1. Dahme tohnleng men koasokoasoia, oh ia wehwehn met ong kitail?

 MA TOHNLENG men pahn koasoiong uhk, ke pahn rong dahme e pahn koasoia? Rahnwet, tohnleng men kin koasoakoasoiong “wehi koaros oh keinek koaros oh lokaia koaros oh aramas koaros.” Dahme e koasoakoasoia? “Lemmwiki Koht oh kalinganahda ih . . . Kaudokiong Meno me ketin wiahda nanleng oh sampah.” (Kaud. 14:​6, 7) Siohwa iei Koht mehlelo kelehpw me koaros anahn kaudokiong. Ia uwen atail kalahnganki me e ketikihong kitail ahnsou mwahu en kaudokiong nan sapwellime tehnpas sarawi lapalapo!

2. Ia wehwehn sapwellimen Siohwa tehnpas sarawi lapalapo? (Menlau pil kilang koakono “ Tehnpas Sarawi Lapalapo Kaidehn”)

² Dahkot tehnpas sarawi lapalapo, oh ia wasa kitail kak diarada oaritik kan me kawehwehda met? Tehnpas sarawi lapalapo kaidehn uhdahn ihmw ehu. E wia sapwellimen Siohwa koasoandi ong kaudok me e ketin kupwurki me poahsoandahsang ahn Sises meirong en pweinen pweipwei sapahlo. Wahnpoaron Pohl kawehwehda met nan nah kisinlikowo me e ntingihdi ong tepin Kristian en Ipru ko me mi Sudia. b

3-4. Dahme Pohl kin pwunodki duwen Kristian en Ipru ko nan Sudia, oh ia duwen eh sewese irail?

³ Dahme kahrehda Pohl ntinglahng Kristian en Ipru ko nan Sudia? Ele ong kahrepe riau. Keieu, pwehn kangoange irail.  Pali laud en irail tikida nan palien lamalam en mehn Suhs. Ele arail kaunen pelien lamalam kan en mahso kin kapailokehkin arail wiahla Kristian kei. Dahme kahrehda? Pwehki sohte arail tehnpas sarawi pwehn kohla oh wia kaudok, sohte pei sarawi pwehn wia arail meirong ong Koht, oh sohte samworo pwehn papah irail. Met kakete kamworusehla sapwellimen Krais tohnpadahk kan oh kahrehiong arail pwoson en luwetala. (Ipru 2:1; 3:​12, 14) Ele ekei irail pil medewehda en pwuralahng pelien lamalam en mehn Suhs.

⁴ Keriau, Pohl ndaiong Kristian en Ipru ko me irail sohte kin nantihong wehwehkihla padahk kapw oh loal kan, de “mwenge kekeluwak” nan Mahsen en Koht. (Ipru 5:​11-14) E sansal me ekei irail kin idawehnte Kosonned en Moseso. Ahpw, Pohl koasoia me meirong kan me mi nan Kosonnedo sohte douluhl kak kihsang dihp. Pwehki kahrepe wet, Kosonnedo “kasohralahr.” Eri Pohl padahkihong irail ekei padahk loal kan. E katamankihong ienge Kristian kan duwen “koapworopwor me . . . mwahusang” me poahsoankihda sapwellimen Sises meirongo. Met uhdahn kak sewese irail en “karanihala Koht.”—Ipru 7:​18, 19.

5. Dahme kitail anahne wehwehki sang pwuhken Ipru, oh dahme kahrehda?

⁵ Pohl kawehwehiong rie mehn Ipru ko dahme kahrehda arail kaudok en ahnsou wet uhdahn mwahusang arail kaudok en mahso. Mwomwen mehn Suhs ko ar kin kaudok kin wiahte “mwetehn soahng kan me pahn kohdo, ahpw me mehlelo iei Krais.” (Kol. 2:17) Mwetehn soahng ehu kin kasalehdahte mwomweu. Ahpw e sohte uhdahn mehlel. Duwehte met, mwomwen ahn mehn Suhs ko kin kaudok mahso kin wiahte mwetehn dahme mehlel me pahn kohdo. Kitail anahne wehwehki koasoandi me Siohwa ketikihong kitail pwehn ale mahkpen dipatail kan oh pwe kitail en kak kaudokiong ih ni ahl me e ketin kupwurki. Kitail pahn kapahrekiong “mwetehn” (mwomwen mehn Suhs kan kin kaudok) ong “me mehlelo” (mwomwen Kristian kan kin kaudok), me pwuhken Ipru kawehwehda. Ni atail wia met, kitail pahn kak wehwehkihla mwahu tehnpas sarawi lapalapo oh ia duwen eh pidada kitail.

