1. Ia duwen atail peren eh poahsoankihda atail pohnese me kitail anahne Koht?

 PEREN mehlel kaidehn pepehm ehu me ke pahn ahneki ahnsou kiste. Ahpw ke kak ahneki erein omw mour. Ia duwen? Sises ketin kawehwehda nan sapwellime Kapahrek en Pohn Dohl: “Meid pai irail me kin pohnese me irail anahne Koht.” (Mad. 5:3) Sises mwahngih me aramas akan wiawihda oh ahneki ineng en esehla oh kaudokiong Sounkapikparailo, Siohwa Koht. Oh pwehki Siohwa ketin wia “Koht me peren,” irail kan me kin kaudokiong ih pil kak peren.​—1 Tim. 1:11.

2-3. (a) Nin duwen me Sises mahsanih, ihs me pil kak peren? (b) Dahme kitail pahn koasoiapene nan iren onop wet, oh dahme kahrehda met anahn?

² Ia duwe, atail irair en mour anahne mwahu pwe kitail en peren? Soh. Nan sapwellime kapahreko, Sises mahsanih mehkot me kapwuriamwei. Pil “irail me kin mwahiei”​—mwein pwehki irail uhdahn mworuskihla diparail kan de irail ahneki kahpwal laud—​kak peren. Sises pil mahsanih me “irail me kin kalokolok pwehki ar wia dahme pwung,” de me kin dadaur ni aramas akan ar “kauwe” irail pwehki arail wia sapwellimen Krais tohnpadahk kei, irail kak peren. (Mad. 5:4, 10, 11) Ahpw ia duwen arail kak uhdahn peren nan soangen irair pwukat?

³ Sises ketin padahkihong kitail me peren sohte kin kohsang irair mwahu en atail mour, ahpw e kohsang atail kin kaitarala atail anahn en esehla Koht oh karanihala ih. (Seims 4:8) Ia duwen atail kak wia met? Nan iren onop wet, kitail pahn koasoiapene kahk siluh me kak kahrehda peren mehlel.

4. Ia keieun kahk me kitail anahne wia pwehn ahneki peren mehlel? (Melkahka 1:1-3)

⁴ KAHK 1: Pwehn ahneki peren mehlel, kitail anahne wadek oh onopki mahsen en Koht. Sises ketin kapahrekiong Mahsen en Koht mwenge. Aramas oh mahn koaros anahne mwenge pwehn mour. Ahpw, aramas kante me kak wadek Mahsen en Koht, oh re uhdahn anahne wia met. Ihme kahrehda Sises mahsanih: “Kaidehn pilawahte me aramas kin anahne mourki, pwe mahsen koaros me pwilsang ni doauesen Siohwa.” (Mad. 4:4) Eri, kitail anahne wadek Mahsen en Koht, Paipel, rahn koaros. Sounmelkahkao koasoia: ‘Meid pai aramas akan me kin perenki peikiong Kosonned en KAUN-O oh medemedewe nan kapehdihr nin rahn oh nipwong.’​—Wadek Melkahka 1:1-3.

5-6. (a) Dahme kitail sukuhlkihsang Paipel? (b) Ni ahl dah kan me wadawad en Paipel kak sewese kitail?

⁵ Pwehki Siohwa ketin poakohng kitail, e ketin kasalehiong kitail sang nan Paipel dahme kitail anahne wia pwehn ahneki mour peren. Kitail sukuhlki dahme e ketin kupwurki ong kitail. Kitail sukuhlki ia duwen atail kak karanihala ih oh dahme kitail anahne wia pwe en ketin mahkohng kitail. Oh kitail sukuhlki duwen koapworopwor kaselel me e ketin inoukihda ong ahnsou kohkohdo. (Ser. 29:11) Padahk mehlel pwukat me kitail sukuhlkihsang atail onopki Paipel kin kalaudehla atail peren!

