Palangko wia kisehnte wasahn pedolongala nan Wasa Sarawio nan tehnpas sarawio. Nin duwen me New World Translation of the Holy Scriptures, me wiawihda mwohn pahr 2023, koasoia, “palangko ni wasahn pedolongo reireiki kiupid 20, me pahrekiong tehlap en tehnpaso, oh ilehki kiupid 120.” (2 Kron. 3:4) Ekei kawehwehn Paipel pil koasoia me palangko ilehki “kiupid 120,” me wehwehki e ilehki mpen piht 175!

Ahpw New World Translation me wiawihda nan pahr 2023 koasoiahki palangk en tehnpas sarawi en Solomono: “E ilehki kiupid 20,” de ilehki mpen piht 30. a Tehk ekei kahrepen wekidekla wet eh wiawi.

1 Nanmwarki 6:3 sohte kasalehda uwen ile en palangko. Nan iretikitiko, sounntingo Seremaia kasalehdahte reirei en palangko oh reirei en masloalen palahngko sang mwohn tehnpaso, e sohte kasalehda uwen ile. Oh nan irelaudo mwurin mwo, e kasalehda ni oaritik wasa kesempwal teikan en tehnpaso, iangahki dengk pwonopwon pronso, kuruma eiseko, oh uhr prons riau ko me mi likin palangko. (1 Nan. 7:​15-37) Ma palangko uhdahn ilehki mpen piht 175 oh ileile sang tehnpas sarawio pwon, dahme kahrehda Seremaia sohte kasalehda duwen met? Pil sounpar epwiki kei mwuhr, sounnting en poadopoad en mehn Suhs kan kasalehda me palangko sohte ileile sang tehnpas sarawio pwon.

Me semen kan kin peikasalki ma dihd en tehnpas sarawio kak kolada palangk ehu me ilehki kiupid 120. Mahso, poahsoan en ihmw de kehl ileile kan me wiawihkihda takai de siment, duwehte ewen kehl en tehnpas sarawi kan nan Isip, kin uhdahn tehlap kohda ahtikitikla. Ahpw tehnpas sarawi me Solomon kauwada weksang. Me semen kan kamehlele me mosul en dihd en tehnpas sarawio sohte daulih piht 9. Kahrehda, emen ohl me samanih ihmw kan en mahs, Theodor Busink, koasoia: “Pwehki uwen mosul en dihd en [wasahn pedolong en tehnpas sarawio], palangko sohte kak [ilehki] kiupid 120.”

Souncopy kan ele sapwungala ni arail ntingihedi 2 Kronikel 3:4. Mendahki ekei doaropwehn mahs kan koasoia “120” nan iretikitik wet, ekei kawehwehn Paipel likilik kan, duwehte Codex Alexandrinus me wiawihda daulih pahr 1,500 samwalahro, oh Codex Ambrosianus daulih pahr 1,400 samwalahro, koasoia “kiupid 20.” Dahme kahrehda souncopy kan kakete sapwungala ni arail ntingihedi “120”? Pwehki ni lokaiahn Ipru, mwomwen lepin lokaiao “epwiki” oh “kiupid” duwepenehte. Eri souncopy men ele ntingihedi lepin lokaiao “epwiki” a kaidehn “kiupid.”

Ei mehlel, mendahki kitail kin song en wehwehkihla oaritik pwukat oh kasalehda ni pwung duwen tehnpas sarawio me Solomon kauwada, kitail kin medemedewehte dahme tehnpas sarawio karasaraskihong, me iei sapwellimen Siohwa koasoandi ong kaudok. Ia uwen atail kalahnganki me Siohwa ketin luke sapwellime ladu kan koaros en kaudokiong ih nan tehnpas sarawi wet!—Ipru 9:​11-14; Kaud. 3:12; 7:​9-17.