1. Ia ahn Piter pepehm mwurin Sises eh ketin wiahda manaman ehu oh sewese Piter en koledi mwahmw tohto?

 EREIN pwohng ehu pwon, Piter wie lalaid ahpw sohte koledi mehkot. Ele e kapwuriamwei me Sises mahsanihong: “Kaieila wasa me loal oh kesehdi amwail uhk kan.” (Luk 5:4) Piter peikasalki me e pahn koledi mwahmw, ahpw e wiahte dahme Sises mahsanihong. Piter oh ohl ako me kin iangih doadoahk koledi kiden mwahmw me kahrehda uhko tepida teipeseng. Ni arail wehwehkihda me Sises ketin wiahda manaman ehu, irail “inenen pwuriamweikihla.” Piter nda: “Maing Kaun, komw ketiweisang ie pwe ngehi aramas dipan emen.” (Luk 5:​6-9) Ele Piter medewe me e sohte warohng mi wasao rehn Sises.

2. Dahme kahrehda e mwahu ong kitail en onopki ahn Piter mehn kahlemeng?

² Ei mehlel, Piter wia “aramas dipan emen.” Paipel kasalehda me ekei pak e kin nda oh wia soahng kan me e koluhkihla mwuhr. Mie pak me ke ahneki soangen pepehmo me Piter ahneki? Mie irair ehu rehmw me ke kin nantihong kamwahwihala, de soangen luwet ehu me ke kin pelipelian erein ahnsou werei? Ma ei, omw onopki ahn Piter mehn kahlemeng kak kangoangeiuk. Ia duwen? Medewehla met: Siohwa kakete sohte ketin mweidohng ahn Piter sapwung kan en ntingdi nan Paipel. Ahpw e ketin mweidohng en ntingdi pwehn kak wia mehn kasukuhl ong kitail. (2 Tim. 3:​16, 17) Atail sukuhlki duwen ohl menet me ahneki luwet oh pepehm me duwehte atail kak sewese kitail en kilang me Siohwa sohte kin ketin kasik me kitail en unsek. E kin ketin kupwurki kitail en pousehlahte papah ih—de nannantihte—mendahki atail luwet akan.

3. Dahme kahrehda kitail en pousehlahte papah Siohwa?

³ Dahme kahrehda kitail anahne pousehlahte papah Siohwa? Pwehki ni atail kin pousehlahte praktiski mehkot, kitail kin kamwahwihala. Karasepe: Sounkeseng men ele kin doadoahngkihla  sounpar tohto pwehn maila kesengki mehn keseng ehu. Erein ahnsou ko, mwein e wiahda sapwung tohto, ahpw ma e pousehlahte praktis, e pahn mwahula. Mehnda ma e wiahla sounkeseng koahiek men, e pahn ekei pak sapwungala. Ahpw e sohte kin uhdi. E kin pousehlahte praktis pwehn kak mwahula. Duwehte met, pil mwurin atail medewe me kitail powehdier soangen luwet ehu, kitail kakete pil pwurehng wia. Ahpw kitail kin nannantihte doadoahk pwehn kamwahwihala. Kitail koaros kin nda de wia soahng kan me kitail kin koluhkihla mwuhr; ahpw ma kitail sohte uhdi, Siohwa pahn ketin sewese kitail en kekeirda. (1 Pit. 5:10) Kitail en tehk ahn Piter mehn kahlemeng en nannantihte. Limpoak me Sises ketin kasalehiong ih, mendahki eh luwet akan, kak kamwakid kitail en pousehlahte papah Siohwa.

4. Nin duwen me Luk 5:​5-10 mahsanih, dahme Piter ndahki pein ih, ahpw ia duwen Sises eh ketin kangoange ih?

⁴ Paipel sohte mahsanih dahme kahrehda Piter ndahki pein ih “aramas dipan emen” de soangen dihp dah me e medemedewe. (Wadek Luk 5:​5-10.) Ahpw ele e wiahda sapwung laud kei. Sises mwahngih me Piter masepwehk, mwein pwehki Piter medewe me e sohte warohng. Sises pil mwahngih me Piter kak kolokolete eh lelepek. Eri, ni kadek Sises mahsanihong Piter en “dehr masepwehk.” Sises eh ketin koapworopworki Piter wekidala ahn Piter mour. Mwuhr, Piter oh rie ohlo Andru pwilikihdi ara pesines en laido oh iangala Sises nan sapwellime doadoahk en kalohk. Siohwa eri ketin kapaiairahda laud.—Mark 1:​16-18.

