1-2. Dahme kin kahrehiong sapwellimen Siohwa ladu kan en peren? (Seims 1:​22-25)

 SIOHWA oh sapwellime Ohlo ketin kupwurki kitail en peren. Melkahka 119:2 mahsanih: “Meid pai irail akan me kin kapwaiada sapwellime kosonned kan, oh kin peikiong ni kapehd unsek.” Sises pil mahsanih: “Meid peren irail me kin rong mahsen en Koht oh kapwaiada!”—Luk 11:28.

² Nin duwen sapwellimen Siohwa tohnkaudok kei, kitail wia aramas kei me peren. Dahme kahrehda? Mie kahrepe tohto me kitail ahneki, ahpw ehu kahrepe kesempwal iei me kitail kin kaukaule wadek Mahsen en Koht oh nantihong kapwaiada dahme kitail sukuhlki.—Wadek Seims 1:​22-25.

3. Ia duwen atail kin paiekihda ni atail kapwaiada dahme kitail wadek nan Mahsen en Koht?

³ Mie ekei ahl me kitail kin paiekihda atail “peikiong mahseno ahnsou koaros.” Keieu, kitail ese me met iei ehu kahk kesempwal pwe kitail en kaperenda Siohwa. Atail ese met kin kahrehiong kitail en peren. (Ekl. 12:13) Oh pil ni atail kin idawehn kaweid me mi nan Mahsen en Koht, kitail kin kamwahwihala atail nanpwungmwahu rehn irail kan nan atail peneinei oh nan atail mwomwohdiso. Ele met wiawihong uhk. Patehng met, kitail kin soikala kahpwal tohto me kin lelohng irail kan me sohte kin idawehn sapwellimen Siohwa kehkehlik kan. Ih met me Nanmwarki Depit koasoia. Mwurin eh koasoia sapwellimen Siohwa kosonned kan, koasoandi kan, oh  kadeik kan nan eh koulo, e koasoia: “I kin ale ketingpen ei kin peikiong sapwellimomwi mahsen kan.”—Mel. 19:​7-11.

4. Dahme kahrehda e sohte kin ahnsou koaros mengei en kapwaiada dahme kitail wadek nan Mahsen en Koht?

⁴ E sohte kin ahnsou koaros mengei en wadek Mahsen en Koht oh kapwaiada dahme kitail sukuhlki? Mendahki kitail kin kedirepw, kitail anahne wiahda ahnsou en wadek oh onopki Paipel pwehn wehwehki dahme Siohwa ketin kupwurki kitail en wia. Eri kitail pahn koasoiapene ekei soahng kan me kak sewese kitail en kaukaule wadek. Kitail pahn pil koasoiapene dahme pahn sewese kitail en medewe dahme kitail wadek oh kilang ia duwen atail kak kapwaiada dahme kitail sukuhlki.

WIAHDA AHNSOU EN WADEK MAHSEN EN KOHT

5. Pwukoa dah kan me kin kahrehiong kitail en kedirepwla?

⁵ Pali laud en sapwellimen Siohwa aramas akan kin uhdahn kedirepw. Kitail kin doadoahngki ahnsou laud en apwalihala soahng kan me Paipel mahsanih me kesempwal. Karasepe, pali laud en kitail kin doadoahk en mwohni pwehn apwalih pein kitail oh atail peneinei. (1 Tim. 5:8) Kristian tohto kin apwalih arail peneinei me soumwahu de mahlahr. Oh kitail koaros anahne apwalih pein atail roson, oh met kin anahne ahnsou laud. Pil mie soahng kesempwal teikan me kitail anahne wia nan mwomwohdiso. Ehu pwukoa kesempwal iei en wia uwen atail kak en kalohki rongamwahwo. Pwehki soangen pwukoa pwukat koaros me ke ahneki, ia duwen omw kak wiahda ahnsou en kaukaule wadek Paipel, doudouloale dahme ke wadek, oh kapwaiada dahme e mahsanih?

6. Ia duwen omw kak tehk mwahu me ke kin wadek Paipel? (Pil kilang kilel.)

⁶ Wadawad en Paipel iei me “keieu kesempwal” ong kitail Kristian kan, eri kitail anahne tehk mwahu me kitail kin wia met. (Pil. 1:10) Tepin irelaud en Melkahkao koasoiahki aramas pai kan: “Re kin perenki peikiong  Kosonned en KAUN-O, oh medemedewe nan kapehdihr nin rahn oh nipwong.” (Mel. 1:​1, 2) E sansal me kitail anahne wiahda ahnsou en wadek Paipel. Ahnsou dah me keieu mwahu en wadek Paipel? E kin pidada ahnsou me keieu mwahu ong emenemen kitail. Ahpw dahme keieu kesempwal iei me kitail en pilada ahnsou ehu me pahn sewese kitail en kaukaule wadek Paipel. Emen brother me adaneki Victor koasoia: “I kin perenki wadek Paipel nimenseng. Mendahki I sohte kin perenki mwadang pirida, ih ahnsowo me sohte mehkot me kak kedirepwe ie. E kin mengei ong ie en tehk mwahu dahme I wadek.” Ele met kin wiawihong uhk. Pein idek rehmw, ‘Ahnsou dah me keieu mwahu ong ie en wadek Paipel?’

