1. Dahme kahrehda e kak apwal ong kitail en peik?

 KE KIN apwalki peik ekei pak? Nanmwarki Depit kin wia met, eri e kapakap ong Koht: “Komw ketin . . . kupwurehkin ineng en peikiong komwi.” (Mel. 51:12) Depit poakohng Siohwa. Ahpw ekei pak, e kin apwalki peik, pil duwehte kitail. Dahme kahrehda? Keieu, kitail kin sapeik pwehki kitail sohsohki sang Adam oh Ihp. Keriau, Sehdan kin kalapw song en kahrehiong kitail en uhwongada Siohwa, duwehte me e wia. (2 Kor. 11:3) Kesiluh, kitail mi nan sampah ehu me aramas akan kin kasalehda madamadau en uhwong, “elen madamadau me kin doadoahk ahnsou wet rehn irail kan me kin sapeik.” (Ep. 2:2) Eri, kitail anahne doadoahk laud pwehn peiong atail soh unsek kan, Tepil, oh sampah wet pwehn peikiong Siohwa oh irail kan me e ketikihong manaman.

2. Ia wehwehn en “kin men peik”? (Seims 3:17)

² Wadek Seims 3:17. Sounntingo Seims, koasoia me aramas erpit kan “kin men peik.” Medewehla ia wehwehn met. Kitail anahne ngoangki oh men peikiong irail kan me Siohwa ketikihong en ahneki manaman. Uhdahn Siohwa sohte ketin kasik me kitail en peikiong emen me nda kitail en sapeikiong sapwellime kosonned kan.—Wiewia 4:​18-20.

3. Dahme kahrehda e kesempwal ong Siohwa me kitail en peikiong irail kan me ahneki manaman?

³ Ele kitail kin pehm me e mengei en peikiong Siohwa sang atail en peikiong aramas. Met pwehki Siohwa kin ahnsou koaros ketikihda kaweid unsek. (Mel. 19:7) Ahpw aramas akan me ahneki manaman sohte unsek. Mendahki met, Samatailo nanleng ketikihong pahpa nohno kan, kaun en koperment kan, oh elder kan arail manaman. (Lep. Pad.  6:20; 1 Des. 5:12; 1 Pit. 2:​13, 14) Ni atail kin peikiong irail, kitail kin peikiong Siohwa. Kitail pahn koasoiapene ia duwen atail kak peikiong aramas akan me Siohwa ketikihong arail manaman, mendahki ekei pak e kin apwal en pwungki de idawehn arail kaweid.

4. Dahme kahrehda seri tohto kin sapeikiong arail pahpa nohno kan?

⁴ Me pwulopwul kan kin mi nanpwungen irail kan me “sohte pahn kin peikiong pahpa nohno kan.” (2 Tim. 3:​1, 2) Dahme kahrehda me tohto kin sapeik? Ekei seri kin medewe me pahpa nohno kan kin mwalaun. Pahpa nohno kan kin kasik me seri kan en wia dahme pein irail sohte kin wia. Ekei seri kin medewe me kaweid en arail pahpa nohno solahr kadoadoahk, kesempwal, de kin nohn kakos. Ma kowe emen me pwulopwul, ke kin ahneki soangen pepehm wet? Me tohto kin apwalki kapwaiada sapwellimen Siohwa kehkehliko: “Kumwail peikiong amwail pahpa nohno kan ni ahl me Kauno ketin kupwurki, pwe met me pwung.” (Ep. 6:1) Dahme kak seweseiuk en wia met?

5. Dahme kahrehda Sises ketin wia mehn kahlemeng keieu mwahu nin duwen me pwulopwul men me peikiong eh pahpa nohno? (Luk 2:​46-52)

⁵ Ke kak sukuhlki en peik sang mehn kahlemeng me keieu mwahu—Sises. (1 Pit. 2:​21-24) E wia aramas unsek men me eh pahpa nohno sohte unsek. Ahpw Sises kin wauneki eh pahpa nohno mendahki ira wiahda sapwung kan oh ekei pak sohte wehwehki ih. (Eks. 20:12) Medewehla dahme wiawi ni ahnsou me e sounpar 12. (Wadek Luk 2:​46-52.) Semeo oh ineo kohkohsang ih nan Serusalem. Sosep oh Mery anahne tehk mwahu me neira seri kan koaros iangih ira ni arail kohkohsang kasarawio. Ni ara diarada Sises, Mery kapwukoahki Sises kahpwalo me ira lelohng! Sises kakete nda me ira sapwung. Ahpw, e sapeng ira ni wahu. Ahpw, Sosep oh Mery “sohte wehwehki dahme e ndindaiong ira.” Mendahki met, Sises kin “pousehlahte uhpahiong ira.”

