Brother kan nan Pedel doadoahk laud daulih sounpar ehu pwehn kauwada wasahn redio ehu me adaneki WBBR nan dekehn Staten Island, New York City. Irail tepte mwatihada oh pelehdihsang tuhke kan wasao. Irail eri kauwada ihmw laud ehu ong tohndoadoahk ko oh pil ehu ihmw tohrohr ong arail kepwehn doadoahk kan. Ni ahnsou me doadoahko nek, brother ko tepida kihpene dipwisou en doadoahk kan me anahn pwehn tepida wia proahdkahs nan redio. Ahpw mie soangen kahpwal kei me irail anahne powehdi.

E uhdahn apwal en kihda andehna laudo ni wasahn redio. Irail anahne langahda andehnao, me reireiki piht 300, nanpwungen tuhke riau me reireiki piht 200. Tepin arail wia met sohte pweida. Ahpw irail likih sapwellimen Siohwa sawas, oh kedekedeo irail wiahda. Calvin Prosser, me iang wia doadoahko, koasoia: “Ma nin tapio se langahda andehnao ni pwung, se pahn pein pohlkin kiht.” Ahpw brother ko kapinga Siohwa pwehki e ketin sewese irail. Ahpw pil mie ehu kahpwal.

Proahdkahs nan redio wia mehkot kapw ahnsowo, eri e apwal en pwainda kepwe kan me anahn. Brother ko diarada transmitter ehu me kehlailki watt 500 me sohte uhdahn kapw oh me aramas emen wasao me pein wiahda. Irail sohte pwainda microphone kapw, ahpw re doadoahngkihte microphone en delepwohn ehu. Nipwong ehu nan February, irail lemehda en song ma dahme irail wiahdao kak doadoahk. Irail anahne prokram ehu pwehn kak wia proahdkahs, eri irail koulki koul en kaping kan ong Siohwa. Emen brother ko me adaneki Ernest Lowe kawehwehda mehkot kemenkouruhr me wiawi  rahno. E koasoia me nindoken arail wie kokoul, Sounkopwung Rutherford, b me rong arail kokoul nan nah redio nan Brooklyn mpen mwail 15 dohsang irail, koahl irailda.

Brother Rutherford kamwan nda: “Kumwail dehier katairong. Ngilamwail kan duwehte ngilen kaht!” Brother ko ekis namenekda oh mwadang kakunla prokramo. Ahpw irail eseier me redio doadoahk mwahu oh re kakehr tepida proahdkahs.

Nan February 24, 1924, nan tepin proahdkahs me irail wia, Brother Rutherford koasoia me irail pahn doadoahngki wasahn redio wet pwehn wia doadoahk me Nanmwarki Krais ketikihongehr irail en wia. E koasoia me kahrepen wasahn redio eh wiawihda iei “pwehn sewese aramas koaros en wehwehki Paipel oh duwen ahnsou kesempwal me kitail mihmi loale.”

Tepin proahdkahs me irail wia uhdahn pweida mwahu. Irail doadoahngki wasahn redio WBBR erein sounpar 33 pwehn kapwilewei prokram kan en sapwellimen Siohwa aramas akan.

Nan July 1924, Tohnsukuhl kan en Paipel pokonpene ong mihting tohrohr ehu nan Columbus, Ohio. Me iang towehda kan kohsang soangsoangen sahpw kan nin sampah, oh padahk kan wiawi ni lokaiahn wai, Arab, France, Sehmen, Krihs, Hungary, Italy, Lithuania, Poland, Russia, lokaiahn Scandinavia kan, oh Ukraine. Aramas akan kak rong ekei padahk ko nan redio, oh brother ko peki wasahn nuhs ehu wasao (Ohio State Journal) en kin ntingihada artikel kan duwen prokram en mihting tohrohro ehuehu rahn.

Niepeng, July 24, riatail Kristian daulih 5,000 iang kalohk nan kahnimwo. Irail kihpeseng kereniong pwuhk 30,000 oh tapiada onop en Paipel kid kid kei. The Watch Tower kahdaneki rahno “me keieu kaperen nan mihting tohrohro.”

