1-2. Dahme kahrehda Siohwa ketin kapikkitailda en ahneki peren ni atail kisekise meteikan?

 NI SIOHWA eh ketin kapikada aramas akan, e ketin kapikirailda en diar peren laud ni arail kin kihkihwei, kaidehn ni arail kin ale. (Wiewia 20:35) Ia duwe, met wehwehki me kitail sohte pahn peren ni emen eh kisekisei kitail? Soh. Kitail koaros kin peren ni atail alehdi kisakis ehu. Ahpw, atail peren kin laudla ni atail kin kisekise meteikan. Oh ni mehlel, e uhdahn mwahu me Siohwa ketin kapikkitailda ni ahl wet. Dahme kahrehda?

² Pwehki Siohwa ketin kapikkitailda ni ahl wet, kitail kak kalaudehla pein atail peren. Kitail kak kalaudehla atail peren ni ahnsou me kitail kin medewe soangen ahl kan me kitail kak kisekise meteikan. E uhdahn kaselel me Siohwa ketin kapikkitailda ni ahl wet.—Mel. 139:14.

3. Dahme kahrehda kitail kak nda me Siohwa iei “Koht me peren”?

³ Pwehki Paipel mahsanih me irail me kin kihkihwei kin peren, kitail kak wehwehki dahme kahrehda Siohwa iei “Koht me peren.” (1 Tim. 1:11) Ih me ketin tepin kisekise meteikan oh sohte me kin kihwei laudsang Siohwa. Nin duwen me wahnpoaron Pohl koasoia, “kitail kin momour oh mwekimwekid oh mihmi” pwehki Ih. (Wiewia 17:28) Mehlel, “kisakis mwahu oh unsek koaros” kohsang rehn Siohwa.—Seims 1:17.

4. Dahme pahn sewese kitail en ahneki peren laud?

⁴ Ele kitail koaros pahn men ahneki peren laud ni atail kin kihkihwei. Kitail kak wia met sang ni atail kahlemengih sapwellimen Siohwa kadek sapan. (Ep. 5:1) Nan iren onop wet, kitail pahn sukuhlki sapwellime mehn kahlemeng kaselel kan en kihkihwei oh pil dahme kitail kak wia ma kitail pehm me meteikan sohte kin kasalehda arail kalahnganki dahme kitail kin wiahiong irail. Met pahn sewese kitail en pousehlahte kihkihwei oh eri ahneki peren laud.

 KAHLEMENGIH SAPWELLIMEN SIOHWA KADEK SAPAN

5. Soahng dah kan me Siohwa ketikihong kitail?

⁵ Ia ekei ahl kan me Siohwa kin ketin kasalehda kadek sapan? Medewehla ekei karasaras. Siohwa kin ketikihong kitail dahme kitail anahne. Mwein kitail sohte pahn ahnsou koaros ahneki kepwe tohto, ahpw pwehki Siohwa, pali laud en kitail ahneki dahme kitail anahne. Karasepe, e kin ketin kahrehda en mie kanatail mwenge, likou, oh atail wasahn kousoan. (Mel. 4:8; Mad. 6:​31-33; 1 Tim. 6:​6-8) Siohwa sohte ketikihong kitail mepwukat pwehki e ketin anahne wia met. Eri dahme kahrehda Siohwa ketin wiahiong kitail met?

6. Dahme kitail sukuhlkihsang Madiu 6:​25, 26?

⁶ Siohwa ketikihong kitail dahme kitail anahne pwehki e ketin poakohng kitail. Medewehla sapwellimen Sises mahsen kan nan Madiu 6:​25, 26. (Wadek.) Sises ketin doadoahngki karasaras kan sang kepikipik. E ketin doadoahngki karasaras en menpihr kan, oh mahsanih: “Re sohte kin kamwarak werentuhke de dolung de kin kihpene nan imwen nahk.” Ahpw, tehk dahme e mahsanih mwuri: “Samamwail nanleng kin ketin katungoale irail.” Sises eri keinemwe: “Kumwail sou kesempwalsang irail?” Ia mehn kasukuhlo? Sapwellimen Siohwa ladu lelepek kan uhdahn kesempwal ong ih laudsang mahn kan. Ma Siohwa kin ketin apwalih mahn akan, kitail kak kamehlele me e pahn pil ketin apwalih kitail! Duwehte pahpa limpoak men, Siohwa kin ketin apwalih sapwellime peneinei pwehki e ketin poakohng irail.—Mel. 145:16; Mad. 6:32.