6. Dahme kin wiawi nan impwal sarawio?

⁶ Mwomwen mehn Suhs kan kin kaudok. Pohl koasokoasoia duwen impwal sarawio me  Moses wiahda nan pahr 1512 Mwohn Krais. (Menlau kilang koakono “Mwomwen Mehn Suhs kan Kin Kaudok—Mwomwen Kristian kan Kin Kaudok.”) Impwal sarawio duwehte ihmw likou ehu me mehn Israel ko kin wahda ni arail kin keseuseli. Irail doadoahngki kereniong lel sounpar 500 lao re kauwada tehnpas sarawio nan Serusalem. (Eks. 25:​8, 9; Nemp. 9:22) Impwal sarawio iei wasa me mehn Israel kan kin pokonpene pwehn kaudokiong Koht oh wia arail meirong kan. (Eks. 29:​43-46) Ahpw, impwal sarawio pil wia karasepen mehkot me mwahusang impwalo, me pahn wiawihong Kristian kan.

7. Iahd me tehnpas sarawi lapalapo tepida miehla?

⁷ Mwomwen Kristian kan kin kaudok. Impwal sarawio wia “mwetehn mehkan en nanleng,” oh e karasahiong sapwellimen Siohwa tehnpas sarawi lapalapo. Pohl koasoia me “impwal wet wia karasaras ehu ong ahnsou wet.” (Ipru 8:5; 9:9) Eri ni ahnsou me e ntinglahng mehn Ipru ko, tehnpas sarawi lapalapo miehier. E miehla pahr 29. Nan pahro, Sises ketin papidaisla, keikihdi sapwellimen Koht manaman, oh tepida papah nin duwen sapwellimen Siohwa “samworo lapalap” nan tehnpas sarawi lapalapo. c—Ipru 4:14; Wiewia 10:​37, 38.

8-9. Nin duwen Ipru 7:​23-27 mahsanih, wekpeseng laud dahieu mie nanpwungen samworo lapalap en Israel kan oh Samworo Lapalapo, Sises Krais?

⁸ Mwomwen mehn Suhs kan kin kaudok. Samworo lapalapo wiliandi aramas akan mwohn Koht. Siohwa ketin idihada tepin samworo lapalap en Israel, Aaron, ni ahnsou me irail kasarawihala impwal sarawio. Ahpw nin duwen me Pohl kawehwehda, “aramas tohto anahne wiahla samworo pwe ren wiliandi meteikan pwehki mehla kin irehdi irail sang ren wiewiahte samworo.” d (Wadek Ipru 7:​23-27.) Oh pwehki samworo lapalap ko sohte unsek, irail anahne wia meirong ong pein diparail kan. Met wia wekpeseng laud nanpwungen samworo lapalap en Israel kan oh Samworo Lapalapo, Sises Krais.

⁹ Mwomwen Kristian kan kin kaudok. Nin duwen atail Samworo Lapalap, Sises Krais ketin wia “sounpapah . . . nan impwal mehlel me Siohwa ketin kauwada, a kaidehn aramas.” (Ipru 8:​1, 2) Eri, Pohl kawehwehda me “pwehki [Sises] kin ieias kohkohlahte, sohte emen me pahn wiliandi sapwellime pwukoahn samworo.” Pohl pil koasoia me Sises “sohte samin kis reh, tohrohrasang me dipan akan” oh me weksang samworo lapalap en Israel kan, “e sohte ketin anahne wiahda meirong kan rahn koaros” ong dipe kan. Met medewehla wekpeseng en pei sarawi kan oh meirong kan me mehn Suhs kan kin wia oh me Kristian kan kin wia.

10. Dahme meirong kan me kin wiawi pohn pei sarawi pronso kin karasaraskihong?

¹⁰ Mwomwen mehn Suhs kan kin kaudok. Likio ni wasahn pedolong en tehnpas sarawio, mie pei sarawi ehu me wiawihdahsang prons me irail kin meirongki mahn akan ong Siohwa. (Eks. 27:​1, 2; 40:29) Ahpw, meirong ko sohte douluhl kak mahkohng dipen aramas ko. (Ipru 10:​1-4) Meirong en mahn kan me kin pwurupwurehng wiawi nan impwal sarawio kin dokedoke meirongo me pahn kihsang douluhl dipen aramas akan.

