IREN ONOP 41
KOUL 13 Krais, Atail Soun Kahlemeng
Dahme Kitail Sukuhlkihsang Rahn 40 ko Mwohnte Sises Ketidahla Nanleng?
“Re kin kilikilang ih erein rahn 40, oh e kin ketin padahngki duwen Wehin Koht.”—WIEWIA 1:3.
DAHME KITAIL PAHN SUKUHLKI
Kitail pahn sukuhlki mehn kahlemeng en Sises erein rahn 40 ko mwohn eh ketidahla nanleng.
1-2. Dahme wiawi ni sapwellimen Sises tohnpadahk riemeno ara alialu kolahng Emaus?
RAHNO iei Nisan 16, pahr 33. Sapwellimen Sises tohnpadahk ko nsensuwed oh masepwehk. Meh riemen kohkohsang Serusalem oh kohkolahng Emaus, kisin kahnimw ehu me dohki mwail 7 sang Serusalem. Ohl pwukat uhdahn mworusala pwehki Sises, me ira kin ideidawehn, ahpwte kamakamala. Ira kasikasik me Mesaiao pahn wiahiong mehn Suhs kan soahng mwahu kan ahpw met e melahr. Ahpw, mehkot kapwuriamwei wiawi.
2 Ohl emen tuhwong ira oh iang irahda. Tohnpadahk ko ndaiong ih duwen soahng suwed kan me wiawihong Sises. Eri ohlo tepida koasoia soahng kan me ira sohte pahn manokehla. E ketin kawehwehda dahme kahrehda Mesaiao anahne lokolok oh mehla ni eh kawehwe “tepisang Moses oh Soukohp ako koaros.” Ni ohl silimeno ar lella Emaus, irail tehkada me ohl menet iei Sises me Koht ketin kaiasada! Medewehla uwen ara peren pwehki Mesaiao ketin ieias!—Luk 24:13-35.
3-4. Dahme wiawihong sapwellimen Sises tohnpadahk ko, oh dahme kitail pahn sukuhlki nan iren onop wet? (Wiewia 1:3)
3 Sises ketin pwarohng sapwellimen tohnpadahk ko pak tohto erein rahn 40 ko mwohn eh ketidahla nanleng. (Wadek Wiewia 1:3.) Sises ketin kangoange sapwellime tohnpadahk ko me nsensuwed oh masepwehk. Oh irail perenda oh ahneki eimah en kalohki oh padahngki rongamwahu en Wehio. a
4 Kitail kak paiekihda atail onopki duwen dahme Sises ketin wia erein ahnsowo. Nan iren onop wet, kitail pahn kilang ia duwen Sises eh ketin doadoahngki ahnsowo (1) pwehn kangoange sapwellime tohnpadahk kan, (2) pwehn sewese irail wehwehkihla mwahu iren Paipel kan, oh (3) pwehn kaiahne irail ong doadoahk me re pahn ahneki ni ahnsou kohkohdo. Nan ehuehu irair pwukat, kitail pahn kilang ia duwen atail kak kahlemengih sapwellimen Sises mehn kahlemeng.
KANGOANGE METEIKAN
5. Dahme kahrehda sapwellimen Sises tohnpadahk ko anahne kangoang?
5 Sapwellimen Sises tohnpadahk ko anahne kangoang. Dahme kahrehda? Ekei irail kohkohsang imwarail, arail peneinei oh pesines pwehn iang Sises. (Mad. 19:27) Ekei irail lelohng wiewia sapahrek pwehki irail wiahla sapwellimen Sises tohnpadahk. (Sohn 9:22) Re wiahda tounmetei pwukat pwehki re kamehlele me Sises iei Mesaiao. (Mad. 16:16) Ni ahnsou me Sises ketin kamakamala, re uhdahn nsensuwed oh mworusala pwehki re sohte ese dahme pahn wiawi.
