1. Dahme iengatail tohndoadoahk de tohnsukuhl kan kakete idek rehtail?

 IA OMW pepehm ni emen iengomw tohndoadoahk de tohnsukuhl eh peidengki dahme ke kin kamehlele? Ke kin salohda? Pali laud en kitail kin. Ahpw soangen peidek wet ele kak sewese kitail en wehwehki dahme aramaso uhdahn medewe de kamehlele, oh elehieng kitail ahnsou mwahu en ehukihong ih rongamwahwo. Ahpw ekei pak, emen kakete idek peidek pwehki e sapwungki kitail de men akamaiong kitail. Met kin kalapw wiawi pwehki re kin rong soahng sapwung kan duwen dahme kitail kin kamehlele. (Wiewia 28:22) Patehng met, kitail miher ni “imwin rahn akan,” ahnsou ehu me aramas tohto “sohte men pwungki meteikan” oh pil kin “lemei.”—2 Tim. 3:​1, 3.

2. Dahme kahrehda kitail kin men kasalehda mpahi?

² Ele ke kin medewe, ‘Ia duwen ei kak meleilei oh kadek ni emen eh men akamaikihong ie dahme I kamehlele?’ Mpahi, de opampap, pahn seweseiuk. Aramas mpahi men sohte kin mwadang lingeringerda, ahpw e kin kaunda eh pepehm ni meteikan kan ar akamaiong ih, de ni eh sohte nohn ese dahme e pahn sapengki irail. (Lep. Pad. 16:32) Ahpw, e sohte mengei en kin ahnsou koaros kasalehda mpahi. Ia duwen omw kak kakairada mpahi? Ia duwen omw kak ni mpahi sapeng emen me peidengki dahme ke kin kamehlele? Oh ma kowe emen pahpa de nohno, ia duwen omw kak sewese noumw seri kan en sukuhlki en kasalehda mpahi ni arail kin uhki arail pwoson? Kitail pahn kilang.

3. Dahme kahrehda kitail kak nda me mpahi wia irair kehlail ehu, a kaidehn luwet? (2 Timoty 2:​24, 25)

³ Aramas mpahi men sohte kin luwet, ahpw e kin kehlail. Kitail anahne kehlail pwehn kak meleileite nan irair apwal ehu.  Mpahi wia kisehn “wahn sapwellimen Koht manaman.” (Kal. 5:​22, 23) Lokaiahn Krihs me kawehwehdi ong “mpahi” kin ekei pak karasaraskihong oahs lawalo men me mandala. Medewehla oahs lawalo men me mandala. Mendahte oahso mandala, ahpw e kehlailte. Ia duwen atail kak kakairada mpahi oh pil ni ahnsowohte kehlail? Kitail sohte kak kelehpw wia met. Kitail anahne kapakapki sapwellimen Koht manaman, oh peki Siohwa en ketin sewese kitail en kakairada irair kaselel wet. Mie me tohto me sukuhlkiher en kin kasalehda mpahi. Karasepe, riatail Kristian tohto kin kasalehda mpahi ni aramas akan ar song en akamaiong irail. Oh met sewese meteikan en kamwahwihala dahme irail kin medewehki Sounkadehde kan. (Wadek 2 Timoty 2:​24, 25.) Ia duwen omw kak kasalehda mpahi ahpw kehlailte?

4. Dahme kitail kak sukuhlkihsang mehn kahlemeng en Aisek duwen mpahi?

⁴ Mie koasoipen me tohto nan Paipel me kasalehda kesempwalpen en kin mpahi. Karasepe, medewehla duwen Aisek. Ni ahnsou me e kousoan nan Kerar, mehn mpe peirin kan audehlong pwehl nan pwarer ko me nein eh pahpao ladu ko weirada. Aisek sohte peiki eh pwarer ko, ahpw e kahrehda tohnimweo oh keseula ehu wasa tohrohr oh weirada pwarer teikan. (Sen. 26:​12-18) Ahpw mehn Pilisdia ko nda me dene pihl me mi wasao pil arail. Mendahki met, Aisek meleileite. (Sen. 26:​19-25) Dahme sewese ih en kolokolete eh mpahi ni meteikan ar mwomwen men kalingeringerihada? Ele e kilang mehn kahlemeng en eh pahpa nohno oh sukuhlki laud duwen Eipraam eh kin kasalehda meleilei, oh pil “meleilei oh mpahi” en Sara.—1 Pit. 3:​4-6; Sen. 21:​22-34.

5. Karasaras dahieu me kasalehda me pahpa nohno Kristian kan kak padahkihong neirail seri kan duwen kesempwalpen en kin mpahi?