Nialem, July 25, nan ehu eh padahk ko, Brother Rutherford ni eimah wadek doaropwe ehu me kadeikada kaunen pelien lamalam ako. E nda me kaun en palien politik, pelien lamalam, oh palien pesines kan kin kauhdi aramas akan sang arail pahn sukuhlki dahme mehlel duwen Wehio me Koht pahn ketin doadoahngki pwehn kapaiahda  tohnsampah. E pil koasoia me kaun pwukat sapwung pwehki irail kin utung League of Nations oh nda me Koht kin ketin doadoahngki League of Nations pwehn kaunkihda sampah. Tohnsukuhl kan en Paipel anahne eimah laud pwehn kalohki rohng wet ong aramas akan.

Mwuhr, ehu oaralap nan The Watch Tower koasoia me mihting tohrohr wet nan Columbus kakehlakahda pwoson en Kristian ngoang ko. Mihting tohrohro kangoange irail en kin eimah kalohk mendahki uhwong kan. Leo Claus, me iang towehda mihting tohrohro, koasoia: “Mwurin mihting tohrohro, se inenen perenki at pahn iang lohki rong wet nan at wasahn kalohko.”

Nan October, Tohnsukuhl kan en Paipel tepida kihpeseng copy rar rar kei en kisin doaropweo (Ecclesiastics Indicted) me koasoia duwen dahme Brother Rutherford padahngki. Nan kisin kahnimw en Cleveland, Oklahoma, Frank Johnson kanekehla eh kihpeseng kisin doaropwe ko oh anahne awih minit 20 mwohn ienge sounkalohk ko tangodo pwekada ih. E keper ong ih en awih wasa me aramas kak kilang ih, pwehki mie ohl kei sang kahnimwo me lingeringerkihda eh kalohk wasao oh raparapahki ih. Brother Johnson lemehda en rukula nan imwen sarawi ehu me karanih ih. Sohte me mi nan imwen sarawio, eri e pwilikihdi ehu doaropwe nan nein sounpadahk en sarawio nah Paipelo oh pil kihdi ekei pohn ehuehu sehr ko. Ih mwadangete pedoisang imwen sarawio. Ahpw miehte ahnsou luwehdi, eri e pil kohla ni imwen sarawi riau, oh wia soahngohte.

Frank mwadang pwurala wasa me ienge sounkalohk ko pahn tuhwong ih. E rukula mwurin wasahn ale kahs ehu, oh kin tetehk ohl ako me raparapahki ih. Ohl ako tangodo wasa me e mihieo, ahpw re sohte kilang ih. Mwurinte arail daulih, iengen Frank ko me kalokalohk karanih wasao, tangodo oh ale ih oh irail koaros eri tang kohkohla.

Emen brother ko koasoia: “Ni at tangatang kohkohla, se daulih imwen sarawi siluh ko. Mpen aramas 50 me kesikesihnen likin imwen sarawi ko. Ekei irail wadewadek kisin doaropweo, a ekei kolada pwehn kasalehiong sounpadahk en arail sarawio en kilang. Se kohkohsang wasao ni ahnsou me keieu mwahu! Se kalahngankihong Siohwa at Koht eh ketin sewese kiht en ese dahme se anahne wia pwe sen kak kalohki rohngo oh sohte kolokoldi.”

Nan sahpw teikan, Tohnsukuhl en Paipel kan pil kin kalohk ni eimah. Nan paliepeng en France, Józef Krett kalohk ong tohndoadoahk kan me kohsang Poland me kin weirada pwoahr pwehn rapahki kohl de mete ape. Brother Krett pahn wia padahk ehu me oaralape koasoia “Iasadahn me Melahr kan ni Ahnsou Keren.” Ni riatail Kristian kan ar kihpeseng doaropwehn luhk ong tohnkahnimwo, emen padre en wasao ndaiong tohn eh sarawio ren dehr iang towehda. Ahpw dahme wiawi weksang met. Daulih aramas 5,000 iang rong padahko, pil padreo! Brother Krett luke padreo en kasalehda dahme e kin kamehlele, ahpw e sohte wia. Mwurin padahko, Brother Krett kihong aramas ako pwuhk ko koaros me mi reh pwehki irail uhdahn men esehla Mahsen en Koht.—Eimw. 8:11.