5. Kapai dah kan me Piter alehdi pwehki e powehdi eh masak oh sohte uhdihsang idawehn Sises?

⁵ Piter kilang soahng kapwuriamwei tohto ni eh iang wia sapwellimen Krais tohnpadahk. E kilang Sises ketin kamwahwihala me soumwahu kan, kausala ngehn suwed kan, oh pil kaiasada me mehla kan. b (Mad. 8:​14-17; Mark 5:​37, 41, 42) Piter pil iang kilang kaudiahl kapwuriamwei ehu duwen Sises eh ketin wia Nanmwarki en Wehin Koht, oh e sohte manokehla duwen met. (Mark 9:​1-8; 2 Pit. 1:​16-18) Ei, ma e sohte idawehnla Sises, Piter sohte pahn kak kilang soahng kan me e kilang. Ia uwen eh perenki me e sohte mweidohng eh madamadau sapwung kan en kahrehiong ih en katihasang soangen kapai pwukat!

6. Piter mwadang powehdi eh luwet kan? Menlau kawehwehda.

⁶ Mendahki dahme e kilangehr oh rong, Piter kin apwalkihte powehdi eh luwet akan. Medewehla ekei karasepen met. Ni Sises eh ketin  kawehwehda mwomwen eh pahn lokolok oh pwoula pwehn kapwaiada kokohp en Paipel, Piter patohwanohng me met sohte pahn wiawi. (Mark 8:​31-33) Piter oh wahnpoaron teiko kin pwurupwurehng akamaiki ihs me keieu lapalap nanpwungarail. (Mark 9:​33, 34) Nipwongo mwohnte Sises ketin pwoula, Piter pelehsang salengen emen ohl. (Sohn 18:10) Pil nipwongohte, Piter uhdahn masakada dahme aramas akan pahn medewehki ih kahrehda e kahmahmkihla kompoakepaho Sises pak siluh. (Mark 14:​66-72) Met kahrehiong ih en sengiseng kowahlap.—Mad. 26:75.

7. Ahnsou mwahu dah me Piter alehdi mwurin Sises eh iasada?

⁷ Sises sohte ketin meliehla sapwellime wahnpoarono me uhdahn mworusala. Mwurin Sises eh ketin iasada, e ketin wiahda ahnsou ong Piter pwehn kamehlelehiong me e ketin poakepoakehte ih. Sises ketin luke Piter en papah nin duwen silepen sapwellime sihpw kan ni aktikitik. (Sohn 21:​15-17) Piter pwungki wia met. E mihmi Serusalem ni rahnen Pendekos oh iangete irail kan me tepin keikihdi sapwellimen Koht manaman.

8. Sapwung laud dahieu me Piter wiahda nan Andiok?

⁸ Pil mwurin eh wiahla Kristian keidi men, Piter anahne pelipeliante eh luwet kan. Nan pahr 36, Piter mi mwo ahnsou me Kornilius, me kaidehn mehn Suhs, keikihdi sapwellimen Koht manaman, me kadehdehda ni sansal me Koht “sohte kin ketin lipilipilki aramas” oh irail kan me kaidehn mehn Suhs pil kak wiahla kisehn mwomwohdiso en Kristian. (Wiewia 10:​34, 44, 45) Mwurin mwo, Piter kak iang mwenge rehn mehn liki kan, mehkot me e sohte pahn wia mwoweo. (Kal. 2:12) Ahpw, ekei Kristian mehn Suhs medewe me mehn Suhs kan oh mehn liki kan sohte kak mwengepene. Ni ahnsou me ekei irail me ahneki soangen madamadau wet kohla Andiok, Piter uhdihsang mwengehiong mehn liki kan, mwein pwehki e masak en kansensuwedihala irail Kristian mehn Suhs kan. Wahnpoaron Pohl kilang duwen tiahk mwalaun wet oh kapwungala Piter mwohn meteiko koaros. (Kal. 2:​13, 14) Mendahki sapwung laud wet, Piter pousehlahte papah Siohwa. Dahme sewese ih?

9. Ia duwen Sohn 6:​68, 69 eh kasalehda ahn Piter loalopwoat?

⁹ Piter uhdahn loalopwoat; e sohte mweidohng mehkot en kauhdihsang eh kin idawehnte Sises. Karasepe, e kasalehda eh loalopwoat ehu pako ni ahnsou me Sises mahsanih duwen mehkot me sapwellime tohnpadahk ko sohte wehwehki. (Wadek Sohn 6:​68, 69.) Me tohto sohte awih de peki Sises en ketin kawehwehda, ahpw re uhdihsang idawehn ih. A Piter soh. E pohnese me Sises kelehpw me sapwellimanki “mahsen en mour soutuk.”

