Kitail sohte anahne medewe me pwehki tohnpadahk isiakan ko sohte mi rehn Sises ni eh wiahda Sak en Soutik en Kauno, met wehwehki me e sohte kupwurperenkin irail de re tangasang ih. Sises kupwurkihte iang sapwellime wahnpoaron ko ni ahnsowo.

Meh ehk riemeno oh meh isiakan ko koaros wia sapwellimen Sises tohnpadahk. Ahpw Sises tepin pilada sang sapwellime tohnpadahk tohto ohl ehk riemeno, me e ketin kahdaneki wahnpoaron kei. (Luk 6:​12-16) E ketiket Kalili ni ahnsou me e ketin “malipepene meh Ehk Riemeno” oh “poaroneirailla ren kalohki Wehin Koht oh kamwahwihala aramas akan.” (Luk 9:​1-6) Mwuhr, nan Sudia, Sises ketin “pilada tohnpadahk teikan, meh 70, oh poaroneirailpeseng mwowe wad riemen.” (Luk 9:51; 10:1) Eri, mie sapwellimen Sises tohnpadahk kan nan soangsoangen wasa kan me kin kalohki duwen ih.

Mehn Suhs kan me wiahla sapwellimen Sises tohnpadahk pahn kin kasarawih Pahsohpao sounpar koaros, mwein rehn arail peneinei kan. (Eks. 12:​6-11, 17-20) Mwohnte eh pahn pwoula, Sises oh sapwellime wahnpoaron ko ketidahla Serusalem. Ahpw Sises sohte ketin ekerpene sapwellime tohnpadahk kan koaros sang Sudia, Kalili, oh Peria pwehn iang ih kasarawih Pahsohpao. Eri e sansal me Sises kupwurki iang sapwellime wahnpoaron kohte ni ahnsowo. E mahsanihong irail: “I uhdahn men iang kumwail tungoale Pahsohpa wet mwohn ei pahn lokolok.”—Luk 22:15.

Mie kahrepe mwahu me Sises ketin wiahki met. Sises pahn kereniong pwoula nin duwen “Sihmpwul en Kohto me kin ketikihsang dipen sampah.” (Sohn 1:29) E pahn kamakamala nan Serusalem, wasa me meirong kan kin wiawi ong Koht sangete mahs. Sihmpwul en Pahsohpao kin katamankihong mehn Israel kan duwen Siohwa eh ketin doareirailsang Isip. Ahpw sang sapwellime meirong, Sises pahn ketin wia laudsang met. E pahn ketin kasaledekihala aramas koaros sang dihp oh mehla! (1 Kor. 5:​7, 8) Dahme Sises ketin wiahdao pahn kahrehiong me Ehk Riemeno en wia kisehn poahsoanpen mwomwohdiso en Kristian. (Ep. 2:​20-22) E mwahu en ese me kahnimw sarawio Serusalem “poahsoankihda takai 12” oh nting pohn takai ko, “mie ahd 12, eden sapwellimen Sihmpwulo wahnpoaron 12 ko.” (Kaud. 21:​10-14) Ei, wahnpoaron lelepek ko ahneki pwais tohrohr ehu ong pweidahn kupwuren Koht. Eri, kitail kak wehwehki dahme kahrehda Sises kupwurki irail en iang ih kasarawi kaimwiseklahn Pahsohpao oh dahme wiawi mwurinte mwo—Sak en Soutik en Kauno.

Tohnpadahk isiakan ko oh tohnpadahk teikan sohte iang Sises konot ahnsowo. Ahpw tohnpadahk kan koaros me kin lelepek pahn paiekihda Sak en Soutik en Kauno me Sises ketin wiahda. Tohnpadahk ko koaros me kedekedeo wiahla Kristian keidi kei pahn iang mi nan inou lap en wehi ehu, me Sises ketin padahkihong sapwellime wahnpoaron ko pwohngo.—Luk 22:​29, 30.