1, 2. Kahpwal dah kan me sapwellimen Siohwa ladu kan anahne nantihong pelianda?

 SANGETE Eipel leledo rahnwet, mie soahng kan me sapwellimen Koht ladu lelepek kan koaros kin nannantihong pelianda. Wahnpoaron Pohl ndaiong Kristian mehn Ipru ko me ‘apwal tohto lelohng irail, ahpw re sohte lohdiong’ ni arail song en alehdi sapwellimen Siohwa kupwuramwahu oh kapai. (Ipru 10:32-34) Pohl kapahrekihpene ahn Kristian kan ar kin nannanti ong sounmwadong kan me kin siai nan mwadong en mehn Krihk kan, duwehte weirentang, poadoar, oh paker. (Ipru 12:1, 4) Rahnwet, kitail kin mi nan weirentang ong mour, oh mie atail imwintihti kan me men kerempwa kitail oh kahrehiong kitail en sohla peren ahnsou wet oh luhssang keting kan ni ahnsou kohkohdo.

² Dahme kitail kin keieu nannanti en pelianda iei Sehdan oh eh sampah. (Ep. 6:12) E uhdahn kesempwal kitail en dehr dukula pahn kasukuhl en sampah wet, loalokong widing mwahl en aramas, oh wiewia sapwung kan duwehte tiahk samin, simoak,  oh kamam sakau de doadoahngki wini en kasahliel kan. Kitail anahne pil pousehlahte peiong atail kin mworusala oh pil pein atail luwet kan.​—2 Kor. 10:3-6; Kol. 3:5-9.

3. Ia duwen Koht eh kin ketin kaiahne kitail en pelianda atail imwintihti kan?

³ Ia duwe, kitail kak uhdahn kalowehdi soahng kehlail pwukat? Ei, ahpw e uhdahn pahn apwal! Pohl kapahrekihong ih sounpaker men ni eh nda: “I kin pei, rasehng sounpaker men me sohte kin pakepakere mwahl nan wehwe.” (1 Kor. 9:26) Duwehte sounpaker men eh kin pei, kitail anahne pelianda atail imwintihti kan. Siohwa kin ketin sewese oh kaiahne kitail en wia met. E ketin wia met sang ni eh ketikihda Paipel. E pil ketin sewese kitail sang ni eh ketikihda sawaspen Paipel kan, mihting en Kristian kan oh mihting tohrohr kan. Ke kin doadoahngki kaweid koaros me ke kin alehdi? Ma soh, ele ke sohte uhdahn kin pelipelian omw imwintihtio. Ke duwehte sounpaker men me kin pakepakere mwahl nan wehwe.

4. Ia duwen atail en dehr lohdi pahn me suwedo?

⁴ Kitail anahne mwasamwasahn ahnsou koaros. Dahme kahrehda? Atail imwintihti kan kakete uhwong kitail ni ahnsou me kitail sohte kasik de ni ahnsou me kitail luwet. Paipel kihda mehn kataman oh mehn kangoang ni eh mahsanih: “Dehr mweidohng me suwed en poweiukedi, ahpw omw mwahu en powehdi me suwed.” (Rom 12:21) Ma kitail pousehlahte pelianda me suwedo, kitail kak kana! Ahpw, Sehdan, eh sampah oh atail luwet kan kak kalowehdi kitail ma kitail sohte kanahieng oh uhdihsang atail kin pelipelian. Eri dehr uhdi. Dehr mworusala oh mweidohng pehmw kan en mwoatohtdi!​—1 Pit. 5:9.

5. (a) Dahme kitail anahne tamataman pwe kitail en kak alehdi sapwellimen Koht kupwuramwahu oh kapai? (b) Ihs irail kan nan Paipel me kitail pahn koasoiapene?