10. Ia duwen Sises eh ketin kasalehda eh koapworopworki Piter? (Pil kilang kilel.)

¹⁰ Sises sohte ketin meliehla Piter. Ni kaimwiseklahn pwohngo me e ketiket sampah, Sises mwahngih me Piter oh wahnpoaron teiko pahn tangasang ih. Mendahki met, Sises ketin kasalehda eh koapworopworki me Piter pahn pwurodo oh pahn lelepekte. (Luk 22:​31, 32) Sises mwahngih me “mohngiong me ngoang, ahpw paliwar me luwet.” (Mark 14:38) Eri, Sises sohte ketin meliehla Piter pil mwurin Piter eh kahmahmkihla ih. Mwurin eh ketin iasada, e ketin pwarohng Piter, ni ahnsou me Piter kelehpw. (Mark 16:7; Luk 24:34; 1 Kor. 15:5) Medewehla ia uwen met eh kakehlakahda Piter me uhdahn nsensuwedkihla dahme e wiahdao!

11. Ia duwen Sises eh kasalehiong Piter me Siohwa pahn ketin sewese ih?

¹¹ Sises kamehlelehiong Piter me Siohwa pahn ketin apwaliheki eh anahn kan. Sises  me iasadahro ketin wiahda pil ehu manaman ong Piter oh ienge wahnpoaron teiko en koledi mwahmw tohtohie. (Sohn 21:​4-6) Manaman wet kamehlelehiong Piter me e sohte apwal ong Siohwa en ketikihda soahng kan me e anahne. Ele wahnpoarono tamanda mahsen en Sises ko me Siohwa pahn ketin apwalih irail kan me kin pousehlahte “rapahki mahs Wehio.” (Mad. 6:33) Soahng pwukat koaros sewese Piter en kin mwohneki mahs doadoahk en kalohko ah kaidehn eh pesines en mwahmwo. E kalohk ni eimah ni rahnen Pendekos pahr 33, oh sewese me kid kei en alehda rongamwahwo. (Wiewia 2:​14, 37-41) Mwuhr, e sewese mehn Sameria kan oh pil irail kan me kaidehn mehn Suhs ren sukuhlki oh pil idawehnla Sises. (Wiewia 8:​14-17; 10:​44-48) Siohwa ketin doadoahngki laud Piter pwehn kahrehdo nan mwomwohdiso soangsoangen aramas koaros.

12. Ia duwen ahn Piter mehn kahlemeng eh kak sewese kitail ma kitail kin apwalki powehdi luwet ehu erein ahnsou werei?

¹² Siohwa kak ketin sewese kitail en pousehlahte papah ih. Ele e apwal en wia met ahnsou koaros, ahpw mehlel ma kitail kin apwalki powehdi luwet ehu rehtail erein ahnsou werei. Ekei pak, atail luwet kan ele apwal sang ahn Piter ko koaros. Ahpw Siohwa kak ketikihong kitail kehl pwe kitail en dehr uhdihsang papah ih. (Mel. 94:​17-19) Karasepe, emen brother kin iang wia tiahk en ohl mwahuki ohl erein sounpar tohto mwohn eh sukuhlki padahk mehlel. E wekidala douluhl eh mour oh tepida mourki kaweid en Paipel kan. Ahpw ekei pak, e kin apwalki powehdi eh ineng sapwung kan. Dahme sewese ih en pousehlahte papah Siohwa? E koasoia: “Siohwa kin ketin kakehlaka ie.” E pil doula koasoia: “Pwehki sapwellimen Siohwa manaman . . . , I sukuhlki me I kak pousehlahte papah ih ni ahl me e ketin kupwurki . . . Siohwa kak ketin doadoahngkin ie, oh mendahki ei soh unsek kan, e kin ketin pousehlahte kakehlakaiehda.”

13. Ia duwen atail kak alasang ahn Piter mehn kahlemeng, nin duwen me kileldi nan Wiewia 4:​13, 29, 31? (Pil kilang kilel.)

