1-2. Dahme kahrehda e mwahu kitail en onopki koasoipen Samson?

 DAHME ke kin medewe ni omw rong ahdo Samson? Ele ke kin medewe duwen ohl emen me uhdahn kehlail. Ei mehlel. Ahpw Samson wiahda pilipil sapwung ehu me kahrehda e lelohng lokolok laud. Mendahki met, Siohwa ketin kilangwohngete ahn Samson lelepek, oh ketin mweidohng eh mehn kahlemeng en kileldi nan Paipel pwe kitail en paiekihda.

² Siohwa ketin doadoahngki Samson en kapwaiada soahng kapwuriamwei kan pwehn sewese sapwellime aramas akan, mehn Israel. Sounpar epwiki kei mwurin Samson mehla, Siohwa ketin kaweid wahnpoaron Pohl en kilelehdi eden Samson en iangete eden irail kan me ahneki pwoson laud. (Ipru 11:​32-34) Ahn Samson mehn kahlemeng kak kangoange kitail. Samson kin koapworopworki Siohwa, pil erein ahnsou apwal kan. Kitail pahn koasoiapene dahme kitail kak sukuhlkihsang Samson oh ia duwen eh mehn kahlemeng eh kak kangoange kitail.

3. Pwukoa dahieu me Samson alehdi?

³ Ni ahnsou me Samson ipwidi, mehn Pilisdia kan kin kakaun wehin Israel oh kin kahpwalihala arail mour. (Sounkopwung 13:1) Arail kaunda lemei kahrehiong mehn Israel kan en lokolok laud. Siohwa ketin idihada Samson en “tapihada doadoahk en kapitala Israel sang mehn Pilisdia kan.” (Sounkopwung 13:5) Pwukoa wet me inenen apwal! Pwehn kapwaiada pwukoa wet, Samson anahne koapworopworki Siohwa.

4. Ia duwen Siohwa eh ketin sewese Samson en kapitala pein ih sang mehn Pilisdia kan? (Sounkopwung 15:​14-16)

 ⁴ Medewehla ehu karasepen Samson eh likih Siohwa oh duwen Koht eh ketin sewese. Ehu pak, karis en Pilisdia kan kodohng koledi Samson nan Lihai, me mwein mi nan Suda. Ohl en Suda ko masepwehkada, eri irail koasoanehdi en kihong mehn Pilisdia ko Samson. Pein ahn Samson tohn wehio salihekihdi ih sahl kapw riapwoat oh wahla ih rehn mehn Pilisdia ko. (Sounkopwung 15:​9-13) Ahpw, “manaman en KAUN-O ahpw kakehlailihala” Samson oh e kamweidpeseng sahl ko oh pitla. Ih eri “diarada lapalahn tihn dilin aupahn ahs emen,” poarehngete, oh kemehkihla ohlen Pilisdia 1,000 kei!—Wadek Sounkopwung 15:​14-16.

5. Ia duwen Samson eh kasalehda me e koapworopworki Siohwa?

⁵ Dahme kahrehda Samson doadoahngki tihn dilin aupahn ahs emen? Sohte me kin doadoahngki mehn pei wet! Samson uhdahn ese me Siohwa pahn ketin sewese ih kalowehdi mehn Pilisdia kan, sohte lipilipil soangen mehn pei dah me e doadoahngki. Ei, ohl lelepek menet doadoahngki dahme mi reh ahnsowo pwehn kapwaiada kupwuren Siohwa. Samson kalowehdi ohlen Pilisdia ko koaros pwehki e koapworopworki Siohwa.

6. Mehn kasukuhl dahieu me kitail kak sukuhlkihsang koasoipen Samson?

⁶ Siohwa pil pahn ketin kakehlakakitailda pwehn kapwaiada atail pwukoa kan, mehnda ma pwukoa pwukat mwomwen uhdahn apwal. Koht kak ketin wia met ni ahl ehu me ele kapwuriamwei ong kitail. Likih me Siohwa, me ketin kakehlakahda Samson, pahn ketin seweseiuk en wia kupwure erein omw kin koapworopworki sapwellime sawas.—Lep. Pad. 16:3.

