IREN ONOP 40
KOUL 30 Semei, Ei Koht oh Kompoakepahi
Siohwa Kin Ketin ‘Kamwahwihala me nan Kapehd Ohlahr akan’
“E ketin kamwahwihalahr me nan kapehd ohlahr akan oh ketin kidimpenehr ar ohla kan.”—MEL. 147:3.
DAHME KITAIL PAHN SUKUHLKI
Siohwa kin uhdahn ketin nsenohki irail kan me nan kapehd tikitiklahr. Iren onop wet pahn kasalehda ia duwen eh kin ketin kansenamwahwih kitail ni atail mworusala oh sewese kitail en kansenamwahwih meteikan.
1. Ia sapwellimen Siohwa pepehm duwen sapwellime ladu kan?
SIOHWA kin ketin mwahngih soahng koaros me sapwellime ladu kan kin lelohng. E kin ketin mwahngih ni ahnsou me kitail kin peren oh nsensuwed. (Mel. 139:2) Ni eh ketin mahsanih me kitail kin wia uwen atail kak koaros pwehn papah ih pil ni atail kin mworusala, e kin ketin kupwurperenkihda! Laudsang met, e ketin kupwurki sewese oh kansenamwahwih kitail.
2. Dahme Siohwa kin ketin wiahiong irail kan me nan kapehd tikitiklahr, oh ia duwen atail kak paiekihda sapwellime sawas?
2 Melkahka 147:3 mahsanih me Siohwa kin ketin ‘kidimpene ohla kan’ en me nan kapehd tikitiklahr kan. Iren Paipel wet kawehwehda ia duwen Siohwa eh kin ketin sewese irail kan me mworusala. Dahme kitail anahne wia pwehn paiekihda sapwellimen Siohwa sawas? Medewehla karasaras ehu. Toahkte koahiek men kak wia soahng tohto pwehn kamwahwihala aramas emen me ohla. Ahpw, pwehn uhdahn paiekihda, me ohlao anahne uhdahn idawehn ahn toahkteo kaweid. Nan iren onop wet, kitail pahn kilang dahme Siohwa ketin mahsanihong irail me nan kapehd tikitiklahr kan oh kilang ia duwen atail kak doadoahngki sapwellime kaweid.
SIOHWA KETIN KATAMANKIHONG KITAIL ME KITAIL UHDAHN KESEMPWAL ONG IH
3. Dahme kahrehda ekei kin pehm me sohte kateparail?
3 Aramas tohto nan sampah rahnwet sohte kin poakohng meteikan. Pwehki met, irail kin wiakauwe irail oh kahrehiong ren pehm me sohte kateparail. Sister men me adaneki Helen a koasoia: “Ei peneineio sohte douluhl kin kasalehda limpoak. Ei pahpao kin lemei oh kin ndaiong ie rahn koaros me sohte katepei.” Mwein mie me kin wiakauweiuk, kanamenekihiuk, de wiahiong ken pehm me sohte katepomw. Ma ei, ele ke kin apwalki kamehlele me mie me uhdahn poakohng uhk.
4. Nin duwen Melkahka 34:18 mahsanih, dahme Siohwa ketin kamehlelehiong kitail?
4 Mehnda ma meteikan kin wiakauweiuk, ke kak kamehlele me Siohwa kin ketin poakohng oh kesempwalkin uhk. E “kin ketiket mpen irail me nan kapehd tikitiklahr.” (Wadek Melkahka 34:18.) Ma ke pehm me “sohla omw koapworopwor,” tamataman me Siohwa ketin mwahngih soahng mwahu kan rehmw oh kin ketin kakerenihiukala reh. (Sohn 6:44) E kin ketin ahnsou koaros onopada en seweseiuk pwehki ke kesempwal ong ih.