Claude Brown kohla Gold Coast, me met adaneki Ghana, nan Aperika pwehn kalohki rongamwahwo. Eh padahk kan oh pwuhk kan me e kihpeseng sewese padahk mehlel en mwadang kohpeseng nan sahpwo. John Blankson, me  sukusukuhlki en wiahla sounwiahda oh netiki wini, iang karonge ehu ahn Brother Brown eh padahk ko. E mwadang pohnese me e diaradahr padahk mehlel. E koasoia: “Padahk mehlel uhdahn kapereniehda, oh I kin koasoiaiong aramas tohto ni wasahn sukuhlo.”

John sukuhlki me Paipel sohte kin padahngki me Koht wia koht silimen (Trinity). Eri ehu rahno, e kohla ni imwen sarawi ehu pwehn kalelapak rehn padreo duwen padahk wet. Padreo pwakihieila liki oh wer nda: “Kaidehn kowe Kristian men; kowe nein Tepil. Kohkohlahsang men!”

Ni eh lella ni imweo, John ntingihada kisinlikou ehu ong padreo oh peki ma ira kak tuhpene wasa ehu me aramas kin pokonpene ie pwe ira en koasoiapene duwen Trinity. Padreo ndaiong John en kohla ni ohpis en kaunen sounpadahk ko. Kaunen sounpadahk ko idek ma e uhdahn ntingihada kisinlikowo.

John nda, “Ei maing.”

Kaunen sounpadahk ko ndaiong John en ntingihada kisinlikou en peki mahk rehn padreo. Eri John ntingihedi:

“Maing, ei sounpadahko nda ien ntingwei oh peki mahk rehmw, oh I kak ntingihada kisinlikou en peki mahk, ahpw ihte ma ke ndahda ni mehlel me ke kin padahngki padahk likamw.”

Sounpadahko uhdahn pwuriamweila oh nda, “Blankson, ih men me ke men ntingihada?”

“Ei maing. Ihte men me I kak ntingihedi.”

“Ke sohla pahn iang sukuhl. Ke sohte kak iangete sukuhl wet ma ke doulahte uhwong padre men me koperment wet kin utung.”

“Ahpw maing, . . . ni omw kin padahki kiht oh mie ire kan me se sohte wehwehki, se kin idek peidek, kaidehn?”

“Ei uhdahn.”

“Maing, ih met me wiawi. Ohlo padapadahkihong kiht duwen Paipel oh I idek reh peidek ehu. Ma e sohte kak sapengala peideko, ia kahrepen I en ntingihada kisinlikou en peki mahk reh?”

Blankson sohte ntingihada kisinlikou en peki mahko oh ieiangete sukuhlo.

The Watch Tower oaralapihada soahng kan me wiawi nan pahro koasoia: “Duwehte Depit, se kak uhdahn nda: ‘Komwi me ketin kakehleiehda pwe I en kak mahwen.’ (Melkahka 18:39) Pahro uhdahn kangoangei kiht pwehki se kilang ia duwen Siohwa eh ketin sewesei kiht . . . Sapwellime ladu lelepek kan . . . uhdahn perenki arail lohkiseli rongamwahwo.”

Ni kaimwiseklahn pahro, brother kan pilahnehda en kauwada pil ehu wasahn redio. Wasahn redio wiawihda nan Chicago, Wehin Amerika, oh adaneki WORD. Transmitter me brother ko doadoahngki ong WORD kehlailki watt 5,000 oh kin kapwilewei rong en Wehio dohki mwail epwiki kei, pil lella paliepeng en Canada.

Nan pahr 1925, Siohwa ketin sewese riatail Kristian kan en wehwehki kawehwe kapw me pid Kaudiahl irelaud 12. Kawehwe kapwo kahrehda ekei en sohla papah Siohwa. Ahpw me tohto teikan perenkihda arail wehwehkihla mwahu mwekid kan me wiawi nanleng oh ia duwen eh pidada sapwellimen Koht aramas akan nin sampah.