7. Karasaras dahieu me kasalehda kesempwalpen en rapahki kaweid sang rehn Siohwa?

⁷ Riatail Kristian tohto me kin iang doadoahk en kauwada atail wasahn kaudok kan kin kasalehda arail likih Siohwa. Mahso, riatail kan kin kalapw pilahnehda oh kauwada pali laud en atail Wasahn Kaudok oh ihmw teikan. Ahpw pwehki me papidaisla kan wie tohtohla,  sapwellimen Siohwa pwihn anahne wiahda wekidekla kan. Brother kan me kin tiengla mwowe kin kapakapki sapwellimen Siohwa kaweid oh song wiepe kapw kan, duwehte pwainda ihmw kan oh pwurehng kamwahwihala. Robert, me nan sounpar kan dower powe kin iang doadoahk en kauwada wasahn kaudok kan nan sampah pwon, koasoia: “Nin tapio, e sohte mengei ong ekei en doadoahngki wiepe kapw wet.” E doula koasoia: “E uhdahn weksang dahme se kin wiewia erein sounpar tohto. Ahpw riat kan nsenohki wiahda wekidekla kan, oh e sansal me Siohwa kin ketin kapaiahda wekidekla pwukat.” Met wiahte ehu karasepen Siohwa eh kin ketin kaweid sapwellime aramas akan en kapwaiada kupwure. E mwahu kitail koaros en kin ekei pak pein idek rehtail, ‘I kin rapahki sapwellimen Siohwa kaweid oh men wiahda wekidekla kan pwehn papah ih?’

8. Ni ahnsou me Samson uhdahn men nimpilda, dahme e wia?

⁸ Ele ke taman soahng kapwuriamwei teikan me Samson wiahda. Ih kelehpw me pei ong oh kemehla laion men oh mwuhr kemehla ohl 30 nan kahnimw en Askelon nan Pilisdia. (Sounkopwung 14:​5, 6, 19) Samson ese me pein ih sohte kak wiahda soahng pwukat ma sohte sawas sang rehn Siohwa. Met sansalda ni ahnsou me e uhdahn men nimpilda mwurin eh kemehla mehn Pilisdia 1,000. Dahme e wia? E sohte koapworopworkihte pein ih en diar nime pihl, ahpw e likweriong Siohwa en ketin sewese ih.—Sounkopwung 15:18.

9. Dahme Siohwa ketin wia ni ahnsou me Samson kapakapki sawas? (Sounkopwung 15:​19, NW)

⁹ Siohwa ketin sapengala ahn Samson peksawas oh ketikihda pihl ni ahl kapwuriamwei ehu. Ni ahnsou me Samson nim pihlo, “eh kehl ahpw pwurodo oh e kehlailda.” (Wadek Sounkopwung 15:​19, NW.) b E sansal me pahd en pihl kapw wet mihmihte wasao mwurin sounpar tohto lella ahnsou me soukohp Samuel ntingihedi pwuhken Sounkopwung kan. Mehn Israel kan me kilang pahd en pihlo ele kin tamanda me irail kak koapworopworki Siohwa en ketin sewese sapwellime tohnkaudok lelepek kan ni ahnsou me irail anahne.

10. Dahme kitail anahne wia pwehn ale sawas sang rehn Siohwa? (Pil kilang kilel.)

¹⁰ Kitail pil anahne koapworopworki Siohwa en ketin sewese kitail sohte lipilipil soangen koahiek dah me ele kitail ahneki de dahme kitail wiadahr nan sapwellime doadoahk. Kitail anahne aktikitik oh pohnese me kitail kak pweida mehlel ma kitail kin koapworopworkihte ih. Duwehte Samson eh kehlailda ni eh nim pihl me Siohwa ketikihda, kitail pil pahn kehlailda ni atail kin isaneki soangen sawas koaros me Siohwa ketikihda ong kitail.—Mad. 11:28.