7. Ia ehu ahl me kitail kak kahlemengih sapwellimen Siohwa kadek sapan? (Pil kilang kilel.)

⁷ Duwehte Siohwa, kitail kak kihong meteikan dahme re anahne pwehki kitail poakohng irail. Karasepe, mie riomw Kristian men me ke ese me anahne mwenge de likou? Siohwa kak ketin doadoahngkin uhk ken sewese riomw Kristiano. Sapwellimen Siohwa aramas akan pil kin mwadang en sewese meteikan nan ahnsou apwal kan. Karasepe, erein soumwahu lusulus en COVID-19, riatail Kristian kan kin ehukihong meteikan mwenge, likou, oh soahng teikan me re anahne. Me tohto pil kin kihda sawas en mwohni ong doadoahk en sampah pwon. Met kin sewese utung riatail kan nan sampah pwon me anahne sawas pwehki kahpwal laud ehu. Riatail Kristian kadek pwukat kin idawehn Ipru 13:16: “Kumwail dehr manokehla wia me mwahu oh  ehukihong meteikan dahme kumwail ahneki, pwe Koht kin ketin kupwurperenki soangen meirong pwukat.”

8. Ni ahl dah kan me kitail kin paiekihda sapwellimen Siohwa kehl? (Pilipai 2:13)

⁸ Siohwa kin ketikihda kehl. Siohwa ketin sapwellimanki kehl oh kupwurki ketikihong sapwellime ladu lelepek kan. (Wadek Pilipai 2:13.) Mie pak ke kapakapki kehl me laud pwehn soikala kasongosong ehu? De mie pak ke kapakapki kehl pwehn dadaur pahn kahpwal laud ehu? Ele ke pil kapakapki kehl pwehn wia soahng kan me ke anahne wia erein rahno pwon. Ni ahnsou me ke kapakapki kehl eh pasapengla, ke kak pwungki dahme wahnpoaron Pohl ntingihdi: “I kakohng mehkoaros pwehki I ahneki kehl sang rehn me ketikihong ie manaman.”—Pil. 4:13.

9. Ia duwen atail kak kahlemengih Siohwa eh kin ketin sapanki sapwellime kehl? (Pil kilang kilel.)

⁹ Kitail sohte ahneki kehl laud duwehte Siohwa oh kitail sohte kak kihong ahn meteikan kehl duwehte me e kin ketin wia. Ahpw kitail kak kahlemengih sang ni atail doadoahngki atail kehl en sewese meteikan. Karasepe, kitail kak sewese riatail Kristian kan me mahlahr de soumwahu oh apwalih imwarail kan de netinet ong irail. Ma kitail kak, kitail kak sewese kamwakele oh apwalih Wasahn Kaudok. Ma kitail doadoahngki atail kehl en wia mepwukat, kitail kak wiahiong riatail Kristian kan soahng mwahu tohto.

10. Ia duwen atail kak kakehlaka meteikan sang ni dahme kitail nda?

¹⁰ Dehr pil manokehla me soahng kan me ke nda kak kangoange emen. Ke kak medewehla emen me pahn perenkihda omw ndaiong me ke kalahnganki dahme e kin wia? Mie emen me ke ese me anahne kangoang? Ma iei, tehk mwahu me aramaso ese me ke kin nsenohki. Ke kak mwemweitla reh, delepwohnla, de kadarala kisinlikou, email, de mwein text. Ke dehr nohn pwunodki dahme ke pahn nda. Ele koasoi kadek keite me riomw Kristiano anahne pwehn kolokolete eh lelepek oh ahneki madamadau pwung.—Lep. Pad. 12:25; Ep. 4:29.

11. Ia duwen Siohwa eh kin ketin doadoahngki sapwellime erpit?

¹¹ Siohwa kin ketikihda erpit. Tohnpadahko Seims ntingihdi: “Ma emen rehmwail sohte ahneki erpit, a en usehlahte pekipeki rehn Koht, pwe e kin ketin sapankihong aramas koaros erpit.” (Seims 1:5) Met kasalehda me Siohwa sohte kin ketin kelehpwki sapwellime erpit. Ni kadek, e kin ketin ehukihong meteikan. Seims pil koasoia me ni Siohwa eh kin ketikihda erpit, e kin ketin wia met ni eh “sohte  kin ketin rapahki sapwung.” E sohte ketin kupwurki kitail en suwedki ni atail kin peki reh kaweid. Ni mehlel, e ketin kupwurki kitail en peki reh.—Lep. Pad. 2:​1-6.

