“I PILADAHR ohlo pwe en papah ie oh kasalehiong mehn liki kan oh nanmwarki kan . . . mwarei.” (Wiewia 9:15) Kauno Sises mahsanih met duwen ohl en Suhso me wiahla Kristian men, me mwuhr adanekihla wahnpoaron Pohl.

Emen ‘nanmwarki ko’ iei Kaunen Rom Nero. Ia pahn omw pepehm ma ke anahne uhki omw pwoson mwohn kaun menet? E wia mehn kangoang ehu ong Kristian kan en alasang Pohl. (1 Kor. 11:1) Ehu ahl me kitail kak wia met kin pidada dahme Pohl kin lelohng me pid kosonned kan en eh ahnsou.

Kosonned en Moseso wia kosonned en sahpwo nan Israel, oh e wia koasoandi ehu ong dahme pwung ong mehn Suhs poadidi kan wasa koaros. Mwurin Pendekos 33, tohnkaudok mehlel kan solahr anahne idawehn Kosonned en Moseso. (Wiewia 15:28, 29; Kal. 4:9-11) Ahpw, Pohl oh Kristian teikan sohte kin koasoia duwen Kosonnedo ni soh wahu; sohte mehkot kin kerempwa arail kin kalohk ong mehn Suhs ko. (1 Kor. 9:20) Pak tohto Pohl kin kohla ni sinakoke kan, wasa me e kak kalohk ong aramas akan me ese duwen Koht en Eipraamo oh me Pohl kak kawehwehiong irail ni eh doadoahngki Palien Paipel ni Lokaiahn Ipru.​—Wiewia 9:19, 20; 13:5, 14-16; 14:1; 17:1, 2.

Wahnpoaron ko pilada Serusalem en wia wasa me kalohk pahn tepin wiawi. Re kin kalapw padahkih aramas akan ni tehnpas sarawio. (Wiewia 1:4; 2:46; 5:20) Pohl kin kalapw seiloakla Serusalem, oh kedekedeo e selidi wasao. Met tapiada kopwung ehu me imwikihla eh kohla Rom.

Ia ahn kaun en Rom kan ar madamadau ong dahme Pohl kin kamehlele oh kalohki? Pwehn sapengala met, e kesempwal en tehk ia ahn mehn Rom kan ar madamadau ong pelien lamalam. Irail sohte kin idingkihong pwihn en aramas akan nan arail wehio en kesehla arail pelien lamalam, ahpw ihte ma pelien lamalamo mwomwen keper ong arail Wehio de tiahk.

Rom mweidohng mehn Suhs ko en ahneki pwuhng laud nan arail wehio. Pwuhk ehu koasoia: “Pelien lamalam en mehn Suhs kan ahneki pwais kaselel tohrohr  ehu nan wehin Rom. . . . Mehn Suhs ko ahneki saledek en wia pein arail kaudok oh sohte anahne kaudokiong koht en mehn Rom ko. Re kak wiahda pein arail kosonned nan arail wasa.” (Backgrounds of Early Christianity) Re pil sohte anahne iang mahwen. * Pohl doadoahngki kosonnedo me Rom kihong pelien lamalam en mehn Suhs ko en wia doarepe ni eh uhki Kristian ko mwohn kaun en Rom kan.

Ahn Pohl imwintihti kan kin song soangsoangen wiepe kan en kahrehiong aramas en wasao oh kaun ko en uhwong ih. (Wiewia 13:50; 14:2, 19; 18:12, 13) Tehk dahme wiawi ehu ahnsou. Kristian elder kan en mwomwohdisohn Serusalem rong mehn Suhs ko ar koasoakoasoiapene nanpwungarail me dene Pohl padapadahki me ren “kesehla Kosonned en Moses.” Soangen koasoi pwukat kakete kahrehiong mehn Suhs kan me ahpwtehn wiahla Kristian kapw kei en medewe me Pohl sohte wauneki sapwellimen Koht koasoandi kan. Oh Tohn Mwoalen Kopwung Lapalapo pil kakete nda me Kristian kan kesehla oh uhwongada kaudok en pelien lamalam en mehn Suhs kan. Ma met wiawi, mehn Suhs kan me kin ehuong Kristian kan kakete ale kalokolok. Re sohla pahn mweimwei en ehuong aramas akan oh pahn sohla mweimwei ren kalohk nan tehnpas sarawio de pil sinakoke kan. Ihme kahrehda elder ko en mwomwohdiso ndaiong Pohl en kadehdehda me dahme aramas ako koasoakoasoia sapwung. E wia met ni eh kohla ni tehnpas sarawio oh wia mehkot me Koht sohte mahsanih en wia ahpw me pil sohte sapwung.​—Wiewia 21:18-27.

Pohl wia met, me kahrehda en mie eh ahnsou mwahu en “uhki rongamwahu oh katengehdi.” (Pil. 1:7) Ni tehnpas sarawio, mehn Suhs ko mwoarongada oh men kemehla Pohl. Kaunen sounpei en mehn Rom ko kihong Pohl nan imweteng. Ni ahnsou me re kaunopada Pohl pwe ren wokih, e kadehdehda me ih emen towe mehlel en Rom. Met kahrehda eh wisikla Sesaria, wasa me Suda mi pahn mehn Rom kan. E kin ahneki ahnsou mwahu wasao en kalohk ni eimah ong me lapalap kan. Met kahrehda aramas akan en esehla mwahu Kristian ko me re sohte nohn ese.