11. Pohn pei sarawi dahieu me Sises toukihda moure nin duwen meirong ehu? (Ipru 10:​5-7, 10)

¹¹ Mwomwen Kristian kan kin kaudok. Sises mwahngih me Siohwa ketin poaronehdo ih  nin sampah pwehn toukihda moure nin duwen pweinen pweipwei sapahl ehu ong aramas akan. (Mad. 20:28) Eri, ni ahnsou me e ketin papidaisla, Sises toukihda pein ih pwehn wia kupwuren Koht. (Sohn 6:38; Kal. 1:4) Pei sarawio me Sises ketin toukihda moure kaidehn aramas me wiahda ahpw e karasahiong “kupwuren” Koht. Kupwuren Siohwa iei me sapwellime Ohlo en meirongkihla eh mour unsek. Sises ketikihda moure “pak ehute” pwehn pwainla dipen koaros me kin pwoson Krais. (Wadek Ipru 10:​5-7, 10.) Met kitail pahn koasoiapene soahng kan me mi loalen impwalo.

12. Ihs me kak pedolongala nan pere riau ko nan impwal sarawio?

¹² Mwomwen mehn Suhs kan kin kaudok. Loalen impwal sarawio oh tehnpas sarawi kan me kokouda mwuhr nan Serusalem duwepenehte. Mie pere riau—“Wasa Sarawi” oh “Wasa Sarawihe”—me kahdeng ehu katohrepeseng. (Ipru 9:​2-5; Eks. 26:​31-33) Loalen wasa Sarawio, mie dewen lamp kohl ehu, pei sarawi en isik warpwohmwahu, oh tehpel en pilawa ehu. “Samworo keidi” kante me mweimwei en pedolong Wasa Sarawio pwehn wia arail pwukoa sarawi kan. (Nemp. 3:​3, 7, 10) Wasa Sarawihe, mie kohpwahn inou kohl ehu me karasaraskihong wasa me Siohwa kin ket ie. (Eks. 25:​21, 22) Samworo lapalapohte me mweimwei en daulih kahdengo kohla Wasa Sarawiheo ni Rahnen Tomwo me kin wiawi pak ehu nan pahr koaros. (Lip. 16:​2, 17) Pahr koaros, e kin pedolong wa ntahn mahn kan pwehn tomwki pein dipe kan oh dipen wehio pwon. Kedekedeo, Siohwa ketin doadoahngki sapwellime manaman pwehn kadehdehda wehwehn  soahng pwukat me mi nan impwal sarawio.—Ipru 9:​6-8. e

13. Dahme Wasa Sarawio oh Wasa Sarawihe nan impwal sarawio kin karasaraskihong mwomwen Kristian kan ar kin kaudok?

¹³ Mwomwen Kristian kan kin kaudok. Ekeite sapwellimen Krais tohnpadahk kan me keikihdi sapwellimen Koht manaman, oh irail ahneki nanpwungmwahu tohrohr rehn Siohwa. Irail meh 144,000 pwukat pahn iang Sises papah nin duwen samworo kei nanleng. (Kaud. 1:6; 14:1) Wasa Sarawio nan impwalo kin karasaraskihong arail pwekipwekda nin duwen sapwellimen Koht seri kei ni arail mi nin sampah. (Rom 8:​15-17) Wasa Sarawihe en impwalo kin karasaraskihong nanleng, wasa me Siohwa kin ketiket ie. “Kahdengo” me katohrepeseng Wasa Sarawio sang Wasa Sarawiheo kin karasaraskihong kahlepen Sises. Ma e wia aramaste oh ahneki paliwar uduk, e sohte kak kohdahla nanleng nin duwen Samworo Lapalap en sapwellimen Siohwa tehnpas sarawi lapalapo. Sang ni eh ketin tounmeteikihla eh mour ong aramas akan, Sises ketin ritingadahng Kristian keidi kan koaros ong mour nanleng. Irail pil anahne sohla ahneki paliwar uduk pwehn ale ketingparail nanleng. (Ipru 10:​19, 20; 1 Kor. 15:50) Mwurin Sises ketin iasada, e ketilongala Wasa Sarawiheo en sapwellimen Siohwa tehnpas sarawi lapalapo, wasa me me keidi kan koaros pahn kedekedeo iang ih.

14. Nin duwen me Ipru 9:​12, 24-26 mahsanih, dahme kahrehda mwomwen kaudokiong Siohwa nan tehnpas sarawi lapalapo mwahusang mwomwen mehn Israel ko kin kaudok?