⁵ Pahpa nohno Kristian kan, kamehlele me kumwail kak padahkihong noumwail seri kan duwen kesempwalpen mpahi. Medewehla mehn kahlemeng en Maxence, me sounpar 17. Nan sukuhl oh nan kalohk, e kin tuhwong aramas akan me kin keh lingeringer. Ni kanengamah, eh pahpa oh nohnou sewese ih en kakairada irair en mpahi. Ira koasoia: “Met Maxence wehwehki me e mengei en lingeringerda oh wia mehkot lemei, ahpw emen anahne uhdahn kehlail pwehn kolokolete eh meleilei.” Maxence sukuhlki en wiahla aramas mpahi men.

6. Ia duwen kapakap eh kak sewese kitail en kamwahwihala atail kin kasalehda mpahi?

⁶ Dahme kitail kak wia ni meteikan ar kalingeringerihkitailda, duwehte ni emen eh karaunlikamwih mwaren Koht de kauwe Paipel? Kitail anahne peki rehn Siohwa sapwellime manaman oh erpit pwe kitail en sapeng aramaso ni mpahi. Ahpw ia duwen ma mwuhr kitail esehda me atail pasapengo sohte wiawi ni ahl me kitail anahne wia? Kitail kak pwurehng kapakapki ireo oh medewe ia duwen atail kak kamwahwihala atail wia met mwuhr. Eri, Siohwa pahn ketikihong kitail sapwellime manaman pwe kitail en kak kaunda atail lingeringer oh kasalehda mpahi.

7. Ia duwen atail wadlikihala ekei iren Paipel eh kak sewese kitail en kaunda atail koasoi oh wiewia? (Lepin Padahk 15:​1, 18)

⁷ Iren Paipel tohto kak sewese kitail ni ahnsou me e apwal en kasalehda mpahi. Sapwellimen Koht manaman kak katamandohng kitail iren Paipel ko. (Sohn 14:26) Karasepe, kaweid kan me kitail diar nan pwuhken Lepin Padahk kak sewese kitail en kasalehda mpahi. (Wadek Lepin Padahk 15:​1, 18.) Pwuhken Paipelo pil kasalehda dahme kahrehda e mwahu kitail en kin meleilei ni ahnsou me kitail kakete lingeringerda.—Lep. Pad. 10:19; 17:27; 21:23; 25:15. 

8. Dahme kahrehda kitail anahne medewe mahs ia kahrepen emen kin peidengki dahme kitail kamehlele?

⁸ Loalokong pil kak sewese kitail. (Lep. Pad. 19:11) Aramas emen me loalokong, de dehdehki mwahu soahng kan, kak kaunda pein ih ni ahnsou me meteikan peidengki dahme e kin kamehlele. Pak tohto, ni aramas akan ar idek peidek, re sohte kin kasalehda dahme kahrehda re idengki peideko. Eri mwohn atail sapeng irail, e mwahu en pohnese me mwein kitail sehse dahme kamwakid aramaso en idengki peideko.—Lep. Pad. 16:23.

9. Ia duwen Kidion eh kasalehda loalokong oh mpahi nan eh wiewia ong ohlen Epraim ko?

⁹ Medewehla ia duwen Kidion eh sapengala ohlen Epraim ko. Irail lingeringer ni arail idek reh dahme kahrehda e sohte likwerih irail mahs pwe ren iang ih mahweniong imwintihti en mehn Israel ko. Ahpw ia uhdahn kahrepen arail lingeringer? Mwein irail nsensuwedla pwehki re kin medewe me arail keineko iei me keieu kesempwal nan Israel? Sohte lipilipil ia kahrepe, Kidion kasalehda loalokong. E song en wehwehki dahme kahrehda re uhdahn lingeringer oh eri sapeng irail ni mpahi. Paipel padahkihong kitail me ni eh sapeng irail ni ahl wet, “re sohla lingeringer pah.”—Sounkopwung 8:​1-3.

10. Dahme pahn sewese kitail en ese ia duwen atail pahn sapeng irail kan me peidengki dahme kitail kin kamehlele? (1 Piter 3:15)

¹⁰ Ele iengatail tohndoadoahk de tohnsukuhl  men peidengki dahme kahrehda kitail kin peikiong kosonned en Paipel kan. Kitail pahn wia uwen atail kak en kawehwehiong kahrepen atail kamehlele me kaweid en Paipel iei me keieu mwahu. Ni ahnsowohte, kitail en wauneki eh madamadau. (Wadek 1 Piter 3:15.) Eri, dehr medewe me eh peideko pahn kauwe kitail, ahpw medewe ia duwen peideko eh kak seweseiuk en esehda dahme e kin kesempwalki. Sohte lipilipil soangen kahrepe dah me emen kin idek peidek, e mwahu kitail en kin sapeng ni meleilei oh kadek. Atail pasapeng ele pahn kamwakid ih en pwurehng medewe dahme e kin kamehlele. Mehnda ma e lemei de mwomwen kapailok, atail mehn akadei iei en sapeng ni kadek.—Rom 12:17.

