Ahn Sehdan Elen Kaunda Uhdahn Sohte Pahn Pweida

“Aramas suwed kan sohte pahn paiamwahula.”​—EKL. 8:13.

1. Dahme kahrehda kadeik en irail me suwed kan kin wia rongamwahu ehu?

 KERENIONG irail me suwed akan pahn ale kadeik. Arail wiewia suwed kan pahn pakadeikda. (Lep. Pad. 5:22; Ekl. 8:12, 13) Met wia rongamwahu ehu ong irail akan me kin poakohng me pwung oh me kin lokolongki koasoandi kan me sohte kin pwung oh pahrek sang irail me suwed kan. Me pahn keieu alehdi kadeik nanpwungen irail me suwed kan iei Sehdan me Tepil, semen soangen suwed koaros.​—Sohn 8:44.

2. Dahme kahrehda ahnsou anahn pwehn kapwungala ire me pwarada nan Ihden?

² Nan Ihden, en Sehdan direkihla madamadau en aklapalap kahrehda aramas en soikala sapwellimen Siohwa elen kaunda. Met imwikihla atail tepin pahpa oh nohno ara iangala Sehdan oh pelianda sapwellimen Siohwa pwung en kaunda oh eri dipada mwohn silangin Koht. (Rom 5:12-14) Siohwa mwahngih ia duwen ara wiewiahn soh wahu oh uhwong pahn imwila ong ira. Imwila wet pil anahne sansalda ong tohnleng kan oh aramas akan koaros. Eri, ahnsou anahn pwehn kapwungala ire wet oh kasalehda ni mehlel me sounpelian pwukat uhdahn sapwung.

3. Ia atail madamadau ong koperment en aramas?

³ Pwehki aramas akan soikala sapwellimen Siohwa koasoandi, re anahne wiahda pein arail koasoandien koperment. Ni ahnsou me wahnpoaron Pohl ntinglahng ienge tohnkaudok kan nan Rom, e kin koasoiahki koperment en aramas nin duwen “pwungen wehi kan.” Ni ahnsowo, pwungen wehi kan iei koperment en Rom pahn kaundahn Nero, me kin kakaun sang pahr 54 lel pahr 68. Pohl koasoia me “Koht, iei ih me kin ketikihong wehi kan arail pwung.” (Wadek Rom 13:1, 2.) Ia duwe, met wehwehki me Pohl kin koasoia me kaundahn aramas kin mwahusang sapwellimen Koht elen kaunda? Uhdahn soh. Ahpw e koasoia me erein Siohwa kin ketin mweidohng kaundahn aramas en mihmi, Kristian akan anahne wauneki dahme “Koht ketin koasoanedier” oh pahsan kaun pwukat.

Ahl Ehu me Pahn Imwila Suwed

4. Ia kahrepen kaundahn aramas sohte kin pweida?

⁴ Ahpw kaundahn aramas me Sehdan kin kamwakamwakid uhdahn sohte pahn pweida. Dahme kahrehda? Kahrepe ehu, pwehki e sohte poahsoankihda erpit sang Koht. Siohwa kelehpw me sapwellimanki erpit unsek. Kahrehda, ihete me wia sounkaweid likilik me pahn kahrehda kaunda ehu en pweida. (Ser. 8:9; Rom 16:27) Weksang aramas akan me kin sukuhlki mehkot sang dahme re wia de arail sapwung kan, Siohwa kin mwahngih ahl me keieu mwahu ahnsou koaros. Sohte koperment ehu pahn kak pweida ma re sohte idawehn sapwellime kaweid kan. Pwehki met, ahn Sehdan koasoandi me iei en doadoahngki aramas en kaunda pahn uhdahn sohte pweida. Patehng met, kahrepen Sehdan kin kamwakid aramas en uhtohrda sang sapwellimen Siohwa elen kaunda iei roporop oh met kin kahrehda kaundahn aramas sohte kin pweida.

5, 6. Dahme kahrehiong Sehdan en uhwongada Siohwa?

⁵ Aramas loalokong men sohte pahn pilada en wia mehkot me pahn imwila suwed. Ma e ngihtehte wia met, e pahn uhdahn diarada me e sapwung. Pak tohto poadopoad kin kasalehda me sohte katepe en uhwongada Sounkapikada wasa lapalahpie. (Wadek Lepin Padahk  21:30.) Ahpw Sehdan karotongehkihla pein ih madamadau en pohnmwahso oh eri sohpeisang Siohwa. Ihme kahrehda Tepilo pilada ahl ehu me pahn ihte imwila suwed.

