Kahpwal Ehu nan Sampah Pwon, Kamwahu Ehu nan Sampah Pwon

LOKOLOK kin mi wasa koaros, oh me tohto kin song en sewese irail kan me mi nan lokolok. Karasepe, palien imwen wini kin doadoahk awa tohto pwehn sewese irail kan me ohla de soumwahu. Sounkakun kisiniei kan, pilismen kan, sounkou kosonned kan, oh irail kan me kin doadoahk nan ampilens oh irail kan me kin wia sawas ong wasa me kahpwal en melimel ape, kin nantihong en wia sawas pwehn pere meteikan sang lokolok. Soangen sawas pwukat kin kak sawas ongete emen, ahpw sohte emen de pwihn ehu me kak kauhdi lokolok nan sampah pwon. Ahpw, Koht ketin kak oh e pahn ketin kamwahwihala kahpwal nan sampah pwon.

Kamehlelpen mepwukat kin sansal nan kaimwiseklahn pwuhken Paipel: “E [Koht] pahn kin ketin limwihasang pilen masarail koaros. Mehla solahr pahn wiawi, solahr mwahiei, solahr nsensuwed, solahr medek. Soahng mering kan sohralahr.” (Kaudiahl 21:4) Tehk ia uwen tohtohn aramas me pahn paiehkihda inou wet. E kin oaralapihada duwen kupwuren Koht ni eh pahn kaimwisekala soangen lokolok koaros. E pahn ketin wia met ni eh pahn ketikihsang pohn sampah wet mahwen, duhpek, soumwahu oh kopwung sapwung, iangahki aramas suwed koaros. Sohte aramas kak wia met.

 Dahme Wehin Koht Pahn Ketin Wia

Koht pahn ketin kapwaiada sapwellime inou kan ni eh pahn ketin doadoahngki ih me keriaun manaman nanleng oh sampah me iei Sises Krais, me iasadahr. Ahnsowo pahn leledo ni en Sises pahn ketin kaunda nin duwen Nanmwarki pohnangin sampah pwon oh sohte me pahn uhwong ih. Aramas solahr pahn mi pahn kaundahn nanmwarki kan, president kan de kaun en pelien politik kan. Irail pahn uhd mi pahn kaundahn Nanmwarki tehmen oh wehi ehute me iei Wehin Koht.

Wehi wet pahn kauwehla koperment en aramas koaros. Paipel kohpada mahsie: “Eri, ni ahnsou me nanmwarki ko pahn kakaun wasa, Koht en nanleng pahn ketin kauwada mwehi ehu me sohte imwi. Mwehi wet sohte pahn kak lohdi, ahpw e pahn kauwehla mwehi teikan koaros, oh pahn mihmi kohkohlahte.” (Daniel 2:44) Aramas koaros nin sampah pahn miniminpene pahn kaunda pwung ehu, iei kaundahn sapwellimen Koht Wehi.

Pak tohto Sises kin ketin koasoia duwen Wehio ni eh ketiket sampah nin duwen aramas emen. E mahsanih duwen met nan sapwellime loulou, oh kaweidih sapwellime tohnpadahk kan en kapakap nin duwen met: “Mweimwi en pweida wasa koaros, kupwuromwi en kin wiawi nin sampah duwen eh kin wiawi nanleng.” (Madiu 6:10) Tehk me Sises ketin kasalehda me Wehio kin pid kupwuren Koht en pweida nin sampah, oh iei kupwuren Koht en ketikihsang lokolok nin sampah pwon.

Sapwellimen Koht koperment pwung wet pahn wahdo kapai tohto me sohte koperment en aramas kak wia. Tamanda me Siohwa ketikihda sapwellime Ohlo nin duwen tomw ehu pwe aramas tohto en kak ale mour soutuk. Pahn kaunda mwahu en Wehio, aramas pahn unsekla. Ia imwin met? Siohwa pahn “ketin kamwomwala mehla kohkohlahte! E pahn ketikihsang pilenmesen aramas koaros.”—Aiseia 25:8.

