1. Mwohnte wahnpoaron Piter mehla, doadoahk dahieu me Siohwa ketikihong en wia?

 WAHNPOARON Piter papah Siohwa ni lelepek erein sounpar tohto. E kin iang Sises erein sapwellime doadoahk en kalohk. E tapiada doadoahk en kalohko rehn irail me kaidehn mehn Suhs, oh mwuhr, e iang pwihn me kin apwalih mwomwohdiso kan koaros ni ahnsowo. Kerenlahng imwin eh mour ni ahnsou me e ese me e pahn kereniong mehla, Siohwa ketikihong ih doadoahk tohto en wia. Nan pahr 62 lel 64, Siohwa ketin doadoahngki pwehn ntingihedi kisinlikou riau—pwuhken Piter Keieu oh Keriau nan Paipel. Piter koapworopworki me kisinlikou pwukat pahn sewese Kristian kan mwurin eh mehla.—2 Pit. 1:​12-15.

2. Dahme kahrehda nein Piter kisinlikou ko uhdahn anahn?

² Siohwa ketin doadoahngki Piter en ntingihedi kisinlikou ko ni ahnsou me ienge Kristian kan “nsensuwedlahr sang ni soangsoangen kahpwal kan.” (1 Pit. 1:6) Aramas suwed kan kin songosong en kawailong nan mwomwohdiso padahk likamw kan oh tiahk samin . (2 Pit. 2:​1, 2, 14) Kristian kan nan Serusalem pahn kereniong lelohng “imwin mehkoaros,” me iei kasohrlahn kahnimwo oh eh tehnpas sarawio sang sounpei en Rom kan. (1 Pit. 4:7) Nein Piter kisinlikou ko uhdahn sewese Kristian ko en kilang dahme re kak wia pwehn dadaur pahn arail kahpwal en ahnsowo oh onopadahng kasongosong kan me pahn wiawi mwuhr. b

3. Dahme kahrehda kitail anahne tehk kanahieng nein Piter kisinlikou ko?

 ³ Mendahki Piter ntingihedi kisinlikou pwukat ong tepin Kristian ko, Siohwa ketin wiahda kisinlikou pwukat en wiahla kisehn sapwellime Mahsen. Eri, kitail kak paiekihda kisinlikou pwukat ahnsou wet. (Rom 15:4) Duwehte tepin Kristian ko, kitail pil mi nan sampah ehu me diren tiahk samin me kak kahrehda en apwal en papah Siohwa. Patehng met, ahnsou keren kitail pahn lelohng kahn kamakam kowahlap ehu me laudsang dahme lelohng mehn Suhs ko ni ahnsou me Serusalem oh eh tehnpas sarawio kasohrala. Kitail diar mehn kataman kesempwal kei nan nein Piter kisinlikou riau ko. Mehn kataman pwukat pahn sewese kitail en awiawihete rahnen Siohwa, powehdi masak aramas, oh kakairada limpoak laud ong emenemen. Mehn kataman pwukat pil kak sewese elder kan en kilang ia duwen ar kak pweida ni arail apwalih anahn akan en sapwellimen Siohwa pelin sihpw.

4. Nin duwen me 2 Piter 3:​3, 4 mahsanih, dahme kakete kaluwetala atail pwoson?

⁴ Kitail mi nanpwungen aramas akan me sohte kin pwoson kokohp en Paipel kan. Me uhwong kan ele kin kapailoke kitail pwehki erein sounpar tohto kitail kin kalohki me imwio kerendohr. Ekei aramas nda me imwio sohte pahn leledo. (Wadek 2 Piter 3:​3, 4.) Ma kitail rong soangen koasoi pwukat sang tohnihmw kan, iengatail tohndoadoahk, de atail peneinei, atail pwoson kakete luwetala. Piter kawehwehda dahme kak sewese kitail.

5. Dahme pahn sewese kitail en kanengamah oh awiawihete kaimwiseklahn imwin koasoandi wet? (2 Piter 3:​8, 9) 

⁵ Ele ekei kin medewe me Siohwa kin ketin pwapwand en kasohrehla sampah suwed wet. Dahme Piter koasoia kak sewese kitail pwehki e kin katamankihong kitail me sapwellimen Siohwa ahnsou kin uhdahn weksang ahn aramas akan. (Wadek 2 Piter 3:​8, 9.) Pahr kid ong Siohwa kin duwehte rahn ehu. Siohwa kin ketin kanengamah, oh sohte ketin kupwurki emen en sohrala. Ni sapwellime rahno eh pahn leledo, koasoandi en sampah wet pahn imwisekla. E uhdahn wia pwais kaselel ehu en doadoahngki ahnsou me luhluhwe pwehn kalohk ong aramas akan nan sampah pwon.