DOUDOULOALE DAHME KE WADEK

7-8. Dahme kak kahrehiong kitail en sohte paiekihda dahme kitail wadek? Menlau kihda ehu karasaras.

⁷ Ma ke koasoanehdi ahnsou en wadek Paipel, mie mehkot me ke anahne kanahieng. Mie pak me ke wadek mehkot oh mwurinte mwo ke manokehla? Met kin wiawihong kitail koaros. Met pil kak wiawi ni atail wadek Paipel. Karasepe, ele ekei pak kitail pilada en wadek ekei irelaud en Paipel ehuehu rahn. Met uhdahn mwahu. Kitail anahne wiahda mehn akadei kan oh nantihong idawehn. (1 Kor. 9:26) Ahpw, kitail anahne wia laudsang en wadekete Paipel ma kitail uhdahn men paiekihda.

⁸ Medewehla karasaras wet: Tuhke kan kin anahne keteu pwehn uhdahn keirda. Ma erein ahnsou kis e keteu mosul, e pahn kahrehiong pwehlo en uhdahn mwuterekla. Oh ma e pwurehng keteu, e sohte pahn mwahuong pwehlo. Eri e pahn mwahu ma ekisekis keteu pwehki pihlo pahn kohdihla nan pwehlo oh sewese tuhkeo en kekeirda. Duwehte met, kitail en dehr pitipit en wadek Paipel me kahrehda sohla atail ahnsou en medewe, taman, oh doadoahngki dahme kitail wadek.—Seims 1:24.

9. Dahme kitail anahne wia ma kitail esehda me kitail kin nohn pitipit en wadek Paipel?

⁹ Wadek ni wawai pwe ken kak medewe dahme  ke wadewadek de dahme ke wadekehr. Met sohte anahne apwal. Ele ke anahne kalaudehla omw ahnsoun onop pwe ken kak doudouloale. De ke kak pilada en wadek ekeite iretikitik oh doadoahngki luhwen ahnsowo pwehn medewe dahme ke wadekehr. Victor me kitail koasoiapene mwoweo, koasoia: “I kin wiahiong ei wadawad en Paipel en mwotomwot, mwein irelaud ehute. Pwehki I kin wadawad nimensehngie I kak doudouloale dahme I wadek rahno pwon.” Sohte lipilipil wiepe dah me ke kin doadoahngki, e kesempwal en wadawad ni ahl ehu me ke pahn kak uhdahn paiekihda dahme ke wadek.—Mel. 119:97; menlau kilang koakono “ Peidek kan me Ken Medewe.”

10. Menlau karasahda ia duwen omw kak kapwaiada dahme ke sukuhlki. (1 Deselonika 5:​17, 18)

¹⁰ Ni omw kin wadek ekei iretikitik, medewe ia duwen omw kak kapwaiada. Ni omw wadek ekei wasa nan Mahsen Koht, pein idek rehmw, ‘Ia duwen ei kak kapwaiada ire wet rahnwet de ahnsou kan mwuhr?’ Karasepe, medewehla me ke wadekehr 1 Deselonika 5:​17, 18. (Wadek.) Mwurin omw wadek iretikitik pwukat, ke kak uhdi oh medewe ia uwen omw kin kalapw kapakap oh ia uwen omw kin poadidi en kapakap. Ke pil kak medemedewe soahng kan me ke kin kalahnganki. Mwein ke pilada me ke pahn kalahngankihong Siohwa soahng siluh. Ma ke pil wiahda minit keite pwehn medemedewe iren mehn kasukuhl kan sang Paipel, met pahn seweseiuk en wehwehki Mahsen en Koht oh kapwaiada dahme e mahsanih. Oh ma ehuehu rahn ke kin doadoahngki dahme ke wadek sang nan Paipel, kedekedeo e pahn kamwahwihala omw papah Siohwa. Ahpw, dahme ke anahne wia ma mie soahng tohto me ke anahne kamwahwihala?