5. Dahme kitail kak sukuhlkihsang sapwellimen Sises wiewia ong irail me pehm me sohte kateparail?
5 Kitail kak sukuhlki sapwellimen Siohwa pepehm sang ni atail koasoiapene mehn kahlemeng en Sises. Ni ahnsou me Sises ketiket nin sampah, e kin uhdahn ketin kadekohng aramas akan me kin pehm me sohte kateparail pwehki dahme meteikan wiahiong irail. (Mad. 9:9-12) Ni ahnsou me lih emen me ahneki soumwahu suwed ehu doahke sapwellime likowo oh koapworopworki me e pahn mwahula, Sises ketin kansenamwahwihala oh kapingahki eh pwoson. (Mark 5:25-34) Sises kin kahlemengih Semeo ni unsek. (Sohn 14:9) Eri ke kak kamehlele me Siohwa ketin kesempwalki oh mwahngih omw irair kaselel kan, iangahki omw pwoson oh poakohng ih.
6. Dahme ke kak wia ma ke pehm me sohte katepomw?
6 Dahme ke kak wia ma ke pehm me sohte katepomw? Wadek iren Paipel kan me kamehlelehiong uhk me ke kesempwal ong Siohwa oh doudouloale. b (Mel. 94:19) Dehr kapahrekiong uhk meteikan oh medemedewe dahme ke sohte kak wia. Siohwa sohte kin ketin kasik ken wia laudsang dahme ke kakohng. (Mel. 103:13, 14) Ma emen wiahiong uhk tiahk lemei de suwed ehu mahso, met kaidehn omw sapwung. Tamataman me Siohwa pahn ketin kadeik irail kan me kin wiakauwe meteikan, ahpw e pahn ketin sewese irail kan me wiakaula. (1 Pit. 3:12) Sandra, me lelohng tiahk lemei ni ahnsou me e seri, koasoia,“I kin kaukaule peki Siohwa en ketin sewese ien kilengwohng pein ngehi ni ahl toupahrek, ni ahlohte me e kin ketin wia.”
7. Ia duwen atail kak doadoahngki dahme wiawihong kitail mahso nan atail papah Siohwa?
7 Dehr peikasalki me Siohwa kak ketin doadoahngkin uhk pwehn sewese meteikan. E ketikihong uhk pwais kaselel en iang ih nan doadoahk en kalohk. (1 Kor. 3:9) Pwehki kahpwal kan me ke kin lelohng, ele e kin mengei ong uhk en wehwehki pepehm en irail kan me kin lokolok. Ke kak wia soahng tohto pwehn sewese irail. Helen, me kitail koasoiapene mwoweo, alehdi sawas oh met kak sewese meteikan. E koasoia: “Mahso, I kin pehm me sohte katepei. Ahpw Siohwa ketin kahrehiong ien pehm me mie me poakohng ie oh ketin doadoahngkin ie pwehn sewese meteikan.” Helen kin perenki papah nin duwen pioneer men.
SIOHWA KETIN KUPWURKI KITAIL EN ALE SAPWELLIME MAHK
8. Dahme Siohwa ketin mahsanihong kitail nan Aiseia 1:18?
8 Ekei sapwellimen Siohwa ladu kan kin pwunodkihte sapwung kan me re wiahda mahso, mehnda ma mwohn de pil mwurin arail papidaisla. Ahpw dehr manokehla me Siohwa uhdahn ketin poakohng kitail oh ketikihda pweinen pweipwei sapahlo ong mahkpen dipatail kan. Kitail kak kamehlele me e ketin kupwurki kitail en ale sapwellime kisakis wet. Siohwa ketin kamehlelehiong kitail me mwurin atail “kapwungala mahs ire pwukat” reh, c e pahn uhdahn ketin mahkohng kitail. (Wadek Aiseia 1:18.) Kitail uhdahn kalahnganki me Samatailo Siohwa sohte kin ketin tamataman atail dihp en mahs ko! Ni ahnsowohte, e kin ketin tamataman soahng mwahu kan me kitail wiahda.—Mel. 103:9, 12; Ipru 6:10.