⁵ Pwe kitail en kana, kitail anahne taman ia kahrepen atail kin nannanti. Met pwehki kitail men alehdi sapwellimen Koht kupwuramwahu oh kapai. Ipru 11:6 mahsanih: “Mehmen me men kowohng rehn Koht uhdahn pahn kamehlele me Koht ketin mie, oh me Koht kin ketin katingih irail kan me kin raparapahki.” Raparapahki Siohwa kin wehwehki me kitail anahne doadoahk laud ma kitail men alehdi sapwellime kupwuramwahu. Nan Paipel, mie mehn kahlemeng mwahu tohto en ohl oh lih akan me wia met. Seikop, Resel, Sosep, oh Pohl lelohng irair kan me apwal ong arail pepehm oh roson. Ahpw re kak pweida. Arail mehn kahlemeng kadehdehda me ma kitail doadoahk laud, kitail pil kak alehdi sapwellimen Siohwa kapai kan. Kitail kilang ia duwen atail kak wia met.

6. Dahme sewese Seikop en nanti laud, oh ia duwen eh alehdi ketingpe? (Menlau kilang tepin kilel.)

⁶ Ohl lelepeko Seikop kin nannanti oh dadaur pwehki e poakohng Siohwa oh kesempwalki eh nanpwungmwahu reh. E uhdahn pwoson sapwellimen Siohwa inou en ketin kapaiada kadaudoke kan. (Sen. 28:3, 4) Ni Seikop eh kereniong sounpar 100, e pil poadoarohng tohnleng men pwehn alehdi kapai sang Koht. (Wadek Senesis 32:24-28.) Ia duwe, Seikop doadoahngki pein eh kehl ni eh poadoarohng tohnleng kehlail menet? Uhdahn Soh! Ahpw e uhdahn kin nanti, oh kadehdehda me e pahn uhdahn doadoahk laud ong kapai ehu! Siohwa ketin kapaiada Seikop pwehki eh nanti laud oh ketikihong Seikop edeo Israel me wehwehki “Emen me  kin ngidingidki de nannantihki mehkot rehn Koht.” Seikop alehdi ketingo me kitail pil kin raparapahki, me iei, sapwellimen Siohwa kupwuramwahu oh kapai.

7. (a) Irair kansensuwed dahieu me Resel ahneki? (b) Dahme Resel wia, oh ia duwen eh ale kapai?

⁷ Ahn Seikop pwoudo, Resel, pil kin men kilang ia duwen Siohwa eh pahn ketin kapwaiada sapwellime inou ong Seikop. Ahpw mie kahpwal ehu. Resel sohte kak naineki seri, mehkot me uhdahn kansensuwed ong lih akan mahso. Ia duwen Resel eh pousehlahte ngidingidki eh irair kansensuwedo? E kin ahnsou koaros ahneki koapworopwor. E kin ngidingidkihte eh kahpwalo ni eh kalaudehla eh kapakap ong Siohwa. Koht ketin karonge ahn Resel kapakap ko, oh Resel pehm me e ale kapai ni ahnsou me e nainekihda seri. Ihme kahrehda e nda: “I uhwong oh pelianda . . . oh kalowehdi.”​—Sen. 30:8, 20-24.

8. Kahpwal dah kan me Sosep ahneki, oh ia duwen eh wia mehn kahlemeng mwahu ong kitail?

⁸ Ahn Seikop oh Resel mehn kahlemeng mwahu en lelepek ele kamwakid neira pwutako Sosep oh sewese ih ni ahnsou me e lelohng kahpwal kan nan eh mour. Ni ahnsou me Sosep sounpar 17, eh mour uhdahn wekila. Rie pwutak ko, me kin luwangki ih, netikihla ih pwehn wia lidu men. Mwuhr, e wie sensel nan imweteng nan Isip erein sounpar tohto, mendahki sohte sapwung ehu e wiahda. (Sen. 37:23-28; 39:7-9, 20, 21) Ahpw Sosep sohte mworusala de lingeringerda, oh e sohte song en dupuk ong rie ko. Dahme kahrehda? Pwehki Sosep kesempwalki eh nanpwungmwahu rehn Siohwa oh e kin medemedewe laud duwen met nan eh mohngiong unsek. (Lip. 19:18; Rom 12:17-21) Mehn kahlemeng mwahu en Sosep kak sewese kitail. Mehnda ma atail mour sohte mwahu ni atail tikitiko de mwomwen me sohte koapworopwor ong atail mour ahnsou wet, kitail anahne ngidingidkihte oh nannanti. Ni atail wia met, kitail kak uhdahn kamehlele me Siohwa pahn ketin kapaiada kitail.​—Wadek Senesis 39:21-23.