11. Ia duwen atail kak koapworopworki sapwellimen Siohwa sawas? Menlau kihda ehu karasaras.

¹¹ Medewehla mehn kahlemeng en Aleksey, emen riatail nan Russia me kin dadaur pahn kalokolok laud. Dahme sewese ih en dadaurete pahn irair apwal pwukat? Ih oh eh pwoudo kin kaukaule wia ara koasoandi en onop Paipel oh kaudok. E koasoia: “I kin song en wiewiahte ei koasoandi en pein onop oh wadawad en Paipel rahn koaros. Ni menseng koaros, ngehi oh ei pwoudo kin koasoiapene iren rahn en rahno oh kapakap ong Siohwa.” Dahme met padahkihong kitail? Kitail en dehr koapworopworkihte  pein kitail, ahpw kitail en koapworopworki Siohwa. Ia duwen? Sang ni atail kin kaukaule wia soahng kan me kin kalaudehla atail pwoson, duwehte onopki Paipel, oh soahng teikan ong kaudok. Eri, Siohwa pahn ketikihda sawas me kitail anahne pwehn pousehlahte papah ih. E ketin kakehlakahda Samson, oh kak ketin kakehlakakitailda.

12. Pilipil suwed dahieu me Samson wiahda, oh ia duwen eh poakohngala Dilehla weksang dahme kin wiawihong ih mwoweo?

¹² Duwehte kitail, Samson sohte unsek, eri ekei pak e wiahda pilipil sapwung kan. Ehu pilipil me e wiahda uhdahn kahrehiong ih nan apwal laud. Mwurin Samson eh wia sounkopwung men erein ahnsou ehu, e “poakepoakehla lih emen ede Dilehla me kin mihmi nan Wahun Sorek.” (Sounkopwung 16:4) Mwohn mwo, Samson men pwoudikihda lihen Pilisdia men. Siohwa ketin kaweid Samson en wia met pwe en kak peiong mehn Pilisdia ko. Mwuhr, Samson pil kohla mihmi nan imwen lihen netiki paliwere men nan kahnimw en Kasa nan Pilisdia. Ni ahnsowo, Koht ketin kakehlakahda Samson pwehn wahsang ewen kehl en kahnimwo, oh kaluwetehla kahnimwo. (Sounkopwung 14:​1-4; 16:​1-3) Ahpw Dilehla wia mehn Israel men, eri met sohte kihong Samson ahnsou mwahu en peiong mehn Pilisdia ko.

13. Dahme Dilehla wiahiong Samson?

¹³ Dilehla alehsang mehn Pilisdia ko mwohni laud pwehn pangala Samson ong irail. Ia duwe, Samson uhdahn poakepoake Dilehla me kahrehda e sohte kak kasawihada dahme Dilehla men wia? Eri Dilehla kin pwurupwurehng peki Samson en ndaiong ih kahrepen eh uhdahn kehlail, oh kedekedeo Samson padahkihong. E kansensuwed me Samson mweidohng pein ih en lelohng irair ehu me  kahrehiong en sohla eh kehl oh Siohwa sohla ketin kupwurperenki ih erein ahnsou ehu.—Sounkopwung 16:​16-20.

14. Imwila dah me lelohng Samson pwehki e likih Dilehla?

¹⁴ Samson lelohng imwila suwed pwehki e likih Dilehla a kaidehn Siohwa. Mehn Pilisdia ko parokedi Samson oh pwadikasang pwoaren mese ko. E selidi nan Kasa, wasa me e kanamenekihala towe ko mwoweo, oh e wiahla soun ngidar krein men. Mehn Pilisdia ko eri walahng ih ni arail kamadipw ehu. Irail wiahda lapalahn meirong ehu ong arail koht likamwo Dakon pwehki re medewe me ih me sewese irail en koledi Samson. Irail wahsang Samson nan imwetengo oh walahng ni kamadipwo pwe ren “kapailoke.”—Sounkopwung 16:​21-25.

15. Ia duwen Samson eh kasalehda me e pwurehng koapworopworki Siohwa? (Sounkopwung 16:​28-30) (Menlau kilang kilel ni kilin Kahn Iroir wet.)

¹⁵ Samson wiahda sapwung laud ehu, ahpw e sohte uhdihsang papah Siohwa. E rapahki ahnsou mwahu en peiong mehn Pilisdia ko, pwehki ih pwukoa me Koht ketikihong ih. (Wadek Sounkopwung 16:​28-30.) Samson peki rehn Siohwa: “Komw ketin kapwuredohng ie pil ehu kehlail, pwe I en ikihong mehn Pilisdia kat.” Koht mehlelo ketin sapengala ahn Samson pekipeko oh ketin kapwurehiong eh kehl tohrohro. Eri, ni ahnsowo Samson kemehla mehn Pilisdia tohtohsang me e kemehla mwoweo.

