1-2. (a) Ia irair en Kristian ko nan Sudia ni ahnsou me wahnpoaron Pohl ntinglahng irail? (b) Dahme kahrehda kisinlikowo uhdahn konehng ahnsowo?

 MWURIN Sises pwoula nan pahr 33, Kristian kan nan Serusalem oh Sudia lelohng kahpwal tohto. Mwurinte mwomwohdisohn Kristian wiawihda, irail kin lelohng kalokolok laud. (Wiewia 8:1) Mpen sounpar 20 mwuri, irail lelohng lokolok laud pwehki duhpek oh semwehmwe. (Wiewia 11:​27-30) Ahpw erein ahnsou ehu mpen pahr 61, Kristian ko sohte lelohng kalokolok duwehte me pahn wiawihong irail mwuhr. Erein ahnsou meleileio, irail alehdi kisinlikou ehu sang wahnpoaron Pohl—kisinlikou ehu me irail uhdahn anahne pwehn kaunopada ong dahme pahn wiawi mwuhr.

² Kisinlikowo ong mehn Ipru ko uhdahn konehng ahnsowo pwehki popohl me Kristian ko ahneki sohte pahn mihmi werei. Pohl kihda kaweid mwahu me pahn sewese Kristian ko en dadaur pahn kahpwal me re pahn kereniong lelohng. Kasohrlahn koasoandi en mehn Suhs ko me Sises ketin kohpadahr pahn kereniongehr wiawi. (Luk 21:20) Pohl oh Kristian kan nan Sudia sohte uhdahn ese iahd me kasohralao pahn wiawi. Ahpw irail kak doadoahngki ahnsou me luhweo pwehn kaunopada pein irail sang ni arail kakehlakahla arail pwoson oh dadaurete.—Ipru 10:25; 12:​1, 2.

3. Dahme kahrehda Kristian kan rahnwet anahne tehk mwahu pwuhken Ipru?

³ Kitail pahn kereniong lelohng ahnsou apwal ehu me uhdahn  apwal sang me wiawihong Kristian en Ipru ko. (Mad. 24:21; Kaud. 16:​14, 16) Eri kitail pahn koasoiapene ekei kaweid mwahu kan me Siohwa ketikihda ong Kristian ko me pil kak sewese kitail.

“NANTIHONGETE KOAHIEKLA”

4. Kahpwal dah kan me Kristian en mehn Suhs ko ahneki? (Pil kilang kilel.)

⁴ Mehn Suhs kan me wiahla Kristian kei anahne wiahda wekidekla laud kan, oh met sohte mengei. Erein ahnsou ehu, mehn Suhs kan kin wia sapwellimen Siohwa aramas pilipilda kei. Erein sounpar tohto, Serusalem wia wasa ehu me keieu kesempwal. Nanmwarki me wia wiliepen Siohwa kin kakaun sang wasao. Oh aramas akan me kin men kaudokiong Siohwa kin wia met ni tehnpas sarawio. Mehn Suhs lelepek kan koaros kin idawehn Kosonned en Moseso oh kosonned kan me arail kaunen pelien lamalam ko kin padahngki. Mie kosonned kan me pid duwen mwenge, sirkumsais,oh mwomwen arail wiewia ong irail kan me kaidehn mehn Suhs. Ahpw mwurin Sises eh pwoula, Siohwa sohla ketin kupwurki meirong kan me kin wiawi nan tehnpas sarawio. Eri met apwal ong mehn Suhs kan me wiahla Kristian pwehki irail ahnlahr idawehn Kosonnedo. (Ipru 10:​1, 4, 10) Kristian koahiek kan, duwehte wahnpoaron Piter, pil apwalki wiahda wekidekla pwukat. (Wiewia 10:​9-14; Kal. 2:​11-14) Pwehki soangen wekidekla kapw pwukat, kaunen pelien lamalam en mehn Suhs kin kaloke laud Kristian ko.

5. Dahme Kristian kan anahne pere irail sang?

⁵ Kristian mehn Ipru ko lelohng uhwong sang pwihnen aramas riau. Ehu pwihn iei kaunen pelien lamalam en mehn Suhs kan me kin wiahki me Kristian ko kesehlahr arail pelien lamalamo. Pwihn teio iei ekei nan mwomwohdiso me kin ngihtehtehki me Kristian kan anahne idawehnte Kosonned en Moseso, mwein pwehki re sohte men lelohng kalokolok. (Kal. 6:12) Dahme kak sewese Kristian lelepek kan en tengediongete padahk mehlel?

