IREN ONOP 43
KOUL 90 Kangoange Emenemen
Ia Duwen Atail Kak Powehdi Peikasal
“Kumwail kasawih mehkoaros.”—1 DES. 5:21.
DAHME KITAIL PAHN SUKUHLKI
Dahme kitail kak wia ma mie atail peikasal me kak kaluwetehla atail papah Siohwa.
1-2. (a) Ia ekei peidek kan me sapwellimen Siohwa ladu kan ele kin ahneki? (b) Dahme kitail pahn kilangpene nan iren onop wet?
KITAIL koaros, sohte lipilipil ma kitail pwulopwul de mah, ekei pak kitail kin peikasalki a ma Siohwa ketin kesempwalkin kitail oh duwen atail pilipil kan me kitail wiahda mahso. Karasepe, ele emen sounkalohk pwulopwul medewe ma Siohwa uhdahn ketin nsenohki ih. E kakete medewe ma e anahne papidaisla. De medewehla karasaras en brother men me ni ahnsou me e pwulopwulo, e pilada en mwohneki mahs Siohwa a kaidehn en koadoahkihada mwohni laud. Met ni eh laudlahr oh naineki mwohni me itarongete en apwaliheki eh peneineio. E kakete medewe ma e wiahda pilipil pwung ni ahnsou me e pwulopwulo. De ele mie sister mah men solahr nohn kehlail. E kakete mworusala pwehki e solahr kak wia dahme e kin kak wia mahso. Mie pak ke ahneki soangen peidek pwukat: ‘Siohwa ketin nsenohkin ie? Tounmetei kan me I wiahda ong Siohwa uhdahn mie katepe? Miehte katepei rehn Siohwa?’
2 Ma kitail sohte kin song en rapahki pasapengpen peidek pwukat, met kak kahrehiong kitail en sohla pwoson Siohwa, oh pil uhdihsang pahpa ih. Nan iren onop wet, kitail pahn kilang ia duwen Paipel eh kak sewese kitail ma kitail medewe me Siohwa sohte ketin nsenohkin kitail, me atail pilipil kan mahso sohte mwahu, de me solahr katepatail ong Siohwa.
NI AHNSOU ME KITAIL KIN PEIKASAL
3. Dahme kitail kak wia ni ahnsou me mie atail peidek kan me kin kahrehiong kitail en pwunod?
3 Ni ahnsou me mie atail peidek kan, e kesempwal en rapahki pasapeng kan nan Paipel. Ma kitail wia met, atail pwoson Siohwa oh atail nanpwungmwahu reh pahn kehlailla oh kitail pahn kak “kesihnenda teng ni pwoson.”—1 Kor. 16:13.
4. Ia duwen atail en “kasawih pwungen mehkoaros”? (1 Deselonika 5:21)
4 Wadek 1 Deselonika 5: 21. Paipel kangonge kitail en “kasawih pwungen mehkoaros.” Ia duwen atail kak wia met? Ni ahnsou me kitail kin peikasalki mehkot, kitail anahne tehk dahme Paipel mahsanih. Karasepe, medewehla duwen sounkalohk pwulopwulo me sohte nohn kamehlele me Siohwa uhdahn ketin nsenohki ih. Ia duwe, e pahn uhdahte pwungki met? Soh, e anahne “kasawih pwungen mehkoaros” sang ni eh onopki Paipel pwehn ese sapwellimen Siohwa madamadau ong ireo.
5. Ia duwen atail kak diar sapwellimen Siohwa pasapeng ong atail peidek kan?
5 Ni ahnsou me kitail kin wadek Paipel, e kin mwomwen me Siohwa ketin mahmahseniong kitail. Ahpw kitail anahne en wia laudsang en wadekte Paipel ma kitail men diarada sapwellimen Siohwa pasapeng kan ong atail peidek kan. Kitail anahne rapahki oh onopki duwen iren Paipel kan me pahn sewese sapengala atail peideko. En wia met, kitail kak wia roporop nan neitail sawaspen Paipel kan. (Lep. Pad. 2:3-6) Kitail anahne kapakapohng Siohwa oh peki en ketin sewese kitail en diar pasapengpen atail peideko. Eri kitail kak rapahki kaweid en Paipel kan oh ire kan me kak sewese kitail nan atail irairo. E pil mwahu en wadek koasoipen irail ladu lelepek kan nan Paipel me pil ahneki soangen madamadau oh pepehm me kitail ahneki.