6-7. Dahme kak sewese me pwulopwul kan en peikiong arail pahpa nohno?

⁶ Me pwulopwul kan, kumwail kin ekei pak apwalki peikiong amwail pahpa nohno kan ni arail sapwungala de sohte wehwehkin kumwail? Dahme kak sewese kumwail? Keieu, medewehla ia sapwellimen Siohwa pepehm. Paipel mahsanih me ni amwail kin peikiong amwail pahpa nohno, “met kin kaperenda Kauno.” (Kol. 3:20) Siohwa ketin mwahngih me ekei pak amwail pahpa nohno sohte kin uhdahn wehwehkin kumwail, de irail kin wiahda kosonned kan me apwal en peikiong. Ahpw ma kumwail kin piladahte en peikiong irail, met kin kaperenda kupwure.

⁷ Keriau, medewehla pepehm en amwail pahpa nohno. Ni amwail kin peikiong irail, met kin kaperenda irail oh kalaudehla arail likih kumwail. (Lep. Pad. 23:​22-25) Kumwail pahn pil karanihala irail. Brother men sang Belgium me adaneki Alexandre koasoia, “Ni ei tepida kalapw peikiong ei pahpa nohno, se karanihala emenemen oh pil kin peren.” b Kesiluh, medewehla ia duwen amwail peik ahnsou wet eh pahn sewese kumwail mwuhr. Paulo, me kin mi Brazil, koasoia, “Ei sukuhlki en peikiong pahpa nohno kin sewese ie en peikiong Siohwa oh meteikan me ahneki manaman.” Mahsen en Koht kihda kahrepe mwahu kumwail en peikiong amwail pahpa  nohno. E mahsanih: “Pwe kumwail en pweida mwahu oh mour werei nin sampah.”—Ep. 6:​2, 3.

8. Dahme kahrehda me pwulopwul tohto pilada en peikiong arail pahpa nohno?

⁸ Me pwulopwul tohto kilangehr ia duwen soahng kan ar kin imwila mwahu ni arail kin peik. Luiza, me pil kohsang Brazil, kin apwalki wehwehki dahme kahrehda e sohte kak naineki sehlpwohn erein ahnsou ehu. E medewe me pali laud en me pwulopwul kan kin naineki sehlpwohn. Ahpw mwuhr, e wehwehkihda me ni mehlelo, eh pahpa nohno kin perepere ih. E esehda me ni eh kin peikiong ira, e sohte anahne medewe me ira kin kakos, pwehki ara kaweid ko iei me e uhdahn anahne. Elizabeth, emen sister pwulopwul nan wehin Amerika, kin apwalkihte peikiong eh pahpa nohno ekei pak. E koasoia, “Ni ahnsou me I sohte nohn wehwehki dahme kahrehda ei pahpa nohnou wiahkihda koasoandi ehu, I kin tamanda ahnsou kan me ara koasoandi ko kin pereiehla.” Monica, me kin kousoan Armenia, koasoia me soahng kan kin ahnsou koaros imwila mwahu ni eh kin peikiong eh pahpa nohno ah kaidehn ni eh kin sapeik.

9. Dahme me tohto kin medewehki duwen en peikiong kosonned?

⁹ Aramas tohto pwungki me kitail anahne koperment kan oh me kitail en peikiong kosonned kan en “irail kan me ahneki manaman.” (Rom 13:1) Ahpw irail ele kin pweiek en kapwaiada kosonned ehu me re sohte mwahuki de mwomwen sapahrek. Karasepe, medewehla kosonned en pwain daksis. Nan ehu sapwen Iurop, aramas tohto kamehlele me “e sapwung en pwain daksis ma ke leme e sohte pahrek.” Ihme kahrehda tohn sahpwo sohte kin pwainla daksis koaros me re anahne pwainohng kopermento.

10. Dahme kahrehda kitail kin peikiong kosonned kan me kitail sohte mwahuki?

¹⁰ Paipel pohnese me koperment en aramas akan kin kahrehda lokolok, me Sehdan me kaunda, oh e pahn kereniong sohrala. (Mel. 110:​5, 6; Ekl. 8:9; Luk 4:​5, 6) E pil mahsanih me “mehmen me kin uhwong irail kan me ahneki manaman kin uhwong koasoandi en Koht.” Ahnsou wet, Siohwa ketin mweidohng koperment kan en kaunda pwe soahng kan en kak soandi mwahu, oh e ketin kasik me kitail en peikiong. Eri, kitail anahne “kihong irail soahng koaros me arail,” pil iangahki pwain daksis, kasalehda wahu, oh peik. (Rom 13:​1-7) Kitail kakete medewe me kosonned ehu kin kahpwalihkitailla, sohte pahrek, de pweilaud en peikiong. Ahpw kitail kin peikiongete, pwehki Siohwa ketin mahsanihong kitail en wia met, erein ar sohte nda me kitail en kauwehla sapwellime kosonned.—Wiewia 5:29.