12. Ahnsou mwahu dah kan me kitail ahneki pwehn ehukihong meteikan dahme kitail ese?

¹² Ia duwen kitail? Kitail kak kahlemengih Siohwa sang ni atail ehukihong meteikan atail erpit? (Mel. 32:8) Sapwellimen Siohwa aramas akan ahneki ahnsou mwahu tohto en ehukihong meteikan dahme re sukuhlki. Karasepe, kitail kalapw kasukuhlih me kapw kan nan kalohk. Ni kanengamah, elder kan kin sewese sounsawas kan oh brother papidaisla kan ren sukuhlki ia duwen arail kak apwalih arail pwukoa kan nan mwomwohdiso. Oh riatail Kristian kan me koahiek en kauwada oh apwalih Wasahn Kaudok kan kin kaiahne meteikan ren wia doadoahk kan me kin wiawi nan sapwellimen Siohwa pwihn.

13. Ia duwen atail kak kahlemengih mwomwen Siohwa eh kin ketin ehukihong meteikan erpit?

¹³ Song en kahlemengih Siohwa ni ahnsou me ke kaiahne meteikan. Taman me Siohwa kin ketin perenki ehukihong meteikan sapwellime erpit. Eri, kitail kin ehukihong meteikan dahme kitail ese ong irail kan me sukusukuhlki. Kitail sohte kin pweiek en kasukuhlih meteikan pwehki kitail masak aramaso me kitail kasukuhlih de kihsang atail pwukoa. Ekei pak aramas akan kin medewe me pwehki sohte me kaiahneirailda, irail sohte pahn kaiahne meteikan. Sapwellimen Siohwa aramas akan en dehr ahneki madamadau wet. Ahpw kitail en perenki ehukihong meteikan dahme kitail ese oh wia uwen atail kak en kaiahne meteikan. (1 Des. 2:8) Kitail men irail en “koahiekla pwe ren padahkihong meteikan.” (2 Tim. 2:​1, 2) Ni kadek, ma kitail koaros ehukihong meteikan dahme kitail ese, kitail oh meteikan pahn peren oh ahneki erpit.

NI ARAMAS AKAN AR SOHTE KASALEHDA KALAHNGAN

14. Ia duwen pali laud en aramas akan ar mwekidki atail kasalehda kadek?

¹⁴ Ni ahnsou me kitail kin kasalehda kadek, ahpw mehlel ong riatail Kristian kan, irail kin kalapw kasalehda arail kalahnganki. Irail kakete kadarohng kitail kisinlikou en kalahngan de kasalehda arail kalahngan ni soangen ahl teikan. (Kol. 3:15) Atail kin alehdi soangen kalahngan pwukat kin kalaudehla atail peren.

15. Dahme kitail en tamataman ni ekei ar sohte kin kasalehda arail kalahngan?

¹⁵ Ahpw ekei pak aramas akan sohte kin kalahnganki dahme kitail kin sewesehkin irail. Ekei pak, e mwomwen me meteikan sohte nsenohki dahme kitail kin wia pwehn sewese irail, de pohnese ia uwen atail kin doadoahngki ahnsou laud, kehl, oh mwohni, pwehn wiahiong irail mehkot. Ma met kin wiawi, ia duwen atail kak kolokolete atail peren de dehr mworusala? Tamataman atail iren Paipel en iren onop wet, Wiewia 20:35. Uwen peren me kitail ahneki ni ahnsou me kitail kin kisekise meteikan sohte poahsoandahsang uwen aramas ar kin kalahnganki dahme kitail kin wia. Kitail kak pilada en kihkihwei ni peren mehnda ma meteikan sohte kin kasalehda arail kalahngan. Ia duwen? Medewehla ekei ahl.

16. Dahme kak sewese kitail en kihkihweite ni peren?

¹⁶ Tamataman me ni omw kisekise meteikan, ke kin kahlemengih Siohwa. E kin ketikihong aramas akan soahng mwahu kan mehnda ma irail kin kalahnganki de soh. (Mad. 5:​43-48) Siohwa ketin inoukihda me ni atail pil kin kisekise meteikan ‘ahpw dehr kasik ren kapwuredohng kitail, ketingpatail pahn laud mehlel.’ (Luk 6:35). Eri ke dehr mworusala ma aramas akan sohte kin ahnsou koaros kalahngan ong uhk. Tamataman me Siohwa pahn  ketin ahnsou koaros katingihkin uhk soahng mwahu me ke sewesehki meteikan oh pwehki ke kin “perenki kihwei.”—Lep. Pad. 19:17; 2 Kor. 9:7.

