1. Koapworopwor dahieu me Siohwa ketikihong kitail?

 SIOHWA ketikihong kitail koapworopwor kaselel en ahneki mour soutuk. Ekei kin koapworopworki me re pahn mour kohkohlahte nanleng nin duwen ngehn kei me sohte kak mehla. (1 Kor. 15:50, 53) Ahpw pali laud en kitail ahneki koapworopwor en mour kohkohlahte nin sampah ni roson unsek oh nsenamwahu. (Kaud. 21:3, 4) Sohte lipilipil ma kitail kin kasikasik en mour kohkohlahte nanleng de nin sampah, kitail kin kesempwalki atail koapworopwor.

2. Dahme atail koapworopwor kin poahsoankihda, oh dahme kahrehda kitail kak ndahki met?

² Lepin lokaiao “koapworopwor,” me Paipel doadoahngki, kak wehwehki “en kasikasik soahng mwahu kan me pahn wiawi.” Kitail kak uhdahn kamehlele me atail koapworopwor ong ahnsou kohkohdo pahn pweida, pwehki met kohsang rehn Siohwa. (Rom 15:13) Kitail ese dahme e ketin inoukidahr, oh pil ese me e kin ahnsou koaros ketin kapwaiada sapwellime inou kan. (Nemp. 23:19) Kitail kamehlele me Siohwa ketin kupwurki oh pil sapwellimanki manaman en kapwaiada soahng koaros me e ketin mahsanih e pahn ketin wia. Eri, atail koapworopwor sohte kohsang pein atail madamadau, de mehkot me kitail men en wiawi. E kin kohsang dahme kitail ese me uhdahn mehlel.

3. Dahme kitail pahn koasoiapene nan iren onop wet? (Melkahka 27:14)

³ Samatailo nanleng uhdahn ketin poakohng kitail, oh ketin kupwurki kitail en likih ih. (Wadek Melkahka 27:14.) Ma atail koapworopworki Siohwa kin kehlail, kitail pahn kak dadaur pahn kahpwal kan oh ahneki eimah oh peren sohte lipilipil dahme pahn wiawihong kitail. Kitail pahn koasoiapene ia duwen atail koapworopwor eh kin pere kitail. Kitail pahn tehkpene mahs ia duwen koapworopwor eh rasehng angke oh lisoarop. Mwuhr, kitail pahn koasoiapene ia duwen atail kak kakehlailihala atail koapworopwor.

4. Ia duwen koapworopwor eh rasehng angke ehu? (Ipru 6:19)

⁴ Nan nah kisinlikowo ong mehn Ipru ko, wahnpoaron Pohl karasahiong atail koapworopwor angke ehu. (Wadek Ipru 6:19.) E kin kalapw seiloak iang sohp, eri e ese me angke kin katengehdi sohp pwehn dehr peila. Ehu ahnsowo, e iang sohp erein melimel laud ehu wiawi. Erein melimelo, e kilang sehla kan koskihdi angke kan nansedo pwe sohpo en dehr peila oh loiong takai keper. (Wiewia 27:29, 39-41) Duwehte angke ehu me kin katengehdi sohp, atail koapworopwor kin katengekitaildi pwe kitail en dehr peila sang Siohwa ni atail lelohng kahpwal kan me duwehte melimel laud. Atail koapworopwor kin kameleileih kitail nan atail kahpwal kan pwehki kitail kamehlele me soahng kan pahn mwahula. Tamataman, Sises mahsanih me kitail pahn lelohng kalokolok. (Sohn 15:20) Eri en doudouloale dahme Siohwa ketin inoukidahr kin sewese kitail en doulahte papah ih.

5. Ia duwen koapworopwor eh sewese Sises ni eh pahn ketin kamakamala?

⁵ Medewehla ia duwen koapworopwor eh sewese Sises en ketin lelepekte mendahki e mwahngih me e pahn ketin kamakamala. Ni rahn en Pendekos 33, wahnpoaron Piter koasoia dahme pwuhken Melkahka mahsanihki duwen Sises eh ketin kasalehda meleilei oh koapworopwor: “I pahn kin momour ni koapworopwor; pwehki komw sohte pahn ketin likidmelieiehla nan Sousou, oh komw pil sohte pahn ketin mweidohng sapwellimomwi me loalopwoato en mwerpeseng. . . . Komw pahn ketin kadirehkiniehla peren laud ni omwi ketiket rehi.” (Wiewia 2:25-28; Mel. 16:8-11) Mendahki Sises mwahngih me e pahn pwoula, e uhdahn koapworopworki me Koht pahn ketin kaiasada ih oh me e pahn perenki eh pahn pwurehng tuhwong Semeo nanleng.​—Ipru 12:2, 3.

