Koht Uhdahn Ketin Nsenohkin Kitail—Ia Duwen Atail Ese

PEIDEK wet wereilahr ahpw e kesempwal oh aramas tohto me kin medemedewe erein sounpar kid kei: Ma iei Koht kin ketin poakohng kitail, dahme kahrehda lokolok inenen laudiki? Ele ke pahn pwungki me ma ke poakohng aramas emen, ke sohte pahn men aramaso en lokolok, oh ma aramaso kin lelohng nan kahpwal ke pahn uhdahn song en sewese ih. Me tohto kin pehm me Koht sohte ketin nsenohkin kitail pwehki lokolok eh inenen laud nan sampah. Ihme kahrehda kesempwal kitail en tehk mahs mehn kadehde kan me kasalehda me Koht uhdahn ketin poakohng oh nsenohkin kitail.

Kapikipikda kan Kasalehda Sapwellimen Koht Limpoak

Siohwa Koht iei “Sounwiepen lahng, sampah, oh sehd, oh audeparail kan koaros!” (Wiewia 4:24) Ni atail kin medemedewe sapwellimen Siohwa kapikipikda kan, kitail uhdahn pahn diar me e ketin nsenohkin kitail. Karasepe, medewe duwen soahng kan me kin kahrehiong uhk en peren oh nsenamwahu. Ke mwahuki mwenge me iou? Siohwa kakete ketin wiahda soangen mwenge ehute pwe kitail en kak mourki. Ahpw, e ketin kapikada soangsoangen mwenge kan me kitail kin perenki oh pil iouki. Siohwa pil ketin kapwatehkihda sampah soangsoangen tuhke kaselel kan, wahn rohs kan, oh pil mwomwen sahpw me duwehte patapat akan, nahna kan oh pil wahu kan.

Pil tehk mwomwen atail wiawihda. Atail kin kak kaperenih meteikan, linganki koul kan, oh perenki soahng kan me lingan sohte uhdahn anahn ong mour ahpw Koht ketikihong kitail pwehn kalaudehla atail nsenamwahuki mour. Pil medewe duwen nanpwungen kowe oh meteikan. Ihs me sohte kin perenki kompoakepah mwahu kan de emen me ke uhdahn poakohng eh kin pwoaleiukedi? Atail kin kak kasalehda limpoak wia kisakis ehu sang rehn Koht emen me limpoak. Pwehki Koht me ketikihong aramas akan ren kak kasalehda limpoak, met kasalehda me Koht pil sapwellimanki irair wet.

 Paipel Kin Kamehlelehiong Kitail Sapwellimen Koht Limpoak

Paipel padahkihong kitail me Koht iei limpoak. (1 Sohn 4:8) Sapwellime limpoak sohte kin sansalda sangete kapikipikda kan ahpw e pil kin sansalda nan sapwellime Mahsen iei Paipel. Karasepe, Paipel kin ketikihda kaweid kan me kin mwahuong atail roson en paliwar, e kin kangoange kitail en wia soahng koaros ni ahl me konehng, oh pil kin kalik kitail sang kapehden mwenge oh kamamsakau.—1 Korint 6:9, 10.

Paipel pil kin ketikihda kaweid erpit kan duwen atail pahn kin ehuiong meteikan. E kin pil kangoange kitail en kin limpoakpene oh kasalehda wahu oh kadek ong meteikan. (Madiu 7:12) E pil kin uhwong soangen wiewia oh tiahk kan me kin kahrehda lokolok me duwehte noahrok, lipahned, peirin, kamwahl, oh kamaramas. Ma aramas koaros pahn kapwaiada kaweid mwahu pwukat me kin dierek nan iren Paipel kan, lokolok uhdahn pahn tikitikla nan sampah pwon.

Kasalepen sapwellimen Koht limpoak me keieu laud iei ni eh ketikihda sapwellime Ohl Sises pwehn tomwki aramas koaros. Sohn 3:16 mahsanih: “Pwe iei uwen Koht eh ketin loalloale sampah, me e ketikihdohki Sapwellime Iehros, pwe mehmen me kin pwosonla ih en dehr salongala, a en ahneki mour soutuk.” Siohwa pil ketin koasoanehdier en kauhdi mehla oh soangen lokolok koaros kohkohlahte.—1 Sohn 3:8.

E inenen sansal me mie mehn kadehde tohto me kasalehda me Siohwa ketin poakohng kitail. Eri e pwung en nda me Koht sohte kin ketin kupwurki atail kin lokolok. E pahn ketin kaimwisekala lokolok. Kitail sohte anahne pwunodki ire wet pwehki Paipel ketin mahsanihong kitail ni sansal ia duwen Koht pahn ketikihsang lokolok.

[Kilel kan nan pali 4]

Atail kin kak kasalehda limpoak wia kisakis ehu sang rehn Koht emen me limpoak