⁶ En Sehdan madamadau en wia mehkot me e sohte ahneki eh pwung en wia kin sansalda mwuhr rehn nanmwarki en Papilon me kileldi nan Aiseia irelaud 14: “Komwi koasoanedier me komwi pahn ketidahla nanleng oh ketikihdi mwoalomwi pohnangin usu me keieu ileile kan. Komwi kupwukupwure me komwi pahn ket nin duwen nanmwarki men pohn nahnao me mi ni paliepeng wasa me koht kan kin pokonpene ie. Komwi mahsanih me komwi pahn ketidahla pohn depwek kan oh duwehla Wasa Lapalap.” (Ais. 14:13-15) Koasoandien nanmwarki soaloalokong menet sohte pweida oh kaundahn Papilon imwikihla imwila kanamenek ehu. Pil duwehte, Sehdan oh eh sampah pahn kereniong lelohng imwila me inenen suwed.

Dahme Kahrehda Koht Mweidohng Irail en Uhtohrda Sang Eh Kaunda?

7, 8. Ia ekei kamwahu kan me kohsang Siohwa eh ketin mweidada suwed en mie erein ahnsou mwotomwot?

⁷ Ekei ele men ese dahme kahrehda Siohwa sohte ketin irehdi aramas en iangala Sehdan oh idawehn koasoandi en kaunda ehu me uhdahn sohte pahn pweida. Nin duwen Koht Wasa Lapalahpie, e kak ketin irehdi met. (Eks. 6:3) Ahpw e sohte ketin wia. Sapwellime erpit kin kasalehda me eh kin ketin mweidohng aramas en uhwong ih erein ahnsou mwotomwot pahn imwila mwahu ahnsou reirei. Kedekedeo, met pahn kadehdehda me Siohwa iei Kaun pwung oh limpoak men, oh aramas lelepek kan pahn paiekihda dahme e ketin pilada.

⁸ Ma aramas akan soikala koasoandi en Sehdan oh sohte men uhtohrda sang sapwellimen Koht kaunda, ia uwen met pahn irehsang irail lokolok laud! Ahpw, sapwellimen Siohwa pilipil en mweidohng aramas akan en kaunda pein irail erein ahnsou mwotomwot kin mie kamwahupe kan. E kin kahrehiong irail kan me ahneki mohngiong pwung en wehwehki duwen erpit en peikiong Koht oh likih ih. Erein sounpar kid kei, aramas kin ahneki soangsoangen koperment kan ahpw sohte ehu me pweida mwahu. Ire mehlel wet kin kakehlaka sapwellimen Koht tohnkaudok kan arail kamehlele me sapwellimen Siohwa elen kaunda iei me keieu mwahu. Mehlel, Siohwa ketin mweidohng Sehdan en kaunda ni ahl suwed kin imwikihla kahpwal ong aramas akan, iangahki irail kan me kin kaudokiong Koht ni lelepek. Ahpw, Siohwa eh ketin mweidohng met en wiawi ahnsou mwotomwot pil wahdo kamwahu ong tohnkaudok lelepek pwukat.

 Uhwong Ehu me Kalinganahla Siohwa

9, 10. Ia duwen kaundahn Sehdan eh kin uhd kalinganahla Siohwa?

⁹ Siohwa eh ketin mweidohng aramas en mihla pahn kaweid en Sehdan oh pein wia arail kaunda sohte mwahn kin kihsang wahupen sapwellime elen kaunda. Poadopoad kin kadehdehda me dahme Seremaia koasoiahki aramas ar sohte kak kaunda pein irail kin uhdahn mehlel. (Wadek Seremaia 10:23.) Patehng met, en Sehdan uhwong kin kihong Siohwa ahnsou en kasalehda mwahu Sapwellime irair kaselel kan. Ia duwen?

¹⁰ Sapwellimen Siohwa irair unsek kan kin uhdahn sansalda ong kitail pwehki kitail kak kilang imwila suwed en kaundahn Sehdan. Ni ahl wet, e kin ketin linganla mwohn irail kan me kin poakohng ih. Ei, ele madamadau riau wet mwomwen uhpene, ahpw ni mehlel, en Sehdan kaunda kin kalinganahla Koht. E kin kasansalehda duwen ahl me keieu kaselel me Siohwa ketin doadoahngki pwehn kapwungala uhwong wet ong sapwellime pwung en kaunda. Pwehn karasahda ire mehlel wet, kitail tehk ekei sapwellimen Siohwa irair kan oh kilang ia duwen kaunda suwed en Sehdan eh kin kamwakid Siohwa en ketin kasalehda irair pwukat ni ahl kapw teikan.