¹³ Nin duwen me kitail kilangehr, Piter wiahda sapwung laud kei pwehki e masak aramas. Ahpw pwehki e kapakapki eimah, Piter kak eimah. (Wadek Wiewia 4:​13, 29, 31.) Kitail pil kak powehdi atail masak. Medewehla dahme wiawihong Horst, emen brother pwulopwul me mihmi Sehmen erein Mahwen Keriaun Sampah. Aramas akan ahnsowo anahne wia  soangen rahnmwahu tohrohr ehu me wehwehki “Hitler pahn doareikitailla.” Mendahki Horst ese me e sapwung en nda met, ekei pak e kin ndahla pwehki e masak eh sounpadahko oh ienge tohnsukuhl ko. Eh pahpa nohno sohte lipwoare ih, ahpw ira kin iangih kapakap oh peki Siohwa en ketikihong ih eimah. Pwehki sawas sang eh pahpa nohno oh eh koapworopworki Siohwa, Horst kedekedeo ahneki kehl en kesihnenda teng. Mwuhr e koasoia: “Siohwa sohte mwahn ketin likidmelieiehla.” c

14. Ia duwen sounsilepen sihpw kadek kan ar kak kangoange irail kan me mworusala?

¹⁴ Siohwa oh Sises sohte pahn ketin likidmelieikitailla. Mwurin Piter kahmahmkihla Sises, e anahne wiahda pilipil kesempwal ehu. Ia duwe, e pahn uhdi, de e pahn pousehlahte wia sapwellimen Krais tohnpadahk? Sises patohwan kapakapkihong Siohwa me ahn Piter pwoson en dehr luwetala. Sises ketin padahkihong Piter duwen kapakap wet oh kasalehda eh koapworopworki me mwuhr Piter pahn kak kakehlakahda rie Kristian kan. (Luk 22:​31, 32) Ia uwen met eh kangoange Piter ni eh tamanda mahsen en Sises ko! Ni ahnsou me kitail kin anahne wiahda pilipil kesempwal ehu, Siohwa kak ketin doadoahngki sounsilepen sihpw kadek kan pwehn kihda kangoang me kitail anahne pwehn lelepekte. (Ep. 4:​8, 11) Brother men me adaneki Paul, me wereila wia elder men, song en kin kangoange meteikan. E idek rehn irail kan me pehm re men uhdi, ren medemedewe ia duwen Siohwa eh ketin kainangihiraildo nan padahk mehlel nin tapio. Ih eri kamehlelehiong irail me sapwellimen Siohwa limpoak loalopwoat sohte pahn kahrehiong Ih en ketin likidmeliehirailla. E koasoia, “I kin kilang me tohto me mworusala ar kin pousehlahte papah Siohwa pwehki sawas me e kin ketikihda.”

15. Ia duwen ahn Piter oh Horst mehn kahlemeng eh karasahda mehlelpen Madiu 6:33?

 ¹⁵ Duwehte Siohwa eh ketin apwalihala ahn Piter oh wahnpoaron teiko arail anahn akan, e pil pahn ketin apwalihala atail anahn akan ni atail kin mwohneki mahs doadoahk en kalohko nan atail mour. (Mad. 6:33) Mwurin Mahwen Keriau en Sampah, Horst, me kitail koasoiapene mwoweo, medewehda en pioneer. Ahpw e uhdahn semwehmwe, oh kin peikasalki ma e kak pein apwalih ih oh wiewiahte doadoahk en kalohk. Dahme e pahn wia? E koasoanehdi en song kilang ma Siohwa pahn uhdahn ketin apwalih ih. Ih eri iang kalohk wihk ehu pwon erein mwemweit en sounapwalih me kin seiloako. Ni imwin wihko, e uhdahn pwuriamweila ni sounapwalih me kin seiloako kihong ih empelop ehu, ahpw sounapwaliho sohte nda sang ihs. Nan empelopo, mie uwen mwohni me itarohng apwalih ih nan eh doadoahk en pioneer erein sounpwong kei. Horst wiahki kisakis wet mehn kadehde ehu me Siohwa pahn ketin apwalih ih. Erein eh mour, e kin mwohneki mahs Wehio.—Mal. 3:10.

16. Dahme kahrehda e mwahu ong kitail en kalaudehla atail sukuhlki duwen Piter oh dahme e ntingihedi nan nah kisinlikou ko?

¹⁶ Ia uwen Piter eh kalahnganki me Sises sohte ketin likidmeliehla ih, nin duwen me e peki nin tapio! Krais pousehlahte ketin kaiahne Piter en wiahla wahnpoaron lelepek men oh wia mehn kahlemeng mwahu ong Kristian kan. Oh kitail koaros pil sukuhlki mehn kasukuhl tohto sang kaiahn wet. Piter ntingihedi ekei mehn kasukuhl pwukat oh pil kaweid teikan nan kisinlikou riau me e kadaralahng mwomwohdiso kan ni mwehin tepin Kristian ko. Nan iren onop en mwuhr, kitail pahn koasoiapene ekei mehn kataman kan sang kisinlikou pwukat oh ia duwen atail kak doadoahngki rahnwet.