6. Dahme brother men koasoiahki duwen koapworopwor?

⁶ Koapworopwor me kitail Kristian kan ahneki kin sewese riatail kan en dadaur. Medewehla mehn kahlemeng en Leonard Chinn, brother lelepek men sang England. Erein Keieun Mahwen en Sampah, e selidi pwehki e sohte iang sounpei. Erein sounpwong riau, e kin kelehpw sensel nan kisin pere kis nan imwetengo. Mwurin mwo, irail idingkihong en wia doadoahk kan me uhdahn apwal. Mwuhr e ntingihedi: “Dahme lelohng ie sewese ien esehda uwen laud en atail anahne koapworopwor pwe kitail en kak dadaur. En Sises, wahnpoaron ko, oh soukohp ko ar mehn kahlemeng kan, oh pil inou kesempwal kan nan Paipel kin sewese kitail. Mepwukat koaros kihong kitail koapworopwor laud ong ahnsou kohkohdo oh kakehlailih kitail en dadaur.” Koapworopwor kin wia angke ehu ong Leonard, oh e pil kak wia angke ehu ong kitail.

7. Ia duwen kahpwal kan eh kakehlakahda atail koapworopwor? (Rom 5:3-5; Seims 1:12)

⁷ Atail koapworopwor kin kehlailla mwurin atail dadaur pahn kahpwal kan oh kehn sapwellimen Siohwa sawas oh kupwuramwahu. (Wadek Rom 5:3-5; Seims 1:12.) Eri atail koapworopwor kin kehlaillahsang ahnsou me kitail tepin rong rongamwahwo. Sehdan men atail kahpwal kan en kaluwetekitailla, ahpw pwehki sapwellimen Siohwa sawas, kitail kak pweida ni atail dadaur pahn ehuehu kahpwal pwukat.

8. Ia duwen koapworopwor eh rasehng lisoarop ehu? (1 Deselonika 5:8)

⁸ Paipel pil karasahiong atail koapworopwor lisoarop ehu. (Wadek 1 Deselonika 5:8.) Sounpei men kin lisoaropda pwehn pere  moangeo sang dahme eh imwintihti kan kin song doadoahngki pwehn kauwehla. Ni atail kin pelian Sehdan, kitail anahne pere atail madamadau sang eh widing kan. Sehdan kin doadoahngki soangsoangen wiepe tohto pwehn kasonge kitail oh kauwehla atail madamadau. Duwehte lisoarop ehu eh kin pere moangen sounpei men, atail koapworopwor kin pere atail madamadau pwe kitail en kak lelepekte ong Siohwa.

9. Dahme kin wiawihong aramas ma re sohte ahneki koapworopwor?

⁹ Atail koapworopwor en mour soutuk pahn sewese kitail en wiahda pilipil loalokong kan. Ahpw ma atail koapworopwor luwetala oh kitail tepida medemedewehte pein atail ineng kan, kitail kak manokehla atail koapworopwor en mour soutuk. Medewehla dahme wiawihong ekei Kristian nan Korint mahso. Irail sohla pwoson ehu sapwellimen Koht inou kesempwal, me iei koapworopwor en kaiasada. (1 Kor. 15:12) Pohl ntingihedi me irail kan me sohte kamehlele kaiasada kin momour ongete ahnsou wet. (1 Kor. 15:32) Rahnwet, me tohto me sohte kin koapworopworki sapwellimen Koht inou kan kin wia uwen arail kak pwe ren ahneki mour nsenamwahu ahnsou wet. Ahpw kitail kin likih dahme Koht inoukihda ong ahnsou kohkohdo. Atail koapworopwor rasehng lisoarop ehu me kin pere atail madamadau oh sewese kitail en dehr kin medemedewehte pein kitail, me kakete kauwehla atail nanpwungmwahu rehn Siohwa.​—1 Kor. 15:33, 34.