17. Ia kahrepe keieu kesempwal me kitail men kisekise meteikan? (Luk 14:​12-14)

¹⁷ Pil ehu me kitail kak wia pwehn kahlemengih Siohwa ni atail kin kihkihwei, iei ni atail kapwaiada dahme Sises mahsanih nan Luk 14:​12-14. (Wadek.) E sohte sapwung en kadekohng meteikan me kak wiahiong kitail soahngohte. Ahpw, ia duwen ma kitail tehkada me kitail kin kalapw kisekise meteikan pwehki kitail kasik me kitail pahn alehsang irail mehkot? Ma ih met me kin wiawi, song wia dahme Sises mahsanih. Kitail kak kadekohng emen me kitail ese me sohte pahn kak kapwurehiong kitail mehkot. Eri kitail pahn peren pwehki kitail kin kahlemengih Siohwa. Ma kitail ahneki soangen madamadauohte, met pahn pil sewese kitail en ahnekihte peren ni meteikan ar sohte kasalehda arail kalahngan.

18. Dahme kitail en tehk mwahu pwehn dehr wia, oh dahme kahrehda?

¹⁸ Dehr medewe me meteikan sohte kin kasalehda kalahngan. (1 Kor. 13:7) Ma meteikan sohte kin kasalehda arail kalahngan, kitail kak pein idek rehtail: ‘Irail uhdahn sohte kin kasalehda kalahngan, de irail kin manokehla wia met?’ Mwein mie kahrepe teikan me kahrehda irail sohte kin kasalehda arail kalahngan. Mwein ekei kin uhdahn kalahnganki ahpw apwalki kasalehda met. Mwein irail kin namenengki meteikan ar kin sewese irail, ahpw mehlel ma irail me kin sewese meteikan mahso. Ahpw, ma kitail uhdahn poakohng riatail Kristian kan, kitail sohte pahn medewehkin irail soahng suwed kan oh kin kihkihwei ni peren.—Ep. 4:2.

19-20. Dahme pil kak sewese kitail en perenki kihkihwei? (Pil kilang kilel.)

¹⁹ En kanengamah. Nanmwarki loalokongo Solomon, ntingihedi: “Kesehwei konomw pilawa pohn pihl kan, pwe mwurin rahn tohto ke pahn pwurehng diar.” (Ekl. 11:​1, NW) Mahsen  pwukat padahkihong kitail me ekei pak aramas akan pahn kasalehda arail kalahngan “mwurin rahn tohto.” Ih met me wiawihong emen sister.

²⁰ Sounpar tohto samwalahro, en sounapwalih me kin seiloak eh pwoud ntingihda kisinlikou en kangoang ehu ong sister men me ahpwtehn papidaisla. Nan nah kisinlikouo, e kasalehda uwen kesempwal en lelepekohngete Siohwa. Mpen sounpar waluh mwuri, sistero sapengala nan kisinlikou ehu, oh koasoia: “Ke sohte pahn ese met ahpw I uhdahn men ken ese uwen omw sewese ie laud sounpar samwalahr ko.” E pil koasoia; “Ke koasoia soahng kadek kan oh I sohte manokehla iren Paipel me ke koasoiao.” a Mwurin eh kawehwehda ekei kahpwal kan me e kin lelohng, sistero koasoia: “Ekei pak I kin mente uhdihsang papah Siohwa. Ahpw iren Paipel me ke ntingihdio sewese ien dehr uhdi. Erein sounpar waluho, sohte mehkot me sewese ie duwehte noumw kisinlikouo oh iren Paipel me ke ehukihong ie.” Song medewehla ia uwen peren me ahn sounapwalih me kin seiloak eh pwoud ahneki ni ahnsou me e alehdi kisinlikou wet “mwurin rahn tohto”! Ele mwurin ahnsou werei, kitail pil kin ale soangen kisinlikou en kalahngan wet sang rehn emen mwurin atail wiahiong ih soahng mwahu tohto.

21. Dahme kahrehda ke koasoanehdi teng en pousehlahte kahlemengih sapwellimen Siohwa kadek sapan?

²¹ Duwehte me kitail koasoiapenehr, Siohwa ketin kapikkitailda en ahneki koahiek tohrohr ehu. Siohwa ketin kapikkitailda en perenki kihkihwei sang atail kin ale. Kitail kin nsenamwahu ni ahnsou me kitail kin kak sewese riatail Kristian kan. Oh kitail kin peren ni arail kin kasalehda me irail kalahnganki. Ahpw, mehnda ma irail kalahnganki de soh, kitail kak perenki me kitail wia dahme pwung. Dehr manokehla me sohte lipilipil dahme ke kin kihwei, “KAUN-O pahn kak en kasapahldohng komwi uwe ieu me laudsang!” (2 Kron. 25:9) Eri dahme ke kin kihong meteikan sohte kak laudsang dahme Siohwa kak ketikihong uhk. Oh ni Siohwa eh kin katingih kitail, ih met me keieu laud. Eri, kitail en koasoanehdi teng en pousehlahte kahlemengih Samatailo nanleng me kin ketin kadek sapan.