6. Dahme Sises ketin wia mwurin eh iasada?
6 Sises ketin wehwehki me e sohte sapwung sapwellime tohnpadahk ko en nsensuwed ni ahnsou me e mehlao. Oh e mwahngih me arail nsensuwed sohte wehwehki me irail pwoson tikitik. Eri ni rahnohte me e ketin iasada, e tepida kangoange kompoakepah kan. Karasepe, e ketin pwarohng Mery Makdala erein eh wie sengiseng pohn eh sousowo. (Sohn 20:11, 16) E pil ketin pwarohng sapwellime tohnpadahk riemen me seiseiloaklahng Emaus. Oh e ketin pwarohng wahnpoaron Piter. (Luk 24:34) Dahme kitail kak sukuhlkihsang sapwellimen Sises mehn kahlemeng? Medewehla dahme wiawi ni eh ketin pwarohng Mery Makdala.
7. Dahme Sises mahsanih Mery wiewia, oh dahme e ketin wiahiong liho? (Sohn 20:11-16) (Pil kilang kilel.)
7 Wadek Sohn 20:11-16. Ni menseng en Nisan 16, ekei lih kohla ni sousou en Siseso. (Luk 24:1, 10) Emen lih ako iei Mery Makdala. Ni ahnsou me Mery lella ni sousowo, paliweren Siseso sohte mi mwo. Eri e kohla ndaiong Piter oh Sohn. Ohl riemen pwukat tangala ni sousowo oh Mery pwakih ira. Ohl ako kilangada me paliweren Siseso sohte mi nan sousowo oh pwurala ni imwara ko. Ahpw Mery mihmihte mwo oh wie sengiseng. E sohte ese me Sises ketiket wasao. E mahsanihada liho eh wie sengisengki ih oh e men kansenamwahwihala. Eri e ketin pwarohng Mery oh wia mehkot me tikitik me uhdahn kangoange ih. E mahsanihong liho en kohla rehn rie ko oh kihong irail rohng kesempwal ehu. E anahne ndaiong irail me Sises pwurehng mourda.—Sohn 20:17, 18.
Kahlemengih Sises sang omw tehk mwahu oh wehwehki pepehm en irail kan me mworusala (Menlau kilang parakrap 7)
8. Ia duwen atail kak kahlemengih Sises?
8 Ia duwen atail kak kahlemengih Sises? Kitail kahlemengih Sises ni atail kin kangoange riatail Kristian kan en pousehlahte papah Siohwa. Duwehte Sises, kitail anahne tehk kanaiehng kahpwal kan me re ahneki, song en wehwehki ia arail pepehm, oh kansenamwahwih irail. Medewehla dahme wiawihong sister men me ede Jocelyn, me rie serepein men mehla nan aksident laud ehu. E koasoia, “Erein sounpwong tohto, I kin uhdahn nsensuwed ahnsou koaros.” Ahpw, brother men oh eh pwoudo luhkehla ni imwarao oh mweidohng en koasoiahda eh pepehm. Ira rong kanaiehng, koasoi kadekohng, oh ndaiong ih ia uwen Siohwa eh ketin kesempwalki ih. Jocelyn koasoia: “I tihwohla oh mwomwen me I kihrla nansed nan melimel laud ehu. Ahpw Siohwa ketin doadoahngki brothero oh eh pwoudo pwehn doareiehla. Ira sewese ien pwurehng ahneki ineng en pousehlahte papah Siohwa.” Kitail pil kak kangoange meteikan ma kitail mweidohng irail en kasalehda arail pepehm oh rong kanaiehng dahme irail nda. Ni ahl wet, kitail kak kansenamwahwih oh sewese irail en pousehlahte papah Siohwa.—Rom 12:15.
SEWESE METEIKAN EN WEHWEHKI MASEHN EN KOHT
9. Kahpwal dah me sapwellimen Sises tohnpadahk ko lelohng, oh ia duwen Sises eh sewese irail?
9 Sapwellimen Sises tohnpadahk ko kamehlele Mahsen en Koht oh wia uwen arail kak en peikiong Siohwa. (Sohn 17:6) Ahpw irail sohte kak wehwehki dahme kahrehda Sises ketin kamakamala nin duwen loallap men. Sises mwahngih me sapwellime tohnpadahk ko pwoson oh poakohng Siohwa, ahpw e ketin pohnese me re anahne wehwehki mwahu iren Paipel kan. (Luk 9:44, 45; Sohn 20:9) Eri e sewese irail en wehwehki wehwehn dahme irail wadek nan Paipel. Medewehla ia duwen eh wia met ni eh pwarohng tohnpadahk riemen ni ahl me kolahng Emaus.