9. Dahme kahrehda kitail en dehr medemedewehte dihp kan me kitail wiahda mahso?
9 Ma ke kin pwunodki soahng kan me ke wiahda mahso, wia uwen omw kak en medemedewe dahme ke kak wia ahnsou wet oh ahnsou kohkohdo. Medewehla mehn kahlemeng en wahnpoaron Pohl. E kaloke Kristian ko oh e koluhkihla eh wia met, ahpw e ese me Siohwa ketin mahkohng. (1 Tim. 1:12-15) Ahpw ia duwe, e kin medemedewehte sapwung kan me e wiahda mahso? E uhdahn sohte wia met, duwehte eh sohte medemedewehte soahng kan me e wia pwehn wiahla Parisi waun men. (Pil. 3:4-8, 13-15) Ahpw, Pohl pousehlahte wia uwen eh kak nan doadoahk en kalohk oh kilangwohngete ahnsou kohkohdo. Duwehte Pohl, ke sohte kak wekidala dahme wiawi mahso. Ahpw ke kak kapinga oh kaperenda Siohwa ahnsou wet. Oh ke kak medemedewe inou kaselel ong ahnsou kohkohdo me e ketin inoukihong uhk.
10. Dahme kitail kak wia ma atail wiewia kan en mahso kamedekihala meteikan?
10 Ele ke kin nsensuwedki soahng kei me ke wiahda mahso me kamedekihala meteikan. Dahme kak sawas? Wia uwen omw kak en kamwahwihala, oh pekimahk. (2 Kor. 7:11) Peki Siohwa en ketin sewese irail kan me ke kamedekihala. E kak ketin seweseiuk oh irail kan me ke kamedekihala pwe kumwail en pousehlahte papah ih oh ahneki meleilei.
11. Dahme kitail kak sukuhlkihsang mehn kahlemeng en soukohp Sona? (Pil kilang kilel ni Kahn Iroir wet.)
11 Sukuhlsang sapwung kan me ke wiahda mahso, oh men Siohwa en ketin doadoahngkin uhk ni ahl me e ketin pilada. Tehk mehn kahlemeng en soukohp Sona. E sohte seiloakla Ninipe nin duwen me Koht kehkehlingki, ahpw e seiloakla ehu wasa. Siohwa ketin panawih Sona oh e sukuhlsang eh sapwungo. (Sona 1:1-4, 15-17; 2:7-10) Siohwa sohte ketin uhdihsang doadoahngki Sona nin duwen soukohp men. Koht ketin pwurehng mahsanihong en pwurala Ninipe, oh met Sona mwadang peikiong. E sohte mweidohng sapwung kan me e wiahda mwoweo en kauhdi ih sang en kapwaiada dahme Siohwa ketin mahsanihong.—Sona 3:1-3.
Mwurin Siohwa ketin doarehsang Sona nan kapehd en mwahmw laudo, Siohwa ketin pwurehng mahsanihong en kohla Ninipe oh kalohki sapwellime rohng (Menlau kilang parakrap 11)
SIOHWA KIN KETIKIHDA SAPWELLIME MANAMAN PWEHN KANSENAMWAHWIH KITAIL
12. Ia duwen Siohwa eh kin ketikihong kitail popohl ni ahnsou me kahpwal laud ehu wiawihong kitail? (Pilipai 4:6, 7)
12 Sang ni sapwellime manaman, Siohwa kin ketin kansenamwahwih kitail ni kahpwal laud eh wiawihong kitail. Medewehla dahme wiawihong Ron oh Carol. Neira pwutako kemehla pein ih. Ira koasoia: “Se lelohng kahpwal laud kan mwoweo, ahpw met me keieu laud. Se sohte kak meirla nipwong kan, eri se kin kapakapohng Siohwa, oh se uhdahn pehm soangen popohlo me kileldi nan Pilipai 4:6, 7.” (Wadek.) Ma ke kin uhdahn nsensuwedki kahpwal ehu me wiawihong uhk, padahkihong Siohwa omw pepehm. Ke kak pwurupwurehng koasoiong oh sohte lipilipil ia uwen werei me ke mwahuki. (Mel. 86:3; 88:1) Pwurupwurehng peki sapwellime manaman. E pahn ketin ahnsou koaros seweseiuk.—Luk 11:9-13.