6. Ia duwen mihting kan eh kin sewese kitail en powehdi atail peikasal?
6 Ni ahnsou me kitail kin onopki Paipel ni mihting kan, e pil mwomwen me Siohwa kin ketin mahmahseniong kitail. Ma kitail kin kaukaule towehda mihting kan, kitail kak rong padahk ehu de pasapeng ehu me sapengala peidek me kitail ahnekio. (Lep. Pad. 27:17) Met kitail pahn koasoiapene dahme kak sewese kitail en alehdi pasapeng.
NI OMW PEIKASALKI MA SIOHWA KETIN NSENOHKIN UHK
7. Peidek dah me ekei kakete idek?
7 Mie pak ke pein idek rehmw, ‘Siohwa ketin nsenohkin ie?’ Ma ke pehm me ke sohte kesempwal, mwein ke pahn medewe me ke sohte kak wiahla kompoakepahn Sounkapikpen lahng oh sampah. Nanmwarki Depit ele ahneki soangen madamadau wet. E medewe me e kapwuriamwei me Siohwa kin ketin tehk aramas akan. E koasoia “Maing KAUN, dahkot aramas pwe komwi en kin ketin tehk; dahkot aramas, pwe komwi en ketin kupwukupwure?” (Mel. 144:3) Ia wasa ke kak diar pasapengpen peidek wet?
8. Nin duwen me 1 Samuel 16:6, 7, 10-12 mahsanih, dahme Siohwa kin ketin kasawih rehn aramas?
8 Paipel padahkihong kitail me Siohwa kin ketin tehk irail kan me kin mwomwen sohte kesempwal ong meteikan. Karasepe, Siohwa ketin kadarala Samuel ni imwen Sehsio pwehn pilada emen nah pwutak ko en wiahla nanmwarki en Israel. Sehsi ekerpene nah pwutak isimeno, Depit me tikitiko me sohte iang. b Ahpw, Depit me Siohwa ketin pilada. (Wadek 1 Samuel 16:6, 7, 10-12.) Siohwa ketin mwahngih loalen Depit. Oh e ketin ese me Depit uhdahn poakohng ih.
9. Dahme kahrehda ke kak uhdahn kamehlele me Siohwa ketin nsenohkin uhk? (Pil kilang kilel.)
9 Medewehla ia duwen Siohwa eh ketin kasaledahr me e kin ketin tehk uhk. E kin ketikihda kaweid me keieu mwahu ong ahmw irair. (Mel. 32:8) Met kasalehda me e ketin mwahngih dahme ke uhdahn anahne. (Mel. 139:1) Ni ahnsou me ke kin doadoahngki sapwellimen Siohwa kaweid oh kilang ia duwen eh kin seweseiuk, ke pahn kamehlelehla me Siohwa ketin nsenohkin uhk. (1 Kron. 28:9; Wiewia 17:26, 27) Siohwa mwahngih omw kin nannanti. E pil ketin mwahngih omw irair mwahu kan oh men wiahla kompoakepahmw. (Ser. 17:10) Oh e pahn uhdahn kupwurperenki ma ke pil men wiahla kompoakepah.—1 Sohn 4: 19.