11-12. Dahme Sosep oh Mery wia pwehn peikiong kosonned ehu, oh ia imwilahn met? (Luk 2:​1-6) (Pil kilang kilel kan.)

 ¹¹ Kitail kak sukuhlsang mehn kahlemeng en Sosep oh Mery, me men peikiong irail kan me kin ahneki manaman mehnda ma e apwal en wia met. (Wadek Luk 2:​1-6.) Ahnsou me Mery liseiankiher sounpwong duwau, koperment en wasao men ih oh Sosep en wia mehkot me uhdahn apwal. Sihsar Akustus wiahda kosonned ehu me koaros nan wehin Rom en kohla sapwarail kan oh iang kileldi. Sosep oh Mery anahne seiloakla Pedleem me dohki mwail 93 oh diren ukada kan. Seiloak wet sohte pahn soanamwahu ong Mery. Pwopwoudo ele pwunodki ma e pahn keper ong ih oh serio. Ia duwen ma e medekda erein arail seiseiloak pohn ahlo? Ira pwunodki dahme pahn wiawihong serio pwehki serio iei Mesaia. Ia duwe, met sou pahn wia kahrepe mwahu en sapeikiong kosonned en kopermento?

¹² Mendahki mie kahrepen Sosep oh Mery en pwunod, ira peikiongete kosonnedo. Siohwa ketin kapaiahda ira pwehki ara peik. Mery lella Pedleem, kaipwidi serio oh sewese kapwaiada kokohp en Paipel!—Maika 5:2.

13. Ia duwen atail peik eh kakete pidada riatail Kristian kan?

¹³ Ni atail kin peikiong irail kan me ahneki manaman, e kin wia kamwahu ong kitail oh meteikan. Ia duwen? Ehu kahrepe iei kitail kin soikala kalokepen atail sapeikiong kosonnedo. (Rom 13:4) Ni atail kin peikiong irail kan me ahneki manaman, irail pahn kilang me Sounkadehdehn Siohwa kan kin peik. Karasepe, sounpar tohto samwalahro nan Nigeria, sounpei kei pedolong nan Wasahn Kaudok ehu erein mihting eh wiewiawi, oh rapahki irail kan me sohte men pwain daksis. Ahpw kaunen sounpei ko ndaiong irail en kohkohla. E nda: “Sounkadehdehn Siohwa kan kin ahnsou koaros pwain daksis.” Ahnsou me ke peikiong kosonned kan, ke kin sewese kahdamwahwihala Sounkadehdehn  Siohwa kan oh ehu rahn, met kak pere riatail Kristian kan.—Mad. 5:16.

14. Dahme sewese sister men en “men peik” ong irail kan me ahneki manaman?

¹⁴ Ele kitail sohte kin men peikiong irail kan me ahneki manaman. Joanna, emen sister sang wehin Amerika koasoia: “E uhdahn apwal ong ie en kin peik, pwehki ekei nan ei peneinei lelohng wiewia sapahrek sang irail me ahneki manaman.” Ahpw Joanna pilada en wekidala eh madamadau duwen irail kan me ahneki manaman. Keieu, e uhdihsang wadek soahng kan nan Internet me kin kalaudehla eh madamadau sapwung duwen irail kan me ahneki manaman. (Lep. Pad. 20:3) Keriau, e kapakapki sapwellimen Siohwa sawas pwehn likih ih a kaidehn en likih wekidekla ehu nan kopermento. (Mel. 9:​9, 10) Kesiluh, e wadek artikel kan nan neitail sawasepen Paipel kan duwen soupoupali. (Sohn 17:16) Met Joanna nda me e kin ahneki meleilei pwehki eh wauneki oh peikiong irail kan me ahneki manaman.

15. Dahme kahrehda ekei pak e kin apwal ong kitail en peikiong kaweid kan me kohsang sapwellimen Siohwa pwihn?

¹⁵ Siohwa ketin kupwurki kitail en ‘peikiong irail kan me kin tiengla mwohtail’ nan mwomwohdiso. (Ipru 13:17) Sises iei atail Kaun, oh e ketin unsek, ahpw brother kan me e ketin idihada pwehn tiengla mwowe sohte unsek. Ele kitail kin apwalki peikiong irail, ahpw mehlel ma re ndaiong kitail en wia mehkot me kitail sohte men wia. Ehu ahnsowo, wahnpoaron Piter sohte men peikiong kaweid me e alehdi. Ni tohnleng men eh ndaiong en tungoale mahn kan me sohte mwakelekel nan Kosonned en Moseso, Piter sohte wia met, kaidehn pak ehute ahpw pak siluh! (Wiewia 10:​9-16) Dahme kahrehda? Piter sohte wehwehki kaweid kapwo. Met weksang dahme e kin wiewia ahnsou koaros. Ma e apwal ong Piter en peikiong tohnleng unsek men, e sohte kapwuriamwei me ekei pak e kin apwal ong kitail en peikiong aramas soh unsek kan!