6. Dahme Pohl kangoangehki ienge Kristian kan en wia? (Ipru 5:14–6:1)

 ⁶ Nan nah kisinlikou ong mehn Ipru ko, Pohl kangoangehki rie Kristian ko en onopki oh doudouloale Mahsen en Koht. (Wadek Ipru 5:14–6:1.) Pohl doadoahngki ekei ire kan nan Palien Paipel ni Lokaiahn Ipru oh kawehwehda dahme kahrehda mwomwen Kristian kan ar kaudokiong Siohwa uhdahn mwahusang mwomwen ahn mehn Suhs ko kin kaudokiong. a Pohl kangoange Kristian kan ren kalaudehla arail ese oh wehwehki padahk mehlel sang nan Paipel pwe irail en kak kasawihada padahk likamw kan oh soikala.

7. Soangen kahpwal dah kan me kitail ahneki rahnwet?

⁷ Rahnwet, mie irail kan me kin kihpeseng padahk de soahng kan me kin uhwong dahme Siohwa ketin mahsanih me mehlel oh pwung. Ekei aramas kin kalapw uhwong atail padahk kan me poahsoankihda Paipel me pid tiahk en wia nsenen pwopwoud oh kin nda me dene kitail wia aramas lemei kei oh lipilipilki aramas. Mwomwen ahn aramas akan uhwong sapwellimen Siohwa madamadau kin wie lalaudla. (Lep. Pad. 17:15) Eri, kitail anahne kakehlailihala atail kak kasawihada oh soikala madamadau sapwung kan me sounuhwong kan kin doadoahngki pwehn kahrehiong kitail en sohla eimah de pil uhdihsang papah Siohwa.—Ipru 13:9.

8. Dahme pahn sewese kitail en nantihongete koahiekla nin duwen Kristian kei?

⁸ Pohl ndaiong mehn Ipru ko ren nantihongete koahiekla nin duwen Kristian kei, oh kitail pil anahne wia duwehte. Met wehwehki me kitail anahne onopki kanahieng Paipel pwe kitail en esehla mwahu Siohwa oh sapwellime madamadau. Kitail anahne pousehlahte wia met pil mwurin atail papidaisla. Sohte lipilipil ia uwen werei me kitail mi nan padahk mehlel, kitail koaros anahne kaukaule wadek oh onopki Mahsen en Koht. (Mel. 1:2) En kaukaule onopki Paipel pahn sewese kitail en kakehlakahla atail pwoson, irair ehu me Pohl ndaiong Kristian en Ipru ko me re anahne ahneki.—Ipru 11:​1, 6.

“AHNEKI PWOSON PWE EN KOLOKOL ATAIL MOUR”

9. Dahme kahrehda Kristian mehn Ipru ko anahne pwoson laud?

⁹ Kristian mehn Ipru ko anahne pwoson laud pwe ren pitsang kahn kamakam me pahn wiawi nan Sudia. (Ipru 10:​37-39) Sises mahsanihong sapwellime tohnpadahk ko me ni ahnsou me re kilang karis en sounpei kan kapilpene Serusalem, irail anahne tangala ni nahna kan. Sapwellime kaweido kowohng Kristian ko koaros, sohte lipilipil ma re mi nan kahnimwo de nansapw en Sudia. (Luk 21:​20-24) Mahso, ni karis en sounpei ehu ar kolahng mahweniong wasa ehu, aramas akan me mi nansapw en wasao kin kalapw tangala nan kahnimwo pwe kehl en kahnimwo en pereirailla. En tangala ni nahna kan mwomwen wia mwekid soaloalokong ehu, kahrehda Kristian ko anahne pwoson laud pwehn peikiong Sises.

10. Dahme pwoson laud pahn kamwakid Kristian kan en wia? (Ipru 13:17)

¹⁰ Kristian mehn Ipru ko pil anahne likih irail kan me Sises ketin doadoahngki pwehn kaweid mwomwohdisou. Irail pwukat me kin tiengla mwowe ele kin kihda kaweid oaritik kan ong iahd me irail en tang oh ia duwen arail pahn wia met. (Wadek Ipru 13:17.) Wahnpoaron Pohl ndaiong rie Kristian kan  ‘en peikiong irail kan me kin tiengla mwohrail.’ Pohl sohte ndinda me ren peikiong elder kan pwehki re anahne wia met, ahpw pwehki re kin likih elder ko. Eri, Kristian mehn Ipru ko anahne kalaudehla arail likih elder ko oh arail kaweid kan mwohn kahn kamakamo wiawi. Ma irail kin peikiong ahn elder ko kaweid kan erein ahnsou sohte apwal, e pahn mengei ong irail en peikiong irail ni ahnsou apwal.