9. Ia duwen atail kak kahlemengih Seikop, Resel, oh Sosep?

⁹ Rahnwet, ele kitail pil anahne dadaur pahn kahpwal kan. Mwein ke kin lokolok pwehki kopwung sapahrek, lipilipilki aramas, de aramas kapailoke de peirinki iuk. Dehr mworusala, tamataman dahme sewese Seikop, Resel, oh Sosep en pousehlahte papah Siohwa ni peren. Koht ketin kakehlakahda oh kapaiahda irail pwehki re uhdahn kalahnganki arail nanpwungmwahu reh. Re kin ngidingidkihte arail kahpwal kan oh mour pahrekiong arail kapakap kan. Pwehki kitail mihmi ni imwin rahn akan, e kesempwal kitail en kolokol atail koapworopwor ong ahnsou kohkohdo en kehlail! Ia duwe, ke men peiki, de doadoahk laud, pwehn alehdi sapwellimen Siohwa kupwuramwahu?

10, 11. (a) Dahme kahrehda kitail anahne doadoahk laud pwehn alehdi sapwellimen Koht kapai? (b) Dahme pahn sewese kitail en wiahda pilipil mwahu kan?

¹⁰ Dahme kahrehda kitail en doadoahk laud pwehn alehdi sapwellimen Koht kapai? Pwehki kitail sohte unsek, ele mie soangen ineng sapwung kei me kitail kin nannanti en pelianda. Ekei kin nannanti pwe ren kak ahneki madamadau pwung ong kalohk, oh ekei kin nannanti pwehki re ahneki kahpwal en soumwahu de pepehm en kelekelehpw. Pil mie ekei me kin diarada me e apwal en mahkohng emen me wiahiong irail mehkot sapwung. Sohte lipilipil ia uwen werei atail papah Siohwa, kitail koaros anahne pelianda  soahng kan me kin kahrehiong kitail en apwalki papah ih. Siohwa iei me kin ketin katingih me lelepek kan.

¹¹ Ei mehlel, e kak uhdahn apwal en wia Kristian men oh wiahda pilipil mwahu kan, ahpw keieu ni atail kin pelipelian atail ineng sapwung kan. (Ser. 17:9) Ma met iei omw pepehm, kapakap ong Siohwa oh patohwan peki sapwellime manaman. Kapakap oh pil sapwellimen Koht manaman kak sewese iuk ken ahneki kehl en wia dahme pwung oh eri kak alehdi sapwellimen Koht kapai. Koasoanehdi teng ken mour pahrekiong omw kapakap kan. Song en wadek Paipel rahn koaros, oh koasoanehdi ahnsou en wia pein omw onop oh kaudok en peneinei.​—Wadek Melkahka 119:32.

12, 13. Ia duwen Kristian riemen ara alehdi sawas en peiong ineng sapwung kan?

¹² Mie karasepe tohto ong ia duwen Paipel, sapwellimen Koht manaman, oh neitail sawaspen Paipel kan ar sewesehier riatail Kristian kan ren powehdi ineng sapwung kan. Emen me pwulopwul wadekala oaralapo “Ia Duwen Omw Kak Powehdi Ineng Sapwung kan?” nan Awake! (lokaiahn wai) en December 8, 2003. Ia eh pepehm ong met? E nda: “I kin nannanti en peiong ei madamadau sapwung kan. Ni ahnsou me I wadek me ‘ong me tohto, e kin inenen apwal en powehdi ineng sapwung kan,’ e kahrehiong ie en pehm me I iang kisehn pirien laud ehu. I pehm me I sohte kelekelehpw.” Me pwulopwul menet pil paiekihda oaralapo “Mour Weksang Koasoandi ​—Koht Kin Kupwurki Met?” me mi nan Awake! (lokaiahn wai) en October 8, 2003. Nan ireo, e esehda me ekei kin pousehlahte pepeiong mepwukat, duwehte ‘kisin tek kamedek kis kohieng ni paliwararail.’ (2 Kor. 12:7) Ahpw, erein arail pousehlahte pepeiong mepwukat pwehn kolokol arail wiewia kan en mwakelekel, re ahneki koapworopwor mwahu ehu ong ahnsou kohkohdo. E nda: “Pwehki kahrepe wet, I medemedewe me I kak kolokol ei lelepek ehuehu rahn. I uhdahn kalahngankihong Siohwa eh ketin doadoahngki sapwellime pwihn en sewese kitail en dadaur ehuehu rahn nan koasoandi suwed wet.”

