“Ia Erein Ei Kin Patohwan Liklikweriong Komwi oh Peksawas?”

Jayne kin sengiseng oh nda: “I men en weirek en medek en sohla.” E ahneki soumwahu en kanser me doupesengier nan paliwere. Eh peneinei oh kompoakepah kan mentehno kihsang eh soumwahu oh eh weirek. Irail kapakapki Koht en ketin sewese ih. Koht pahn ketin karonge? E kin ketin nsenohkin irail?

KOHT mwahngih irair en aramas akan. Sapwellime mahsen iei Paipel, mahsanih: “Audepen lahng oh sampah koaros kin weiweirek.” (Rom 8:22) Koht mwahngih me mie aramas rar kei me duwehte Jayne me kin ahneki medek en war, pepehm oh madamadau rahn koaros. Koht mwahngih me aramas rar kei (800 million) kin meirla ni ar duhpek pwohng koaros oh pil me rar kei kin lelohng tiahk en lemei nan arail peneinei. E pil mwahngih pahpa oh nohno tohto me kin pil pwunodki mouren neirail seri kan ahnsou kohkohdo. Mie pak ke kin medewe ma Koht pahn ketin kamwahwihala kahpwal pwukat? Ma kitail kin men sewese kompoakepatail kan, Koht sou pahn pil kupwurki sewese aramas akan me e ketin kapikada?

Kaidehn kowe kelehpw me kin peidengki ma Koht sou pahn kak kamwahwihala kahpwal pwukat. Sounpar 2,600 samwalahro, ohl lelepek Apakuk pil ahneki soangen pepehmohte me irail me tohto kin ahneki rahnwet, oh e kalelapek rehn Koht: “Maing, KAUN, ia erein ei kin patohwan liklikweriong komwi oh peksawas, a komwi ahpw sohte ketin karonge oh doareikitasang nan at apwal laud? Dahme komw ketin mweidkihong ie I en patopatohwan soangen sapwung oh suwed pwukat? Ia duwen omwi kak ketin kanengamahiong mahmahsanih soangen wiewia suwed wet? Apwal laud kin kapiliepene, akamai oh pei kin wiewiawi wasa koaros.” (Apakuk 1:2, 3) Soukohp Apakuk pein kadehde duwen tiahk me uhdahn suwed oh kapwuriamwei nan eh ahnsou. Soangen wiewiahn lemei pwukat kin wia audepen nuhs en ehuehu rahn oh mepwukat kin wia mehkot kansensuwed oh kapwunod ong aramas me limpoak kan.

Ia duwe, Koht kin ketin mwamwahliki en Apakuk eh pepehm? Soh. E kin ketin karonge en Apakuk kalelapek kan oh kin kamweitala oh kangoange ih nan eh pwunod. Siohwa Koht kakehlakahda en Apakuk pwoson ni eh inoukihong me e pahn ketikihsang lokolok. Sapwellimen Koht mahsen en koapworopwor pil kin kak kakehlaka iuk duwehte me wiawihong Jayne oh eh peneinei. Iren mwuri kan pahn sapengla peidek pwukat: Ia duwen atail ese me Koht uhdahn ketin nsenohkin kitail? Dahme Koht pahn ketin wia pwehn kaimwisekala lokolok oh iahd met pahn wiawi?