Peidek kan Sang Sounwadawad kan
Mie ehu soangen mwenge me mehn Israel ko kin kang nan sapwtehno likin manna oh kuail?
Manna iei me mehn Israel kan kin keieu kang erein sounpar 40 nan sapwtehn. (Eks. 16:35) Siohwa pil ketikihong irail kuail ahnsou riau. (Eks. 16:12, 13; Nemp. 11:31) Ahpw, pil mie soangen mwenge teikan me mehn Israel kan kin kang.
Karasepe, ekei pak Siohwa kin ketin kahluwalahng sapwellime aramas akan “wasa me re pahn kin kommoaldi ie” wasa me mie pihl oh mwenge. (Nemp. 10:33) Wasa ko iei wasakis nan Elim, “wasa me mie utuhnpihl 12 oh tuhke pahm 70”—ele tuhke pwukat iei tuhke deid pahm. (Eks. 15:27) Pwuhko Plants of the Bible koasoia me tuhke deid pahm kin keirda nan soangsoangen wasa kan, oh me aramas kin keieu wiahki mwenge nan sapwtehn kan. Irail kin doadoahngki tuhkeo pwehn wiahkihda mwenge, leh, oh wasahn kousoan ong aramas rar rar kei.
Mehn Israel kan ele pil uhdi ni ehu wasa laud me rahnwet adaneki Feiran, me wia kisehn Wahun Feiran. a Pwuhko Discovering the World of the Bible koasoia me wahu, de wahu en pillap wet, “reireiki mwail 81 oh e wia ehu wahu me keieu reirei, keieu kaselel oh ndand nan Sainai.” E pil doula koasoia: “Nan wahwo, me dohki mwail 28 sang kepinpillapo, ih wasa me Feiran mi ie, me reireiki mwail 3, oh me inenen kaselel oh diren tuhke deid pahm. Wasao ilehki piht 2,000 sang nansed. Uwen kaselel en wasao, aramas akan kin kapahrekihong mwetuwel en Ihden. Sangete mahs, aramas akan kin kohla wasao pwehki tuhke deid pahm ko.”
Deid pahm nan wahu en Feiran
Ni mehn Israel ko kohkohsang Isip, irail wahda pilawa amas, peisin en kapal pilawa, pil kakete krein oh leh. Soahng pwukat sohte kin mihmi werei. Aramas akan pil wahda “kiden sihpw, kuht oh kou.” (Eks. 12:34-39) Pwehki irair en sapwtehno uhdahn apwal, diren mahn ko mehla. Ekei mahn ako irail kangala, oh ekei irail meirongkihla, pil ong koht likamw kan. b (Wiewia 7:39-43) Ahpw mendahki met, miehte nein mehn Israel ko pelin mahn kan. Kitail kak kilang met sang ni dahme Siohwa ketin mahsanihong sapwellime aramas ko ni arail sapeikiong ih: “Noumwail seri kan pahn wiahla silepen sihpw oh kakahnseli nan sapwtehn erein sounpar 40.” (Nemp. 14:33) Irail kakete ale milik oh uduk sang mahn pwukat, ahpw e sohte itar en kamwengehla aramas silirar erein sounpar 40. c
Ia wasa mahn pwukat kak diar kanarail mwenge oh nimarail pihl? d Ele e kin kalapw keteu ni ahnsowo kahrehda mie tuhke tohto nan sapwtehn. Insight on the Scriptures, Volume 1, koasoia me sounpar 3,500 samwalahro, “pihl nan wasa me mehn Israel kan mi ie uhdahn tohtohsang ahnsou wet. Kitail ese met pwehki mie wahu tohto me madadahr me mahso wia pillap kei.” Mendahki met, sapwtehno wiahte wasa kamasepwehk ehu. (Deud. 8:14-16) Ma Siohwa sohte ketikihda pihl ong mehn Israel ko oh neirail mahn ko, irail uhdahn pahn mehla.—Eks. 15:22-25; 17:1-6; Nemp. 20:2, 11.
Moses padahkihong mehn Israel ko me Siohwa ketin katungoalehki irail manna “pwe en kasalehiong [irail] me kaidehkte kisin tungoal me aramas akan kin mourki, pwe soangen mahsen koaros me kin pwilisang nin silangin KAUN-O.”—Deud. 8:3.
a Menlau kilang The Watchtower en May 1, 1992, pali 24-25.
b Paipel kasalehda ahnsou riau ko me mehn Israel kan doadoahngki mahn akan pwehn meirongkihong Siohwa nan sapwtehn. Keieun ahnsowo iei ahnsou me koasoandi en samworo kan wiawihda; keriaun ahnsowo iei ni Pahsohpao. Mwekid riau pwukat wiawi nan pahr 1512 mwohn Krais, sounpar ehu mwurin mehn Israel kan mweselsang Isip.—Lip. 8:14–9:24; Nemp. 9:1-5.
c Kerenlahng kaimwiseklahn sounpar 40 nan sapwtehno, mehn Israel kan kulihada mahn kidkid kei sang arail mahwen kan. (Nemp. 31:32-34) Mendahki met, irail kin kangkangte manna lao irail pedolong nan Sapwen Inowo.—Sos. 5:10-12.
d Kitail kak nda me mahn akan sohte iang kang manna pwehki Siohwa mahsanihong aramas ko en rikpene manna ni uwen me emenemen kak kang ahpw e sohte mahsanih duwen mahn akan.—Eks. 16:15, 16.