WIAHDA MEHN AKADEI KAN ME KE KAKOHNG

11. Dahme kahrehda ke kakete mworusala ekei pak? Menlau kihda ehu karasaras.

¹¹ Ni omw wadek Paipel, ke kakete mworusala pwehki ke esehda me mie soahng tohto me ke anahne kamwahwihala. Karasepe, medewehla me ehu rahno, omw wadawad en Paipelo kasalehda me ken dehr lipilipilki aramas. (Seims 2:​1-8) Ke kilang me ke kak kamwahwihala mwomwen omw wiewia ong meteikan, eri ke pilada en wiahda ekei wekidekla. Met uhdahn mwahu! Rahno mwuri ke wadek ekei iretikitik me kasalehda me e kesempwal en kanahieng dahme ke kin koasoia. (Seims 3:​1-12) Ke esehda me ekei pak ke kin nda mehkot me sohte kadek de sohte kangoang. Eri ke koasoanehdi me ke pahn kalaudehla omw kangoange meteikan ni omw koasoiong irail. Ele omw wadawad en Paipel  en mwurin mwo kin pidada ken kanahieng en dehr kompoakepahnkihla sampah wet. (Seims 4:​4-12) Ke esehda me ke anahne uhdahn kanahieng dahme ke kin kilang, wadek, oh rong. Kapahieu en rahno, ele ke pahn pehm me e nohn apwal en wiahda wekidekla pwukat.

12. Dahme kahrehda ken dehr mworusala ma omw wadawad en Paipel kasalehda me ke anahne wiahda wekidekla kan? (Pil kilang nting tikitik kan.)

¹² Ma ke anahne wiahda ekei wekidekla de kamwahwihala soahng kan, dehr mworusala. Omw ese me ke anahne kamwahwihala soahng kei rehmw kasalehda me ke aktikitik oh ahneki kahrepe mwahu. Ni atail kin aktikitik, kitail pahn wadek Paipel oh rapahki ahl akan en kamwahwihala. a Pil tamataman me kitail anahne pousehlahte pwuhriong nan “mour kapw.” (Kol. 3:10) Dahme pahn seweseiuk en pousehlahte peikiong Mahsen en Koht?

13. Soangen ahl mwahu dah me ke kak kapwaiada dahme ke sukuhlki? (Pil kilang kilel.)

¹³ Dehr song en kapwaiada soahng koaros me ke wadek ni ahnsou ehute, ahpw song en kapwaiada ehu de riau. (Lep. Pad. 11:2) Ke kak song wia met: Ntingihedi soahng kan me anahne kamwahwihala, oh eri pilada soahng ehu de soahng riau me ke anahne wia mahs, oh mwuhr soahng teiko. Mehnia me ke pahn tepikihda?

14. Mehn akadei dah kan me ke kak tepikihda?

¹⁴ Ele ke kak tepikihda mehn akadei ehu me ke mengeiki kapwaiada. De ke kak pilada soahng ehu rehmw me ke keieu anahne kamwahwihala. Ahnsou me ke pilada, wia roporop nan neitail sawasepen Paipel kan, doadoahngki Watch Tower Publications Index de  Sawas ong Wia Roporop en Sounkadehdehn Siohwa kan. Kapakapohng Siohwa oh peki en ketikihong uhk “ineng en wia soahng koaros me e ketin kupwurki.” (Pil. 2:13) Kowe eri kapwaiada dahme ke sukuhlki. Ni omw kilang me ke kak wiahda wekidekla ehu de kamwahwihala omw irair en Kristian, e pahn kangoangeiuk en pousehlahte wiahda wekidekla kan. Oh e pahn mengei ong uhk en wiahda wekidekla teikan.

MWEIDOHNG MAHSEN EN KOHT EN “DOADOAHK LOALAMWAIL”

15. Ia duwen sapwellimen Siohwa aramas akan ar weksang me tohto me kin wadek Paipel? (1 Deselonika 2:13)

¹⁵ Ekei aramas wadekehr Paipel pak tohto. Ahpw ia duwe, irail uhdahn kamehlele Paipel? Irail kin song en mour pahrekiong dahme Paipel padahngki oh wekidala arail mour? Soh. Pali laud en aramas sohte kin idawehn kaweid en Paipel. Ahpw sapwellimen Siohwa aramas akan uhdahn weksang met! Duwehte tepin Kristian ko, kitail kin kamehlele Paipel “nin duwen mahsen en Koht me iei me mehlel.” Patehng met, kitail kin wia uwen atail kak koaros en kapwaiada kaweid en Paipel kan nan atail mour.—Wadek 1 Deselonika 2:13.

16. Dahme kak sewese kitail en peikiong Mahsen en Koht?

¹⁶ E sohte kin ahnsou koaros mengei en wadek oh kapwaiada Mahsen en Koht. Ele e kin apwal kitail en wiahda ahnsou en wadek. De kitail kakete nohn pitipit en wadek Paipel oh sohte doudouloale dahme kitail wadeko. De kitail kakete pwunodki soahng tohto me kitail anahne kamwahwihala. Sohte lipilipil kahpwal dah me ke ahneki, e sohte nohn apwal en powehdi. Sang ni sapwellimen Siohwa sawas, ke kak powehdi. Kitail en koasoanehdi teng en ale sapwellime sawas oh peikiong Mahseno, a kaidehn en rongorongete. Ni mehlel, atail kalaudehla atail wadek oh doadoahngki Mahsen en Koht nan atail mour, atail peren pahn laudla.—Seims 1:25.