⁶ Kitail ese me Paipel audaudki kaweid mwahu tohto ong atail mour en ehuehu rahn. Ni atail kin idawehn kaweido, kitail kak peren. Sohte lipilipil ni omw kin mworuskihla omw kahpwal kan, kalaudehla omw wadek  sapwellimen Siohwa Mahsen oh doudouloale. Sises mahsanih: “Meid pai irail me kin rong mahsen en Koht oh kapwaiada!”​—Luk 11:28.

7. Dahme kak seweseiuk en paiekihda laud omw kihong ahnsou en wadek Mahsen en Koht?

⁷ Ni omw wadek Mahsen en Koht, kihong ahnsou en perenki dahme ke wadek. Pwehn karasahda, mie pak met wiahiong uhk? Emen kukihada mwenge me ke kin iouki. Ahpw mwein pwehki ke karuwaru de ke kedirepwki omw medemedewe soahng teikan, oh ke mwenge pitipit oh sohte uhdahn neme mwengeo. Mwuhr, ke esehda me ke nohn mwenge pitipit oh sohte wawaila pwehn perenki mwengeo. Met kak duwehte atail wadek Paipel. Ekei pak, kitail kin wadek pitipit me kahrehda kitail sohte kin nohn perenki sukuhlki dahme kitail wadek. Kihong ahnsou pwe ken perenki wadek Mahsen en Koht. Ni omw wadek, medewehla dahme wiawi, ngilen irail me koasoakoasoi, oh dahme ke wadekehr. Ni omw wia met, e pahn kalaudehla omw peren.

8. Ia duwen ‘ladu lelepek oh loalokongo’ kin kapwaiada eh pwukoa? (Pil kilang dahme ntingdi pah.)

⁸ Sises ketin idihada ‘ladu lelepek oh loalokongo’ pwehn kihda padahk kan me rasehng mwenge ni ahnsou me konehng, oh kitail kin uhdahn medkihla. b (Mad. 24:45) Paipel wia poahsoanpen soahng koaros me ladu lelepeko kin wiahda. (1 Des. 2:13) Eri, padahk pwukat me rasehng mwenge kin sewese kitail en ese sapwellimen Siohwa madamadau me sansalda nan Paipel. Ihme kahrehda kitail kin wadek Kahn Iroir oh Awake! oh artikel teikan nan jw.org. Kitail kin kaunopada ong mihting en nan wihk oh mihting en nan imwin wihk kan. Oh kitail kin kilang prokram en JW Broadcasting^® nan sounpwong koaros ma mie. Ma kitail tehk kanahieng me kitail kin doulahte wadek oh onopki Paipel, eri kitail pahn kak wia keriaun kahk me kitail anahne wia pwehn ahneki peren mehlel.

9. Ia keriaun kahk me kak kahrehda peren mehlel?

⁹ KAHK 2: Pwehn ahneki peren mehlel, kitail anahne peikiong sapwellimen Siohwa koasoandi kan. Sounmelkahkao ntingihedi: “Meid pai irail kan me kin peikiong KAUN-O, oh kin momourki sapwellime kosonned akan.” (Mel. 128:1) En peikiong Siohwa kin wehwehki me kitail en uhdahn wauneki ih oh soikala wia soahng kan me kin kansensuwedihada ih. (Lep. Pad. 16:6) Eri, kitail kin pousehlahte wia uwen atail kak en idawehn sapwellimen Siohwa koasoandi kan ong dahme pwung oh sapwung me e ketin kawehwehda nan Paipel. (2 Kor. 7:1) Kitail pahn ahneki peren ma kitail wia soahng kan me Siohwa kin ketin kupwurperenki oh soikala soahng kan me e ketin kalahdeki.​—Mel. 37:27; 97:10; Rom 12:9.

10. Nin duwen me Rom 12:2 mahsanih, ia atail pwukoa?

¹⁰ Wadek Rom 12:2. Aramas emen ele ese me Siohwa ketin sapwellimanki pwuhng en pilada dahme pwung oh sapwung, ahpw e pil anahne pwungki sapwellimen Koht koasoandi kan. Karasepe, aramas emen ele ese me koperment kan ahneki pwuhng en koasoanehdi uwen sipihd me sidohsa en tangatangki. Ahpw ele e sohte pahn pwungki koasoandi ko. Eri e kin diraip uk. Kitail kin kasalehda sang ni atail wiewia kan me kitail uhdahn kamehlele me en idawehn sapwellimen Siohwa koasoandi kan iei me keieu mwahu. (Lep. Pad. 12:28) Ih met me ahn Depit  pepehm. E koasoiahki Siohwa: “Komw pahn ketin kasalehiong ie ahl me kin kowohng mour; omwi kin ketiket rehi kin kadirehkiniehla peren oh kahrehiong ie peren poatopoat.”​—Mel. 16:11.

