Erein pahro, sapwellimen Siohwa pwihn wiahda wekidekla kan me sewese kangoange miniminpenehn kaudok nanpwungen Tohnsukuhl en Paipel kan. The Watch Tower tepida wiahda kawehwehpen iren Paipel kan me irail pahn koasoiapene nan arail Mihting en Kapakap oh Kapinga Siohwa nan ehuehu wihk. Tohnsukuhl en Paipel kan pil wiahda kalender ehu me kasalehda iren Paipel me re pahn koasoiapene ehuehu wihk nan mihtingo, oh koul ong ehuehu rahn me irail kak koulki ni arail wia pein arail onop, de kaudok en peneinei.

Nan arail mihting ko, Tohnsukuhl en Paipel ko pahn koasoiahda dahme wiawi nan arail doadoahk en kalohk, dahme re kalahngankihong Siohwa, koulki koul ehu, de pil kapakap. Eva Barney, me papidaisla pahr 1923 ni eh sounpar 15, koasoia: “Ma ke men koasoia mehkot, ke pahn kesihnenda oh tepikihda ‘I men kalahngankihong Kauno pwehki soahng mwahu koaros me ketin wiahiong ie.’” Ekei riatail kan kin perenki wia met. Sister Barney doula koasoia: “Poakehla Brother Godwin. Mie soahng tohto me e kin men kalahngankihong Kauno. Ahpw ni eh pwoudo kilang brother me wia padahko eh tepida soansuwed, e kin waik en eh pwoudo sekido oh e kin uhdi koasoi oh mwohndi.”

Pak ehu nan sounpwong ehu, ehu mwomwohdiso kin wia mihting en Kapakap oh Kapinga Siohwa. The Watch Tower en April 1, 1923 koasoia: “Irail pahn doadoahngki elepen mihting pwehn koasoia dahme wiawi nan kalohk oh kangoange sounkalohk kan. . . . Se kamehlele me mihting kangoang pwukat pahn kahrehda irail en karanihala emenemen.”

Charles Martin, emen sounkalohk me sounpar 19 sang Vancouver, Canada, paiekihda laud mihting pwukat. Mwuhr e koasoia: “Ih wasaht me I esehla dahme I pahn kin nda ni ihmw kan. Emen pahn kin koasoiahda dahme wiawi ni eh kalohk ihmw lel ihmw. Met sewese ie en ese dahme I pahn nda oh ia duwen ei pahn sapengala ahn aramas akan ar peidek.”

Arail miniminpene pil kin laudla ni riatail kan ar koasoanehdi rahn akan me koaros kak iang kalohk. The Watch Tower en April 1, 1923 pakairki: “Pwe kitail koaros en miniminpene nan doadoahk  ehute . . . , Niare, May 1, 1923 wiahla rahn me koaros en iang kalohk. Mwurin mwo, tepin Niare koaros en sounpwong ehu pahn wiahla rahnen kalohk . . . Koaros nan mwomwohdiso anahne iang kalohk.”

Tohnsukuhl en Paipel pwulopwul kan kin iang doadoahk wet. Hazel Burford, me sounparte 16 ahnsowo, koasoia: “Bulletin ehu kin kihda iren sawas kan ong koasoakoasoipene pwe sen wadlikihala. a Ngehi oh ei pahpa kahlapo kin doadoahk laud nan doadoahk pwukat koaros .” Ahpw, Sister Burford pwuriamweikihla dahme emen brother medewehki eh doadoahk en kalohko. E koasoia: “Emen brother mah uhdahn kehlailki me ien dehr kalohk ong aramas akan. Ni ahnsowo, ekei sohte wehwehki me Tohnsukuhl en Paipel kan koaros, iangahki ‘mwahnakapw oh peinakapw akan,’ anahne iang kapinga Sounkapikpatail Lapalapo.” (Mel. 148:12,13) Ahpw Sister Burford pousehlahte kalohk. Mwuhr, e iang Sukuhl en Kilead Keriau oh papah nin duwen misineri men nan Panama. Kedekedeo, riatail Kristian ko wekidala arail madamadau duwen me pwulopwul kan en iang kalohk.

Mihting tohrohr kan pil kin sewese riatail Kristian kan en miniminpene. Tohtohn mihting tohrohr pwukat kin mie rahn ehu me irail wiahda ong kalohk. Karasepe, ni mihting tohrohro nan Winnipeg, Canada, koaros me iang towehda alehdi luhk en iang kalohk nan kahnimwo ni March 31. Irail kin tuhwong aramas tohtohie ni rahnen kalohk pwukat oh e kin imwila mwahu. Nan August 5, mie aramas 7,000 me iang towehda pil ehu mihting tohrohr nan Winnipeg. Ni ahnsowo, nempehn aramas me iang towehda mihting tohrohr wet iei me keieu tohto nan Canada.

Ehu mihting tohrohr en sapwellimen Siohwa aramas akan me uhdahn kesempwal iei me wiawi August 18-26, 1923 nan Los Angeles, California. Nan wihk kan mwohn mihting tohrohro wiawi, nuhspehpa kan pakairki duwen mihting tohrohro oh Tohnsukuhl en Paipel kan kihpeseng doaropwe  daulih 500,000 duwen met. Irail pil kihda sain ni wararail sidohsa kan, ni bus kan, oh pil ni sidohsa teikan.

Rahn Kaunop, August 25, Brother Rutherford wia kapahrek ehu me oaralape “Sihpw kan oh Kuht kan,” oh kawehwehda duwen “sihpw kan” nin duwen aramas pwung kei me pahn kousoan nan paradais nin sampah. E pil wia ehu padahk oh wadek duwen mehn akadei ehu me adaneki “Mehn Kataman Ehu.” Mehn akadei wet iei en kadeikada irail kan me dene irail Kristian oh kangoange me ahneki mohngiong mehlel kan en katohreirailsang “Papilon Lapalap.” (Kaud. 18:​2, 4) Mwuhr, Tohnsukuhl en Paipel ngoang kan nan sampah pwon pahn kihpeseng kisin doaropwe rar rar kei duwen mehn akadei wet.