13. Ia duwen sapwellimen Siohwa manaman eh kak sewese kitail en doulahte kaudokiong Siohwa ni lelepek? (Episos 3:16)
13 Mie pak ke lelohng kahpwal laud ehu oh pehm me sohte omw kehl en wia mehkot? Sapwellimen Siohwa manaman kak kihong uhk kehl me ke anahne pwehn doulahte kaudokiong Siohwa ni lelepek. (Wadek Episos 3:16.) Medewehla dahme wiawihong sister men me adaneki Flora. Ih oh eh pwoudo kin papah nin duwen misineri kei ni ahnsou me eh pwoudo wiahda tiahk en kamwahl, oh ira mweipeseng. E koasoia: “I uhdahn nsensuwed pwehki eh sohla loalopwoat oh I sohte kak medewe ehu soahng tohrohr. I kapakapki sapwellimen Siohwa manaman pwehn dadaurete. Siohwa ketin kansenamwahwihiehla oh sang sapwellime sawas, I kehlailda oh kak dadaur mendahki e mwomwen me I sohte kak nin tapio.” Flora pehm me Siohwa ketin sewese en kalaudehla eh likih oh pil kamehlele me e pahn ketin apwalih nan eh kahpwal kan koaros. E pil koasoia: “Melkahka 119:32 uhdahn sewese ie, me mahsanih: ‘I pahn ngoangki peikiong sapwellimomwi mahsen kan, pwehki komw pahn ketin kalaudehla ei loalokong.’”
14. Ia duwen atail kak mweidohng sapwellimen Koht manaman en sewesei kitail?
14 Mwurin omw peki Siohwa en ketikihong uhk sapwellime manaman, dahme ke anahne wia? Wia soahng kan me pahn seweseiuk en ale sapwellimen Koht manaman. Mepwukat me iangahki iang towehda mihting kan oh kalohk ong meteikan. Wadek Mahsen en Siohwa ehuehu rahn. Met pahn seweseiuk en doudouloale sapwellime madamadau. (Pil. 4:8, 9) Ni omw wadek, tehk koasoipen irail kan me lelohng kahpwal oh doudouloale ia duwen Siohwa eh ketin sewese irail en dadaur. Sandra, me kitail koasoiapene mwoweo, lokolongki kahpwal laud kan me e lelohng. E koasoia: “Koasoipen Sosep uhdahn kangoange ie. E sohte mweidohng kahpwal oh wiewia sapahrek kan me e lelohng en kaluwetehla eh nanpwungmwahu rehn Siohwa.”—Sen. 39:21-23.
SIOHWA KETIN DOADOAHNGKI RIATAIL KAN PWEHN KANSENAMWAHWIH KITAIL
15. Ihs me kak kansenamwahwih kitail, oh ia duwen arail kak sewese kitail? (Pil kilang kilel.)
15 Ni atail kin lokolok, riatail Kristian kan kak wia “utupen nsenamwahu laud” ong kitail. (Kol. 4:11) Riatail Kristian kan iei ehu ahl me Siohwa kin ketin doadoahngki pwehn kasalehiong kitail sapwellime limpoak. Irail kak kansenamwahwih kitail ni arail wiahda ahnsou ong kitail oh rong atail kasalehda atail pepehm. Ele irail kak kangoangehkin kitail iren Paipel ehu de iang kitail kapakap. d (Rom 15:4) Ekei pak, riatail men kakete katamankihong kitail sapwellimen Siohwa madamadau oh met kak sewese kitail en pousehlahte dadaur. Irail kin kalapw sewese kitail ni soangen ahl akan me duwehte wahdo kanatail mwenge pwehn kansenamwahwih kitail.