10. Ia duwen koapworopwor eh kak pere kitail sang madamadau sapwung?

¹⁰ Atail koapworopwor pil kak pere kitail en dehr medemedewe me kitail sohte kak kaperenda Siohwa. Karasepe, mwein ekei kakete nda: ‘I sohte pahn kak iang irail kan me pahn mour kohkohlahte. Uhdahn I sohte warohng. I sohte pahn kak wia dahme Koht ketin kupwurki ien wia.’ Taman me Elipas, me kohdo rehn Sohp pwe dene en kansenamwahwih, doadoahngki soangen koasoi pwukat ong Sohp. Elipas koasoia: “Mie aramas emen me uhdahn mwakelekel?” Mwuhr e pil ndahki Koht: “Koht sohte pil kin ketin likih sapwellime tohnleng kan; pwe irail pil sohte kin mwakelekel mwohn silangi.” (Sohp 15:14, 15) Ia uwen likamw! Tamataman me Sehdan me men ken ahneki soangen madamadau pwukat. E ese me ma ke kin medemedewehte soahng pwukat, omw koapworopwor pahn sohla mie. Eri, soikala soangen likamw pwukat oh medemedewehte sapwellimen Siohwa inou kan. Dehr peikasalki me e ketin kupwurki ken mour kohkohlahte oh me e pahn ketin seweseiuk en lel mehn akadei wet.​—1 Tim. 2:3, 4.

11. Dahme kahrehda kitail en kanengamah ni atail awiawih pweidahn atail koapworopwor?

¹¹ E sohte mengei en pousehlahte kakehlailih atail koapworopwor ahnsou koaros. Kitail kakete sohla kanengamah ni atail awiawih Koht en ketin kapwaiada sapwellime inou kan. Ahpw pwehki Siohwa me ketin poatopoat, dahme werei ong kitail kin wiahte ahnsou mwotomwot ehu ong ih. (2 Pit. 3:8, 9) E pahn ketin kapwaiada dahme e ketin inoukihda ni ahl me keieu mwahu, ahpw ele e sohte pahn wia met ni ahnsou me kitail kasik. Dahme kak sewese kitail en kin kakehlailih atail koapworopwor ni atail kanengamah awiawih Koht en ketin kapwaiada sapwellime inou kan?​—Seims 5:7, 8.

12. Nin duwen me Ipru 11:1, 6 mahsanih, ia duwen koapworopwor eh kin pidada pwoson?

¹² Atail koapworopwor pahn kehkehlailte ma kitail kin karanihte Siohwa, pwehki ih me pahn ketin kapwaiada atail koapworopwor. Pwehn ahneki koapworopwor, kitail anahne pwoson me Siohwa ketin mie oh me e kin “ketin katingih irail kan me kin ngoangki rapahki ih.”  (Wadek Ipru 11:1, 6.) Ma kitail uhdahn kamehlele me Siohwa ketin mie, atail likih me e pahn ketin kapwaiada dahme e ketin inoukihda pahn pil laudla. Kitail pahn koasoiapene ekei ahl akan en kalaudehla atail nanpwungmwahu rehn Siohwa oh pousehlahte kakehlailih atail koapworopwor.

13. Ia duwen atail kak karanihala Koht?

¹³ Kapakap ong Siohwa, oh wadek sapwellime Mahsen. Mendahki kitail sohte kak kilang Siohwa, kitail kak karanihala ih. Kitail kak patohng ih ni kapakap oh kamehlele me e pahn ketin karonge kitail. (Ser. 29:11, 12) Kitail kak rong Koht sang ni atail wadek sapwellime Mahsen oh doudouloale. Ni atail wadek duwen Siohwa eh kin ketin apwalih irail kan mahso me kin loalopwoatohng ih, atail koapworopwor pahn kehlailla. Mehkoaros me ntingdier nan Mahsen en Koht “ntingdier pwe en padahkih kitail pwe kitail en ahneki koapworopwor sang ni atail kin dadaur oh sang ni kakehlepen loalatail me kohsang Nting Sarawi kan.”​—Rom 15:4.