6. Ia duwen atail kin “tamatamante” rahnen Siohwa? (2 Piter 3:​11, 12)

⁶ Piter kangoange kitail en “tamatamante” rahnen Siohwa. (Wadek 2 Piter 3:​11, 12.) Ia duwen? Ehuehu rahn kitail kak doudouloale ia uwen kaselel en ahnsowo me kitail pahn mi nan sampah kapwo. Medewehla pein kowe ni omw pahn esingengki ahng mwakelekel, kang mwenge me mwahu ong roson en war, kasamwo me ke poakohng kan ni ar pahn iasada, oh padahkihong aramas akan sang mahsie duwen pweidahn kokohp en Paipel kan. Ma ke medemedewe soahng pwukat, e pahn seweseiuk en awiawihete ahnsowo oh kamehlele me kitail miher ni imwin rahn akan. Pwehki kitail “eseier loalokong wet” duwen ahnsou kohkohdo, kitail sohte pahn ‘idawehnla’ sounpadahk likamw kan.—2 Pit. 3:17.

7. Ia duwen masak aramas eh kak kaluwetala kitail?

⁷ Pwehki atail ese me rahnen Siohwa kerendohr, kitail men wia uwen atail kak koaros en ehukihong meteikan rongamwahwo. Ahpw ekei pak, kitail kin pweiek en wia met. Dahme kahrehda? Pwehki kitail masak dahme aramas akan kakete medewehkin kitail de wiahiong kitail. Met wiawihong Piter. Pwohngo me kopwung wiawihong Sises, Piter masak en nda me ih emen sapwellimen Sises tohnpadahk oh  pwurupwurehng kahmahmki me e ese Sises. (Mad. 26:​69-75) Ahpw wahnpoaron menet kak koasoia mwuhr: “Kumwail dehr kin masak dahme re kin masak, de pil salohkihda kowahlap.” (1 Pit. 3:14) Dahme Piter nda kamehlelehiong kitail me kitail kak powehdi masak aramas.

8. Dahme kak sewese kitail en powehdi masak aramas? (1 Piter 3:15)

⁸ Dahme kak sewese kitail en powehdi masak aramas? Piter padahkihong kitail: “Kasarawihala Krais nin duwen Kaun nan mohngiongimwail.” (Wadek 1 Piter 3:15.) Kitail kak katamankihong pein kitail me Sises Krais iei atail Nanmwarki oh me e sapwellimanki manaman laud. Ma ke salohda de masepwehkada ni ahnsou me ke pahn ehukihong meteikan rongamwahwo, tamanda atail Nanmwarkio. Medewehla eh ketin kakaun sang nanleng oh tohnleng tohto patopato reh. Tamanda me e sapwellimanki “manaman koaros . . . nanleng oh sampah” oh me e pahn ketin ‘ieiang uhk rahn koaros lao lel ni kaimwiseklahn koasoandi en mwehio.’ (Mad. 28:​18-20) Piter kangoange kitail en “onopada ahnsou koaros” pwehn uhki atail pwoson. Ke men kalohk ong emen nan wasahn doadoahk, nan sukuhl, de wasa sohte lipilipil? Medewe mahs iahd me ke pahn kak wia met, kowe eri kaunopada dahme ke pahn nda. Kapakapki eimah, oh likih me Siohwa pahn ketin seweseiuk powehdi masak aramas.—Wiewia 4:29.

9. Ia duwen Piter eh sohte kasalehda limpoak ni ehu ahnsowo? (Pil kilang kilel.)

⁹ Piter kin sukuhlki en kasalehda limpoak. E iang mi wasao ni Sises eh mahsanih: “I pahn kihong kumwail kehkehlik kapw ehu, kumwail en poakohng emenemen; duwehte ei kin poakohng kumwail, kumwail pil poakohng emenemen.” (Sohn 13:34) Mendahki met, Piter sohla iang mwenge rehn rie Kristian kan me kaidehn mehn Suhs pwehki e masak Kristian mehn Suhs kan. Wahnpoaron Pohl ndahki mwekid me Piter wiao, mwekid en “mwalaun.” (Kal. 2:​11-14) Piter pwungki kaweid me kohieng ih oh sukuhlsang met. Nan nah kisinlikou riau ko, e kasalehda me kitail en dehr ahnekihte pepehm en poakohng riatail Kristian kan, ahpw kitail en pil kasalehda limpoak wet.