16. Dahme kitail kak sukuhlkihsang ahn Samson sapwungo?

¹⁶ Mendahki Samson lelohng imwila suwed pwehki sapwung me e wiahda, e sohte uhdihsang eh songosong en wia kupwuren Siohwa. Ma kitail pil wiahda sapwung ehu oh anahne peneu de kitail luhssang pwais kaselel ehu, kitail en dehr uhdi papah Siohwa. Tamataman me Siohwa kin ketin kupwurki mahkohng kitail. (Mel. 103:​8-10) Mendahki atail sapwung kan, Siohwa kak ketin doadoahngkihte kitail, duwehte eh ketin doadoahngki Samson.

17-18. Dahme kahrehda ahn Michael mehn kahlemeng kin kangoange iuk? (Pil kilang kilel.)

¹⁷ Medewehla mehn kahlemeng en brother pwulopwul men me adaneki Michael. E kin soupisek nan eh papah Siohwa. E papah nin duwen sounsawas men oh pil pioneer. Ahpw, e wiahda sapwung ehu me kahrehda e sohla ahneki pwukoa nan mwomwohdiso. E koasoia: “Mwohn ahnsowo, I kin uhdahn soupisek nan ei papah Siohwa. Ahpw mwuhr,  I wiahkinteieu pehm me I solahr kak wia mehkot nan sapwellimen Siohwa doadoahk. I sohte leme me Siohwa pahn ketin likidmeliehla, ahpw I kin medewe ma ei nanpwungmwahu reh pahn pwurehng duwehte mwoweo de ma I pahn kak pwurehng papah ih nan mwomwohdiso duwehte me I kin wia mwoweo.”

¹⁸ E mwahu me Michael sohte uhdihsang papah Siohwa. E doula koasoia: “I kin doadoahk laud en pwurehng kamwahwihala ei nanpwungmwahu rehn Siohwa sang ni ei kin kaukaule kapakapohng ih, wia ei onop oh doudouloale.” Kohkohlao, Michael pwurehng alehdi eh pwukoa kan nan mwomwohdiso. Met e kin papah nin duwen elder oh pioneer men. E koasoia: “Utuht oh kangoang me I alehdi, ahpw mehlel sang elder kan, sewese ie en ese me Siohwa ketin poakepoakeiehte. Pwehki ei nsen mwakelekel, I kak pwurehng papah nan mwomwohdiso. Dahme wiawihong ie padahkihong ie me Siohwa pahn ketin mahkohng emen sohte lipilipil me uhdahn koluhla mehlel.” Kitail kak kamehlele me Siohwa pahn ketin doadoahngki kitail oh kapaikitailda mehnda ma kitail wiahda sapwung kan, ma kitail kin wia uwen atail kak en kapwungala atail wiewia kan oh pousehlahte koapworopworki ih.—Mel. 86:5; Lep. Pad. 28:13.

19. Ia duwen ahn Samson mehn kahlemeng eh kakehlakaiukada?

¹⁹ Nan iren onop wet, kitail koasoiapene soahng kei me wiawihong Samson. Samson sohte unsek; ahpw, e sohte uhdihsang eh kin songosong en papah Siohwa, pil mwurin eh wiahda sapwungo rehn Dilehla. Oh Siohwa ketin pousehlahte doadoahngki ih. Koht pwurehng ketin doadoahngki Samson ni ahl laud ehu. Siohwa ketin wiahkihte Samson ohl uhdahn lelepek men, pil ketin kahrehiong en iang kileldi rehn me lelepek teikan nan Ipru irelaud 11. Ia uwen met eh kangoange kitail ni atail ese me kitail kin papah Sahm limpoak men nanleng me kin ketin kupwurki kakehlakahda kitail, ahpw mehlel nin ahnsou me kitail kin luwetala! Eri duwehte Samson, kitail en peki rehn Siohwa: “Komw ketin kupwure ie. Komw ketin kapwuredohng ie pil ehu kehlail.”—Sounkopwung 16:28.