¹⁴ Wasaht kitail kak kilang ni sansal uwen lapalap en sapwellimen Siohwa koasoandi ong kaudok min me poahsoandahsang pweinen pweipwei sapahlo oh pwukoahn samworo lapalap me Sises ahneki. Samworo lapalap kan en Israel kin pedolongala Wasa Sarawiheo me aramas wiahda oh wa ntahn mahn kan ong meirong, ahpw Sises “ketila nanleng,” wasa me keieu sarawi, pwehn pato mwohn Siohwa. Wasao e patohwanohng Koht eh mour unsek “pwe en ketikihsang dihp sang ni eh ketin meirongkihla pein ih.” (Wadek Ipru 9:​12, 24-26.) Sapwellimen Sises meirongo me kamwakelehsang dipatail kan kohkohlahte. Nin duwen me kitail pahn sukuhlki met, mehnda ma atail koapworopwor iei en mi nanleng de nin sampah, kitail koaros kak kaudokiong Siohwa nan sapwellime tehnpas sarawi lapalapo.

15. Ihs me kin papah wasa kelpene en impwal sarawio?

¹⁵ Mwomwen mehn Suhs kan kin kaudok. Mie wasa kelepene ehu ni impwal sarawio me samworo kan kin wia arail doadoahk. Pei sarawi laudo me wiawihdahsang prons ong meirong isihs mi wasa me kelpeneo, iangahki peisin en pihl prons ehu me samworo kan kin doadoahngki pwehn kamwakeleirailda mwohn arail pahn wia arail doadoahk sarawio. (Eks. 30:​17-20; 40:​6-8) Ahpw, tehnpas sarawi kan me wiawihda mwuhr, pil mie wasa ehu me kelpene me irail kan me kaidehn samworo kak kesihnen oh kaudokiong Koht.

16. Ihs me kin papah wasa kelpene riau ko nan tehnpas sarawi lapalapo?

¹⁶ Mwomwen Kristian kan kin kaudok. Mwohn ar kohdahla nanleng pwehn iangih Sises papah nin duwen samworo kei, me keidi kan nin sampah kin papah ni lelepek ni wasa me kelpeneo masloale en tehnpas sarawi lapalapo. Peisin en pihl laudo me mi nan impwal sarawio oh tehnpas sarawio kin wia mehn kataman ehu ong irail, oh pil ong Kristian kan koaros en kolokolete arail mwakelekel.  Eri, ia wasa me ‘pokon kalaimwuno’ me kin utung Krais oh ienge me keidi kan ni loalopwoat pahn kaudokiong Siohwa? Wahnpoaron Sohn kilang arail “uh mwohn mwoahlo . . . oh re kin papah [Koht] ni rahn oh nipwong.” Pokon kalaimwuno kin wia met nin sampah ni wasa me kelpeneo masliki en sapwellimen Siohwa tehnpas sarawi lapalapo. (Kaud. 7:​9, 13-15) Ia uwen atail uhdahn kalahnganki me Siohwa ketikihong kitail pai kaselel en kaudokiong ih nan sapwellime tehnpas sarawi lapalapo!

17. Meirong dah kan me kitail ahneki pai kaselel en patohwanohng Siohwa?

¹⁷ Rahnwet Kristian kan koaros ahneki pai kaselel en kaudokiong Siohwa sang ni arail doadoahngki arail ahnsou, kehl, oh kepwe kan pwehn papah ih. Nin duwen me Pohl padahkihong Kristian en Ipru ko, kitail kak “patohwanohng Koht meirong en kaping ahnsou koaros, me iei, wahn kilin ewetail me kin lohkihong wehipokon mwareo.” (Ipru 13:15) Kitail kak kasalehda me kitail kesempwalki atail pai kaselel en kaudokiong Siohwa sang ni atail wia uwen atail kak koaros nan sapwellime doadoahk.

18. Nin duwen me Ipru 10:​22-25 mahsanih, soahng dah kan me kitail anahne ahnsou koaros wia oh dehr manokehla?

¹⁸ Wadek Ipru 10:​22-25. Ni kaimwiseklahn nah kisinlikowo ong mehn Ipru kan, Pohl koasoia duwen soahng kan me kitail anahne ahnsou koaros wia ni atail kaudokiong Siohwa. Soahng pwukat iei kapakap ong Siohwa, kalohk ong meteikan, iang mihting en mwomwohdiso kan, oh kangoange emenemen ‘oh wia mepwukat laud sang mahs ni atail kilang rahnen Siohwa kerendohr.’ Kerenlahng kaimwiseklahn pwuhken Kaudiahl, tohnlengo koasoia met pak riau pwehn kasalehda uwen kesempwal en met: “Kaudokiong Koht.” (Kaud. 19:10; 22:9) Kitail en dehr manokehla kesempwalpen padahk mehlel loal wet duwen sapwellimen Siohwa tehnpas sarawi lapalapo oh atail pai kaselel en kaudokiong atail Koht lapalapo!