14. Dahme kahrehda kitail en kin medemedewe dahme Siohwa ketin wiadahr ong meteikan?

¹⁴ Doudouloale duwen Siohwa eh kin ketin kapwaiada sapwellime inou kan. Medewehla dahme Koht ketin wiahda ong Eipraam oh Sara. Ira uhdahn mahlahr oh sohte kak naineki seri. Ahpw Koht ketin inoukihong ira me ira pahn nainekihda seri men. (Sen. 18:10) Ia duwen Eipraam eh mwekidki met? Paipel mahsanih: “E koapworopworki oh pwoson me e pahn wiahla semen wehi tohto.” (Rom 4:18) Mendahki Eipraam sehse ia duwen inowo eh kak pweida, e uhdahn kamehlele me Siohwa pahn ketin kapwaiada sapwellime inou. Ohl lelepeko sohte nsensuwedla. (Rom 4:19-21) Koasoipen ih kak padahkihong kitail me kitail kak ahnsou koaros kamehlele me Siohwa pahn ketin kapwaiada sapwellime inou kan, mehnda ma ong kitail, met mwomwen sohte kak wiawi.

15. Dahme kahrehda kitail anahne medemedewe dahme Koht ketin wiadahr ong kitail?

 ¹⁵ Medemedewe dahme Siohwa ketin wiahionguhkehr. Medewehla ia duwen omw paiekidahr pweidahn inou kan me mi nan Mahsen en Koht. Karasepe, Sises inoukihda me Semeo pahn ketikihong uhk omw anahn akan. (Mad. 6:32, 33) Sises pil kamehlelehiong uhk me Siohwa pahn ketikihong uhk sapwellime manaman ni ahnsou me ke peki. (Luk 11:13) Siohwa ketin kapwaiadahr inou pwukat. Mwein ke kak medewehda inou teikan me e ketin kapwaiada ong uhk. Karasepe, e ketin inoukihda en ketin mahkohng uhk, kansenamwahwihiuk, oh ketikihda dahme ke anahne pwehn mihmi karanih ih. (Mad. 6:14; 24:45; 2 Kor. 1:3) Ni omw kin doudouloale dahme Koht ketin wiadahr ong uhk, ke pahn kakehlakahda omw koapworopwor ong dahme e pahn ketin wiahiong uhk ni ahnsou kohkohdo.

16. Dahme kahrehda koapworopwor wia kisakis kesempwal ehu?

¹⁶ Atail koapworopwor en mour soutuk wia kisakis kesempwal ehu sang rehn Koht. Kitail kin kasikasik ahnsou kaselel ehu me kohkohdo, ahnsou ehu me kitail kak kamehlele pahn leledo. Koapworopwor wet kin rasehng angke ehu ong kitail me kin katengekitaildi pwe kitail en kak dadaur pahn kahpwal kan, kalokolok kan, oh pil mehla. E pil rasehng atail lisoarop, me kin pere atail madamadau pwe kitail en kak soikala dahme sapwung oh wia dahme pwung. Koapworopwor me Paipel padahkihong kitail sewese kitail en kalaudehla atail karanihala Koht oh pil kasalehiong kitail ia uwen Koht eh ketin poakohng kitail. Kitail kin uhdahn paiekihda ni atail kin pousehlahte kakehlailih atail koapworopwor.

17. Dahme kahrehda atail koapworopwor kin kahrehda peren?

¹⁷ Nan nah kisinlikowo ong mehn Rom ko, wahnpoaron Pohl kangoangehki irail: “Perenda pwehki amwail koapworopwor.” (Rom 12:12) Pohl kak peren pwehki e uhdahn kamehlele me ma e lelepekte, e pahn alehdi mour soutuk nanleng. Kitail pil kak perenkihda atail koapworopwor pwehki kitail kamehlele me Siohwa pahn ketin kapwaiada sapwellime inou kan. Duwehte me sounmelkahkao ntingihedi, “meid pai aramas . . . me kin koapworopworki KAUN-O eh Koht, . . . E kin ketin kapwaiada sapwellime inou kan ahnsou koaros.”​—Mel. 146:5, 6.