“I SOUNPAR 15 ni ahnsou me I papidaisla, oh sounpwong weneu mwuri I tepida iang wia sawaspen pioneer. Mwurin sounpar ehu, I audehda doaropwehn iang pioneer. Ni ei kesepwil sang sukuhl, I peki en iang papah wasa me anahn laud mie ong sounkalohki Wehio. I men keseula sang ei wasao oh sang ei nohno kahlapo me I kin mihmi reh me kaidehn emen Sounkadehdehn Siohwa. Ia uwen ei nsensuwedla ni sounapwalih me kin seiloako eh nda me ei wasahn kalohko pahn mihte wasao me I tikida ie! I sohte men en ese ia ei pepehm ong met. I itiekidi oh kohkohla pwehn medewe dahme e nda. I ndaiong iengei sounkalohko: ‘I leme ei pepehm duwehte ahn Sona. Ahpw ni imwio Sona kohla Ninipe. Eri, I pahn pil papah wasa me koasoandiong ie en wia.’

“Ahnsouwet I wiahier pioneer men nan ei wasao erein sounpar pahieu, oh I kak kilang ia uwen eh loalokong en idawehn kaweid me I alehdi. Ei madamadau sapwungo iei uhdahn kahpwalo. Ahnsouwet I ahneki peren laud. Nan sounpwong ehu, I kin wia onop en Paipel rehn aramas 24. Kalahngan ong Siohwa, I pil tepida onop en Paipel rehn ei nohno kahlapo me kin uhwong ie.”

Emen tohnsukuhl en Paipel nan Fiji anahne pilada ma e pahn kohla ni mihting tohrohr en Sounkadehde kan de ma e pahn iang eh pwoudo kohla ni ehu kamadipw en kasarawien ipwidien emen kiseh ko. Eh pwoudo pwungki me e kak iang towehda mihting tohrohro. Liho ndaiong eh pwoudo me e pahn kohla ni kamadipwo mwuhr. Ahpw ni eh pwurodo sang mihting tohrohro, e pehm me nan eh irairo, e pahn mwahu en dehr kihong ih nan irair ehu me kakete keper ong eh nanpwungmwahu rehn Siohwa, eri e sohte kohla.

Erein liho iang mihtingo, ohlo ndaiong kiseh ko me e ndahiongehr eh pwoudo en iang irail mwurin eh “mihting en Sounkadehde ko.” Re nda, “E sohte pahn kohdo; Sounkadehdehn Siohwa kan sohte kin wia kasarawi en ipwidi!” *

Imwilahn met, ohlo uhdahn pohlkihda me eh pwoudo lelepek ong dahme e kamehlele oh kadeikpen loale. Mwuhr ahn liho lelepek kahrehda en ahneki ahnsou mwahu en kalohk ong eh pwoudo oh pil meteikan. Ia imwilahn met? Eh pwoudo pwungkihda en onop Paipel oh tepida iang ih kohla ni mihting kan.