Pwuhken Wiewia irelaud 24 kawehwehda duwen ahn Pohl repenpwung mwohn Peliks, mehn Rom men me wia kepina nan Suda, me rongehr duwen dahme Kristian kan kin kamehlele. Mehn Suhs ko nda me Pohl kauwehla kosonned en Rom ni ahl siluh de tohtohsang. Re nda me eh padahk kan kahrehiong mehn Suhs ko ren pelianda wehin Rom. Re pil nda me e kaunda pwihn en pelien lamalam ehu me kin pitih aramas, oh e pil songosong en kahrehiong aramas akan ren dehr wauneki tehnpas sarawio, me ni ahnsowo mi pahn epwelpen mehn Rom ko. (Wiewia 24:5, 6) Mepwukat kakete kahrehiong ih en kamala.

E mwahu ong Kristian kan rahnwet en medewe dahme Pohl wia ong dahme aramas ako ndahki ih. E kasalehda meleilei oh waun. Pohl koasoia duwen Kosonnedo oh padahk en Soukohp ako, oh kasalehda eh pwuhng en kaudokiong ‘Koht en seme kahlap ako.’ Met wia pwuhng ehu me mehn Suhs teikan ahneki pahn kosonned en Rom. (Wiewia 24:14) Kedekedeo, Pohl kakehr uhki oh padahki duwen eh pwoson mwohn kepinao Porsius Pestus, me wiahla kepina mwurin Peliks, oh pil mwohn Nanmwarki Erod Akripa.

Pwe en kak ale kopwung pahrek, Pohl nda: “I peki kopwung sapahl rehn Sihsar.”​—kaun me keieu lapalap ni ahnsowo.​—Wiewia 25:11.

Tohnleng men mwuhr ndaiong Pohl: “Ke uhdahn pahn uh mwohn Sihsar.” (Wiewia 27:24) Kaunen Rom Nero nda ni tepin eh kaunda me e sohte pahn kelehpwki kopwung koaros. Erein sounpar waluh en eh tepin kaunda, e kin kalapw kihong meteikan ren wia pwukoa wet. Pwuhk ehu koasoia me ni ahnsou me Nero kin pwungki wia kopwung ehu, e kin karonge kopwungo nan tehnpeseo, wasa me e kin ale sawas sang pwihn en sounkaweid kan me uhdahn koahiek oh me me tohto kin men rong.​—The Life and Epistles of Saint Paul

 Paipel sohte mahsanih ma pein Nero me karonge oh kopwung Pohl de ma e kihong emen tohrohr en karonge ahn Pohl pekipeko oh ripohtkihong ih. Sohte lipilipil dahme wiawi, Pohl ele kawehwehda me e kin kaudokiong Koht en mehn Suhs ko oh e kin kangoange aramas koaros en wauneki koperment. (Rom 13:1-7; Taitus 3:1, 2) E mwomwen me ahn Pohl uhki rongamwahwo mwohn me lapalap ako pweida mwahu pwehki mwoalen kopwung en Sihsar kasaledekihala Pohl.​—Pil. 2:24; Pail. 22.

Sises mahsanihong sapwellime tohnpadahk ko: “Kumwail pahn wisikiong mwohn kaun oh nanmwarki kan pwehki ngehi, pwe kumwail en kadehdehiong irail oh mehn liki kan duwen Rongamwahu.” (Mad. 10:18) E wia pwais kaselel ehu en wia wiliepen Sises ni ahl wet. Atail kin nanti uhki rongamwahwo kakete imwikihla atail kana nan kopwung kan. Ei mehlel, dahme aramas soh unsek kan kin pilada sohte kin uhdahn “katengehdi pwehn kehlail” rongamwahwo. Wehin Koht kelehpw me pahn kihsang douluhl lokolok oh kopwung sapahrek.​—Ekl. 8:9; Ser. 10:23.

Ahpw, pil rahnwet mwaren Siohwa kin sarawihla ni Kristian kan ar kin uhki arail pwoson. Duwehte me Pohl wia, kitail pil anahne song en meleilei, mehlel, oh kamwakid meteikan en kamehlele dahme kitail nda. Sises mahsanihong sapwellime tohnpadahk ko: “Kumwail dehr pwunodki dahme kumwail pahn sapengkin irail; pwe I pahn kihong kumwail soangen pasapeng kei oh soangen loalokong kei me sohte emen rehn amwail imwintihti kan kak pelianda oh kasohwe.”​—Luk 21:14, 15; 2 Tim. 3:12; 1 Pit. 3:15.

Ni Kristian kan ar uhki arail pwoson mwohn nanmwarki kan, kepina kan, de me lapalap teikan, re kin kak wia mehn kadehde ong irail kan me ele apwal rongamwahwo en lella rehrail. Ekei pilipil mwahu kan me mwoalen kopwung wiahda kin kamwahwihala kosonned kan, kahrehda en mie saledek en kalohk oh kaudok. Ahpw sohte lipilipil ia imwilahn kopwung pwukat, eimah me sapwellimen Koht ladu kan kin kasalehda ni kopwung kan kin kaperenda Koht.