Mie pak me e apwal ong uhk en taman dahme ke ahpwtehn onopki? Met kin wiawihong kitail koaros ekei pak. Dahme kak sawas? Pwurehng kousapahlih ire kesempwal kan.

Ni omw kin onop, song en uhdi ekis oh medemedewe dahme ke ahpwtehn sukuhlki. Ih met me wahnpoaron Pohl kangoangehki rie Kristian ko en wia ni arail wadek nah kisinlikowo. E koasoia: “Eri, iet ire kesempwal en.” (Ipru 8:1) Ni eh wia met, e sewese irail en wehwehki dahme e koasoakoasoia, oh ia duwen soahng koaros me e koasoia ar dokpene.

Mwein ke kak doadoahngki minit eisek mwurin omw onop pwehn medewe duwen ire kesempwal kan me ke ahpwtehn sukuhlki. Ma ke sohte uhdahn taman ire ko, pwurehng kilang sawasepen oaralap kan de wadek tepin sendens en ehuehu parakrap ko pwehn seweseiuk tamanda. Ma ke sukuhlki mehkot kapw, song en pein kawehwehda. Ni omw kin pwurehng kousapahlih dahme ke ahpwtehn sukuhlki, e pahn mengei ong uhk en tamataman. Ke pil pahn wehwehki mwahu ia duwen omw pahn kak kapwaiada.