11. Ia duwen sapwellimen Siohwa limpoak eh kin sansalda?

¹¹ Limpoak. Pwuhk Sarawi kin padahkihong kitail me “Koht iei limpoak.” (1 Sohn 4:8) Keieu, kepikipikdahn aramas kin wia kasalepen sapwellimen Koht limpoak. Atail wiawihda ni ahl kapwuriamwei oh inenen mwahu pil kin kadehdehda duwen sapwellimen Koht limpoak. Ni limpoak, Siohwa pil ketikihong aramas arail wasahn kousoan me audaudkihda soahng koaros re anahne pwehn nsenamwahu. (Sen. 1:29-31; 2:8, 9; Mel. 139:14-16) Ahpw ni ahnsou me aramas dipada, Siohwa ketin kasalehda sapwellime limpoak ni ahl kapw. Ia duwen? Wahnpoaron Sohn koasoia dahme Sises mahsanih: “Pwe iei uwen Koht eh ketin loalloale sampah, me e ketikihdohki Sapwellime Iehros, pwe mehmen me kin pwosonla ih en dehr salongala, a en ahneki mour soutuk.” (Sohn 3:16) Ia duwe, mie ehu soangen elen limpoak me mwahu sang Koht eh ketin poaronehdo sapwellime Iehros pwehn tomwkihla aramas dipan akan? (Sohn 15:13) Kasalepen limpoak wet kin wia mehn kahlemeng ehu ong aramas akan, kihong irail ahnsou pwehn alasang sapwellimen Koht limpoak en tounmetei nan arail mour en ehuehu rahn, duwehte me Sises kin ketin wia.​—Sohn 17:25, 26.

12. Ia duwen sapwellimen Siohwa manaman eh kin sansalda?

¹² Manaman. “Koht, Wasa Lapalahpie” kelehpw me sapwellimaniki manaman en kapikada mour. (Kaud. 11:17; Mel. 36:9) Ahnsou me aramas men kin ipwidi, e kin duwehte doaropwe ehu me sohte mesen nting loale. Ahpw ni ahnsou me e mehla, doaropwe wet kin audaudkihda en aramaso eh pilipil kan, wiewia kan, oh pil dahme e kin lelohng nan eh mour pwehn wiahla soangen aramas dahmen ih. Siohwa kin ketin tamataman oh nekidala ire pwukat. Ni ahnsou me konehng, Siohwa kak ketin kapwurehdo mouren aramaso iangahki eh irair kan me ih kelehpw ahneki. (Sohn 5:28, 29) Kahrehda, mehnda ma mehla kaidehn kupwuren Koht  ong aramas, met kin kihong Siohwa ahnsou mwahu en ketin kasalehda sapwellime manaman en kapwurehdo me melahr akan. Mehlel, Siohwa iei “Koht, Wasa Lapalahpie.”

13. Ia duwen meirong en Sises eh kin kasalehda sapwellimen Siohwa irair unsek en pwung oh pahrek?

¹³ Pwung oh Pahrek. Siohwa sohte kin ketin likamw oh pil sohte kin ketin mwekid sapwung. (Deud. 32:4; Taitus 1:2) Ahnsou koaros e kin ketin kolokolte irair me keieu mehlel oh pwung oh pahrek mehnda ma e pil wahdo kahpwal ong ih. (Rom 8:32) Ia uwen Siohwa kin kupwurtoutoukihla ni eh mahsanih sapwellime Ohlo mehla pohn tuhkehn kalokolok duwehte aramas lahlahwe men! Ahpw, pwehki eh ketin loalloale aramas soh unsek kan, Siohwa kin ketin mweidohng mwekid kamedek wet en wiawi pwehn kolokolte sapwellime koasoandi unsek en pwung oh pahrek. (Wadek Rom 5:18-21.) Sampah wet me diren sapwung oh sapahrek kin kihong Siohwa ahnsou mwahu en kasalehda me sapwellime irair en pwung oh pahrek iei me keieu kaselel.

14, 15. Ia duwen sapwellimen Siohwa irair en erpit oh kanengamah ara kin sansalda?