10. Ia duwen Sises eh sewese sapwellime tohnpadahk ko en wehwehki me ih me Mesaiao? (Luk 24:18-27)
10 Wadek Luk 24:18-27. Tehk me Sises sohte mwadangete ndaiong ohl ako ihs ih. Ahpw e idek peidek kan. Dahme kahrehda? Mwein e men ira en padahkihong dahme re medemedewe. Oh ira wia met. Ira ndaiong ih me ira medewe me Sises pahn wiahla nanmwarki en Israel oh kaunda irail ah kaidehn mehn Rom ko. Sises mweidohng ira en koasoiahda ara pepehm. Ih eri doadoahngki iren Paipel kan pwehn sewese ira en wehwehki me kokohp tohto pweidahier. b Mwuhr ni soutiko, e tuhwong ekei tohnpadahk oh pil kawehwehiong irail wehwehn kokohp pwukat. (Luk 24:33-48) Dahme kitail kak sukuhlkihsang met?
11-12. (a) Mehn kasukuhl dah me kitail sukuhlkihsang mwomwen ahn Sises ketin padahngki iren mehlel sang Paipel? (Pil kilang kan.) (b) Ia duwen Brother men eh sewese nah tohnsukuhl en Paipelo?
11 Ia duwen atail kak kahlemengih Sises? Keieu, ni atail padahkih tohnsukuhl en Paipel kan, idek peidek kan me konehng pwehn sewese irail en kasalehda arail pepehm. (Lep. Pad. 20:5) Ni omw esehda ia arail pepehm, kasalehiong irail ia duwen arail kak diar iren Paipel kan me kak sewese irail nan arail irairo. Ke dehr ndaiong irail dahme ren wia. Ahpw sewese irail en medewe duwen iren Paipel ko oh ia duwen arail kak doadoahngki nan arail mour. Medewehla dahme wiawihong brother men nan Ghana me adaneki Nortey.
12 Ni ahnsou me Nortey sounpar 16, e tepida onopki Paipel. Ahpw sohte pwand, ah peneinei ko uhwongada ih. Dahme sewese ih en pousehlahte onopki Paipel? Brother me kin onop reho koasoiahiongehr duwen Madiu irelaud 10 oh kasalehiong ih me Kristian mehlel kan pahn lelohng kalokolok. Nortey koasoia, “Eri ni kalokolok eh tepida, I kamehlele me i diaradahr padahk mehlel.” Brothero pil kasalehiong ih Madiu 10:16, me mahsanih me kitail anahne kanaiehng. Eri ira koasoiapene ia duwen iren Paipel wet eh kak sewese Nortey en kawehwehiong ah peneinei ko ni wahu dahme e kin kamehlele. Mwurin eh papidaisla, Nortey men wiahla pioneer, ahpw eh pahpao men en iang sukuhl laud. Brothero sohte ndahng Nortey dahme en wia. Ahpw e idek reh peidek kan pwehn sewese ih medewe kaweid en Paipel kan oh wiahda pilipil me pwung. Dahme Nortey wia? Nortey pilada en tepida pioneer. Eh pahpao ndaiong en kohkohla. Ia ahn Nortey pepehm duwen dahme wiawihong ih? E koasoia, “I kamehlele me i wiahda pilipil pwung.” Ni atail kin kangoange meteikan en doudouloale iren Paipel kan, kitail kin sewese irail en kakehlaka arail pwoson oh en pousehlahte papah Siohwa.—Ep. 3:16-19.
