I ipwidi nan pahr 1934. Ei pahpa nohno kohsang Switzerland kohla Timmins, kisin kahnimw ehu nan Ontario Canada, wasa ehu me aramas akan kin rapahki mete, kohl, oh daimon. Mpen pahr 1939, ei nohnou tepida wadek Kahn Iroir oh iang towehda mihting en Sounkadehdehn Siohwa kan. E kin kahre ie oh riei meh wenemeno. Sohte pwand, e wiahla emen Sounkadehdehn Siohwa.

Pahpa sohte perenki nohno eh wiahla emen Sounkadehde, ahpw nohno poakohng padahk mehlel oh koasoanehdi en kolokolete. E wia met mendahki nan 1940 samwa, Canada keinapwihdi doadoahk en Sounkadehdehn Siohwa kan. E kin ahnsou koaros kadek oh wauneki pahpa mendahki e kin lokaia lemeiong. Eh mehn kahlemeng mwahu sewese ngehi oh riei ko sen pil pilada en papah Siohwa. Se uhdahn peren ni ahnsou me pahpa kedekedeo wekila oh tepida kadek ong kiht.

Nan August 1950, I iang towehda mihting tohrohro (Theocracy’s Increase) nan New York City. I uhdahn mwekidki en kalaudehla ei papah Siohwa mwurin ei tuhwong riei Kristian kan sang sampah pwon oh rong koasoipen Tohnsukuhl en Kilead kan me kesepwil! Met kalaudehla ei koasoanehdi en doadoahngki pali laud en ei ahnsou ong pahpa Koht. Mwurinte ei pwurala imwato, I audehda doaropwehn iang pioneer. Ohpis en Sounkadehdehn Siohwa kan nan Canada ntingdo oh nda me I anahne papidaisla mahs. I wia met nan October 1, 1950. Sounpwong ehu mwuri, I wiahla emen pioneer oh alehdi tepin wasa me I pahn pioneer ie nan Kapuskasing. Kahnimwo uhdahn dohsang wasa me ei peneineio mi ie.

Nan 1951, ohpis en Sounkadehdehn Siohwa kan idek rehn Sounkadehde kan me kak lokaiahki  lokaiahn France ma irail men keseula nan wasa kan nan Quebec me kin lokaiahki lokaiao. Mie anahn laud ong sounkalohk kan wasao. I tikida lokaiahki lokaiahn wai oh France, eri I pwungki luhko oh kohla Rouyn. Sohte me I ese wasao. Ihte me I alehdi iei adres en wasao, me I koasoia mwoweo. Ahpw soahng koaros pweida mwahu. Ngehi oh Marcel kompoakepahnkihla emenemen, oh I perenki papah nan Quebec erein sounpar pahieu, kedekedeo nin duwen pioneer tohrohr men.

Erein ei mi Quebec, I perenki ei alehdi luhk en iang Sukuhl en Kilead nempe 26 nan South Lansing, New York. I kesepwil nan February 12, 1956, oh I pekederla wasa me met adaneki Ghana, b West Africa. Mwohn ei kak wia met, I anahne pwurala Canada oh awih lao I alehdi doaropwe koaros me I anahne pwehn keseula Ghana. I medewe me I pahn mi Canada erein wihkte riau de siluh.

I awiawih doaropwe ko erein sounpwong isuh nan Toronto. Erein ahnsowo peneinei en Cripps mweidohng ien mi rehrail, oh I esehla Sheila, neirail serepeino. Se poakepoakehla emenemen. Ni ahnsou me I kereniong pek pwopwoud reh, nei doaropwe ko lella. Ngehi oh Sheila kapakapki met oh pilada me I anahne kohla Ghana. Ahpw se pil pilada me se pahn kin ntingpene oh awih pwehn kilang ma se kak pwopwoudla mwuhr. Pilipil wet sohte mengei, ahpw mwuhr se esehda me e wia pilipil mwahu ehu.

Sounpwong ehu me I seiloak iang kisa, sohp, oh sompihr, I lella Accra, Ghana. Wasao I alehdi pwukoahn sounapwalih me kin seiloak (district overseer). I anahne seiloakseli nan Ghana oh Ivory Coast (met Côte d’Ivoire) oh Togoland (met Togo). Pali laud en ahnsou, I kin kelehpw dake weren ohpiso sidohsa. I uhdahn kin perenki seiloakla rehn riei Kristian kan!