16. Mendahki wahnpoaron Pohl kakete medewe me kaweid ko me e ale sohte pwung, dahme e wia? (Wiewia 21:​23, 24, 26)

¹⁶ Wahnpoaron Pohl “kin men peik” mehnda ma e ale kaweid me e medewe sohte pwung. Kristian mehn Suhs kan rongada koasoi pwoat duwen Pohl me dene e kin kalokalohki duwen en “kesehla kosonned en Moses” oh mwamwahliki Kosonned en Moses. (Wiewia 21:21) Ohl mah Kristian kan nan Serusalem ndaiong Pohl en kahrehda ohl pahmen oh kohla ni tehnpas sarawio oh kamwakelehda ih ong kaudok pwehn kasalehda me e kin peikiong Kosonnedo. Ahpw Pohl ese me Kristian kan solahr mi pahn Kosonnedo. E pil sohte wiahda mehkot sapwung. Ahpw Pohl peikiong ahnsowohte. E “kahrehda ohl ako oh iang irail kamwakelda ong kaudok.” (Wadek Wiewia 21:​23, 24, 26.) Pwehki eh peik, Pohl sewese miniminpenehn rie Kristian ko.—Rom 14:​19, 21.

17. Dahme ke sukuhlkihsang dahme wiawihong Stephanie?

¹⁷ Sister men me adaneki Stephanie apwalki peikiong pilipil ehu me brother kan nan eh wasao wiahda. Ih oh eh pwoudo kin perenki ara papah nan ehu pwihn me kin lokaiahki ehu lokaia tohrohr. Mwuhr, ohpis en Sounkadehdehn Siohwa kan kauhdi pwihno, oh pwopwoudo pwurala nan ara mwomwohdisou me kin lokaiahki ara lokaia. Stephanie koasoia: “Uhdahn I nsensuwedla. I sohte  leme mie anahn laud nan at wasa.” Mendahki met, e pilada en utung kaweid kapwo. E doula koasoia: “Mwuhr, I wehwehkihda me en brother ko pilipilo uhdahn mwahu. Nan at mwomwohdiso kapwo, mie me tohto me arail peneinei sohte iang padahk mehlel, eri se wiahla arail peneinei me kin kangoange irail. I kin onop rehn sister men me ahpwtehn pwurehng iang mihting oh kalohk. Oh ahnsou wet mie ei ahnsou laud en wia pein ei onop.” E pil koasoia, “Kadeikpen loalei mwakelekel, pwe I ese me I kin wia uwen ei kak en peik.”

18. Ia duwen atail kin paiekihda atail peik?

¹⁸ Kitail kak sukuhlki en peik. Sises “ketin sukuhlki peik sang ni mehkan me e ketin lokolongki.” (Ipru 5:8) Duwehte Sises, kitail kin esehla peik erein atail kahpwal kan. Karasepe, erein tepidahn soumwahu lusuluso COVID-19 ni ahnsou me kitail alehdi kaweid en uhdihsang tuhpene ni mihting kan nan Wasahn Kaudok oh kalohk ihmw lel ihmw, ke kin apwalki peikiong? Mendahki met, omw peik pereiukala, sewese mwomwohdiso en miniminpene, oh kaperenda Siohwa. Met kitail koaros onopadahr en kin peikiong kaweid koaros me kitail ale erein kahn kamakam kohwahlapo. Peikiong kaweid pwukat pahn pere atail mour.—Sohp 36:11.

19. Dahme kahrehda ke men peik?

¹⁹ Kitail sukuhlkiher me peik kin wahdo kapai tohto. Ahpw kitail pilada en peikiong Siohwa pwehki kitail poakohng ih oh men kaperenda ih. (1 Sohn 5:3) Kitail sohte kak kapwungohng Siohwa soahng koaros me e ketin wiahiong kitail. (Mel. 116:12) Ahpw kitail kak peikiong ih oh irail kan me ahneki manaman. Ma kitail peik, kitail kin kasalehda me kitail loalokong. Me loalokong kan kin kaperenda kupwuren Siohwa.—Lep. Pad. 27:11.