11. Dahme kahrehda en ahneki pwoson laud kesempwal ong Kristian kan rahnwet?

¹¹ Duwehte Kristian mehn Ipru ko, kitail pil anahne pwoson. Kitail mi ni ahnsou ehu me pali laud en aramas akan sohte kin kamehlele me imwin koasoandi en mwehi wet kerendohr. Irail pil kin kepitki atail kamehlele met. (2 Pit. 3:​3, 4) Patehng met, mendahki Paipel kihda ire kei duwen dahme pahn wiawi erein kahn kamakam kohwahlapo, miehte soahng tohto me kitail sohte ese. Kitail anahne ahneki pwoson laud me imwin koasoandi en mwehi wet pahn wiawi ni ahnsawi oh me Siohwa pahn ketin apwalih kitail.—Apak. 2:3.

12. Dahme pahn sewese kitail en pitsang kahn kamakam kowahlapo?

¹² Kitail pil anahne kakehlailihala atail pwoson ‘ladu lelepek oh loalokongo’ me Siohwa kin ketin doadoahngki pwehn kaweid kitail rahnwet. (Mad. 24:45) Ni kahn kamakam kowahlapo eh pahn tepida, kitail kakete alehdi kaweid oaritik kan me pahn doarekitailla, duwehte me Kristian mehn Ipru ko alehdi ni ahnsou me sounpei en Rom ko kapilpene Serusalem. E uhdahn kesempwal kitail en likih irail kan me kin tiengla mwowe nan sapwellimen Siohwa pwihn. Ma kitail sohte likih oh peikiong arail kaweid ahnsou wet, e pahn apwal en peikiong kaweid kan me kitail pahn alehdi erein kahn kamakam kowahlapo.

13. Dahme kahrehda kaweid me kileldi nan Ipru 13:5 uhdahn konehng?

¹³ Erein arail awiawih ahnsoun tang, Kristian mehn Ipru ko pil anahne soikala “limpoak en mwohni” oh nsenohkihte arail kin papah Siohwa. (Wadek Ipru 13:5.) Ekei irail lelohngehr kahpwal en duhpek oh semwehmwe. (Ipru 10:​32-34) Mendahki mwoweo irail kin men dadaur pahn kahpwal laud pwehki rongamwahwo, ele ekei tepidahr medewe en koadoahkihada mwohni laud pwehn pereirailsang keper de pil semwehmwe. Ahpw mwohni sohte pahn doareirailla ni ahnsou me Serusalem kasohrala. (Seims 5:3) Ni mehlel, mehmen me kin poakohng kepwe kan ele pahn apwalki en kohkohsang imwarail kan oh arail kepwe kan.

14. Ia duwen pwoson laud eh kak kamwakid atail pilipil ong kepwe kan ahnsou wet?

¹⁴ Ma kitail ahneki pwoson laud me ni ahnsou keren, Siohwa pahn ketin kasohrehla sampah suwed wet, eri kitail sohte pahn medewe me naineki mwohni laud de ahneki kepwe tohto iei me keieu kesempwal. Nan kahn kamakam kohwahlapo, mwohni sohla pahn mie katepe. Paipel mahsanih me aramas akan pahn “kesehla neirail kohl oh silper kan pohn ahl akan” pwehki re pahn esehda me “kohl de silper sohte kak doareirailla ni ahnsou me KAUN-O pahn ketikidohng pohrail sapwellime engieng.” (Esek. 7:19) Kitail en dehr nsenohkihte koadoahkihada mwohni tohto, ahpw kitail en wiahda pilipil kan me kak sewese kitail en apwalih pein kitail oh atail peneinei oh pil kak papahte Siohwa. E sohte pahn wia elen loalokong en wiahda pweipwand me sohte anahn de doadoahngki atail ahnsou laud pwehn apwalih atail kepwe kan. Kitail pil anahne kanaiehng en dehr wiahkihla atail kepwe kan me keieu kesempwal nan  atail mour. (Mad. 6:​19, 24) Ni atail kerekerenlahng imwin koasoandi wet, kitail pahn anahne pilada ma kitail pahn koapworopworki Siohwa de atail kepwe kan.

“KUMWAIL EN DADAURETE”

15. Dahme kahrehda Kristian mehn Ipru ko uhdahn anahne dadaurete?

¹⁵ Kristian mehn Ipru kan anahne dadaurete ni arail kin papah Siohwa pwehki irair en Sudia susuwedla. (Ipru 10:36) Mendahki ekei irail lelohng kalokolok laud mahso, tohtohn irail sohte lelohng met. Eri Pohl katamankihong irail en kaunopada ong pil ekei kalokolok kan oh pil onopada en lelepekte lao mehla, duwehte me Sises ketin wia. (Ipru 12:4) Mehn Suhs tohto uhdahn lemei oh lingeringerki aramas tohto ar wialahr Kristian kei. Sounpar keite mwowe, pwihn en aramas lemei ehu uhwongada Pohl ni eh kalokalohk nan Serusalem. Mehn Suhs daulih 40 “kahukihla me re pahn riahla ma re pahn kang de nim mehkot mwohn arail kemehla Pohl.” (Wiewia 22:22; 23:​12-14) Mendahki aramas akan pahn kailongki oh kaloke irail, Kristian ko anahne pousehlahte tuhpene ong kaudok, kalohki rongamwahwo, oh ahnekihte pwoson laud.