11-12. (a) Dahme kitail kak medewe mahs mwohn atail sapeng peidek apwal ehu? (Pil kilang kilel.) (b) Menlau kihda ehu karasaras me pid ia duwen ahn emen peidek eh kak imwikihla koasoakoasoipene ni kadek?

¹¹ Karasepe, ma iengatail tohndoadoahk men idek dahme kahrehda kitail sohte kin wia ipwidi, medewehla met: Ia duwe, e kakete medewe me e sohte mweimwei kitail en kin ahneki ahnsou en peren? De e kakete medewe me kitail pahn kauwehla en tohndoadoahk kan ar kin doadoahkpene mwahu? Ele kitail pahn tepte kapinga iengatail tohndoadoahko pwehki e kin nsenohki meteikan oh eri ndaiong me kitail pil men tohn atail wasahn doadoahko en kin doadoahkpene mwahu. Met kakete elehieng kitail ahnsou mwahu en koasoiong ih ni kadek duwen dahme Paipel kasalehda duwen rahnen ipwidi kan.

¹² Kitail pil kak doadoahngki wiepe wet ni ekei ar kin idek peidek apwal kan. Iengatail tohnsukuhl men kakete nda me dene Sounkadehdehn Siohwa kan anahne wekidala arail madamadau me pid ohl mwahuki ohl oh lih mwahuki lih. Ia duwe, e nda met pwehki e sohte uhdahn wehwehki dahme Sounkadehdehn Siohwa kan kin ndahki tiahk wet? De mwein emen kompoakepah de emen kiseh kin wia soangen tiahk wet? Ia duwe, e medewe me kitail kin kailongki irail kan me kin wia tiahk wet? Kitail anahne kamehlelehiong ih me kitail kin nsenohki aramas koaros oh pil wauneki ahn emenemen pwuhng en wiahda pein eh pilipil. b (1 Pit. 2:17) Eri, kitail kak padahkihong dahme Paipel mahsanih oh ia duwen atail idawehn kaweid en Paipel eh sewese kitail en ahneki mour nsenamwahu.

13. Ia duwen omw kak sewese emen me kin kauwe atail kamehlele Koht?

¹³ Ni emen eh uhdahn sapwungki kitail, kitail en dehr mwadangete medewe me kitail ese dahme e kin kamehlele. (Taitus 3:2) Karasepe, ia duwen ma iengomw tohnsukuhlo nda me e wia mehkot pweipwei en kamehlele Koht? Ia duwe, ke pahn medewe me e kin uhdahn kamehlele padahk me dene aramas kohsang mahn oh kin uhdahn ese duwen met? Ni mehlel, mwein e ndahte dahme e rongasang meteikan. Dehr tepte kauwe palien sains, ahpw ke kak medewehda ire ehu me ke kak kihong iengomw tohnsukuhlo en medemedewe mwuhr. Ele ke kak kasalehiong ih ehu link nan jw.org me koasoia duwen kepikipik kan. Mwein mwuhr, e pahn men kumwa en koasoiapene artikel ehu de kisin kasdo ehu me e diarada wasao. Ni atail kin kasalehda wahu ni ahl wet, met kak sewese ih en men kalaudehla eh sukuhlki dahme Paipel kin padahngki.

14. Ia duwen Niall eh doadoahngki mwahu neitail website pwehn sewese ienge tohnsukuhlo en powehdi ahn ekei madamadau sapwung duwen Sounkadehdehn Siohwa kan?

¹⁴ Me pwulopwul men me adaneki Niall doadoahngki neitail website pwehn kasalehda  me dahme ekei kin ndahki Sounkadehdehn Siohwa kan sohte mehlel. E koasoia: “Iengei tohnsukuhl men kin kalapw ndaiong ie me I sohte kamehlele palien sains pwehki I kin likih pwuhko me diren ‘soai’ loale a kaidehn dahme mehlel.” Ni tohnsukuhlo eh sohte mweidohng Niall en kawehwehda dahme e kin kamehlele, Niall kasalehiong tohnsukuhlo oaralapo “Science and the Bible” nan jw.org. Mwuhr, Niall esehda me tohnsukuhlo wadekalahr oaralapo, oh e kakehr ehukihong ih duwen mour eh miehla. Ele met pil kak wiawihong uhk.