¹⁴ Erpit. Mwurinte Adam oh Ihp dipada, Siohwa ketin kasalehda ia duwen eh pahn ketin kapwungala suwed koaros me kohsang arail uhwongada ih. (Sen. 3:15) Pwehki Siohwa ketin mwekid mwadang, oh pil kin ekis ekis ketin kasalehda oaritik kan duwen kupwur wet ong sapwellime ladu kan, met kin kahrehda sapwellimen Siohwa erpit en uhdahn sansalda. (Rom 11:33) Sohte me kak irehdi sapwellimen Koht kehl en apwalihala ire kan ni ahl me pahn pweida. Nan sampah ehu me diren tiahk samin, mahwen, sohte toupahrek, sapeik, soh mahk, lipilipilki aramas, oh mwalaun, Siohwa sapwellimaniki ahnsou mwahu en kasalehiong sapwellime kapikipik kan duwen erpit mehlel. Tohnpadahk Seims koasoia: “A erpit me kin sang powe, mwohn mehkoaros me mwakelekel, me pil kansenamwahu, kapohl, oh kompoake, [“toupahrek, peik,” NW] me kin diren kalahngan oh kin kahrehda wiewia mwahu tohtohie; e sohte kin lipilipilki aramas, e sohte kin mwalaun.”​—Seims 3:17.

¹⁵ Kanengamah. Sapwellimen Siohwa irair en kanengamah sohte pahn nohn sansalda ma e sohte anahne ketin kanengamahiong soh unsek kan, dihp kan oh sapwung kan en aramas. Ni Siohwa eh kin kupwurki wia met erein sounpar kid kei kasalehda me e sapwellimanki irair kaselel wet ni unsek oh kitail uhdahn anahne kalahngankihong ih. Wahnpoaron Piter kasalehda ni pwung me kitail anahne ‘tehk mwahu sapwellimen Kaun-o kanengamah ong kitail ni eh ketikihong kitail ahnsou mwahu en ale komour.’​—2 Pit. 3:9, 15.

16. Dahme kahrehda Siohwa eh kin kupwurki mahkohng kitail kin kahrehiong kitail peren laud?

¹⁶ Kupwurki Kasalehda Mahk. Kitail koaros aramas dipan kei, oh pak tohto kitail kin sapwungala. (Seims 3:2; 1 Sohn 1:8, 9) Ia uwen atail anahne kalahnganki me Siohwa kin uhdahn kupwurki mahkohng kitail! (Ais. 55:7) Medewehla  ire mehlel wet: Pwehki kitail ipwidi nin duwen aramas soh unsek kei, kitail kin inenen peren ni ahnsou me Koht kin ketin mahkohng atail sapwung kan. (Mel. 51:5, 9, 17) Ni atail kin kehn sapwellimen Siohwa irair wet, e kin kakehlaka atail limpoak ong ih oh kangoange kitail en kahlemengih ih nan atail wiewia ong meteikan.​—Wadek Kolose 3:13.

Dahme Kahrehda Sampah Mihla nan Irair Suwed Ehu?

17, 18. Ia duwen ahn Sehdan elen kaunda eh sohte kin pweida?

¹⁷ Koasoandi en sampah pwon me Sehdan kin kakaun kin pwurepwurehng sansalda me e sohte kin pweida sangete mahs. Met uhdahn mehlel! Pwehki atail tepin pahpa oh nohno rongala kaweid en Sehdan, ira eri pilada kaundahn aramas a kaidehn sapwellimen Siohwa kaunda. Eri irail tapiada elen kaunda ehu me uhdahn sohte kak pweida. Medek oh lokolok me tohnsampah pwon kin lelohng iei kilelepen me kaundahn aramas uhdahn sohte kin pweida.

¹⁸ Elen kaundahn Sehdan kin kahrehiong aramas en roporop. Ahpw roporop sohte kak kalowehdi limpoak me iei poahsoanpen sapwellimen Siohwa elen kaunda. Elen kaundahn Sehdan sohte kin wahdo nsenamwahu, peren oh epwel mwahu. Sapwellimen Siohwa elen kaunda kin uhdahn pweida! Mie mehn kadehde nan atail ahnsou? Ei, kitail pahn kilang nan iren onop en mwuhr.

Dahme Kitail Sukuhlki Duwen Kaunda ni Atail Wadek . . .

• Rom 13:1, 2?

• Lepin Padahk 21:30?

• Seremaia 10:23?

• Kolose 3:13?

[Peidek en Onop]

[Kilel kan nan pali 25]

Kaundahn Sehdan sohte kin wia kamwahu ong aramas akan

[Credit Line]

U.S. Army photo

WHO photo by P. Almasy

[Kilel nan pali 26]

Sapwellimen Siohwa manaman kak kapwurehdo melahr akan

[Kilel nan pali 27]

Sapwellimen Siohwa irair en limpoak oh pwung oh pahrek kin sansalda ni meirong en sapwellime Ohl