10. Dahme kin sewese kitail en kasalehda “limpoak en pirien me sohte mwalaun”? (1 Piter 1:22)

¹⁰ Piter koasoia me kitail en ahneki “limpoak en pirien me sohte mwalaun” ong riatail Kristian kan. (Wadek 1 Piter 1:22.) Soangen limpoak wet kin kohsang atail “peikiong me mehlelo.” Me mehlelo kin iangahki padahko me “Koht sohte kin ketin lipilipilki aramas.” (Wiewia 10:​34, 35) Kitail sohte kak peikiong sapwellimen Sises kehkehlik duwen limpoak ma kitail kin kasalehda limpoak ong ekei nan mwomwohdiso ahpw kaidehn ong meteikan. Mehlel, ele kitail kin karanih ekei laudsang atail karanih meteikan, duwehte Sises. (Sohn 13:23; 20:2) Ahpw Piter katamankihong kitail me kitail en nantihong ahneki “limpoak en pirien”—duwehte limpoak me mi nan peneinei ehu—ong riatail Kristian kan koaros.—1 Pit. 2:17.

11. Ia duwen atail en poakohng meteikan “sang nan mohngiong”?

¹¹ Piter kangoange kitail en “poakpene mehlel sang nan mohngiong.” Me pid met, “uhdahn poakpene mehlel” kin wehwehki en poakohng emen mehnda ma e apwal en kasalehda. Karasepe, ia duwen ma riatail men kansensuwedihala de kamedekihkitailla? Nin tapio, ele kitail men dupukohng a kaidehn en kasalehiong limpoak. Ahpw, Piter sukuhlkihsang Sises me en dupukohng emen sohte kin kaperenda Koht. (Sohn 18:​10, 11) E ntingihedi: “Kumwail dehr dupungki me suwed ong me suwed de kauwe ong kauwe. Ahpw kumwail wia me mwahu.” (1 Pit. 3:9) Ma ke ahneki limpoak mehlel, ke pahn kadek oh nsenohki irail kan me ele kamedekihiukala.

12. (a) Dahme limpoak mehlel pil kin kamwakid kitail en wia? (b) Dahme ke men nantihong wia nin duwen me kisin kasdou Preserve the Precious Gift of Unity kasalehda?

¹² Nan nah tepin kisinlikowo, Piter doadoahngki lepin lokaiao “uhdahn limpoakpene.” Soangen limpoak wet kin pwaindi “dihp tohto,” kaidehn ekeite. (1 Pit. 4:8) Ele Piter tamanda ni Sises eh ketin padahkihong ih sounpar kei mwoweo duwen en mahkohng meteikan. Ni ahnsowo, ele Piter medewe me ih aramas mwahu men ni eh nda me e pahn mahkohng rieo “pak isuh.” Ahpw, Sises ketin padahkihong ih—pil kitail—en mahkohng riatail kan “pak 77,” me wehwehki sohte irepen atail en wia met. (Mad. 18:​21, 22) Ma e kin apwal ong uhk en kapwaiada kaweid wet, dehr mworusala! Sapwellimen Siohwa ladu soh unsek kan koaros kin ekei pak apwalki mahkohng meteikan. Dahme kesempwal ahnsou wet iei en wia dahme ke kak wia pwehn mahkohng riomwo oh wiahda popohl reh. c

13. Dahme kak kahrehda e apwal ong elder kan en apwalih riarail Kristian kan?

¹³ Piter sohte manokehla dahme Sises mahsanihong ih mwurin eh ketin iasada: “Apwalih  nei kisin sihpw kan.” (Sohn 21:16) Ma kowe elder men, ke ese me kaweid pwukat pil dokedoke iuk. Ahpw e kak apwal ong elder men en diar ahnsou en apwalih pwukoa kesempwal wet. Elder kan anahne mahs tehk mwahu me arail peneineio ahneki soahng koaros me re anahne pwehn wie momour, me koaros nan peneineio kin poakpene, oh en sewese irail en karanihala Siohwa. Elder kan kin tiengla mwowe nan doadoahk en kalohk oh pil kaunopada oh wia arail pwukoa kan nan mihting kan oh mihting tohrohr kan. Ekei pil kin iang Pwihn me Kin Ehuiong Imwen Wini kan, de ale pwukoa en iang kauwada Wasahn Kaudok kan oh ohpis en Sounkadehdehn Siohwa kan. Elder kan kin uhdahn soupisek!