15. Ia duwen pahpa nohno kan ar kak sewese neirail seri kan pwehn sapeng ni mpahi iengarail tohnsukuhl kan me peidengki dahme irail kin kamehlele?

¹⁵ Pahpa nohno kan kak padahkihong neirail seri kan ia duwen arail pahn sapeng ni mpahi emen me peidengki dahme irail kin kamehlele. (Seims 3:13) Ekei pahpa nohno kan kin wiahda ahnsoun praktis erein arail kaudok en peneinei. Irail kin medewe duwen ire kan me kakete pwarada nan sukuhl, koasoiapene oh kamwomwada ia duwen arail pahn sapeng emen, oh padahkihong neirail seri ko ia duwen arail pahn kasalehda mpahi oh kadek ni arail kin koasoiong meteikan.—Menlau kilang koakono “ Ahnsoun Praktis Kak Sewese Omw Peneinei.”  

16-17. Ia duwen ahnsoun praktis eh kak sewese me pwulopwul kan?

¹⁶ Ahnsoun praktis kak sewese me pwulopwul kan en kamehlelehiong pein irail dahme re kamehlele oh kawehwehiong meteikan dahme kahrehda. Artikel kan pahn oaralapo “Young People Ask” nan jw.org pil kin kihda doaropwehn kasukuhl ong me pwulopwul kan. Soahng pwukat wiawihda pwehn sewese me pwulopwul kan en kalaudehla dahme irail kin kamehlele oh kaunopada pasapeng kan ni pein  arail lokaia. Sang ni atail onopki artikel pwukat nin duwen peneinei ehu, kitail koaros kak sukuhlki en uhki atail pwoson ni elen mpahi oh kadek.

¹⁷ Me pwulopwul men me adaneki Matthew kawehwehda ia duwen ahnsoun praktis eh sewese ih. Ehu me ih oh eh pahpa nohno kin wia nan arail kaudok en peneinei iei re kin kalapw roporopki ire kan me kakete pwarada nan sukuhl. E koasoia: “Se kin medewehda soangen peidek kan me kakete pwarada, oh se kin praktiski ia duwen at pahn sapeng sang ni dahme se diarada nan at roporop. Ni ei kin uhdahn wehwehkihla kahrepen dahme I kin kamehlele, I sohla kin peikasal oh I diarada me e mengei en kin sapeng meteikan ni mpahi.”

18. Dahme Kolose 4:6 kasalehda me kesempwal?

¹⁸ Ei mehlel, kaidehn koaros pahn men pwungki kitail mehnda ma kitail kin kawehwehda mwahu soahng kan. Ahpw en koasoi ni mpahi oh kadek kak sawas. (Wadek Kolose 4:6.) Atail koasoiaiong emen duwen dahme kitail kin kamehlele kak duwehte dapadap. Kitail kak koski mpweio ni wawai de uhdahn uk. Ni atail koski mpweio wawai, sounmwadong teio kak daperedi oh doulahte mwadong. Duwehte met, ma kitail kin koasoi ni kadek oh mpahi, aramas akan ele pahn men rong oh pousehlahte koasoiong kitail. Ahpw ma emen kin mente akamai de kauwe kitail, kitail sohte anahne pousehla koasoiong ih. (Lep. Pad. 26:4) Pali laud en aramas ele sohte kin akamai ong kitail. Ni mehlel, ekei—de me tohto—pahn rong.

19. Dahme pahn kamwakid kitail en kasalehda mpahi ni atail kin uhki dahme kitail kamehlele?

¹⁹ E sansal me e uhdahn kesempwal en esehla kasalehda mpahi. Kapakap ong Siohwa oh peki kehl me ke anahne pwehn kolokolete omw mpahi ni omw sapeng peidek apwal kan de ni meteikan ar kauweiuk. Tamataman, omw mpahi kak kauhdi sawehwe kan me kakete wiahla akamai laud. Oh omw sapeng ni mpahi oh wahu kakete kamwakid ekei sounrongorong kan en wekidala dahme re kin medewehki kitail oh duwen padahk mehlel en Paipel kan. Ke en kin ‘onopada ahnsou koaros pwe ke en sapeng’ irail kan me peidengki dahme ke kin kamehlele, oh “wia met ni mpahi oh wahu laud.” (1 Pit. 3:15) Ei, kasalehda me ke kehlail sang ni omw kin mpahi!