“Ma ke pahn sohpeiong, e pahn ketin kupwurperenkinuhkala.”—1 Kron. 28:9 (Menlau kilang parakrap 9) c
NI OMW PEIKASALKI MA KE WIAHDA PILIPIL MWAHU KAN MAHSO
10. Ni atail kin medewehla atail pilipil kan mahso, peidek dah kan me kitail kakete idek?
10 Ekei pak, ele ekei kin medewehla mahso oh medewe ma irail wiahda pilipil mwahu kan. Mwein irail kohkohsang arail doadoahk pweimwahu ehu, de pilada en dehr wiahda pesines pwe ren kak kalaudehla arail papah Siohwa. Ahpw ele met wiawi sounpar tohto samwalahro. Irail kakete medewehla ekei aramas me re ese me wiahda pilipil me weksang arail ko, oh met aramas ko mwomwen naineki mwohni laud oh ahneki mour nsenamwahu. Pwehki met, irail kakete medewe: ‘Mie katepen tounmetei kan me I wiahiong Siohwa? De I anahne doadoahk laud pwe ien naineki mwohni laud met?’
11. Madamadau sapwung dah me sounnting en Melkahka 73 ahneki?
11 Ma ke kin ahneki soangen peidek pwukat, medewehla ia ahn sounnting en Melkahka 73 pepehm. E kilang aramas akan me sohte kin papah Siohwa ar roson mwahu, kepwehpwe, oh mwomwen sohte kin pwunod. (Mel. 73:3-5, 12) Ni eh kilang me arail mour mwomwen nsenamwahu, met kahrehiong en pehm me eh nannanti en papah Siohwa sohte katepe. E kin “lokolok rahn ehu pwon” ni eh kin medewe met. (Mel. 73:13, 14) Ia duwen eh powehdi eh madamadau sapwungo?
12. Nin duwen me Melkahka 73:16-18 mahsanih, ia duwen sounntingo powehdi eh mworus?
12 Wadek Melkahka 73:16-18. Sounmelkahkao kohla nan sapwellimen Siohwa tehnpas sarawio. Wasao, e kak medemedewe mwahu soahng kan. E wehwehkihda me mendahki mour nsenamwahu me ekei ahneki, sohte arail koapworopwor ong ahnsou kohkohdo. Eri e sohla mworus oh kamehlele me en mwohneki mahs Siohwa nan eh mour wia pilipil me keieu mwahu. Oh e koasoanehdi teng en pousehlahte papah Siohwa.—Mel. 73:23-28.
13. Dahme ke kak wia ma ke koluhkihla ekei pilipil kan me ke wiahda mahso? (Pil kilang kilel.)
13 Duwehte me Sounmelkahkao wia, ke pil kak powehdi omw madamadau sapwung kan. Ia duwen? Tamataman soahng mwahu kan me ke ahneki, iangahki sapwellimen Siohwa kapai oh tamataman me irail kan me sohte kin papah Siohwa sohte kin alehdi sapwellime sawas. Ong pali laud me sohte kin papah Siohwa, en ahneki mour nsenamwahu met iei me irail kin keieu kesempwalki pwehki sohte arail koapworopwor ong ahnsou kohkohdo. Ahpw ong kowe, Siohwa ketin inoukihda kapai kan me uhdahn siksang dahme ke kak medewe. (Mel. 145:16) Pil medewehla met. Ke sohte pahn kak uhdahn ese ia pahn mwomwen omw mour rahnwet ma ke wiahda ehu pilipil tohrohr. Ahpw mie mehkot me ke kak uhdahn kamehlele: Ni omw wiahda pilipil kan pwehki omw poakohng Koht oh meteikan, ke pahn ahnsou koaros alehdi soahng kan me pahn kahrehiong uhk peren laud.
Kilenglahng kapai kan me Siohwa ketin inoukihda (Menlau kilang parakrap 13) d
NI OMW PEIKASALKI MA MIEHTE KATEPOMW REHN SIOHWA
14. Soangen irair dah me ekei ahneki, oh peidek dah kan me irail kakete pein idek rehrail?
14 Ekei sapwellimen Siohwa aramas akan sohte kak wia uwen me re mwahuki pwehki arail mahla de soumwahu. Eri irail kakete medewe me irail sohte kesempwal rehn Siohwa. Re kakete idek, ‘Miehte katepei rehn Siohwa?’