Kompoakepatail mwahu oh likilik kan me poakohng Siohwa kak kansenamwahwih oh sewesei kitail (Menlau kilang parakrap 15)
16. Dahme kitail anahne wia pwehn ale sawas sang meteikan?
16 Ele ekei pak kitail anahne peki meteikan en sewesei kitail. Riatail kan poakohng kitail oh men sawas. (Lep. Pad. 17:17) Ahpw ele irail sehse ia atail pepehm de dahme kitail anahne. (Lep. Pad. 14:10) Ma ke kin nsensuwed laud, ke kak koasoiong kompoakepahmw mwahu kan oh padahkihong irail omw pepehm. Padahkihong irail dahme pahn seweseiuk. Ke kak pilada en koasoiong emen elder de riemen me ke ahn. Ekei sister kin mengeiki koasoiong sister men me koahiek.
17. Ia ekei kahpwal kan me kak kauhkitaildihsang en ale kangoang, oh ia duwen atail kak powehdi?
17 Patehng riomw Kristian kan. Ele ekei pak ke kin uhdahn nsensuwedla me kahrehda ke sohte men patehng meteikan. Ele riomw Kristian kan sohte uhdahn wehwehki omw pepehm de kin nda mehkot me kamedek. (Seims 3:2) Ahpw, dehr kadohwanoweiuksang irail. Siohwa kak ketin doadoahngkin irail pwehn kangoangeiuk. Elder men me adaneki Gavin, me ahneki soumwahu en nsensuwed laud, koasoia: “Pak tohto I sohte kin men koasoiong de patehng kompoakepahi kan.” Ahpw, Gavin kin nantihong patehng rie Kristian kan. Oh e kin kalapw nsenamwahula ni eh wia met. Sister men me adaneki Amy koasoia: “Pwehki soahng kan me wiawihong ie mahso, I kin apwalki likih aramas akan. Ahpw I sukusukuhlki en poakohng oh likih riei Kristian kan duwehte me Siohwa kin ketin wia. I ese me met kin kaperenda Siohwa, oh pil ngehi.”
SAPWELLIMEN SIOHWA INOU KAN ONG AHNSOU KOHKOHDO KAK KANSENAMWAHWIH KITAIL
18. Dahme kitail kak kasikasik ni ahnsou kohkohdo, oh dahme kitail kak wia ahnsou wet?
18 Ahnsou keren, Siohwa pahn ketikihsang soahng koaros me kin kahrehiong kitail nsensuwed laud oh weirek. (Kaud. 21:3, 4) Ni ahnsowo, soahng kamedek kan me kitail kin lelohng pahn “manokonokla douluhl.” (Ais. 65:17) Ahpw pil ahnsou wet, Siohwa kin ketin apwalih kitail ni atail kin lokolok. Siohwa ketikidahr soahng tohto pwehn kansenamwahwih oh sewese kitail. Isaneki soahng pwukat. Dehr peikasalki me e ‘kin ketin nsenohkin uhk.’—1 Pit. 5:7.
KOUL 7 Siohwa Iei At Kehl
a Ahd kan kaidehn uhdahn adarail.
b Menlau kilang koakono “ Siohwa Ketin Kesempwalkin Uhk.”
c Pwehn “kapwungala mahs ire” kan rehn Siohwa, kitail anahne kadehdehda me kitail koluhla sang ni atail pekimahki dipatail kan oh kapwungala atail wiewia kan. Ma kitail wiahda dihp laud ehu, kitail pil anahne rapahki sawas sang elder kan nan mwomwohdiso.—Seims 5:14, 15.