11-12. (a) Ni atail kin pwunod de mworusala, dahme kitail anahne kanahieng? (b) Ia duwen mahsen ko nan Pilipai 4:8 eh sewese kitail ni atail pilada mehn kamweit kan?

¹¹ Ni atail kin lelohng kahpwal de mworusala, kitail kakete pehm me kitail anahne mehkot me pahn sewese kitail en uhdihsang pwunodki atail kahpwal kan. Ahpw, kitail anahne kanahieng en dehr wia soahng kan me Siohwa ketin kalahdeki.​—Ep. 5:10-12, 15-17.

¹² Nan nein Pohl kisinlikowo ong mehn Pilipai kan, e kangoangehki Kristian ko en pousehlahte medemedewe soahng kan me “pwung, . . . mwakelekel, . . . limpoak, [oh] me mwahu.” (Wadek Pilipai 4:8.) Mendahki Pohl sohte koasoakoasoia duwen soahng kan me pid mehn kamweit, dahme e ntingihedio anahne kamwakid mwomwen atail pilada mehn kamweit. Song wia met: Ahnsou koaros ma ke kilang lepin lokaiao “soahng kan” nan iretikitiko, wiliankihdi lepin lokaiao “koul kan,” “kasdo kan,” “pwuhk kan,” de “video game kan.” En wia met kak seweseiuk en ese mehnia me pwung mwohn silangin Koht oh mehnia me sohte pwung. Kitail men idawehn sapwellimen Siohwa koasoandi ileile kan. (Mel. 119:1-3) Pwehki kitail ahneki nsenmwakelekel, kitail kak doulahng kesiluhn kahk me kahrehda peren mehlel.​—Wiewia 23:1.

13. Ia kesiluhn kahk me pahn kahrehiong kitail peren mehlel? (Sohn 4:23, 24)

¹³ KAHK 3: Tehk kanahieng me ke kin keieu mwohneki omw kaudokiong Siohwa. Siohwa ketin kapikkitailda, oh kitail anahne kaudokiong ih. (Kaud. 4:11; 14:6, 7) Eri dahme keieu kesempwal nan atail mour iei me kitail en kaudokiong Siohwa ni ahl me e ketin kupwurki, me iei en kaudongki “sapwellime manaman oh mehlel.” (Wadek Sohn 4:23, 24.) Kitail men sapwellimen Koht manaman en kaweid atail kaudok pwehn pahrekiong padahk mehlel me mi nan sapwellime Mahsen. Kitail en keieu mwohneki atail kaudok mehnda ma kitail kin mi nan sahpw ehu me atail doadoahko keinapwidi. Ahnsou wet, riatail kan daulih meh 100 kin selidi pwehki irail Sounkadehdehn Siohwa kan. c Mendahki met, ni peren irail kin wia soahng koaros pwe ren kak kapakap, onop, oh padahkihong meteikan duwen Koht oh sapwellime Wehio. Ni aramas kan kin kauwe de kaloke kitail, kitail kak peren pwehki Siohwa kin ketin sewese kitail en dadaur oh pahn ketin katingih kitail.​—Seims 1:12; 1 Pit. 4:14.