Kahlemengih Sises sang omw sewese meteikan en medewe iren Paipel kan (Menlau kilang parakrap 11) e
SEWESE BROTHER KAN REN WIAHLA “ARAMAS AKAN NIN DUWEN KISAKIS KEI”
13. Dahme Sises ketin wia pwehn tehk mwahu me doadoahk en kalohko pousehlahte wiawi mwurin eh ketidahla nanleng? (Episos 4:8)
13 Ni eh ketiket nin sampah, Sises ketin kapwaiada ni unsek doadoahk me Semeo ketikihong ih en wia. (Sohn 17:4) Ahpw Sises sohte medewe me ih kelehpw me kak wia dahme Siohwa ketin kupwurki. Erein sounpar siluh elep me e kalokalohk nin sampah, e pil ketin kaiahnehda meteikan. Sises likih sapwellime tohnpadahk ko. E ketikihong irail pwukoa en kalohk, padahngki rongamwahwo oh en apwalih sapwellimen Siohwa aramas kesempwal kan. Ekei tohnpadahk ko me kin tiengla mwowe nan doadoahk wet mweinele pohnangin sounpar 30. (Wadek Episos 4:8.) Ohl pwukat iangih Sises doadoahk laud oh kin loalopwoat ong ih. Ahpw mwohn eh ketidahla nanleng, e ketikihong irail pil ekei mehn kaiahn pwe irail en kak wiahla “aramas akan nin duwen kisakis kei.” Ia duwen eh ketin kaiahne irail?
14. Dahme Sises ketin padahkihong sapwellime tohnpadahk ko erein rahn 40 ko mwohn eh ketidahla nanleng? (Pil kilang kilel.)
14 Sises ketikihong sapwellime tohnpadahk ko kaweid me pahn sewese irail. E ketin wia met ni ahl kadek. Karasepe, e mwahngih me ekei irail sohte uhdahn kamehlele me e pwoula oh e ketin iasadahr. Eri e sewese irail en ese me mehlelo sang ni eh ketikihong irail kaweid. (Luk 24:25-27; Sohn 20:27) E pil mahsanihong irail en nsenohkihte arail apwalih sapwellimen Siohwa aramas akan laudsang arail doadoahk en mwohni. (Sohn 21:15) E katamankihong irail en dehr kapahrekihong dahme irail kin wia ong dahme meteikan kan kak wia nan sapwellimen Siohwa doadoahk. (Sohn 21:20-22) Oh e ketin kapwungala madamadau sapwung me re ahneki duwen Wehio oh sewese irail en nsenohkihte kalohki rongamwahwo. (Wiewia 1:6-8) Dahme elder kan kak sukuhlkihsang Sises?
Kahlemengih Sises sang omw kaiahne ohl akan en apwalih pwukoa teikan (Menlau kilang parakrap 14)
15-16. (a) Ni soangen ahl dah me elder kan kak kahlemengih Sises? Menlau kawehwehda. (b) Ia duwen Patrick eh paiekihda kaweid?
15 Ia duwen elder kan ar kak kahlemengih Sises? Re anahne kaiahne brother kan oh pil irail me pwulopwul kan, pwe en wia doadoahk kan nan mwomwohdiso. c Elder kan wehwehki me brother pwukat anahne sukuhlki soahng tohto. Irail anahne kaiahne brother pwulopwul kan ni elen limpoak pwe irail en sukuhlki en kin aktikitik, likilik, oh men sewese meteikan.—1 Tim. 3:1; 2 Tim. 2:2; 1 Pit. 5:5.
16 Medewehla ia duwen brother men me ede Patrick eh paiekihda kaweid ehu. Ni ahnsou me e pwulopwul, e kin lokaia lemei oh sohte kin kadekohng meteikan, pil sister kan. Elder men tehkada me Patrick anahne wiahda wekidekla kan oh kihong ih kaweid inen ahpw ni ahl kadek. Patrick koasoia, “I perenki eldero eh kasalehiong ie dahme I anahne kamwahwihala. I kin mworuskihla ni ei kilang brother teikan arail alehdi pwukoa kan me I men wia. Ahpw ahn eldero kaweid sewese ie en ese me I anahne aktikitik oh kasalehiong riei Kristian kan limpoak ah kaidehn en nsenohkihte en alehdi pwukoa ehu.” Imwilahn met, Patrick wiahla emen elder ni eh sounpar 23.—Lep. Pad. 27:9.