Ni kaimwiseklahn rahnen mihting tohrohro, aramas daulih 30,000 me iang towehda oh rong brother Brother Rutherford eh wia padahko “Wehi kan Koaros Kohkohlahng Armakedon, ahpw me Rar Rar Kei me Momour Ahnsou Wet Sohte Pahn Mehla.” Pwehki irail kasik me aramas tohto pahn iang towehda, Tohnsukuhl en Paipel kan rent ihmw laud ehu (Los Angeles Coliseum) me ahpwtehn wiawihda. Pwe koaros en kak iang rong, brother ko doadoahngki speaker laud kan me mi wasao, me ahnsowo wia soahng kapw kei. Me tohto pil rong prokramo nan redio.

Nan pahro 1923, doadoahko kekeirda laud nan Aperika, Iurop, India, oh South America. Nan India, brother A. J. Joseph kin apwalih eh pwoudo oh nah seri wenemen, oh ni ahnsowohte pil sewese wiahda pwuhk kan ni lokaiahn Hindi, Tamil, Telugu, oh Urdu.

Nan Sierra Leone, Tohnsukuhl en Paipel Alfred Joseph oh Leonard Blackman ntingla ni atail poasen kaun nan Brooklyn, New York, oh peki sawas. Ni April 14, 1923, ira alehdi pasapeng. Alfred koasoia: “Nipwong en Rahn Kaunop ehu, mie me call ie ni ei sohte kasik.” Ngilen aramaso nan delepwohno uhdahn laud ni eh idek, “Kowe me ntingla Watch Tower Society oh peki sounkalohk kan?” Alfred sapengki “Ei.” E nda: “Re kadariedohr.” William R. Brown me delepwohndo. Ih oh eh pwoudo oh neira serepein riemeno, Louise oh Lucy, peidi rahno sang Caribbean. Brother ko sohte anahne awih ahnsou reirei pwehn tuhwong brother Brown oh eh peneineio.

Alfred doula koasoia: “Nimenseng en mandahn rahno, nin doken ngehi oh Leonard wiewia at onop en Paipel nin duwen me se kin wia ehuehu wihk, se kilangada ohl reirei men ni wenihmwo.  Ohl reireio iei Brother Brown. E kin uhdahn ngoangki padahk mehlel me kahrehda e men wia kapahrek ong wehipokon rahno mwuri.” Sohte lel sounpwong ehu, Brother Brown kihlahr pwuhk koaros me e wa kohdo. Sohte pwand, e pil alehdi pwuhk 5,000, oh mwurin mwo irail pil anahnehte pwuhk tohto. Ahpw Brother Brown kaidehn ohlen netiki pwuhk men. Erein ahnsou werei me e kin papah Siohwa ni ngoang, e kin kalapw doadoahngki iren Paipel kan nan eh padahk kan, kahrehda aramas akan kin kahdaneki ih Bible Brown.

Nan Sehmen, brother kan koasoanehdi en keseusang ohpis en Sounkadehdehn Siohwa kan nan Barmen pwehki e nohn tikitik. Irail pil rong me sounpei en France kan pahn kereniong kohdo nan kahnimwo oh mahweniong. Tohnsukuhl en Paipel ko diarada ihmw ehu nan Magdeburg me mwomwen mwahuong arail doadoahk en wiahda pwuhk. Ni June 19, re kanekehla arail kihpene kepwehn wiahda pwuhk kan oh pil kepwe teikan oh keseula nan Pedel kapwo nan Magdeburg. Rahnohte me atail poasen kaun esehda me irail keseulahr wasao, nuhspehpa kan pakairki me France koledier kahnimw en Barmen. Brother ko kalahngankihong Siohwa eh ketin pere oh sewese irail.

Nan Brazil, George Young, me seiloakla wasa tohto pwehn kalohki rongamwahwo, wiahda ohpis en Sounkadehdehn Siohwa kapw ehu oh tepida wiahda pwuhko The Watch Tower ni lokaiahn Portugal. Erein sounpwong keite, e kihla makasihn oh kisin pwuhk daulih 7,000. Sarah Ferguson uhdahn perenki brother Young eh mwemweitla rehn eh peneineio. E kin wadek The Watch Tower sangete pahr 1899, ahpw e saikinte kak papidaisla. Sounpwong kei mwuhr, Sister Ferguson oh nah seri pahmeno kakehr papidaisla.

Ni imwin pahro, The Watch Tower en December 15, 1923 koasoiahda ia duwen wekidekla kan me wiawihong arail mihting kan, kalohk, oh mihting tohrohr kan eh kamwakid Tohnsukuhl en Paipel kan. E koasoia: “E sansal me mwomwohdiso kan ahneki pwoson laud. Kitail kaunopada ong doadoahk teikan oh pousehlahte papah Koht ni ngoang oh peren erein pahr 1924.”

Pahro mwuhr pil wia pahr kesempwal ehu ong Tohnsukuhl en Paipel kan. Erein sounpwong kei, riatail Kristian kan kin wie doadoahk nan kisin deke kis nan Dekehn Staten, me karanih atail poasen kaun nan Brooklyn. Ihmw kan me re kauwada wasa kapwo imwisekla ni tepin pahr 1924, oh re sewese kaminiminpene riatail Kristian kan oh lohkipeseng rongamwahwo ni ahl me sohte kin kak wiawi mahso.