14. Dahme kak kamwakid elder kan en apwalih pelin sihpwo? (1 Piter 5:​1-4)

¹⁴ Piter kangoangehki ienge elder kan: “Kumwail wia silepen sapwellimen Koht pelin sihpw.” (Wadek 1 Piter 5:​1-4.) Ma kowe elder men, se ese me ke poakohng riomw Kristian kan oh men apwalih irail. Ahpw, ele ekei pak ke pehm me ke uhdahn kedirepw de uhdahn pwangada me kahrehda ke sohte kak kapwaiada pwukoau. Dahme ke kak wia? Padahkihong Siohwa omw pepehm. Piter ntingihedi: “Ma emen kin papah, a en wia met ni eh pahn kin koapworopworki kehl me Koht ketikihda.” (1 Pit. 4:11) Riomw Kristian kan ele lelohng kahpwal kan me sohte kak mwahula ahnsou wet. Ahpw tamatamante me “silepe lapalap en sihpw kan,” Sises Krais, kak ketin sewese irail laudsang me ke kak wia. E kak ketin wia met rahnwet oh pil nan sampah kapwo. Koht ketin kupwurki elder kan en poakohngete riarail kan, apwalih irail, oh wiahla “mehn kahlemeng ong pelin sihpwo.”

15. Ia duwen emen elder eh apwalih pelin sihpwo? (Pil kilang kilel.)

¹⁵ William, me wereila wia elder men, wehwehki kesempwalpen en wia silepen pelin sihpw. Ahnsou me soumwahu en lusuluso COVID-19 tepida, ih oh ienge elder kan koasoanehdi me nan wihk koaros irail en kin keieu nsenohki en tuhwong emenemen sounkalohk nan arail pwihnen kalohk. E kawehwehda dahme kahrehda: “Tohtohn riatail kan kin kelekelehpw ni imwarail kan oh irail kin mwadangete mworusala.” Ni emen riatail eh kin lelohng kahpwal ehu, William kin rong kanahieng pwehn esehda dahme irail kin pwunodki oh anahne. Ih eri rapahki ekei sawasepen Paipel de kisin kasdo kan nan  neitail website me e kak doadoahngki pwehn kangoangehki rieo. E koasoia: “Sounsilepen pelin sihpw uhdahn anahn ahnsou wet laudsang mahs. Kitail kin nanti laud pwehn sewese aramas akan en sukuhlki duwen Siohwa; kitail pil anahne wia soangen nantiohte pwehn apwalih riatail kan en mihmihte nan padahk mehlel.”

16. Ni ahl dah me kitail kak doadoahngki mehn kasukuhl kan me kitail sukuhlki sang nein Piter kisinlikou ko?

¹⁶ Kitail koasoiapene ekeite mehn kasukuhl sang nan nein Piter kisinlikou riau ko. Ele ke tehkada soahng ehu rehmw me ke men kamwahwihala. Karasepe, ke men kalaudehla omw doudouloale kapai kan me pahn wiawi nan sampah kapwo? Ke wiadahr mehn akadei en kalohk nan wasahn doadoahk, sukuhl de wasa teikan? Ke diarehr soangen ahl dah me ke kak kalaudehla omw uhdahn poakohng riomw Kristian kan? Elder kan, kumwail koasoanedier teng en nsenohki oh ngoangki apwalih sapwellimen Siohwa sihpw kan? Pein kasawihiuk ni mehlel oh kilang wasa kan me ke kak kamwahwihala, ahpw dehr mworusala. “Kauno me ketin kadek” oh e pahn ketin seweseiuk en kekeirda. (1 Pit. 2:3) Piter kamehlelehiong kitail: “Koht . . . pahn ketin kanekehla amwail kaiahn. E pahn ketin katengeikumwaildi, e pahn ketin kakehlaikumwailda oh e pahn ketkinkumwaildiong pohn poahsoan teng.”—1 Pit. 5:10.

17. Ma kitail pousehlahte papah Siohwa oh mweidohng en ketin kaiahne kitail, ia pahn imwilahn met?

¹⁷ Nin tapio, Piter pehm me e sohte warohng mi rehn Sises. (Luk 5:8) Ahpw pwehki limpoak oh utuht sang Siohwa oh Sises, Piter pousehlahte idawehn Sises ni lelepek. Eri Siohwa ketin mweidohng Piter en pedolong “nan Wehi poatopoat en atail Kaun oh Sounkomour Sises Krais.” (2 Pit. 1:11) Met wia keting laud ehu! Ma ke pousehlahte papah Siohwa duwehte me Piter wia, oh mweidohng Siohwa en ketin kaiahneiuk, ke pahn pil ale keting en mour soutuk. Ke pahn ‘ale mehn akadei en omw pwoson, me iei komourpomw.’—1 Pit. 1:9.