15. Dahme sounnting en Melkahka 71 uhdahn kamehlele?
15 Sounnting en Melkahka 71 kasalehda soangen pepehmohte. E kapakapki: “Komw pil dehr ketin keseiehla ni ei luwetalahr.” (Mel. 71:9, 18) Mendahki e pehm me e luwetala, sounmelkahkao uhdahn kamehlele me ma e papah Koht ni lelepek, Siohwa pahn uhdahn ketin sewese. Sounmelkahkao sukuhlki me Siohwa kin ketin kupwurperenki irail kan me kin wia uwen arail kak en papah ih mendahki arail soh itar akan.—Mel. 37:23-25.
16. Ia ekei ahl kan me Siohwa kin ketin doadoahngki me mah kan? (Melkahka 92:12-15)
16 Me mah kan, medewehla ia duwen Siohwa eh kin ketin kilangwohng uhk. E kak ketin seweseiuk pwe ken papah ih ni lelepek mendahki omw soh itar akan. (Wadek Melkahka 92:12-15.) Dehr medewe soahng kan me ke solahr kak wia, ahpw medemedewehte soahng kan me ke kak wia. Karasepe, ke kak sewese meteikan sang ni omw kin lelepek oh kasalehda omw nsenohkin irail. Ke kak padahkihong meteikan ia duwen Siohwa eh ketin seweseiukehr erein sounpar tohto oh inou en Paipel dah kan me ke kasikasik ni ahnsou kohkohdo. Oh dehr manokehla me omw kapakapki meteikan kin uhdahn sawas. (1 Pit. 3:12) Sohte lipilipil irair dah me kitail ahneki, kitail koaros kak patohwanohng Siohwa oh wiahiong meteikan mehkot.
17. Dahme kahrehda kitail en dehr karasahiong kitail meteikan?
17 Ma ke nsensuwedkihla omw sohla kak wia soahng tohto nan sapwellimen Siohwa doadoahk, tamataman me e kin ketin kesempwalki dahme ke kak wiahiong. Ele ke kin karasahiong dahme ke kin wia ong dahme meteikan kak wia. Dehr wia met! Dahme kahrehda? Pwehki Siohwa sohte kin ketin wia met. (Kal. 6:4) Karasepe, Mery kihong Sises kisakis en lehn wai pweilaud ehu. (Sohn 12:3-5) Weksang met, liohdi semwehmweo meirongki sent toantoal riau nan tehnpas sarawio. (Luk 21:1-4) Ahpw, Sises ketin kilengwohng ara kisakis ko nin duwen kasalepen ara pwoson. Semeo, Siohwa, uhdahn ketin kesempwalki soahng koaros me ke kin wia pwehki omw kin poadidiong ih oh poakohng ih, sohte lipilipil ma e mwomwen tikitik ong uhk.
18. Dahme pahn sewese kitail en powehdi peikasal kan? (Menlau kilang koakono “ Mahsen en Siohwa Kak Seweseiuk Powehdi Peikasal.”)
18 Kitail koaros kin ahneki peikasal ekei pak. Ahpw, nin duwen me kitail sukuhlki, Paipel kak sewese kitail en powehdi. Eri wia uwen omw kak en diarada pasapengpen omw peidek kan, oh ke pahn nsenamwahu oh sohte pwunod. Siohwa ketin mwahngihiuk. E ketin kalahnganki tounmetei koaros me ke wiahiong oh pahn ketin kapwaiada sapwellime inou en katingihiuk. Siohwa kin ketin poakohng oh nsenohki emenemen sapwellime ladu lelepek kan.
KOUL 111 Kahrepen At Peren
a WEHWEHN LEPIN LOKAIA KAN: Nan iren onop wet, kitail koasoiapene peikasal kan me kahrehiong kitail en sohte nohn ese ma kitail kesempwal rehn Siohwa de ma atail pilipil kan mahso mwahu. Soangen peikasal pwukat sohte kin pidada sohte pwoson Siohwa oh sapwellime inou kan.
b Mendahki Paipel sohte kasalehda Depit sounpar depe ni ahnsou me Siohwa ketin pilada, e kakete sounpar eisek samwa.—Menlau kilang The Watchtower en September 1, 2011, pali 29, par. 2.
