, oh sohte kahrepen eh pahn masak mehkot.”​—Lep. Pad. 1:33.

14-15. Dahme kitail sukuhlkihsang Lepin Padahk 4:23?

¹⁴ Ni atail doadoahngki sapwellimen Koht erpit, kitail kin ahnsou koaros paiekihda. Kitail koasoiapenehr duwen Siohwa eh ketin kamengeiong koaros sapwellime erpit. Karasepe, nan pwuhken Lepin Padahk pwon, e ketikihda kaweid mwahu kan me pahn ahnsou koaros kadoadoahk ong kitail. Kitail pahn koasoiapenehte kaweid pahieu.

¹⁵ Pere omw madamadau. Paipel mahsanih: “Kanahieng omw madamadau, pwe omw madamadau kan kin kahrehda mwomwen omw mour.” (Lep. Pad. 4:23) Medewehla dahme kitail kin anahne wia pwehn pere atail mohngiong. Kitail anahne kang mwenge roson,  eksersais, oh soikala soahng kan me suwed ong paliwaratail. Kitail pil kin wia soahngohte pwehn pere atail madamadau. Kitail kin wadek Mahsen en Koht rahn koaros. Kitail kin kaunopada ong mihting kan, iang towehda, oh iang pasapeng. Kitail kin kaukaule iang kalohk. Oh kitail kin soikala kakairada tiahk sapwung kan sang ni atail kaleke kitail sang soahng koaros me kak kauwehla atail madamadau, duwehte mehn kamweit samin kan oh werek suwed.

16. Dahme kahrehda Lepin Padahk 23:4, 5 wia kaweid mwahu ong kitail rahnwet?

¹⁶ Itarki dahme ke ahneki. Paipel kihda kaweid wet: “Dehr mweidohng paliweromwen en pwangada ni omw songosong en kepwehpwehla. Noumw mwohni kak sohrala ni marepteieu, rasehng ikel emen me wunen peh osohsehng e ahpw pipihrla.” (Lep. Pad. 23:4, 5) E mengei ong aramas en luhssang neirail mwohni oh kepwe kan. Ahpw me kepwehpwe oh me semwehmwe tohto rahnwet kin pwunodki laud arail pahn wiahda sent. Ihme kahrehda irail kin kalapw wia soahng kan me kin kahdsuwedihirailla, kauwehla arail nanpwungmwahu rehn meteikan, de pil arail roson en war. (Lep. Pad. 28:20; 1 Tim. 6:9, 10) Ahpw erpit kin sewese kitail en toupahrekiong mwohni. Oh met kin pere kitail sang noahrok oh kahrehiong kitail en nsenamwahu oh peren.​—Ekl. 7:12.

17. Nin duwen me Lepin Padahk 12:18 mahsanih, ia duwen atail lokaia eh kak wia “lokaiahn loalokong”?

¹⁷ Medewe mahs mwohn omw koasoi. Ma kitail sohte kanahieng, atail lokaia kakete kamedekihala meteikan. Paipel mahsanih: “Lokaia mwahl kin kauwehla wasa rasehng kedlahs, ahpw lokaiahn loalokong kin kamwahwihala wasa.” (Lep. Pad. 12:18) Kitail kin sewese kolokol popohl ni atail soikala koasoiaseli en meteikan sapwung. (Lep. Pad. 20:19) Ma kitail men atail koasoi en kansenamwahwih meteikan oh sohte kamedekirailla, kitail anahne kaukaule wadek oh medemedewe Mahsen en Koht. (Luk 6:45) Ni atail doudouloale dahme Paipel mahsanih, atail koasoi kan kak wiahla “poahsoan en kupwurokong” me kin kansenamwahwihala meteikan.​—Lep. Pad. 18:4.

18. Ia duwen atail doadoahngki kaweid en Lepin Padahk 24:6 eh kak sewese kitail nan kalohk?

 ¹⁸ Idawehn kaweid. Paipel kihda kaweid mwahu wet pwehn sewese kitail: “Kumwail uhdahn pahn wiahda koasoandi mwahu mwohn amwail pahn kowohng mahwen. Oh uwen tohtohn kaweid mwahu me kumwail kin alehdi, iei ih kasalepen amwail pahn kana nan mahwen.” (Lep. Pad. 24:6) Ia duwen atail doadoahngki iretikitik wet eh sewese kitail en kamwahwihala atail kalohk oh padahk? Kitail en dehr wia pein atail elen kalohk oh padahk, ahpw kitail en idawehn iren sawas kan me kitail alehdi. Kaweid pwukat kin kohda ni atail mihting kan, wasa me sounkaweid koahiek kan kin wia padahk kan en Paipel pwehn kaiahne kitail. Patehng met, sapwellimen Siohwa pwihn kin wiahda pwuhk oh kasdo kan me kak sewese aramas akan en wehwehki Paipel. Ia duwe, ke kin sukusukuhlki ken koahiekla doadoahngki mehn sawas pwukat?

19. Ia omw madamadau duwen erpit me kohsang rehn Siohwa? (Lepin Padahk 3:13-18)

¹⁹ Wadek Lepin Padahk 3:13-18. Kitail uhdahn kalahnganki kaweid mwahu kan nan Mahsen en Koht! Ma sohte kaweid pwukat, kitail sohte pahn kak mour nsenamwahu de peren. Nan iren onop wet, kitail koasoiapenehr ekei karasepen kaweid mwahu kan me mi nan pwuhken Lepin Padahk. Mehlel, Paipel pwon kin audaudki kaweid erpit kan sang rehn Siohwa. Kitail anahne doadoahngki sapwellime kaweid nan atail mour. Mwomwen sampah wet eh kin kilangwohng soangen erpit wet sohte kesempwal ong kitail; kitail uhdahn kamehlele me “irail kan me loalokonglahr kin pereperen.”