14. Dahme wiawihong brother pwulopwul men nan Tajikistan, oh dahme kahrehda?

¹⁴ Ekei riatail kan kin lelohng kahpwal kan me uhdahn laud, ahpw irail kin ahneki peren mehlel pwehki irail wia kahk siluh ko me kitail koasoiapenehr. Medewehla dahme wiawihong Jovidon Bobojonov me sohte men iang sounpei. E sounpar 19 oh kin kousoan Tajikistan. Nan October 4, 2019, pilismen kan wahsang ih ni imweo, salihedi sounpwong kei, oh wiahki ih loallap men. Wiewia sapahrek wet pwarada nan nuhs nan sahpw tohto. Ripoht kasalehda me pwolihs ko keme oh song en kahrehiong en kaula pwehn wiahla sounpei oh pil likawih likoun sounpei.  Mwurin mwo, e ale kopwung oh selidi nan imweteng lao president en sahpwo kasaledekihala ih. Erein ahnsowo pwon, Jovidon kin kolokolete eh lelepek oh peren. Ia duwen? Sang ni eh kin ahnsou koaros pohnese me e anahne Koht.

15. Ia duwen Jovidon eh kin sukuhlki duwen Siohwa erein eh mi nan imweteng?

¹⁵ Erein eh mihmi nan imweteng, Jovidon kin pousehlahte sukuhlki duwen Siohwa, pil ni ahnsou me sohte nah Paipel de sawasepen Paipel kan. Ia duwen eh kak wia met? Rie Kristian ko kin wahla kene mwenge oh ntingihedi ni ehdin mwenge ko iren rahn en rahno. Eri, e kak wadek Paipel oh doudouloale rahn koaros. Mwurin eh pedoisang nan imweteng, e kihda kaweid wet ong irail kan me saikinte lelohng kalokolok laud kan: “E uhdahn kesempwal en doadoahngki omw saledek ni uwen omw kak pwehn kalaudehla omw esehla duwen Siohwa sang ni omw wadek sapwellime Mahsen oh neitail sawasepen Paipel kan.”

16. Dahme Jovidon kin medemedewehte?

¹⁶ Riatail brothero kin peikiong sapwellimen Siohwa koasoandi kan. E sohte kin medemedewehte duwen ineng suwed kan oh wia soahng suwed kan. Ahpw, e kin medemedewehte duwen Siohwa oh dahme e ketin kesempwalki. Jovidon kin kapinga lingan en sapwellimen  Koht kepikipik kan. Ni menseng koaros e kin pirida oh rongorong ngilen menpihr kan. Nipwong kan e kin kilang maramo oh usu kan. E koasoia: “Kisakis pwukat sang rehn Siohwa kin kaperenih oh kangoange ie.” Ni atail kin kalahnganki atail anahn en war kan oh soahng kan me Siohwa ketikihong kitail sang nan Paipel, kitail kin peren. Met kak sewese kitail en dadaur.

17. Ia duwen mahsen ko nan 1 Piter 1:6, 7 eh kak sewese emen me ahneki soangen irairohte me Jovidon ahneki?

¹⁷ Jovidon pil kin mwohneki mahs eh kaudokiong Siohwa. E ese kesempwalpen en lelepekte ong Koht mehlelo. Sises mahsanih: “Siohwa omw Koht me ke anahne kaudokiong, oh ih kelehpw me ke anahne papah.” (Luk 4:8) Kaunen sounpei ko oh sounpei ko men Jovidon en sohla wia emen Sounkadehdehn Siohwa. Ahpw, e kin kapakap ngidingid ehuehu rahn oh nipwong koaros, pekipeki Siohwa en ketin sewese ih en lelepekte. Mendahki wiewia sapahrek ko me e lelohng, Jovidon kin lelepekte. Met e kak ahneki peren laud pwehki e ahneki mehkot me e sohte ahneki mwohn pwolihs ko wahsang ih ni imweo, keme, oh salihedi. Met eh pwoson kehlailla pwehki kasongosong me lelohng.​—Wadek 1 Piter 1:6, 7.

18. Ia duwen atail kak ahnekihte peren?

¹⁸ Siohwa ketin mwahngih dahme kitail anahne pwehn ahneki peren mehlel. Ma ke idawehn kahk siluh ko me kin kahrehda peren mehlel, ke kak ahnekihte peren mendahki kahpwal laud kan. Eri ke pil kak nda: “Meid pai aramas akan me arail Koht iei KAUN-O!”​—Mel. 144:15.