17. Ia duwen Sises eh ketin kasalehda me e likih sapwellime tohnpadahk ko?
17 Sises ketikihong sapwellime tohnpadahk ko pwukoa en kalohki rongamwahwo ong aramas akan oh kawehwehda Iren Paipel ko. Tohnpadahk ko ele medewe me re sohte kak wia dahme Sises mahsanihong irail en wia. Ahpw Sises ketin kamehlele me re kak wia doadoahk wet. Ihme kahrehda e ketin mahsanihong irail: “Duwen Sahmo eh ketin poaroneiehdo, ih pil duwen ei pahn kadarkumwailwei.”—Sohn 20:21.
18. Ia duwen elder kan ar kak kahlemengih Sises?
18 Ia duwen elder kan ar kak kahlemengih Sises? Elder koahiek kan kin kaiahne meteikan sang arail mweidohng irail en apwalih soangen pwukoa kei. (Pil. 2:19-22) Karasepe, elder kan kin peki me pwulopwul kan en sewese kamwakele oh apwalih Wasahn Kaudok. Elder kan kak kihong irail pwukoa ehu ren wia, kaiahne irail ong ia duwen arail pahn wia met, oh likih me re pahn wiahda. Elder kapw men me adaneki Matthew uhdahn kalahnganki elder koahiek kan me kaiahne ih en wia soangsoangen doadoahk nan mwomwohdiso oh likih me e pahn kapwaiada met. E koasoia, “Ni ei wiahda sapwung, re kin sewese ie en kilang ia duwen ei kak sukuhlsang ei sapwung ko oh kamwahwihala.” d
19. Dahme kitail en koasoanehdi teng en wia?
19 Sises ketin doadoahngki rahn 40 ko mwohn eh ketidahla nanleng pwe en kangoange, padahkih, oh kaiahne meteikan. Kitail en koasoanehdi teng en idawehn sapwellime mehn kahlemeng. (1 Pit. 2:21) E pahn ketin sewese kitail en wia met. Met pwehki e inoukihda: “I pahn ieiang kumwail rahn koaros lao lel ni kaimwiseklahn koasoandi en mwehio.”—Mad. 28:20.
KOUL 15 Kapinga Sapwellimen Siohwa Mesenih!
a Pwuhken Rongamwahu ko oh pwuhken Paipel teikan kasalehda me Sises ketin pwarohng sapwellime tohnpadahk ko pak tohto mwurin eh iasada. E ketin pwarohng Mery Makdala (Sohn 20:11-18); lih teikan (Mad. 28:8-10; Luk 24:8-11); tohnpadahk 2 (Luk 24:13-15); Piter (Luk 24:34); wahnpoaron ko ahnsou me Tomas sohte mi mwo (Sohn 20:19-24); wahnpoaron ko iangahki Tomas (Sohn 20:26); tohnpadahk 7 (Sohn 21:1, 2); tohnpadahk daulih 500 (Mad. 28:16; 1 Kor. 15:6); rieo Seims (1 Kor. 15:7); ong wahnpoaron ko koaros (Wiewia 1:4); oh wahnpoaron ko me karanih Pedani. (Luk 24:50-52). Sounnting en Paipel kan ele sohte kasalehda ahnsou kan koaros me Sises pwarohng sapwellime tohnpadahk ko.—Sohn 21:25.
b Pwehn kilang ekei kokohp kan duwen Mesaiao, menlau kilang artikelo “Do Messianic Prophecies Prove That Jesus Was the Messiah?” nan jw.org.
c Ekei elder pwulopwul kan ele kak idihdida nin duwen sounapwalih me kin seiloak pil ni arail sounpar 25-30. Ahpw irail anahne mahs papah nin duwen elder kei.
d Pwehn kilang ekei iren sawas teikan ong ia duwen en sewese brother pwulopwul kan en kak alehda pwukoa kan, menlau kilang Kahn Iroir en August 2018, pali 11-12, parakrap 15-17, pil nan April 1, 2015, pali 8-18.
e WEHWEHN KILEL: Mwurin brothero eh sewese tohnsukuhl en Paipelo en medewe iren Paipel kan, tohnsukuhlo kesehla kapwat en Krismas kan.