¹³ Pil tehk dahme wiawihong emen sister nan Wehin Amerika. E ntingihedi: “I men kalahnganki amwail kin ahnsou koaros kihong kiht dahme se anahne ni ahnsou me konehng. I kin kalapw pehm me ire pwukat wiawihda ong ie. Sounpar tohto, I kin wie pepeiong ineng kehlail ehu ong mehkot me Siohwa ketin kalahdeki. Ekei pak, I kin men uhdi oh sohla pei. I ese me Siohwa kin ketin kalahngan oh mahk, ahpw pwehki I ahneki ineng sapwung wet oh ni mehlel I sohte uhdahn kailongki, I pehm me I sohte warohng ale sapwellime sawas. Ei wia pepeiong met kin kamwakid soahng koaros me I kin wia nan ei mour. . . . Mwurin ei wadek oaralapo ‘Ke Ahneki “Mohngiong Ehu Pwehn Esehla” Siohwa?’ nan Kahn Iroir en March 1, 2013, I uhdahn pehmada me Siohwa uhdahn kupwurki sewese ie.”

14. (a) Ia ahn Pohl pepehm ong soahng kan me e kin pepeiong? (b) Ia duwen atail kak kana ni atail peiong atail luwet kan?

¹⁴ Wadek Rom 7:21-25. Pein Pohl ese ia uwen apwal en kin peiong ineng sapwung oh luwet kan. Ahpw, e uhdahn kamehlele me e kak kana nan pei wet ma e kapakapohng Siohwa, likih sapwellime sawas, oh kasalehda eh pwoson sapwellimen Sises meirongo. Ahpw ia duwen kitail? Kitail kak kana ni atail peiong atail luwet kan? Ei, ma kitail alasang Pohl oh uhdahn koapworopworki Siohwa, a kaidehn pein atail kehl, oh pil pwoson pweinen pweipwei sapahlo.

15. Ia duwen Siohwa eh kak ketin sewese kitail en kolokol atail lelepek oh dadaur pahn kahpwal kan?

¹⁵ Ekei pak Koht ele kin ketin mweidohng kitail en kasalehda ia uhdahn atail pepehm ong irair ehu. Karasepe, ma kitail de emen nan atail peneinei lelohng soumwahu laud de kopwung sapahrek, dahme kitail pahn wia? Ma kitail uhdahn likih Siohwa, kitail pahn patohwan peki en ketikihong kitail kehl me kitail anahne pwehn kolokol atail lelepek oh peren oh atail nanpwungmwahu reh en kehlail. (Ais. 12:2) Dahme wiawihong Kristian tohto, mahso oh pil rahnwet, kasalehda me kapakap kak kakehlakahda kitail oh kihong kitail kehl me anahn pwe kitail en kak pousehlahte dadaur.

16, 17. Dahme ke koasoanehdi teng en wia?

¹⁶ Tepilo pahn uhdahn perenki kilang omw mworusala, uhdi oh pehmw kan mwoatohtdi. Eri koasoanehdi teng ken “kolokol me mwahu kan.” (1 Des. 5:21) Ke kak kana nan omw peiong Sehdan, eh sampah suwed wet, oh ineng sapwung koaros! Ke kak kana ma ke uhdahn likih me Koht pahn ketin kakehlaka oh seweseiuk.​—2 Kor. 4:7-9; Kal. 6:9.

¹⁷ Eri pousehlahte nannanti oh ngidingidki peiong omw kahpwal kan. Ke kak uhdahn kamehlele me Siohwa pahn ketin ‘kamwerehdiong uhk soangen kamwahu kan ni uwe ieu me laud.’​—Mal. 3:10.