Ni imwin wihk kan, mie ei pwukoa nan mihting tohrohr kan. Sohte at wasahn Mihting  Tohrohr. Eri brother ko anahne wiahda lepin ihmw me oahski pehri oh tehnpaini pwehn pere irail sang karakar en ketipino. Pwehki sohte aispwoaks nan wasahn mwengeo, brother ko anahne kihdi mahn kan wasa me keren pwe irail en kemehla mwuhr oh kamwengehki irail kan me iang towehda mihting tohrohro.

Mie soahng kemen kouruhr kan me wiawi ni mihting tohrohr ko. Ehu ahnsowo, Herb Jennings, c emen iengei misineri, padapadahk ni emen kou tangasang nan wasahn mwengeo. E tangala nanpwungen mwoahlo oh aramas ako. Herb uhdi padahk oh mahno uhdahn mesen pwuriamweila. Ahpw brother pahmen me uhdahn kehlail koledi oh kapwurehla nan wasahn mwengeo, oh koaros lopwolopw.

Erein wihko, I kasalehda kasdou The New World Society in Action nan kousapw kan me karanih wasao. Pwehn wia met, I langada tehi pwetepwet ehu nanpwungen tuhke riau oh kasalehda kasdou. Tohn wasa ko uhdahn perenki! Ong me tohto, ehdin kasdo me re kilang. Irail lopwolopw laud ni arail kilang aramas akan nan kasdou ar papidaisla. Kasdou uhdahn sewese irail kan me kilang pwehn esehda me Sounkadehdehn Siohwa kan kin miniminpene oh me re mi nan sampah pwon.

Mwurin sounpar riau nan Africa, I perenki iang towehda kapokon laud ehu New York City pahr 1958. I uhdahn perenki kilang Sheila, me kohdihdohsang Qubec, wasa me e kin papah nin duwen emen pioneer tohrohr. Se kin ntingpene, ahpw met se pwurehng tuhpene, I peki en pwoudkiniehla, oh e pwungki. I ntinglahng Brother Knorr d oh peki ma Sheila kak iang Sukuhl en Kilead oh iang ie mi nan Africa. E pwungki. Kedekedeo, Sheila leledo Ghana. Se pwopwoudla nan Accra, October 3, 1959. Se pehm me Siohwa uhdahn kapaikihtda pwehki at mwohneki mahs ih nan at mour.

Nan 1961, se pekederla Cameroon. Brother ko peki ien wiahda ohpis en Sounkadehdehn Siohwa kapw ehu eri I uhdahn kedirepw. Pwehki I pwukoahki apwalih doadoahko nan Cameroon, I anahne sukuhlki soahng tohto. Eri nan 1965  se esehda me Sheila liseian. Ni mehlel, e uhdahn apwal ong kiht en medewehla at pahn wia pahpa nohno kei. Ahpw ni at pereperenki pwukoa kapwo oh koasoanehdi me se pahn pwurala Canada, mehkot uhdahn kansensuwed wiawi.

Sheila iohla. Toahkteo padahkihong kiht me nait seri me sohte ipwidio kisin pwutak kis. Met wiawi sounpar 50 samwalahro, ahpw se sohte kak manokehla. Mendahki dahme wiawihong kihto uhdahn kansensuwed, se mihmihte nan at pwukoau, me se uhdahn perenki.

Brother kan nan Cameroon kin kalapw lelohng kalokolok pwehki irail sohte kin uhpalihki palien politik. Irairo uhdahn apwal erein ahnsoun usuhs en presiden. Nan May 13, 1970, mehkot me se sohte men en wiawi ahpw e wiawi. Kopermento kihsang at ohpis kapw kaselelo me se ahpwtehn keseulong sounpwong limau mwoweo. Erein wihk ehute, misineri koaros—iangahki ngehi oh Sheila—anahne kohkohsang sahpwo. E apwal en kohkohsang riat Kristian ko pwehki se uhdahn pwunodki dahme pahn wiawihong irail.

Mwurin mwo, se mihmi nan ohpis en France sounpwong weneu. Wasao, I pousehlahte wia uwen ei kak koaros en apwalih anahn en riatail Kristian kan nan Cameroon. Ni December nan pahro, se pekederla ohpis en Nigeria, me tepida apwalih doadoahko nan Cameroon. Kristian ko nan Nigeria kasamwoi kiht oh se perenki at kak papah wasao erein sounpar kei.

Nan 1973, se anahne wiahda pilipil apwal ehu. Sheila kin lokolongki eh soumwahu laud. Erein at mi New York pwehn iang mihting tohrohr ehu, e sengiseng oh ndaiong ie: “I solahr kak pousehlahte wia dahme I kin wia! I uhdahn pwangadahr oh kalapw soumwahu.” E kin iang ie papah nan West Africa daulih sounpar 14. I uhdahn kalahnganki eh kin lelepek, ahpw se anahne wiahda ekei wekidekla kan. Mwurin at koasoiapene oh kapakapki met, se pilada me se anahne pwurala Canada, wasa me e kak ale epwelpen wini ong eh rosono. En kohkohsang at pwukoahn misineri iei pilipil me keieu apwal me se anahne wiahda.