16. Ia duwen kisinlikowo ong mehn Ipru ko eh kak sewese kitail en ahneki madamadau pwung duwen kalokolok? (Ipru 12:7)

¹⁶ Dahme pahn sewese Kristian mehn Ipru ko en dadaur pahn uhwong? Pohl men sewese Kristian kan en kilang kamwahupen en dadaurete pahn kahpwal kan. E kawehwehda me Koht ele ketin mweidohng arail pwoson en lelohng kasongosong pwehn kaiahne irail. (Wadek Ipru 12:7.) Soangen kaiahn wet kak sewese irail en kakairada de kamwahwihala arail irair en Kristian kan me kin kaperenda Siohwa. Ni arail kin medemedewehte soahng mwahu kan me kohsang kahpwal pwukat, e pahn mengei ong Kristian mehn Ipru ko en dadaurete.—Ipru 12:11.

17. Dahme Pohl sukuhlki duwen en dadaur pahn kalokolok?

 ¹⁷ Pohl kangoangehki Kristian mehn Ipru ko ren eimah oh dehr luwetala ni arail lelohng kahpwal kan. E warohng kaweidihkin irail met. Mwohn eh wiahla Kristian men, pein ih kin kaloke Kristian kan oh e pil kilangehr uwen laud en aramas akan ar kin wiakauwe irail. E pil ese ia duwen eh pahn dadaur pahn kalokolok. Met pwehki pein ih lelohng soangsoangen uhwong kan mwurin eh wiahla Kristian men. (2 Kor. 11:​23-25) Eri Pohl uhdahn esehla mwahu dahme anahn pwehn dadaurete. E katamankihong Kristian ko me ni arail kin dadaur pahn kahpwal kan, irail en dehr koapworopworki pein irail ahpw ren koapworopworki Siohwa. Pohl kak nda ni eimah: “Siohwa iei sawasepei; I sohte pahn masak.”—Ipru 13:6.

18. Dahme kitail anahne ese duwen ahnsou kohkohdo pwe kitail en kak dadaur pahn kalokolok?

¹⁸ Ekei riatail Kristian kan kin dadaur pahn kalokolok ahnsou wet. Ehu ahl me kitail kak sewese irail iei sang ni atail kin kapakapkin irail. Oh ekei pak kihong irail dahme irail anahne. (Ipru 10:33) Ahpw Paipel mahsanih me “koaros me men mourki poadidiong Koht ni arail kin miniminiong Krais Sises pil pahn lelohng kalokolok.” (2 Tim. 3:12) Pwehki met, kitail koaros anahne kaunopada ong dahme pahn wiawi ahnsou kohkohdo. Kitail en doulahte likih Siohwa ni unsek, oh uhdahn kamehlele me e pahn ketin sewese kitail en dadaurete pahn kahpwal sohte lipilipil me kitail pahn lelohng. Ni ahnsou me konehng, e pahn ketin kasaledekihala me kin lelepek ong ih sang kalokolok.—2 Des. 1:​7, 8.

19. Dahme kitail kak wia pwehn kaunopkitailda ong kahn kamakam kowahlapo? (Pil kilang kilel.)

¹⁹ Ei mehlel, nein Pohl kisinlikowo ong mehn Ipru ko sewese tepin Kristian ko en kaunopada ong kahpwal kan me irail pahn lelohng. Pohl kangoange rie Kristian ko en kalaudehla arail esehla oh wehwehkihla Mahsen en Koht. Arail wia met pahn sewese irail en kasawihada oh soikala padahk kan me kakete kaluwetehla arail pwoson. E kangoange irail en kakehlakahla arail pwoson pwe irail en kin mwadang idawehn sapwellimen Sises kaweid kan oh kaweid en irail kan me kin tiengla mwowe nan mwomwohdiso. Oh e sewese Kristian ko en dadaur pahn kahpwal kan sang ni arail kin kilangwohng kahpwal ko nin duwen kaiahn ehu sang rehn Samarail limpoako. Kitail en pil doadoahngki kaweid wet sang nan Paipel. Eri, kitail pahn kak dadaur ni lelepek lao lel ni imwi.—Ipru 3:14.