Ekei ele pahn idek: ‘Dahme Koht sou wiahki mehkot sangete nin tapio? Dahme e ketin awiawih?’ Siohwa kak ketin wia mehkot sangete nin tapio pwehn kihsang de pere sang lokolok koaros. Ahpw e ketin mweidohng mepwukat en wiawi kaidehn pwehki roporop ahpw ong kamwahu poatopoat ong sapwellime seri kan nin sampah. Pahpa oh nohno me limpoak kan pahn mweidohng neirail seri kan en lelohng kahpwal ma ira ese me met pahn wia kamwahupen neira serio. Iei pil kahrepen Siohwa eh ketin mweidohng aramas en lelohng lokolok ahnsoukis, oh Paipel kasalehdahr kahrepe pwukat. Mepwukat kin pid atail pwung en pilipil, dihp, oh pil ire ehu me pid sapwellimen Siohwa pwuhng en kaunda. Paipel pil kasalehda me erein ahnsoukis, emen ngehn suwed mweimweiongehr en kaunda sampah. *

Mendahki kitail sohte kak kawehwehdi kahrepe kan koaros nan doaropwe wet, mie ire mehlel riau me kak kihong kitail koapworopwor oh kangoang. Ire keieu: Kapai me Siohwa pahn ketin kapaiahkin kitail pahn inenen laud sang mehlel uwen lokolok me kitail kin lelohng. Me laud sang met, Koht mahsanih: “Mehkoaros me pweidahr nan ahnsou samwalahr ako pahn manokonokla douluhl.” (Aiseia 65:17) Koht pahn ketikihsang nsensuwed oh lokolok me e ketin mweidohng en wiawi ongete ahnsoukis.

Ire keriau: Sohte mehkot kak wekidala ahnsou me Koht pahn ketikihsang lokolok. Tamanda ahnsou me soukohp Apakuk idek ia uwen werei Siohwa pahn ketin mweidohng tiahk lemei oh apwal en wiawi. Siohwa mahsanih: “E saikinte lel ahnsou me e pahn wiawi. Ahpw e pahn mwadang leledo, . . . e sohte pahn pwand.” (Apakuk 2:3) Kitail pahn kilang nan iren mwurin met, duwen ahnsou me kileldier eh kerendohr.

[Nting tikitik me mi pah]

 [Koakon nan pali 7]

Iren Paipel kan me Kasalehda Ahnsou Mwahu kan ni Ahnsou Kohkohdo

SOLAHR MAHWEN:

“Kumwail kohdo, oh kilang dahme KAUN-O ketin wiahda. Kumwail kilang soahng kapwuriamwei kan me e ketin wiahda nan sampah. E kin ketin katokehdi mahwen wasa koaros nin sampah.”​—Melkahka 46:8, 9.

KOMPOAKEPATAIL KAN PAHN IASADA:

“Aramas koaros, me mwahu oh suwed, pahn iasada sang mehla.”​—Wiewia 24:15.

REKEN MWENGE:

“Reken wahn pilawa en kin wiewiawihte nan wehiet; wahnsahpw en kin kipehdi dohl akan.”​—Melkahka 72:16.

SOLAHR PAHN MIE SOUMWAHU:

“Sohte emen me kin kousoan nan sahpwo pahn kaulimkihla eh soumwahu.”​—Aiseia 33:24.

ARAMAS SUWED PAHN SOHRALA:

“Ahpw Koht pahn ketin koahkoahsang aramas suwed kan nan sahpwo oh usadahsang me dipan akan rasehng dihpw eh kin usuhsdahsang nan pwehl.”​—Lepin Padahk 2:22.

PWUNG PAHN KIPEHDI WASA KOAROS:

“Ahnsou ehu nanmwarki men [Sises Krais] pahn mie me inenen inen oh pwung, oh sapwellime kaunen wehi kan pahn kin kakaun ni pwungen kosonned.”​—Aiseia 32:1.

[Kilel kan nan pali 7]

Wehin Koht pahn kamwahwihala soangen lokolok koaros me kitail lelohngehr