Ni at pwurala Canada, I alehdi doadoahk ehu sang kompoakepahi men me ahneki wasahn netiki sidohsa nan kisin kahnimw ehu paliepeng en Toronto. Se rent ehu ihmw, pwainda kepwehn nan ihmw me aramas iuhsdahr, oh kak mi loale oh sohte wiahda pweipwand. Se sohte men ahneki soahng tohto pwehki se koapworopworki me se pahn pwurehng doadoahngki pali laud en at ahnsou en papah Siohwa. Se pwuriamweikihla me at koapworopworo pweida mwadang sang me se medewe.

I tepida toukihda ei ahnsou Rahn Kaunop kan pwehn iang kauwada wasahn Mihting Tohrohr kapw ehu nan Norval, Ontario. Kedekedeo, I idihda en wia sounapwalih en wasahn Mihting Tohrohro. Ahn Sheila soumwahwo mwamwahula oh se medewe me e kak wia pwukoa kapw  wet. Eri se keseula nan ehu ihmw ni wasahn Mihting Tohrohro nan June 1974. Se uhdahn perenki at pwurehng doadoahngki pali laud en at ahnsou ong papah Siohwa!

Se kalahnganki me ahn Sheila soumwahwo mwamwahula. Sounpar riau mwuri, se alehdi pwukoahn sounapwalih me kin seiloak. Wasa me se pahn wia at pwukoau mi Manitoba, Canada, me uhdahn lemwulemwur. Ahpw, se uhdahn perenkihda at tuhwong riat Kristian kan wasao me uhdahn kin kasalehda limpoak laud. Se sukuhlki me sohte lipilipil wasa se kin papah—me keieu kesempwal iei en doulahte papah Siohwa sohte lipilipil wasa se mi ie.

Mwurin sounpar kei mwurin at papah nin duwen sounapwalih me kin seiloak, se ale luhk en papah nan Pedel en Canada nan 1978. Sohte pwand, I sukuhlki mehkot me kamedek ahpw uhdahn kesempwal. I wia padahk ehu me reireiki awa ehu elep ni lokaiahn France ni mihting tohrohr ehu nan Montreal. E kansensuwed me sounrongorong ko sohte perenki ei padahko, oh brother men sang Palien Kalohk kihong ie kaweid. I anahne pohnese me sangete mahs, I sohte koahiek en wia padahk. Ahpw I sohte pwungki kaweido. At koasoio sohte mwahu oh I nsensuwed pwehki I medewe me e nohn kauwe oh sohte kapinga ie. I wiahda sapwung ni ei medemedewehte mwomwen kaweido eh kohieng ie oh ei pepehm ong aramaso me kihong ie.

Rahn kei mwuri, emen me wia kisehn ohpis en Sounkadehdehn Siohwa kan koasoiaiong ie duwen kahpwalo. I ndahda me ei mwekidki kaweido sohte mwahu oh I pekimahk. Mwuri I koasoiong brothero me kihong ie kaweid. Ni kadek e mahkohng ie. Dahme wiawio padahkihong ie ia uwen kesempwal en kin aktikitik oh I sohte pahn manokehla. (Lep. Pad. 16:18) I kapakapkihong Siohwa pak tohto duwen met, oh I koasoanehdi en dehr pwurehng ahneki madamadau sapwung ni emen eh kihong ie kaweid.

Met I kin mi nan Pedel en Canada dauliher sounpar 40, oh sang pahr 1985, I kin iang pwihn me kin apwalih ohpis en Sounkadehdehn Siohwa kan. Nan February 2021, ei pwoudo Sheila mehla. I uhdahn loaleidki oh pil mie pein ei kahpwal en roson. Ahpw ei papah Siohwa kin kahrehiong ien soupisek oh peren oh I sohte kin “pwunodki kowahlap duwen mour eh mwotomwot.” (Ekl. 5:20) Mendahki mie kahpwal tohto nan ei mour, mie soahng tohto me kin kahrehiong ie peren laud. Ei mwohneki Siohwa nan ei mour oh perenki papah ih sounpar 70, kin kahrehiong ie nsenamwahu laud. I kapakapki me riatail Kristian pwulopwul kan en pil pousehlahte mwohneki mahs Siohwa, pwehki I kamehlele me re pahn pil ahneki mour nsenamwahu me kak wiawihte ni atail kin papah Siohwa.